40
40-küy •••• Bexarǝt — Dawutning ǝwladi bolƣan Ⱪutⱪuzƣuqi-Mǝsiⱨ, Dawut arⱪiliⱪ kelidu
1 Dawut yazƣan küy: —
 
Pǝrwǝrdigarƣa tǝlmürüp, küttüm, küttüm;
U manga egilip pǝryadimni anglidi.
2 U meni ⱨalakǝt orikidin,
Xundaⱪla patⱪaⱪ laydin tartiwaldi,
Putlirimni uyultax üstigǝ turƣuzup,
Ⱪǝdǝmlirimni mustǝⱨkǝm ⱪildi. ◼«ⱨalakǝt oriki» — ibraniy tilida: «xawⱪunlaxlarning oriki».
3 U aƣzimƣa yengi nahxa-munajatni,
Yǝni Hudayimizni mǝdⱨiyilǝxlǝrni saldi;
Nurƣun hǝlⱪ buni kɵrüp, ⱪorⱪidu,
Ⱨǝm Pǝrwǝrdigarƣa tayinidu.
4 Tǝkǝbburlardin yardǝm izdimǝydiƣan,
Yalƣanqiliⱪⱪa ezip kǝtmǝydiƣan,
Bǝlki Pǝrwǝrdigarni ɵz tayanqisi ⱪilƣan kixi bǝhtliktur!
5 I Pǝrwǝrdigar Hudayim,
Sening biz üqün ⱪilƣan karamǝtliring wǝ oy-niyǝtliringni barƣanseri kɵpǝytip, san-sanaⱪsiz ⱪilƣansǝn,
Kimmu ularni bir-birlǝp ⱨesablap Ɵzünggǝ rǝⱨmǝt ⱪayturup bolalisun!
Ularni sɵzlǝp baxtin-ahir bayan ⱪilay desǝm,
Ularni sanap tügitix mumkin ǝmǝs. ◼«Kimmu ularni bir-birlǝp ⱨesablap Ɵzünggǝ rǝⱨmǝt ⱪayturup bolalisun!» — baxⱪa birhil tǝrjimisi: «Kimmu Sanga tǝngdax bolup seni tosalisun?!».
6 Nǝ ⱪurbanliⱪ, nǝ axliⱪ ⱨǝdiyǝliri Sening tǝlǝp-arzuyung ǝmǝs,
Biraⱪ Sǝn manga sǝzgür ⱪulaⱪlarni ata ⱪilding;
Nǝ kɵydürmǝ ⱪurbanliⱪ, nǝ gunaⱨ ⱪurbanliⱪini tǝlǝp ⱪilmiding; ◼«...Sǝn manga sǝzgür ⱪulaⱪlarni ata ⱪilding» — baxⱪa birhil tǝrjimisi boluxi mumkin: «sǝn mening ⱪulaⱪlirimni sanjiding». Musa pǝyƣǝmbǝr arⱪiliⱪ qüxürülgǝn muⱪǝddǝs ⱪanun boyiqǝ, bir ⱪulning ɵz hojayiniƣa mǝnggü hizmǝttǝ bolƣusi bolsa, buni bǝlgilǝx üqün hojayin uning ⱪuliⱪiƣa bigiz sanjiydu («Mis.» 21-babni kɵrüng). Bu hil tǝrjimǝ toƣra bolsa, bu Mǝsiⱨning Hudaƣa mǝnggülük sadiⱪliⱪini bildüridiƣan sɵzdur. «Nǝ ⱪurbanliⱪ, nǝ axliⱪ ⱨǝdiyǝliri... nǝ kɵydürmǝ ⱪurbanliⱪ, nǝ gunaⱨ ⱪurbanliⱪini tǝlǝp ⱪilmiding» — «Law.» 1-7-babta tǝlǝp ⱪilinƣan bǝx hil asasiy ⱪurbanliⱪlarning ⱨǝmmisi muxu 6-ayǝttǝ tilƣa elinidu.  ◘Law. 2:1; 3:1; 4:13; Ibr. 10:5-12
7 Xunga jawab bǝrdimki —
«Mana mǝn kǝldim!» — dedim.
Oram yazma dǝsturda mǝn toƣruluⱪ pütülgǝn: — ◼«Oram yazma dǝsturda mǝn toƣruluⱪ pütülgǝn» — «oram yazma dǝstur» Musa pǝyƣǝmbǝrgǝ qüxürülgǝn muⱪǝddǝs ⱪanunni kɵrsitidu.
8 «Hudayim, Sening kɵnglüngdiki iradǝng mening hursǝnlikimdur;
Sening Tǝwrat ⱪanunung ⱪǝlbimgǝ pütüklüktur». ◘Zǝb. 37:31; Yǝx. 51:7
9 Büyük jamaǝt arisida turup mǝn ⱨǝⱪⱪaniyliⱪni jakarlidim;
Mana bularni ɵzümdǝ ⱪilqǝ elip ⱪalƣum yoⱪtur,
I Pǝrwǝrdigar, Ɵzüng bilisǝn. ◘Zǝb. 35:18; 111:1
10 Ⱨǝⱪⱪaniyliⱪingni ⱪǝlbimdǝ yoxurup yürmidim;
Wapadarliⱪingni wǝ nijatliⱪingni jakarlidim;
Ɵzgǝrmǝs muⱨǝbbiting wǝ ⱨǝⱪiⱪitingni büyük jamaǝtkǝ ⱨeq yoxurmastin bayan ⱪildim.
11 I Pǝrwǝrdigar, meⱨribanliⱪliringni mǝndin ayimiƣaysǝn;
Ɵzgǝrmǝs muⱨǝbbiting wǝ ⱨǝⱪiⱪiting ⱨǝrdaim meni saⱪliƣay!
12 Qünki sansiz külpǝtlǝr meni oriwaldi;
Ⱪǝbiⱨliklirim meni besiwelip, kɵrǝlmǝydiƣan boldum;
Ular beximdiki qeqimdin kɵp,
Jasaritim tügixip kǝtti.
13 Meni ⱪutⱪuzuxni toƣra tapⱪaysǝn, i Pǝrwǝrdigar!
I Pǝrwǝrdigar, tez kelip, manga yardǝm ⱪilƣaysǝn!
14 Mening ⱨayatimƣa qang salmaⱪqi bolƣanlar biraⱪla yǝrgǝ ⱪaritilip rǝswa ⱪilinsun;
Mening ziyinimdin hursǝn bolƣanlar kǝynigǝ yandurulup xǝrmǝndǝ bolƣay. ◘Zǝb. 35:4,26; 70:2; 71:13
15 Meni: — «Waⱨ! Waⱨ!» dǝp mǝshirǝ ⱪilƣanlar ɵz xǝrmǝndilikidin alaⱪzadǝ bolup kǝtsun!
16 Biraⱪ Seni izdigüqilǝrning ⱨǝmmisi Sǝndǝ xadlinip huxal bolƣay!
Nijatliⱪingni sɵygǝnlǝr ⱨǝmixǝ: «Pǝrwǝrdigar uluƣlansun» deyixkǝy!
17 Mǝn ezilgǝn ⱨǝm yoⱪsul bolsammu,
Biraⱪ Rǝb yǝnila meni yad etidu;
Sǝn mening Yardǝmqim, mening azad ⱪilƣuqim;
I Hudayim, keqikmǝy kǝlgǝysǝn!
 
 

◼40:2 «ⱨalakǝt oriki» — ibraniy tilida: «xawⱪunlaxlarning oriki».

◼40:5 «Kimmu ularni bir-birlǝp ⱨesablap Ɵzünggǝ rǝⱨmǝt ⱪayturup bolalisun!» — baxⱪa birhil tǝrjimisi: «Kimmu Sanga tǝngdax bolup seni tosalisun?!».

◼40:6 «...Sǝn manga sǝzgür ⱪulaⱪlarni ata ⱪilding» — baxⱪa birhil tǝrjimisi boluxi mumkin: «sǝn mening ⱪulaⱪlirimni sanjiding». Musa pǝyƣǝmbǝr arⱪiliⱪ qüxürülgǝn muⱪǝddǝs ⱪanun boyiqǝ, bir ⱪulning ɵz hojayiniƣa mǝnggü hizmǝttǝ bolƣusi bolsa, buni bǝlgilǝx üqün hojayin uning ⱪuliⱪiƣa bigiz sanjiydu («Mis.» 21-babni kɵrüng). Bu hil tǝrjimǝ toƣra bolsa, bu Mǝsiⱨning Hudaƣa mǝnggülük sadiⱪliⱪini bildüridiƣan sɵzdur. «Nǝ ⱪurbanliⱪ, nǝ axliⱪ ⱨǝdiyǝliri... nǝ kɵydürmǝ ⱪurbanliⱪ, nǝ gunaⱨ ⱪurbanliⱪini tǝlǝp ⱪilmiding» — «Law.» 1-7-babta tǝlǝp ⱪilinƣan bǝx hil asasiy ⱪurbanliⱪlarning ⱨǝmmisi muxu 6-ayǝttǝ tilƣa elinidu.

◘40:6 Law. 2:1; 3:1; 4:13; Ibr. 10:5-12

◼40:7 «Oram yazma dǝsturda mǝn toƣruluⱪ pütülgǝn» — «oram yazma dǝstur» Musa pǝyƣǝmbǝrgǝ qüxürülgǝn muⱪǝddǝs ⱪanunni kɵrsitidu.

◘40:8 Zǝb. 37:31; Yǝx. 51:7

◘40:9 Zǝb. 35:18; 111:1

◘40:14 Zǝb. 35:4,26; 70:2; 71:13

© 2010 Mukeddes Kalam - Uyghur Bible Translation Committee