42
Ikkinqi Bɵlüm •••• 42-küy •••• Hudaƣa tǝxna bolƣan musapirning duasi
1 Nǝƣmiqilǝrning bexiƣa tapxurulup oⱪulsun dǝp, Koraⱨning oƣulliri üqün yezilƣan «Masⱪil»: —
Keyik eriⱪlardiki suƣa tǝxna bolƣandǝk,
2 Mening jenim Hudaƣa, ⱨayat Tǝngrigǝ intizardur;
Aⱨ, mǝn ⱪaqanmu Hudaning ⱨuzurida kɵrünüxkǝ müyǝssǝr bolimǝn?■Zǝb. 63:1-2
3 Mening keqǝ-kündüz yeginim kɵz yaxlirim bolup kǝlgǝn;
Hǝⱪlǝr kün boyi mǝndin: «Hudaying ⱪǝyǝrdǝ?» dǝp soraydu.■Zǝb. 80:5
4 Ɵtkǝn künlǝrni ǝslǝp,
Jenimning dǝrdlirini tɵküwatimǝn
(Mǝn kɵpqilik bilǝn ketiwetip,
Hudaning ɵyigǝ tǝntǝnǝ ⱪilip mengip,
Huxalliⱪta Ⱨǝmdusana oⱪup, nahxa eytip,
Ⱨeytni tǝbrikligǝn top-top ⱪoxundǝk, jamaǝt bilǝn billǝ barattim!).
5 — I jenim, Sǝn tenimdǝ nemixⱪa bundaⱪ ⱪayƣurisǝn?
Nemixⱪa iqimdǝ bundaⱪ mǝyüslinip kǝtting?
Hudaƣa ümid baƣla;
Qünki Uning jamalidin qiⱪⱪan nijatliⱪtin,
Mǝn Uni yǝnila uluƣlaymǝn, — Mening Hudayimni!■Zǝb. 43:5
6 Jenim iqimdǝ mǝyüslinip kǝtti;
Xunga mǝn Seni seƣinimǝn;
Ⱨǝtta musapirliⱪta Iordan dǝryasi boyidiki wadilarda,
Ⱨǝrmon taƣlirida, Mizar teƣidimu Seni seƣinimǝn.
7 Sening xarⱪiratmiliringning awazliriƣa,
Qongⱪur ⱨang bilǝn qongⱪur ⱨang maslixip ⱨɵrkirimǝktǝ.
Sening ⱨǝmmǝ dolⱪunliring ⱨǝm ⱪaynam-taxⱪinliring meni ƣǝrⱪ ⱪildi.
8 Kündüzi Pǝrwǝrdigar ɵzgǝrmǝs muⱨǝbbitini manga buyruydu,
Keqiliri Uning nahxisi,
Wǝ ⱨǝm ⱨayatim bolƣan Tǝngrigǝ ⱪilƣan dua manga ⱨǝmraⱨ bolidu.
9 Mǝn Ⱪoram Texim bolƣan Hudaƣa: —
«Meni nemixⱪa untup ⱪalding?
Mǝn nemixⱪa düxmǝnning zulumiƣa uqrap,
Ⱨǝmixǝ azab qekip yürüwatimǝn?» — dǝymǝn.■Zǝb. 35:11-17; 38:6; 43:2
10 Sɵngǝklirimni ǝzgǝndǝk rǝⱪiblirim meni mǝshirǝ ⱪilip ǝyiblǝydu;
Ular kün boyi mǝndin: «Hudaying ⱪǝyǝrdǝ?» — dǝp sorimaⱪta.
11 I jenim, tenimdǝ nemixⱪa bundaⱪ ⱪayƣurisǝn?
Nemixⱪa iqimdǝ bundaⱪ mǝyüslinip kǝtting?
Hudaƣa ümid baƣla;
Qünki mǝn Uni yǝnila mǝdⱨiyilǝymǝn,
Yǝni qirayimƣa salamǝtlik, nijatliⱪ ata ⱪilƣuqi Hudayimni mǝdⱨiyilǝymǝn!
U mening Hudayimdur!
□42:1 «Koraⱨning oƣulliri üqün yezilƣan «Masⱪil»» — «Koraⱨ» Musa wǝ Ⱨarun pǝyƣǝmbǝrgǝ ⱪarxi isyan kɵtürgǝn kixi. Biraⱪ kɵrünüp turiduki, uning ǝwladliri Hudaning yolida mangatti. Ular bǝlkim «kaⱨin» (ⱪurbanliⱪ ⱪilƣuqi) bolup, muⱪǝddǝs ibadǝthanida ibadǝt hizmitidǝ Zǝburdiki yeⱪimliⱪ mǝdⱨiyǝ nahxilirini eytix bilǝn xuƣullanƣan. Bu küydin ⱪariƣanda, yazƣuqi Israilning ximaliy padixaⱨliⱪidiki Liwan degǝn hilwǝt taƣliⱪ rayoniƣa sürgün ⱪilinƣan. «Masⱪil» — «Masⱪil»ning mǝnisi bizgǝ namǝlum; bǝzi alimlar uni «tǝrbiyilik» degǝnni bildüridu, dǝp ⱪaraydu; yǝni bǝzilǝr uni «maⱨirliⱪ bilǝn eytilsun» degǝnni bildüridu, dǝp ⱪaraydu.
■42:9 Zǝb. 35:11-17; 38:6; 43:2