3
E Nikodemus
* Ion 7:50; 19:39E Nikodemus ia a Pariseo, a mata­kari ne huriki a Iuda. I luve ne Isu na rodo, i ta maea, “Mari ni tovo, mi lohoka vona a Vure i rudu valai ioe, go tovo e huriki. A bakovi ra Vure i laho turana kunana, bara i rata a maka nivakasiri, i manga a hini ioe o rata.”
* Mat 18:3; 1Pe 1:23E Isu i koli, i ta maea, “A taki muholi ioe, a viri i uka ma ni poda tabu, i uka ma ge dili na harikianga na Vure.”
Lakea e Nikodemus i nanea, “Ni gi poda navai tabu a bakovi i gare pali? Ge dili navai tabu na tamudine kinana ni gi poda tabu?”
* Ese 36:25-27E Isu i koli, i ta maea, “A taki muholi ioe, i uka tara viri ge dili tavula na harikianga na Vure. A viri i ngaru ni dili na harikianga na Vure bara ni poda taro na naru, na Hanu Kiripiripi. * Ion 1:13E kinane hita i poda hita, si tahoka a nimahuri. Pali a Hanuna Vure kunana i habi a nimahuri na hanune hita. Naha ni turutu vona a ngava a takia, ‘E huriki ri ngaru ni dili na harikianga na Vure, bara ni poda tabu.’ A vilu i pori viliha na ningaru vona. Si longoa a nangina, pali i uka ma si lohoka vona i ngalu valai vai o ge ngalu lokovai. E huriki a bakovi a ngatavine a Hanuna Vure i habi a nimahuri karaba ne ria, ri mavonga kunana. Si matakilaka vona a Hanuna Vure i habi a nimahuri karaba ne ria, pali i uka ma si lohoka vona i rata navia.”
E Nikodemus i nanea, i ta maea, “I navai ge mavonga?”
10 E Isu i koli, i ta maea, “Ioe a mari ni tovo ne Israel, pali i uka ma o longo­kilala a ngava a taki? 11 Iau a ta muholi, mi ta vona a maki mi lohoka vona, mi vakalongo vona a maki mi matai, pali i uka ma mu longo mai a ngava mi taki mua vona. 12 A taki mua na maka maki na malala, pali i uka ma mu luhoi tora. Pali mu gu luhoi navai a ngava na maki na hunu ga taki mua vona? 13 I uka tara viri ge lakea ma na hunu, a Tuna Bakovi kunana a viri i valai na hunu. 14  * Gi 21:9; Ion 8:28; 12:32-34Hosi na robo i ngeki, e Moses i vakatavorea na kai a mata ni rata na aen, pali i mavonga kunana a Tuna Bakovi bara ni vakatavore na kai. 15  * Ion 20:31Lakea e rei a viri i luhoi tora ia bara i bole a nimahuri vakaroro.
16  * Ion 3:36; 10:28; Rom 5:8; 8:32; 1Ion 4:9-10“I mavonga a vuhuna a Vure i ngaru hateka e huriki na malala, lakea i rudua e Tuna a bakovi a madiva ge mate, lakea e rei a viri i luhoi tora ia i uka ma ge velu, bara i bole a nimahuri vakaroro.
17  * Luk 19:10“A Vure i rudua e Tuna a bakovi i valai na malala, i uka ma ge pelekado e huriki. I rudu vilia ge korimule e huriki na limana. 18  * Ion 5:24E huriki ri luhoi tora ia, a Vure i uka ngava ne ria. Pali e huriki i uka ma ri luhoi tora ia, a Vure i tahoka a ngava ne ria, a vuhuna i uka ma ri luhoi torea a Tuna Vure a madiva. 19  * Ion 1:5,9; 8:12A Vure i pelekado e huriki maea: A nipara i bele pali na malala, pali e huriki a bakovi a ngatavine ri ngaru hatekea a uvo, ri marikoi a nipara, a vuhuna a narone ria i hale. 20 E huriki ri rata a naro hale ri marikoi a nipara, i uka ma ri gi valai na hini palala, a vuhuna ri mangenge, ma ge bele kavakava a narone ria. 21 Pali e huriki ri muri mai a ngava muholi, ri valai mai a nipara, ni gi matakilaka vona, a maki ri rata, ri rata a vuhuna ri rihi a Vure.”
E Ioanes i Vakalongo e Huriki ne Isu
22  * Ion 4:1-2Muri e Isu i lakea na tabeke i ngeki ne Iudea turane huriki a murimuri vona, i made turane ria vonga, i vahilolo e huriki. 23 E Ioanes tara i vahilolo e huriki o Aenon, tabukoi na tanga e Salim, a vuhuna i tahoka a naru a hini ngi, lakea e huriki ri valai vakaroro vonga ni gi vahilolo. 24 Ra hini nga i muga ne Ioanes ni ru dili na bavi. 25 Na tahuna iea e huriki a murimuri ne Ioanes ri vahehe turana Iuda tara, na vinara na nivahilolo na viri, ge malamala na matana Vure. 26 Ri lakea ne Ioanes ri takia ri ta maea, “Mari ni tovo, ra bakovi i turamu rira na gagana naru e Iordan, ra viri o vakalongo e huriki vona. Ngane i vahilolo e huriki, pali ngane e huriki lobo ri lokovonga vona.”
27 Lakea e Ioanes i koli, i ta maea, “A bakovi bara i bole kunana a maki a Vure i habi vona. 28  * Mat 11:10; Ion 1:20Mu longo pali na tuline mua na tahuna a ta maea, ‘Iau i uka ma iau e Kristo. Pali a Vure i rudu iau ga muga valai.’ 29 A bakovi tara ge parangi a ngatavine, a ngatavine iea ne vona kunana. A turana bakovi iea bara i davea, i talangakia. Na tahuna i longoa, bara i vivi. Iau ngane, a vivi mavonga liu. 30 A rana ngane bara i rike. Pali a ragu ngane, bara i makali puru.
A Viri i Valai na Hunu
31  * Ion 8:23“A viri i valai meli i dagi hateka ne huriki lobo. Pali a viri na malala, a viri na malala kunana, i ta manga a viri na malala kunana. A viri i valai na hunu i dagi hateka ne huriki lobo. 32  * Ion 3:11I vakalongo a maka maki i matai, a maki i longo, pali i uka tara viri ge longo mai a ngavana. 33 Pali e rei a viri i longo mai a ngavana, i vakasiri manga a Vure i ta muholi. 34 A viri a Vure i rudua i valai i vakalongo e huriki na nitana Vure, a vuhuna a Vure i habi vona a Hanuna, i uka harena. 35  * Mat 11:27; Ion 5:20E Tamana i ngaru hatekea na hatena e Tuna, lakea i ru a maki lobo na limana. 36  * Ion 3:16-18; 1Ion 5:12E huriki ri luhoi torea e Tuna bara ri bole a nimahuri vakaroro. Pali e huriki ri marikoi e Tuna, i uka ma ri gi bole a nimahuri, a vuhuna a rongova na Vure i tabuli ne ria.”

*3:1: Ion 7:50; 19:39

*3:3: Mat 18:3; 1Pe 1:23

*3:5: Ese 36:25-27

*3:6: Ion 1:13

*3:14: Gi 21:9; Ion 8:28; 12:32-34

*3:15: Ion 20:31

*3:16: Ion 3:36; 10:28; Rom 5:8; 8:32; 1Ion 4:9-10

*3:17: Luk 19:10

*3:18: Ion 5:24

*3:19: Ion 1:5,9; 8:12

*3:22: Ion 4:1-2

*3:28: Mat 11:10; Ion 1:20

*3:31: Ion 8:23

*3:32: Ion 3:11

*3:35: Mat 11:27; Ion 5:20

*3:36: Ion 3:16-18; 1Ion 5:12