13
E Isu i Vahilolo a Vahane Huriki a Murimuri
Kuduvi a Habu na Nipagepolo ge vakatubu. E Isu i lohoka vona a parava i valai pali ge pe a malala, ge hamule sike ne Tamana. I ngaru hateka e huriki a viri vona ri made na malala, ngane ta ge vakasiri muholi ria i ngaru hateka ria.
* Luk 22:3; Ion 13:27Na malunga ngane ri kakani. E Satan i habi pali a niluhoi ne Iudas Iskariot, e tune Simon, ge habi e Isu na limane huriki a pile. * Ion 3:35; 16:28E Isu i lohoka vona e Tamana i ru a maki lobo na limana. I lohoka vona ia i valai na Vure, pali ngane ta ge hamule lakea tabu na Vure. Lakea i pesi rike, i kali talea a varakia vona, i bolea a lavalava na nihilolo, i rea halui a kipona. Muri i guru puru na tavila a naru, i vakatubu ni vahilolo a vahane huriki a murimuri vona. Muri i ravu ria na lavalava i rea vona.
Na tahuna e Isu ta ge vahilolo a vahane Simon Petrus, lakea e Petrus i nanea, “Bakovi Dagi, go vahilolo a vahagu?”
E Isu i koli, i ta maea, “I uka ma o lohoka vona a maki a ratea. Muri bara o lohoka vona.”
Pali e Petrus i hehe, i ta maea, “Naha ni vahilolo a vahagu.”
Pali e Isu i koli, i ta maea, “Iau i uka ma ga vahilolo a vahamu, i uka ma go made turagu.”
Lakea e Simon Petrus i koli, “Pali o Bakovi Dagi, i uka ma ga a vahagu kunana, a limagu, a gigu ranga o vahilolo.”
10  * Ion 6:64,70-71; 15:3Lakea e Isu i koli, i ta maea, “A bakovi i hilolo pali i uka ma ge hilolo tabu. Bara ni vahilolo kunana a vahana, a vuhuna a kakaina lobo i matapado pali. Mua mu matapado, pali i uka ma i mua lobo.” 11 E Isu i ta maea, a vuhuna i lohoka vona a viri bara i habi ia na limane huriki a bakovi hale, ra i mavonga i taki i uka ma e huriki lobo ri matapado.
12 Na tahuna i vahilolo lobo a vahane ria, i rodo mulea a varakia vona, i hamule mai a murina. Lakea e Isu i nana ria, i ta maea, “A naro a ratea ne mua, mu matakilalea, o i uka? 13 I kamumu mu gale iau ‘E Bakovi Dagi’, ‘A mari ni tovo’ a vuhuna i muholi a ngava ngi. 14  * Mat 20:28; Luk 22:27Iau a Bakovi Dagi ne mua, a mari ni tovo ne mua, a vahilolo pali a vahane mua. Mua ranga, ngane a ngaru mu gu made palupu, mu vahilolo a vahane mua. 15  * Pili 2:5; Kol 3:13; 1Pe 2:21A vakasiri mua pali, mu rata manga a hini a rata ne mua. 16  * Mat 10:24A taki muholi mua, a vora i uka ma ge muga na matakari vona. A vinuru tara i uka ma ge matakari a viri i rudua. 17 Ngane mu lohoka vona a ngava nga. Mua bara mu longo mai, bara mu vivi.
E Isu Bara Ni Habi na Limana Pile
18  * Sng 41:9“Iau i uka ma a taki mua lobo. A lohoka vona e huriki a bakovi a vulaki. Pali a maki ta ge bele, ge bele muholi a Hinere, i ta maea, ‘A viri miri vakani a bret, ia kunana a viri bara i rata hale iau.’
19  * Nim 3:14; Ion 14:29; 16:4“A taki mua vona muga, lakea na tahuna ge bele a maki iea, bara mu luhoi tora iau, ‘Iau kunana, ra Iau.’ 20  * Mat 10:40A taki muholi mua, e rei a viri i tagui e huriki a rudu, i manga i tagui iau. E rei a viri i tagui iau, i manga i tagui a viri i rudu iau a valai.”
21 Na tahuna e Isu i taki lobo a ngava nga, i lege a lohona, lakea i vakalongo ria, i ta maea, “A taki muholi mua, a viri tara ne mua bara i habi iau na limane huriki a pile.”
22 Lakea e huriki a murimuri ri vamatanono. Ri ngapa vona a ngava iea, e rei muholi a viri i takia? 23 A viri tara ne ria, ra murimuri e Isu i ngaru hatekea, i made tabukoi vona.* A murimuri e Isu i ngaru hatekea, re Ioanes. 24 Lakea e Simon Petrus i longo rike lokovonga, i takia, “O nanea. E rei muholi a viri i takia?”
25 Lakea i doga rike ne Isu, i nanea, “Bakovi Dagi, e rei ge rata mavonga?”
26 Lakea e Isu i koli, i ta maea, “Ra viri ga lutua a bret, ga habia vona. Ia kunana.” Muri i lutua a bret i habia ne Iudas Iskariot, e tune Simon. 27  * Ion 13:2Na tahuna e Iudas i bolea a bret, lakea e Satan i dili vona.
Lakea e Isu i takia, “A ra maki ta go ratea, o vano o rata malaviriria.” 28 Pali e huriki ri kakani i uka ma ri lohoka vona a ngava e Isu i taki virihia e Iudas vona. 29 I ranga e huriki ri luhoi e Isu i takia e Iudas ge kona a maki na habu, o ge habi a maki ranga ne huriki a matasia, a vuhuna i matakari a tava ne ria. 30 E Iudas i bolea a bret e Isu i habia vona, lakea i malaviriri kunana i pagitala. I hapu ngane a rodo.
A Vinara Karaba
31  * Ion 12:23Na tahuna e Iudas i vano pali, e Isu i ta maea, “Ngane a Tuna Bakovi i bole a bagetuanga vona, lakea mu masia vona a bagetuanga na Vure. 32  * Ion 17:5Na tahuna mu masia ne Isu a bagetuanga na Vure, ra bagetuanga iea kunana i vakasiria ne Tuna. Lakea a Vure bara i malaviriri kunana i vakabagetua.
33  * Ion 7:33-34“Mua mu manga e huriki e tugu, iau i uka ma ga made tabaka turane mua. Bara mu matakana iau. Pali i manga a ngava a taki ne huriki a Iuda, ngane a taki mua vona tabu. A hini ga lakea vona, bara mu keri ni lakea vona.
34  * Ion 15:12,17; 1Ion 3:23; 2Ion 5“A vinara karaba a habi ne mua i maea, mu vangaru, i manga iau a ngaru mua. 35 Mua bara mu rata mavonga, e huriki lobo bara ri matakilala mua, mua e huriki a murimuri nau.”
E Petrus Bara i Nana Rovi ne Isu
(Mateo 26:31-35; Markus 14:27-31; Lukas 22:31-34)
36 Lakea e Simon Petrus i nanea, “Bakovi Dagi, go lokovai?”
E Isu i koli, i ta maea, “A hini ga lakea vona, ngane bara o keri ni valai vona. Pali muri ma bara o muri valai.”
37 E Petrus i nana tabu, “Bakovi Dagi, i navai ga keri ni muri mai ioe ngane? Bara pesi turamu, a mate turamu.”
38 Muri e Isu i koli, i ta maea, “Ioe go mate muholi nau? A taki muholi ioe, muga na kureko ge tangi, bara o nana rovi iau balaka tolu!”

*13:2: Luk 22:3; Ion 13:27

*13:3: Ion 3:35; 16:28

*13:10: Ion 6:64,70-71; 15:3

*13:14: Mat 20:28; Luk 22:27

*13:15: Pili 2:5; Kol 3:13; 1Pe 2:21

*13:16: Mat 10:24

*13:18: Sng 41:9

*13:19: Nim 3:14; Ion 14:29; 16:4

*13:20: Mat 10:40

*13:23: A murimuri e Isu i ngaru hatekea, re Ioanes.

*13:27: Ion 13:2

*13:31: Ion 12:23

*13:32: Ion 17:5

*13:33: Ion 7:33-34

*13:34: Ion 15:12,17; 1Ion 3:23; 2Ion 5