Tesalonaika Tovetumagana Yadi Leta Nagona Paulo Givetokilumina
Kivemala
Tesalonaika ani melala kuyakuya taliyeya, Masedoniya anafafali wagaine. Paulo yana laumamala balawalilivuga anavelu wagaine ginau wadedeku ke valeya iwakana gimadu lumamalena e ada ekalesiya-nai givevuvu (Gugai 17:1-14). Tovetumagana evagudiyavo ani tufodi meIsileli aku tufona moyaidi ani badi keke meIsileli. Aku meIsileli-dina idamana Yeisu anavetumagana wagaine faina, aditoveimeyayavo iagouga-mowa e ada Paulo yana yoo nodi iwavidi ke inau melala Beliya. Aku muliya Paulo Timoti giimilina Tesalonaika ke adivaleya iwakana gialiyena.
Leta taidei wagaine Paulo givona vesiule meTesalonaika wagaidiya, faina vita tulina tulina wagaidiya yadi vetumagana wagaine imididi toyogina, ada kaduwe Paulo inuwaududuna faina. Nuwanuwana aseasedi gina kivevatudi ada yadi tolidadana ani Yeisu aimo keke gida yewaela aku badi tovetumagana imadualika ani gilufata.
Vesiule. (1:1)
MeTesalonaika yadi vetumagana faina ivona vesiule. (1:2-10)
Paulo yana gugai Tesalonaika wagaine. (2:1-16)
Paulo nuwanuwana meTesalonaika gina maduboda-vagiledi. (2:17 - 3:5)
MeTesalonaika valeyadi Paulo ginogalina ada givemwamwala. (3:6-13)
Dewa iwakana wagaine Yaubada kana kivemwamwalina. (4:1-12)
Yeisu yana yewa-vagila faina. (4:13 - 5:11)
Paulo yana vagadona anaebalauyabu ke vonavetalakafoi. (5:12-28)
1
1 Ime Paulo, Sailasi ke Timoti. Imiyavo Yaubada yana yoo wamiyamiya yana ekalesiya Tesalonaika wagaine ani yama vesiule wagaimiya, imi Yaubada Tamada kaduwe yada Kauveya Yeisu Keliso nodi waveseyana. Adiselu wa yadi nuwadoga ina lemelememi ada kaduwe aseasemi ina kikiveniwalovina.
MeTesalonaika yadi vetumagana faina ivona vesiule.
2 Keke gavana faina aku tova moyaina avesivesiule Yaubada wagaine moyaimi faimiya, ada kaduwe yama veoveola wagaine amiyegana ainainanadi. 3 Tova ke tova Yaubada Tamada matane yami vetumagana wa anagugai anuwanuwayedi, kaduwe Banae wanuwakabubuyena faina yana gugai wagaine wavedivediwe, ada yami vetumagana wasevelavelaina yada Kauveya Yeisu Keliso wagaine. 4 Tubuiyameyavo, Yaubada ginuwakabubuyemi. Ada aalamanena vaita givenuwadadanemi Banae yana kalivayavo, 5 faina tova-nai Yeisu anavaleya iwakana aaliyena wagaimiya ani Aluwaluwa Tabuna givetutamwaina, e ada ina keke vona gagana wagaine aku kaduwe gugai ebameyasidobodobo gigugaiyena,†1Kol 4:20 e ada wavonaga, “Valeya-nai ani vona velemoena.” Tova-nai ime ineneku imi nodi amimwatuguya amiyamiya, imi waalamanena gavaiyamu adewadewa ina yami ebaita ke amilema faina. 6 E ada imiyavo ani ime wagaveuveulema†2Tes 3:7,9 kaduwe yada Kauveya wagaveuveulena. Taumiyavo waawaegemi valeya-nai iwakana wagaine ada vita tulina tulina wanuwagadi badi kaliva-dina Keliso iagougena ani wagaidiya-deya. Uloulolo moyaina wanuwagadi†Gug 17:5 aku Aluwaluwa Tabuna yana vemwamwala wagaine imi wavemwamwala.†Mad 5:12 7 Ada idamamauwe wadewa faina, tovetumagana moyaidi imiyamiya Masedoniya ke Akaiya yami vemwamwala iitana ke yami vetoefaefa, ada ida yadi ebaita e ada ina gaveuveulemi. 8 Imiyavo wagaimiya-deya Yeisu valeyana giyegemo ginau yami fafali Masedoniya ke Akaiya anakalivayavo wagaidiya. Ada keke yami fafali gagana, aku kaduwe yami vetumagana Yaubada wagaine valeyami gimutula ginau mali kaliva fafali moyaidi atuwadeya ani ikaiyanogala yami vetumagana Yaubada wagaine faina. E ada keke tamo valeya ana vetutamwai. 9 Faina mali fafali anakalivayavo ani taudiyavo iawatalatalaina gavaiyamu tuwaina yama maduboda wagaimiya, ada gavaiyamu wa yami aseawaega wasivaivaima, kadu gavaiyamu tuwaina waawaegemi yaubada fwayafwaya wagaidiya aku Yaubada Banae velemoena kadu wayawaina ani wamiyavilami wagaine ke wavetogugai faine. 10 Kaduwe badi kaliva-dina iifuifufuyena gavaiyamu wabodaboda Natuna yana yewa-vagila gabameya-deya faina,†Gug 1:11 Banae Yaubada gisiveyawa-vagilena alikeya.†Gug 2:24 Tainei Natuna-nai Yeisu, Banae Yaubada yana nuwakoyo lakaina ke yana matavuloga aimo ina yegemona ani gikibababaleda wagaidiya-deya.†Mad 3:7, Lom 5:9, 1Tes 5:9