1 Ada tayuwe yadayada-dina wagaidiya Yeisu yana tonogala adiyoo giveiveinala. Ada imiyamiya e aku tova seyana badi meya Giliki anatoifufu ani badi meya Ibeliu anatoifufu igavoluvoluyedi. Ivonavona vaita yadayada seyana seyana aa anavutuga wagaine taudiyavo yadi sikwasikwa adivutuga kabisona, aku badi meya Ibeliu anatoifufu ani yadi sikwasikwa adivutuga lakaina. 2 E ada afositolo adituwelo tonogala moyaidi idouwevagauwidi ada ivonedi, ivona, “Kai ime aa anavutuga ana itaveyabina aku Yaubada yana vona analaumamala ana ilovena, aga wada keke gida luboda. 3 E ada tubuiyameyavo, kaliva adiseveni wa adivetumagana wana venuwadadanedi amimwatuguya, badi imaga Aluwaluwa Tabuna wagaine ada kaduwe tonuwanuwa velemoedi. E ada aa anavutuvutuga ana veledi ina gugaiyena, 4 aku ime taumeyavo ani ana awaegema veoveola ke Yaubada yana vona analaumamala wagaidiya.”

5 Ada tovetumagana matatabudi afositolo yadi ifufu inogalina ada nuwadi givemwamwala. E ada kaliva seyana ivenuwadadanena ani anayegana Sitiveni, banae yana vetumagana lakaina kaduwe Aluwaluwa Tabuna wagaine gimaga-mowa. Ada kaduwe kaliva tufodi ivenuwadadanedi anafaiweya, adiyegana Filipi, Polokalasi, Naikena, Timoni ke Pamenasi, ada kaduwe Nikolasi kwana Anitiyoki banae keke kwana Isileli aku meIsileli yadi tafalolo wagaine gidamana. 6 Ada taidei kaliva-dina afositolo matadiya ivemidididi, ada nimadi isedi seyana seyana wagaidiya aku iveoveola faidiya.†Gug 13:3

7 Ada Yaubada yana vona gimutula ginau, ada kaliva moyaidi inogalina ke ivetumaganena. Ada tonogala yadi yoo Yelusalema wagaine giveinala-mowa, kaduwe veyavo anatovegugaiyavo tufona moyaidi valeya iwakana ivetumaganena ada imatawalewaleyena.

8 Aku banae Sitiveni ani aseasena gimaga Yaubada yana nuwadoga wagaine, kaduwe tova moyaina Yaubada yana toyogina wagaine gimiyamiya faina, gugai ebameyasidobodobo ke iyaiyaya lakaidi gigugugaiyedi kaliva adimwatuguya. 9 Aku kaliva tufodi ivenibainena, meIsileli adiyoo seyana. Badi kaliva-dina manuwa ebavewala wagaine ivagavagauta, ada manuwa-nai ivewagana Togugai Etoetoyavugidiyavo Yadi Manuwa Ebavewala. Ada badi meIsileli-dina yadi melala adiyegana Sailini kaduwe Alekisanidia, kaduwe badi meIsileli Silisiya ke Eisiya adifafali wagaidiya ani kaliva-dina ivebutu Sitiveni nodi ivevonavona toyogina. 10 Aku Aluwaluwa Tabuna nuwauya lakai-vagaina Sitiveni givelena faina,†Luk 21:15 yana vona wagaidiya iveyamata. Keke adifaiweya ina vonalufata.

11 Aku badi meIsileli kaliva tufodi ivonekavuyedi ke ina vonaga, “Bana kaliva-nai anogalina givona awadamana Mosese wagaine, ada kaduwe Yaubada wagaine.”

12 E ada badi yadi ifufu-nai wagaine,†Mad 26:59-61 meIsileli yoo ada kaduwe kaliva lakaidiyavo ke veimeya anatovewalayavo ikivenuwakoyodi. E ada Sitiveni ivenibainena ke ina ikiveyabi inauwena meIsileli yadi Kanisela wagaidiya. 13 Ada Sitiveni ilukuwena Kaniselayavo wagaidiya, aku kaduwe toveloi nodi ilukuwedi ke bana faine ifwaya ivona, “Bana kaliva-nai tova moyaina yada manuwa tabutabuna ada kaduwe Mosese yana veimeya giawaawavekoyoyedi. 14 Ime anogalina givona vaita Yeisu Banae kwana Nasaledi manuwa tabu gida yawelina, ada veimeya Mosese yada yoo nagona giveledi ke ivesesevedamana wagaideya, ani gida sevedavedamadi aku veimeya evagudi gidasedi.” Taidei anafaiweya Sitiveni iveloina. 15 Ada kaliva moyaidi ebavevonayavuga anafafali wagaine-deya ani Sitiveni iitavutuvutuna, ada magigina iitana vaita anelose magigina anafaiweya.