5
Yeisu yana tonogalayavo gimadudouwedi biyavo-dina.
Mad 4:18-22; Mak 1:16-20
1 Tova seyana Yeisu gimididi Lavu Genesaleti**‘Genesaleti lavu’ ani yegana anavelu ‘Lavu Galili lakaina’, ada kaduwe ‘Leyaga Galili’. Aku ‘Leyaga Galili’ anavelemoena ani tayuwe gufa-mowa aku keke leyaga. taliyeya ada Yaubada yana vona gilulumamalena aku kaliva ani iyooyoofifina ke ina nogalina.†Mad 13:1-2, Mak 3:9-10, 4:1 2 Aku giitana taliya lilivane waka iluwei toyauba isedi ada inau yadi guvata iikolakola. 3 Ada waka seyana wagaine Yeisu giyage, tainei Saimoni yana waka, ada giveolena maita-moena ina talalaka. Ada au waka wagaine givetogana aku kaliva givewaledi. 4 Tova-nai giifufu giavaina, Saimoni wagaine givona, “Waka una talalakavena gawaneya ke guvata una seobuye una yakunena ada igana una veonana.”
5 Aku Saimoni givonaga, “Kauveya, bogi anamatatabuna afaisewa toyogina, aku keke tamo ada veona. Aku uvona faina au guvata gana seobuyedi.” 6 Ada toyauba yadi guvata iyakunedi anafaiweya Yeisu givonedi ani au igana iveonadi, anayoo lakai-moena wagaine yadi guvata ivebutu ina agigidi.†Iyo 21:2-6 7 E ada tubuiyadiyavo iluyaudiyedi waka velugana wagaine inaela ina lemedi, ada ielai ke waka iluwei ivemagadi velemoena, tayuwe wagaine ivebutu ina kamomola.
8 Aku Saimoni-Pita tova-nai gaitoma taidei giitana ada au Yeisu agene tugana givetodonena ada givona, “Kauveya, una segeku unanau, faina Iya tokoyona.” 9 Faina tubuiyanavo nodi igana moyaina iveonadi wagaine meyadi gisidobodobona. 10 E, anafaiweya kadu Iyemesa ke Iyoni, badi Sebedi natunavo ani Saimoni anakeluyavo nodi tova moyaina iyubayubau. Ada Yeisu Saimoni givonena, “Keke una matauta. Tova malinai ke gina naunau ani oye kaliva aditoyauba.” 11 Ada iyalili ke yadi waka itaidi ilaka avaleya, ada gaitoma matatabuna au ilovedi imiya aku Yeisu imuliyena.
Yeisu tolefelo gikivebwainina.
Mad 8:1-4; Mak 1:40-45
12 Seyana tova Yeisu melala seyana lakaina wagaine gimiyamiya aku kaliva seyana gielai ani vovona matatabuna lefelo gikiwafina. Ada tova-nai kaliva-nai Yeisu giitana, au giodu magigina babi wagaine aku gialamamaiyena, givona, “Kauveya, gaalamanena O afaiweya una kiveyegayeganeku. E ada kai nuwanuwa aga uda gugaiyena.”
13 Ada Yeisu nimana gitunena ke gisena kaliva wagaine aku givona, “Ika, nuwanuwaku. Una yegayegana.” Ada maduga-mowa analefelo giavaina. 14 Ada Yeisu giveimeyena givona, “Una nogalina. Keke tamo gaito una awatalatalaine aku unanau veyavo anatovegugai wagaine tauni una vewaleni, e ada gina itani vovo ani gibwaina. Ada ya yegayegana Yaubada matane faina ani una vebolavoi Yaubada wagaine Mosese giveimeya anafaiweya e ada kaliva moyaidi ina alamanena o velemoena bade uveiwaka.”†Vei 14:1-4, Luk 17:12-14
15 Aku Yeisu yana faisewa valeyana gimutula lakai-moena wagaine, kaliva yoo yoo ielai bonana ina nogalina ada adiveoga wagaidiya ina bwaina. 16 Aku Yeisu yana dewa ani tova moyaina yoo gisegesegedi aku ginaunau fafali kavovona giveoveola.†Mak 1:35
Yeisu kaliva vovona memeluyana gikivebwainina.
Mad 9:1-8; Mak 2:1-12
17 Yadayada seyana wagaine Yeisu kaliva givewavewaledi manuwa seyana wagaine aku Falisiyavo ada Mosese yana veimeya anatovewalayavo wadedeku kadu ivetoga, biyavo-dina ielai melala moyaina wagaidiya Galili ke Yudiya adifafali wagaidiya ada kadu Yelusalema. Ada Yaubada yana toyogina gimiyamiya Yeisu wagaine ke toveoga gina kivebwainidi. 18 Ada kaliva tufodi ielai ani kaliva iwai ialiyena vaya wagaine, banae vovona memeluyana. E ani ibalalava vaita ina lukuwena manuwa negenine ke Yeisu matane inasena 19 aku wai keke ida nuwaga, faina yoo lakaina. E ada iwai ilakavena manuwa getane**MeIsileli yadi manuwa anaiyogona wagaine ani manuwa getane matatabuna beyabeyana, e ada wada kaduwe yadi ebamiya ke yadi ebada faidiya. ada manuwa getana anaseboda kabisona ikakidi ada awagane kaliva iseobuyena anavaya wagaine yoo nefanidiya Yeisu magigine-mwane. 20 Ada Yeisu kaliva-dina yadi vetumagana giitana ke givona kaliva-nai wagaine, givona, “Natuku, ya koyona bademowa gavenuwaegedi.”
21 Aku Falisiyavo ke veimeya anatovewalayavo taudiyavo nuwainagediya ivona, “Ida gavakaliva ayo givonavona awadamana Yaubada wagaine? Keke seyana gaito anafata koyona gina venuwaegedi aku Yaubada anakaibe-mowa.” 22 Aku Yeisu yadi nuwanuwa gialamanena e ada gitolidadanedi, givona, “Gavaiyamu-yo taidei anafaiweya aseasemiya wanuwanuwa? 23 Gavavona meyameyagani-moena ganavona, ‘Ya koyona bademowa gavenuwaegedi’ o kai ganavona, ‘Una mididi ke una nudadana’? 24 Aku nuwanuwaku wana alamanena ani Banae Kaliva Natuna wa yana veimeya e ada anafaiweya kaliva yadi koyona gina venuwaegedi babi taidei wagaine.” Ada au kaliva-nai vovona memeluyana ani Yeisu givonena, “Iya gavoneni, una mididi, avaya una waina ada unanau ya manuweya.” 25 Ada maduga-mowa moyaidi matadiya gimididi ada anavaya giwaina ada ginau manuweya aku Yaubada giawadavadavana. 26 Ada kaliva moyaidi meyadi gisidobodobona ada Yaubada idavana, ivona, “Vona velemoena! Malinai gaitoma taidei ebanuwavogana velemoena kaitadi.”
Livai anavedo.
Mad 9:9-13; Mak 2:13-17
27 Muliya Yeisu giyegemona ginaunau aku giitana takesi anatoyaudi anayegana Livai**Livai anayegana anavelu ani Madiu. (Mad 9:9) ani yana takesi anavada wagaine givetovetoga. Ada Yeisu givonena, givona, “Unaela una muliyeku.” 28 Ada gimididi gaitoma matatabuna gisedi aku Yeisu gimuliyena.
29 Ada muliya Livai yana manuweya kanibutu lakaina gifaisewana Yeisu faine, ada yoo lakai-moena ani takesi anatoyaudi ke kaduwe kaliva tufona badi nodi ienokekela teibeli lilivane ikanikani. 30 Aku Falisiyavo ada veimeya anatovewalayavo badi Falisi adiyoo ani Yeisu yana tonogalayavo wagaidiya igavoluvolu, ivona, “Gavana faina takesi anatoyaudi ke tokoyona nodi wakanikani ada wayugayuga?”†Luk 15:1-2
31 Yeisu givonedi, “Badi gavega iwakadiyavo ani keke nuwanuwadi doketa, aku badi toveoga gaga ani nuwanuwadi. 32 Iya gaelai ani keke toyegayegana gana douwedi faina. Aiyada gaelai ke tokoyona gana douwedi ke yadi dewa koyona wagaidiya ina nuwavilana aku ina awaegedi Yaubada wagaine.”
Kani anailova faina Yeisu itolidadanena.
Mad 9:14-15; Mak 2:18-20
33 Aku aimo seyana tova kaliva tufodi ielai Yeisu wagaine ke ivonena, “Iyoni yana tonogalayavo ani tova ke tova kani iiloilovau aku iveoveola, kaduwe Falisiyavo yadi tonogalayavo anafaiweya, aku O ya tonogalayavo ani kani gaga ada yuga gaga isei ginaunau.”
34 Ada Yeisu givona matalivulivuna wagaidiya, givona, “Nagi anakani vemwamwala wagaine ani gavaiyamu, amifaiweya tonagi tubuiyanavo wana veimeyedi kani ina iloilovau tova-nai tonagi kaliva nodi ina miyamiya? Keke, faina tonagi-nai nodi imiyamiya. 35 Aku tova gielaelai wagaine kaliva tufodi inaela tonagi kaliva inavai tubuiyanavo wagaidiya-deya ke ina nauwena. E ada yadayada-dina wagaidiya kani ina iloilovau.”
Yeisu yana vewala evaguna ani keke kaliva yadi nuwanuwa tuwaina nodi kana vetutamwata.
Mad 9:16-17; Mak 2:21-22
36 Kaduwe givona matalivulivuna-vagila, givona, “Keke nuya evaguna wagaine kana kelili ebaibwadi faina ada kana etovefose nuya tuwaina wagaine. Kai kana gugaiyena aga nuya evaguna ginabuta wagaine gina siyauta ke gina agigina, ada kaduwe ebaibwadi nuya evaguna wagaine keke gida luboda gina vefafaliye nuya tuwaina. 37 Kaduwe anafaiweya, keke waini evaguna kana iwavedama tuwava kevakeva bubuna tuwaina wagaidiya. Faina waini evaguna yana lutuga wagaine tuwava bubu-dina gina fuwadi ada waini gina maduyabu ke tuwava bubu inakoyo.**Waini anatuwava anakivemala faidiya ani una itana ailabama adiebakivemala Malika 2:22 wagaine. 38 Aku analauboda waini evaguna kana iwana tuwava evaguna wagaidiya.**Taidei vona matalivulivuna anavewala ani gaitoma seya-moena faina, anafaiweya 5:36. Anaalamana velemoena ani taidei anafaiweya. MeIsileli yadi tafalolo anavewala tuwaidi ada kaduwe veyavo anawai evaguna anavewala evagudi ani taidei gaitoma-dina iluwei faidiya Yeisu giifuifufu. Veyavo anawai evaguna ani gaitoma evagu-moena, ada analauboda ani ananuwanuwa ke anagugai evaguna. Veyavo anawai tuwaina anamuliya ada veyavo anawai evaguna anamuliya ani tulina tulina, ada keke gida luboda kana lomwani seyana. E ada gavega ivetonogala Yeisu wagaine ani keke adilauboda ke ina nuwanuwa vaita wai tuwaina ina itaveyabi ke ina mulimuliye. 39 Ada kaduwe keke seyana gaito waini tuwaina ginayuga ayo muliya nuwanuwana waini evaguna, faina ginavona, ‘Ya! Waini tuwaina iwaka-moena.’ ”
**5:1 ‘Genesaleti lavu’ ani yegana anavelu ‘Lavu Galili lakaina’, ada kaduwe ‘Leyaga Galili’. Aku ‘Leyaga Galili’ anavelemoena ani tayuwe gufa-mowa aku keke leyaga.
†5:1 Mad 13:1-2, Mak 3:9-10, 4:1
†5:14 Vei 14:1-4, Luk 17:12-14
**5:19 MeIsileli yadi manuwa anaiyogona wagaine ani manuwa getane matatabuna beyabeyana, e ada wada kaduwe yadi ebamiya ke yadi ebada faidiya.
**5:27 Livai anayegana anavelu ani Madiu. (Mad 9:9)
**5:37 Waini anatuwava anakivemala faidiya ani una itana ailabama adiebakivemala Malika 2:22 wagaine.
**5:38 Taidei vona matalivulivuna anavewala ani gaitoma seya-moena faina, anafaiweya 5:36. Anaalamana velemoena ani taidei anafaiweya. MeIsileli yadi tafalolo anavewala tuwaidi ada kaduwe veyavo anawai evaguna anavewala evagudi ani taidei gaitoma-dina iluwei faidiya Yeisu giifuifufu. Veyavo anawai evaguna ani gaitoma evagu-moena, ada analauboda ani ananuwanuwa ke anagugai evaguna. Veyavo anawai tuwaina anamuliya ada veyavo anawai evaguna anamuliya ani tulina tulina, ada keke gida luboda kana lomwani seyana. E ada gavega ivetonogala Yeisu wagaine ani keke adilauboda ke ina nuwanuwa vaita wai tuwaina ina itaveyabi ke ina mulimuliye.