2
Yeisu kaliva vovona memeluyana gikiveiwakanena.
Mad 9:1-8; Luk 5:17-26
1 Yadayada gavaiyei giavaidi, kaduwe Yeisu giyewa-vagilena Kafaneumi wagaine, ada kaliva ikaiyanogala vaita Yeisu kadu gimiyamiya yana manuweya. 2 E ada yoo lakaina ivagauta ada waiyeda ke manuwa-moena ani keke tamo mwatugu gidatufo. Ada Yeisu valeya iwakana gilulumamalena wagaidiya 3 aku kaliva adilaufuli ielai ani kaliva iwai ialiyena, banae vovona memeluyana. 4 Ada vaita kaliva-nai ina lukuwena Yeisu wagaine aku keke adifata, faina yoo lakaina. E ada iwai ilakavena manuwa getane, ada manuwa getana anaseboda kabisona ikakidi ada awagane kaliva iseobuyena anavaya wagaine. 5 Ada Yeisu kaliva-dina yadi vetumagana giitana ke kaliva-nai wagaine givona, “Natuku, ya koyona bademowa gavenuwaegedi.”†Luk 7:48
6 Aku veimeya anatovewalayavo tufodi nodi ivetovetoga aku taudiyavo nuwainagediya itolidadana, ivona, 7 “Gavana faina givonavona anafaiweya? Ida kaliva-nai Yaubada givona awadamanena! Keke seyana gaito anafata koyona gina venuwaegedi aku Yaubada anakaibe-mowa.” †1Iyo 1:9, Ais 43:25
8 Aku maduga-mowa Yeisu aluwaluwane-deya yadi nuwanuwa gialamanena e ada givonedi, givona, “Gavaiyamu-yo taidei anafaiweya aseasemiya wanuwanuwa? 9 Gavavona meyameyagani-moena ganavone kaliva-nai vovona memeluyana wagaine, ganavona, ‘Ya koyona bademowa gavenuwaegedi,’ o kai ganavona, ‘Una mididi, avaya una waina ke una nudadana’? 10 Aku nuwanuwaku wana alamanena ani Banae Kaliva Natuna wa yana veimeya e ada Bana anafaiweya kaliva yadi koyona gina venuwaegedi babi taidei wagaine.” Ada au kaliva-nai vovona memeluyana ani Yeisu givonena, 11 “Iya gavoneni, una mididi, avaya una waina ada unanau ya manuweya.” 12 Au kaliva-nai gimididi, anavaya giwai-yo moyaidi matadiya giyegemona ginau.
E ada yoo-dina meyadi gisidobona ke Yaubada idavana ada ivona, “Keke seyana tova gugai taidei anafaiweya kadaita!”†Mad 9:33
Yeisu Livai gidouwena ke gina muliyena.
Mad 9:9-13; Luk 5:27-32
13 Kaduwe Yeisu giyewa-vagilena Lavu Galili taliyeya, aku yoo lakaina ivagauta wagaine ada givewaledi. 14 Ada Yeisu fafali-nai gisegena aku gitauya ginaunau ani Alipiyo natuna Livai giitana. Banae takesi anatoyaudi ke yana takesi anavada wagaine givetovetoga. Ada Yeisu givonena, “Unaela una muliyeku.” Ada gimididi ke Yeisu gimuliyena.**Livai anayegana anavelu ani Madiu. (Mad 9:9)
15 Ada muliya Yeisu ginau Livai yana manuweya ada yana tonogalayavo nodi teibeli lilivane ienokekela ikanikani, aku badi takesi anatoyaudi ada kaduwe tokoyona moyaidi nodi, faina yoo lakaina imuliyena. 16 Aku veimeya anatovewalayavo, badi Falisi adiyoo, ani iitana Yeisu takesi anatoyaudi ke tokoyona nodi ikanikani e ada yana tonogalayavo itolidadanedi, ivona, “Gavana faina takesi anatoyaudi ke tokoyona Banae badi nodi ikanikani?”†Mad 11:19, Luk 15:1-2
17 Aku Yeisu yadi tolidadana ginogalina-yo gilufata wagaidiya, givona, “Badi gavega iwakadiyavo ani keke nuwanuwadi doketa, aku badi toveoga gaga ani nuwanuwadi. Iya gaelai ani keke toyegayegana gana douwedi faina. Aiyada gaelai ke tokoyona gana douwedi.” †Luk 19:10, 1Tim 1:15
Kani anailova faina Yeisu itolidadanena.
Mad 9:14-15; Luk 5:33-35
18 Aku aimo seyana tova Iyoni yana tonogalayavo ada Falisiyavo yadi tonogalayavo ani kani iloilovau. Ada kaliva tufodi ielai Yeisu wagaine ke itolidadanena, ivona, “Gavana vuvuna ayo Iyoni yana tonogalayavo ada Falisiyavo yadi tonogalayavo ani tova ke tova kani iloilova, aku ya tonogalayavo ani keke?”
19 Ada Yeisu givona matalivulivuna wagaidiya, givona, “Nagi anakani vemwamwala wagaine ani gavaiyamu, tonagi kaliva tubuiyanavo nodi ina miyamiya aku tubuiyanavo kani ina ilovau? Keke, faina tonagi-nai nodi imiyamiya. 20 Aku tova gielaelai wagaine, kaliva tufodi inaela tonagi kaliva ina vaina tubuiyanavo wagaidiya-deya ke ina nauwena. E ada yadayada-dina wagaidiya kani ina iloilovau.”
Yeisu yana vewala evaguna ani keke kaliva yadi nuwanuwa tuwaina nodi kana vetutamwata.
Mad 9:16-17; Luk 5:36-39
21 Ada kaduwe givona matalivulivuna-vagila, givona, “Keke nuya tuwaina kana bwadi nuya diyana evaguna wagaine. Faina aimo nuya diyana evaguna ginabuta wagaine gina siyauta, e ada nuya tuwaina gina agigina lakai-moena. 22 Kaduwe anafaiweya, keke waini evaguna kana iwavedama tuwava kevakeva bubuna tuwaina wagaidiya. Faina waini evaguna yana lutuga wagaine tuwava bubu-dina gina fuwadi, e ada waini ke tuwava bubu inakoyo. Aku analauboda waini evaguna kana iwana tuwava evaguna wagaidiya.” **Tova-nai goti ina mununa ada ina wekalina, ani waini anatuwava ina bubuna kwafilina matatabuna wagaine. Ada waini evaguna ina faisewana ada ina iwana tuwava-nai ke odona ina sifobodana. Ada aimo waini evaguna gina lutuga wagaine, tuwava evaguna ani iwakana. Keke gina sigigi aku anafata ginafata. Aku kai ida iwana tuwava bubuna bade givetuwai wagaine, wada keke iwakana, faina tuwava-nai bademowa ayayana e ada keke ginafata aku waini evaguna gina lutuga wagaine, tuwava tuwaina gina afuwana.
Yeisu Banae Sabate anatoveimeya.
Mad 12:1-8; Luk 6:1-5
23 Sabate seyana wagaine Yeisu yana tonogalayavo nodi witi anabakula wagaidiya inunugolota, aku tonogalayavo ivebutu witi guwana ikidakadaka.**Tayuwe adigiduwa-nai ani kai witi ina kidakadaka aga wada keke kiyafu. Aku kai witi kwasikwasi wagaine ina talana, wada kiyafu. (2Vei 23:25) 24 Aku badi Falisiyavo ani iitadi ada Yeisu ivonena, ivona, “Una itana. Gavana faina Sabate anaveimeya keke ida itaveyabi?”
25 Bana givonedi, givonaga, “Aku maita waveyawanuwagana gavana Kini Deivida gigana tova-nai yana yooyavo nodi mafa gilavudi wagaine? 26 Giluku Yaubada yana manuwa wagaine ada beledi vevetabuna Yaubada matane isena, ani givai gikanina, ada kaduwe yana kalivayavo giveledi ikani. Taine Yaubada yana veyavo anatovegugai aditonagona anayegana Ebayada yana tova wagaine. Aku beledi-nai ani wa anaveimeya vitana velemoena, keke kaliva-kavokavovo inakani aku badi veyavo anatovegugai gaga adiawaega ke ina kanina.”†1Sam 21:1-6
27 Ada kaduwe Yeisu givonedi, “Yaubada keke kaliva gida bubudi Sabate†2Vei 5:14 anaawata faina, aku aiyada Sabate gibubuna kaliva adilema faina. 28 Taidei faina Banae Kaliva Natuna ani Tauna Sabate anaKauveya.”
**2:14 Livai anayegana anavelu ani Madiu. (Mad 9:9)
**2:22 Tova-nai goti ina mununa ada ina wekalina, ani waini anatuwava ina bubuna kwafilina matatabuna wagaine. Ada waini evaguna ina faisewana ada ina iwana tuwava-nai ke odona ina sifobodana. Ada aimo waini evaguna gina lutuga wagaine, tuwava evaguna ani iwakana. Keke gina sigigi aku anafata ginafata. Aku kai ida iwana tuwava bubuna bade givetuwai wagaine, wada keke iwakana, faina tuwava-nai bademowa ayayana e ada keke ginafata aku waini evaguna gina lutuga wagaine, tuwava tuwaina gina afuwana.
**2:23 Tayuwe adigiduwa-nai ani kai witi ina kidakadaka aga wada keke kiyafu. Aku kai witi kwasikwasi wagaine ina talana, wada kiyafu. (2Vei 23:25)
†2:26 1Sam 21:1-6
†2:27 2Vei 5:14