2
1 Iwe, üa ekieki lon letipei, “Üpwe sotuni pwapwan fanüfan pwe üpwe chök pwapwa.” Nge a pwä pwe pwal ei pön chök. 2 Nge mürin üa mefi pwe takir umwes chök. Met echök lomoten pwapwa? 3 Üa sotuni le apwapwai inisi ren ai ün wain, nge ükükün chök ai üpwe chüen mirit. Üa pwal sotuni le föri föförün tiparoch, pwe üpwe silei met a öchiti aramas pwe repwe föri lon fansoun manauer mi mochomoch won fanüfan. 4 Üa föri angang mi amwarar. Iwe, üa aüetä chomong imwei, üa pwal fotuki irän wain lon tanipii. 5 Üa pwal föri tanipi me leni mi amassawa o fotukätiu chomong sokun irä mi ua lon. 6 Üa föri lenien koluk, pwe üpwe achöchönü ekewe irä pwe repwe märöch. 7 Üa pwal kamö mwän me fefin pwe üpwe nöüniir amanau, a pwal wor nei amanau mi uputiu lon imwei. Iwe, üa nöüni chomong sokun pwiin man lap seni ekewe aramas meinisin ra imweimw lon Jerusalem me mwei. ✡1.King 4.23 8 Iwe, üa achufengeni silifer me kolt fän itei, pwal chomong sokun wöün king me fanü. A pwal wor nei souköl mwän me fefin, pwal chomong sokun pwapwa mwän ra pwapwa ngeni. ✡1.King 10.23-27; 2.Kron 9.22-27; 1.King 10.10,14-22
9 Iei popun üa fokun tekia lap seni ekewe aramas meinisin ra imweimw lon Jerusalem me mwei. Iwe, ai mirit a chök nonom rei. ✡1.Kron 29.25 10 Meinisin mine mesei a mocheniaiti üa chök angei. Üsap pwal epeti seniei sokun pwapwa, pun letipei a pwapwa ren ai angang weires. Ei pwapwa iei liwinin ai angang weires. 11 Mürin üa nenengeni meinisin mine üa föri, pwal ewe angang weires üa föri. Iwe, üa mefi pwe meinisin a pön, a usun chök turufi asepwäl. Esap wor och feiöch lon mine chon fanüfan ra föri.
12 Iei mine üa ekiekisefäli usun wewen tipachem me tiparoch ika umwes. Iwe, met ewe eman mi siwili ewe king epwe tongeni föri? Epwe chök föri mine aramas ra fen föri seni me lom. 13 Iwe, üa küna pwe tipachem a mürina seni tiparoch, usun chök saram a mürina seni rochopwak. 14 Eman mi tipachem a küna mwan, nge eman mi tiparoch a fetal lon rochopwak. Nge üa mefi pwe eu chök sopolar. 15 Iwe, üa ekieki lon letipei, “Mine a fis ngeni ewe mi tiparoch epwe pwal fis ngeniei. Met chök lomoten ai tipachem meinisin?” Iei mine üa apasa pwe pwal ei pön chök. 16 Pun aramas resap chechemenitamei chon tipachem me chon tiparoch, nge lon fansoun epwe feito repwe fokun manlükirela meinisin. Solapan pwe eman mi tipachem a mäla usun chök eman mi tiparoch. 17 Iei mine esap wor aüchean manau me rei, pun meinisin mine a fis won fanüfan a ariföüüei. Iwe, meinisin a pön, a usun chök turufi asepwäl. 18 Iwe, esap wor lomotan ngeniei ai angang weires meinisin üa föri won fanüfan, pun üa silei pwe üpwe likiti ngeni ewe eman mi siwiliei. 19 Nge iö a silei ika ewe eman epwe tipachem ika epwe tiparoch? Inamwo, epwe chök nemeni meinisin mine üa förätä o anganga won fanüfan fän ai weires me ai tipachem. Pwal ei pön chök.
20 Iei mine apilükülüküngau a toriei pokiten weiresin ai angang won fanüfan. 21 Pun fän ekoch eman aramas a angang weires ren an tipachem me silelap, nge lesopolan manauan eman aramas esap angang weires a feiöchüni feiöchün meinisin. Pwal ei pön chök, pwal eu mettoch mi fokun ngau. 22 Met feiöchün eman aramas ren an angang weires meinisin won fanüfan? 23 Pun ränin manauan meinisin ra uren cheuch, nge an angang a chök weires. Iwe, letipan esap pwal tongeni kinamwe lepwin. Pwal ei pön chök. ✡Hiop 5.7; 14.1
24 Iwe, a mürina seni meinisin pwe eman aramas epwe mongö o ün, epwe pwal pwapwa lon an angang weires. Nge üa küna pwe pwal ei a chök feito seni lepöün Kot. ✡SalAf 3.13; 5.18; 9.7; Ais 56.12; Luk 12.19; 1.Kor 15.32 25 Pun iö a tongeni mongö ika pwapwa are Kot esap ngeni? 26 Iwe, mirit me silelap me pwapwa Kot a lifang ngeni eman a chen me ren. Nge Kot a ngeni chon tipis angangen ionifengeni o achukuchukätä wöü, nge mürin a ngeni chokewe ra chen me ren pwe repwe wöüni. Pwal ei pön chök, a usun chök turufi asepwäl. ✡Hiop 32.8; SalF 2.6