22
One Message Fo Da Kings Fo Judah
(Matthew 23:38; Luke 13:35)
1 Dis wat Da One In Charge tell: “Go down by da palace fo da Judah king. Wen you come ova dea, tell um: 2 ‘You, da king fo da Judah peopo! Lissen up wat Da One In Charge tell. You da one from King David blood line dat get da right fo be king. You, yoa palace guys, an yoa peopo dat come inside dese gates—all you guys, lissen up!
3 “ ‘Dis wat Da One In Charge tell: Inside dis place, judge da right way an do wat stay right. Make shua da guys dat rip off peopo no hassle da ones dey wen steal from da firs time. Fo da guys not from dis place, an da guys dat no mo faddah o muddah, o da wahines dat no mo husban, no go do stuff fo hurt dem o bus um up. No go kill somebody dat neva do notting wrong. 4 Cuz if you guys make shua you do all dis stuff I tell, den da kings from King David blood line goin come inside da gates fo dis palace. Dey goin ride inside war wagons an on top horses, wit dea palace guys an dea peopo. 5 ✡22:5: Matt 23:28; Luke 13:35But if you guys make deaf ear all dis stuff dat I tell, den me, Da One In Charge, I promise I goin do dis fo shua—I goin make dis palace come all bus up.’ ”
6 Dis wat Da One In Charge tell bout da palace fo da Judah king:
“No matta da palace nice looking
An stay fo me jalike da Gilead fores
An da fores on top a da Lebanon Mountains,
I goin make um come jalike da boonies,
Jalike one town dat no mo peopo.
7 I goin make guys come fo wipe out da palace.
Erybody goin bring dea tools fo work.
Dey goin chop up yoa nice cedar wood beams.
An throw um inside da fire.
8 Peopo from plenny lands goin pass by dis big town.
Dey goin tell each odda,
‘How come Da One In Charge wen do all dis to dis importan town?’
9 Odda peopo goin tell, ‘Cuz da peopo broke
Da deal dey wen make wit dea God, Da One In Charge,
An dey go down an show respeck fo odda gods, an work fo dem.’ ”
One Message Bout King Jehoahaz
10 No cry fo da mahke king Josiah
No stay sad inside cuz a him.
Mo betta, cry plenny fo King Jehoahaz
Dat stay in prison inside one far land.
Cuz he no goin come back.
An he no goin see da land wea he wen born no moa.
11 ✡22:11: 2Kings 23:31-34; 2Rec 36:1-4You know, dis wat Da One In Charge tell bout Shallum. He da one dat get da name King Jehoahaz afta his faddah Josiah mahke, da king fo Judah. But he gone awready from dis place, an Da One In Charge tell: “He no goin come back hea no moa. 12 He goin mahke inside da place wea da Babylon guys wen take um cuz he one prisona. He no goin see dis land one mo time.”
One Message Bout King Jehoiakim
13 Da One In Charge tell dis:
“Ho, King Jehoiakim!
He all jam up!
Cuz wen he build his palace,
He neva do wass right, fo pay fo um.
He bulai da peopo dat help him
Fo him make da rooms upstairs.
He make da guys from his peopo work fo notting.
He no pay dem fo dea work.
14 He tell, ‘I goin build my big palace.
I goin get rooms on top da oddas wit plenny space.
I goin put big windows dea.
An put cedar wood panel all ova da inside wall.
An paint um real red.’
15 “If you like fo real kine fo build house
Wit mo plenny cedar wood den some odda guy,
You tink dat make you one king, o wat?!
Yoa faddah Josiah, he get plenny fo eat an drink.
But him, he wen do wat stay right an judge da right way.
Dass why eryting come good fo him.
16 He wen make shua da judge guys do da right ting
Fo help da peopo dat no mo notting, an need stuff.
Dass how come eryting come good fo him.
Cuz wen you know me, Da One In Charge, fo real kine, az how you goin ack!
Az wat Da One In Charge tell.
17 “But you, Jehoiakim, you ony like get
Wat you can rip off from da real owna!
You like kill da peopo dat neva do notting wrong.
You like make sly kine fo make peopo pay you extra fo wat you do fo dem.
You bus up peopo an you no give a rip!”
18 ✡22:18: 2Kings 23:36–24:6; 2Rec 36:5-7Az why dis wat Da One In Charge tell bout Jehoiakim, Josiah boy, dat come king fo da Judah peopo afta King Josiah mahke:
“Da ohana peopo no goin stay sad inside
Wen Jehoiakim mahke.
Dey no goin tell, ‘Bummahs he wen mahke, braddah! Bummahs, sistah!’
Dey no goin tell, ‘Bummahs, oua king wen mahke! Bummahs, awesome him!’
19 Dey goin bury him jalike he one mahke donkey.
Dey goin drag um outside da Jerusalem town gate
An dump da body ova dea.
20 Eh, you Jerusalem peopo!
All da ones dat can help you fight
Stay all bus up awready!
No matta you guys go up on top da Lebanon mountains an yell,
O go make dem hear yoa voice Bashan side,
O yell from da Moab mountains,
Dey no can help you you know!”
21 “Dat time eryting stay okay fo you, I wen tell you watch out!
But you tell, ‘I no goin lissen you!’
Az how you ack from small kid time.
You neva lissen me!
22 I goin make all yoa leada guys come prisonas
Jalike one strong wind blow um away.
All da ones dat can help you fight
Goin come prisonas an go one far place.
Den, you goin get plenny shame an lose face,
Cuz a all da bad kine stuff you wen do.
23 You da king dat live inside Lebanon kine palaces,
Dat get cedar wood fo make high makamaka.
You goin moan plenny wen you start fo hurt,
Jalike one wahine wen she born one bebe.”
One Message Fo King Koniah
24 ✡22:24: 2Kings 24:8-15; 2Rec 36:9-10Da One In Charge tell: “Fo shua, I da God dat stay alive. An I stay shua too bout you, Koniah (yoa faddah Jehoiakim was da king fo Judah). I stay shua dat no matta you stay tight wit me jalike one ring on top my finga, I still goin hemo you off my finga. Cuz you no stay tight wit me, I goin dump you! 25 I goin give you to da guys dat like kill you. Dey da ones make you come sked. Dass Nebukadnezzar, da king fo Babylon, an da Babylon army guys. 26 I goin throw you out, an yoa muddah too dat wen born you, an make you go anodda land. You an her neva born ova dea, but you two guys goin mahke ova dea. 27 You guys no goin come back dis land, no matta you like come back fo real kine.”
28 Peopo tell: “Dis guy Koniah—
He jalike one pot dat erybody tink no good awready,
Dat stay all bus up.
He jalike one dish,
Dat no mo nobody like keep um.
How come gotta throw out him an his kids
An make um go anodda country
Dey neva know befo, aah?!
29 Lissen up! Even da Judah land
Gotta lissen up good, wat Da One In Charge tell!”
30 Dis wat he tell: “Write down dis Koniah guy name inside da records
Jalike he neva have kids.
Cuz from now till he mahke, he no goin do notting,
No goin get nobody from his blood line
Dat goin get da right one fo come king.
Dey no can come da kings from King David blood
Dat goin get da right fo stay in charge inside Judah!”
✡22:5 22:5: Matt 23:28; Luke 13:35
✡22:11 22:11: 2Kings 23:31-34; 2Rec 36:1-4
✡22:18 22:18: 2Kings 23:36–24:6; 2Rec 36:5-7
✡22:24 22:24: 2Kings 24:8-15; 2Rec 36:9-10