31
Da Israel Peopo Goin Come Home
(Matthew 2:18; John 6:45; Rome 11:26-27; Hebrews 8:8-12; 10:16)
1 Da One In Charge tell dis: “Dat time, I goin come da God fo all da peopo dat get da Israel blood line, an dey goin come my peopo.” 2 Den Da One In Charge tell dis:
“Da peopo dat still stay alive Moses time
Afta da Egypt guys try fo kill dem,
I wen make dem spesho kine
Wen dey stay inside da boonies,
An wen dey go from dea fo res inside dea land.”
3 From long time befo time,
Me, Da One In Charge, I wen show up fo dem see me. I tell:
“I get plenny love an aloha fo you guys fo long time.
Dass why fo long time I stay tight wit you guys.
4 You Israel peopo,
Jalike you my daughtah dat I love!
I goin build you guys up one mo time
Jalike one strong house,
An you goin come solid inside.
One mo time you goin take yoa tammorines
Fo dance an sing wit yoa frenz an get good fun.
5 You guys goin plant grape fields one mo time
On top da hills aroun Samaria town.
Afta da year wen dey give da new grapes to me, Da One In Charge,
Den da farma guys dat plant um
Can eat da grapes.
6 Goin come one time
Wen da security guard guys
On top da hills Efraim side
Goin yell lidis:
‘Go come! fo us go Mount Zion
Fo talk to oua God, dass Da One In Charge a us, Jerusalem side.’ ”
7 Dis wat Da One In Charge tell:
“Yell, cuz you stay good inside,
Bout how da peopo dat come from Jacob stay!
Yell fo da nation dass mo importan den all da odda nations!
Let erybody hear dat you tell good stuff bout Da One In Charge.
Tell: ‘Da One In Charge, get yoa peopo outa trouble,
All da Israel peopo dat stay alive still yet.’ ”
8 Da One In Charge tell dis too:
“Look! I goin bring my peopo thru da north land.
I goin bring um togedda from da mos far places on top da earth.
Some a dem goin be peopo dat no can see, an peopo dat no can walk good,
Da hapai wahines, an da wahines dat start fo born dea kid awready, all togedda.
Plenny peopo goin come back.
9 Dey goin cry all da way hea,
An wen I lead dem, dey goin pray plenny.
I goin bring dem by da streams dat get plenny watta inside dat time,
On top one easy fo go road
Wea nobody goin trip an fall down.
Cuz I da faddah fo da Israel peopo,
An da Efraim ohana, dey jalike my numba one boy.
10 “Lissen wat me, Da One In Charge, tell, you peopos!
Make shua erybody inside da far away islans know dis!
Tell um: ‘Da One dat wen scatta da Israel peopo,
He da One goin bring dem back togedda.
He goin take kea dem
Jalike one sheep guy take kea his sheeps.’
11 Cuz Da One In Charge goin do wat he gotta do
Fo da peopo dat come from Jacob
No need be one slave no moa.
Jalike he goin buy um back fo dea ohana
From da peopo dat mo strong den dem.
12 Dey goin come back yelling cuz dey stay good inside,
On top da hill wea Da One In Charge stay, Zion side.
Dey goin smile plenny cuz Da One In Charge give um plenny—
Wheat an barley, new wine an olive oil,
Young sheeps, goats, an cows.
Dey goin stay jalike one garden dat get plenny watta.
Dey no goin lose fight no moa.
13 Den da young girls goin dance an sing
Cuz dey stay good inside.
Same ting fo da young guys an da ol guys.
Dey goin dance an sing too.
I goin change dem from stay sad inside to stay good inside.
I goin give dem good kine words, so dey no stay sad no moa.
14 I goin give da pries guys da bestes kine stuff fo eat
Fo dem stay good inside.
I goin give my peopo all da good stuff dey can eat.”
Az wat Da One In Charge tell.
15 ✡31:15 a: Start 35:16-19; b: Matt 2:18Dis wat Da One In Charge tell too:
“I hear one voice from inside Ramah town.
Somebody dea stay sad inside an cry.
Jalike Rachel stay cry real hard fo da peopo dat come from her.
She no let nobody tell her nice kine stuff bout her ohana.
Cuz dey no stay no moa.”
16 Dis wat Da One In Charge tell Rachel:
“Stop yoa crying an yelling.
No need cry,
Cuz you wen raise yoa kids good,
I goin do good tings fo you,
Cuz a da work you wen do.
Dey goin come back
From da land wea da peopo stay agains you.”
17 Da One In Charge tell dis too:
“Da ting you like see happen,
Fo shua dat goin happen bumbye.
Da peopo dat goin come from you
Dey goin come back dea land.
18 Fo shua, I hear da Efraim peopo make sad kine noise,
Dey tell: ‘You wen punish us guys jalike us one young cow
Dat no like learn how fo pull one plow.
But now, us guys know dat you wen punish us guys
Fo teach us one lesson.
Help us go home, an we goin go,
Cuz you, oua God, dass Da One In Charge a us!
19 Afta us guys wen go da wrong way, us come real sorry.
Afta you show wat kine guys us, us slap oua head.
Us get plenny shame an peopo no mo respeck fo us,
Cuz from small kid time, us do bad kine stuff, an peopo talk bad bout us.’ ”
20 But Da One In Charge tell:
“Da Efraim peopo, dey my kids dat I love!
Dey my kids, an dey make me feel good inside.
I grumble bout dem plenny times,
Still yet, I no foget dem even litto bit!
Az why I stay sad inside
Cuz I miss dem plenny.
I get plenny love an pity fo dem.”
Az wat Da One In Charge tell.
21 “You Israel peopo,
Jalike you da daughtah dat I love!
Pile up rocks
Fo show da way fo go back home!
Put up signs nea da road
So da peopo goin know wea fo go.
Tink bout da main road dat you wen take
Wen you wen come prisonas!
You Israel peopo, go back yoa towns.
22 How long you guys goin wait
An donno wea you stay going
Befo you make up yoa mind?!
You Israel guys jalike da daughtah dat I love,
Dat befo time, wen ack
Jalike one wahine dat no stay tight wit her husban.
Az how me, Da One In Charge, goin do one new ting on top da earth fo change eryting—
Jalike if da wahines wen take kea da guys.”
23 Dis wat Da One In Charge, da God Ova All Da Armies, da God fo da Israel peopo, tell: “Da peopo inside da Judah ohana land, dat live inside da towns ova dea, I goin bring dem back from wea dey stay prisonas. An wen I do dat, dey goin talk lidis one mo time:
“ ‘I like fo Da One In Charge do good kine stuffs fo Jerusalem town,
Cuz da One Dat Do Wass Right Erytime, live dea.
I like him do da same ting fo da hill dat stay spesho fo Da One In Charge!’
24 “Da peopo goin live togedda inside da Judah land an all da towns dea, wit da farma guys, an da guys dat move aroun wit dea animals too. 25 Erybody dat come weak cuz dey thirsty, I goin give um plenny fo drink. Erybody dat feel jalike dey goin fall down cuz dey hungry, I goin feed dem plenny.”
26 Den I wake up an look aroun. An cuz I wen sleep good, I feel good.
27 Da One In Charge tell: “Da time goin come wen da Israel an Judah land goin get plenny peopo an animals, jalike I wen throw seed all ova da place. 28 Befo time, I wen make shua da peopo dat stay agains dem go pull dem up, bus um up, wipe um out, an hurt um! But from now, I goin make shua I plant um good an make um come strong.” Dass wat Da One In Charge tell.
29 ✡31:29: Ezek 18:2Dat time, peopo no goin talk jalike dey figga God wen punish dem fo da bad tings dea ancesta guys wen do. Dey no goin tell:
“Da faddah guys wen eat sour grape,
But goin be dea kids mout goin hurt.”
30 But az not true! Erybody goin mahke cuz a da bad kine stuff dey wen do, not wat some odda guy wen do. Az jalike whoeva eat da sour grape, dey da ones dea mout goin hurt.
31 ✡31:31: Matt 26:28; Mark 14:24; Luke 22:20; 1Cor 11:25; 2Cor 3:6✡31:31: Heb 8:8-12Da One In Charge tell,
“You know wat?! Da time goin come,
Wen I goin make one new deal
Wit da Israel peopo an da Judah peopo.
32 No goin be jalike da deal
I wen make wit dea ancesta guys,
Da time I wen take dea hand
An pull um outa Egypt.
Cuz dey wen broke dat deal I wen make wit dem,
No matta I get da right fo tell dem wat fo do.”
33 ✡31:33: Heb 10:16Da One In Charge tell,
“Dis da deal I goin make wit da Israel peopo afta dat time:
I goin put my rules inside dem.
Jalike I write um inside dea head.
Den I goin come dea God, an dey goin come my peopo.
34 ✡31:34: Heb 10:17One guy no need teach his fren
O his braddah no moa, an tell um, ‘Know Da One In Charge.’
Cuz dey all goin know me, Da One In Charge,
From da kine guys dass not importan, to da kine guys dass importan.”
Az wat Da One In Charge tell.
“Cuz I goin let um go fo da stuffs dey wen do wrong,
An hemo dea shame fo all dat.
I no goin even rememba da bad kine stuffs dey wen do.”
35 Dis wat Da One In Charge tell,
Da One dat tell da sun fo shine day time,
An tell da moon an stars dey suppose to shine nite time,
Da One dat make da ocean move
So da waves make big noise—
Da One In Charge, da God Ova All Da Armies, do dat.
Dass wat kine god him!
36 Da One In Charge tell:
“Jalike I goin make shua
Dat da tings I tell da sun an moon an stars
No goin disappea from in front me.
Same ting, I goin make shua
Dat da Israel ohana blood line
Goin stay one nation in front me foeva.”
37 Dis wat Da One In Charge tell:
“No mo nobody can measure da sky up dea,
An no mo nobody can find all da foundations down undaneat da earth!
Same ting, I no goin throw out all da Israel ohana
Cuz a all da kine stuff dey wen do!”
Az wat Da One In Charge tell.
38 Da One In Charge tell, “You know, da time goin come wen da peopo goin build Jerusalem town fo me one mo time, from da Hananel Towa to da Corna Gate west side. 39 Dey goin measure da west side wall from ova dea, strait ova da Gareb Hill, den turn east an go to Goah. 40 Inside da valley wea dey throw da mahke bodies an da ashes, an on da fields on da side a da valley from dea to da Kidron Stream, den to da corna nea da Horse Gate on da east side, all dat goin stay spesho fo me, Da One In Charge. Nobody goin bus up Jerusalem one mo time.”
✡31:15 31:15 a: Start 35:16-19; b: Matt 2:18
✡31:31 31:31: Matt 26:28; Mark 14:24; Luke 22:20; 1Cor 11:25; 2Cor 3:6
✡31:31 31:31: Heb 8:8-12