6
Da One In Charge Poin Finga His Peopo
1 Lissen wat Da One In Charge tell:
“Stan up in front da Judge!
Tell how come you do
Wat you wen do!
Tell um in front da mountains!
Let da hills hear wat you guys tell
Bout wat you wen do!
2 “Lissen wat me Da One In Charge tell
Fo poin finga my peopo.
Let da mountains hear dat.
Dey da strong foundations
Fo da earth dat stay foeva.
Lissen cuz Da One In Charge know
How come he poin finga his peopo,
Da Israel peopo!
3 Eh, my peopo,
Wat I wen do agains you guys, aah?!
Wat kine stuff I wen do
Fo make you guys tell me az why hard?!
Tell me da ansa!
4 ✡6:4 a: Outa 12:50-51; b: Outa 4:10-16; c: Outa 15:20Fo shua, you guys know,
I wen bring you guys outa da Egypt land.
I wen pay da price fo take you guys outa dea,
Wea you guys was slave guys.
I wen sen Moses fo lead you guys,
An Aaron an Miriam too.
5 ✡6:5 a: Census 22:2–24:25; b: Josh 3:1–4:19“My peopo,
No foget wat Balak wen tell
Da king fo da Moab peopo,
Dat he wen like put kahuna
On top you guys!
No foget how Beor boy Balaam wen ansa him,
Dat Da One In Charge ony goin do good stuff fo you guys!
No foget how you guys wen go from Koa Town to Gilgal,
Wen me Da One In Charge do awesome stuff
Fo help you guys go da odda side a da Jordan Riva.
Den you goin undastan dat me, Da One In Charge,
Stay do wass right fo you guys erytime.”
Da Peopo Talk
6 Den da peopo tell:
“Fo make tings right,
Wat I can bring fo Da One In Charge
Wen I go in front him?
Wen I go down fo show respeck
Fo da God Up Dea Inside Da Sky?
I goin bring bebe cows one year ol,
Fo make burn up kine sacrifice, o wat?
7 You figga Da One In Charge goin stay good inside
If I bring tousan boy kine sheeps?
Maybe 10,000 rivas full a olive oil?
Maybe I even goin bring my boy,
Da firs one dat wen born,
Dat come from me,
Fo make him come one sacrifice fo Da One In Charge!
You figga dat goin be enuff,
Cuz a all da bad kine stuff I wen do, o wat?”
Micah Talk To Da Peopo
8 Den Micah tell:
“No need! Da One In Charge tell you awready
Wass good fo you do,
An how he like you fo ack.
You gotta do wass right,
An stay tight wit God ery day,
An come las, not firs, wit God.”
9 Lissen up! Da One In Charge stay call
To da peopo inside da big town Jerusalem.
Wen peopo stay sked a God an show respeck,
Cuz dey know wat kine god him,
Dat show dat dose peopo know wat fo do erytime.
Da One In Charge
Poin Finga Dem One Mo Time
Poin Finga Dem One Mo Time
“Lissen up good, you Judah ohana peopo,
An da ones dat come togedda inside Jerusalem:
Da army guys dat goin wipe out yoa town,
Dey stay come awready!
10 Da One In Charge tell:
‘You guys tink I still yet goin foget da real bad guys?
Da way dey bulai how dey measure da wheat,
An stash da stuffs dey wen steal inside dea house?!
No ways I goin let um do dat!
11 You tink I suppose to let dem go
Wen dea scales bulai an dey weigh um wrong?!
12 All da rich guys from Jerusalem ony like bus up peopo.
Da peopo dat live ova dea stay bulai erytime.
Erytime dey talk, dey make scam.
13 Dass why me Da One In Charge
Stay start awready fo wipe out you guys,
An wack you guys so hard I make you come sick.
I mess you up cuz a all da bad kine stuff you guys do.
14 You guys goin eat, but you no goin come full.
You guys still yet goin stay hungry erytime.
You guys goin stash stuff,
But you guys no can keep um long time.
Cuz wateva you guys get,
I goin let odda guys bus um up wit swords.
15 You guys goin plant food,
But you no goin harves da food.
You guys goin step da olives fo press out da oil,
But you no goin get oil fo pour on top yoa head.
You guys goin step da grapes fo press out da juice,
But you no goin get wine fo drink.
16 ✡6:16 a: 1Kings 16:23-28; b: 1Kings 16:29-34; 21:25-26But still yet you guys do
Wat da rules from King Omri tell you fo do.
An you copy eryting Omri boy King Ahab an his ohana stay do.
You guys follow eryting dey tell you az good fo you do.
Az why I goin let you guys come all bus up.
So den, da odda peopos goin tell, “Bummahs!”
Wen dey tink bout you guys.
Da odda peopos goin laugh an make fun a you guys.’ ”
✡6:4 6:4 a: Outa 12:50-51; b: Outa 4:10-16; c: Outa 15:20
✡6:5 6:5 a: Census 22:2–24:25; b: Josh 3:1–4:19
✡6:16 6:16 a: 1Kings 16:23-28; b: 1Kings 16:29-34; 21:25-26