Din Solat
Sin Hebreo
Maipanggep Sin Solat Ay Nay
Din solat ay nay et naisolat sin esay gimong di Judio ono Hebreo ay mamati. Naisolat ta mapapigsa din pammati da, tan masepsep ay mapalpaligatan da, et nganngani ay taynan da din pammati da en Cristo ta mantaoli da sin relihion di Judio. Din inyat di nangisolat ay nangipapigsa en daida et inpaammo na din kinangaton di kasasaad Jesus.
Tolo di napateg ay inpalawag na ay maipanggep en Jesus. Din damo et Anak Diyos sisya ay magay nanlogiana ya patingga na. Gapo ta sisya din Anak Diyos, nangatngato mo din mamadto ya si Moses ya olay din aanghel. Maikadwa, nabanbanol di inamag Jesus mo din inam-amag di papadin di Judio, isonga sisya di naiskat en daida ay mangiaalagey si ipogaw en Diyos ay eng-enggana. Maikatlo, begew en sisya, maisalakan ay kosto di ipogaw, tan sisya din kosto ay natongpalan di og-ogalin di Judio ya din aanimal ay indatdaton da en Diyos.
Pag dad-aten din nangisolat din inam-amag di madayaw ay Judio ed nabaon begew sin pammati da ta say ipapasnek koman din mamasa ay mamati en Jesus, olay mo peteg ay mapalpaligatan da. Sin kakdengan di solat, binagbagaanas daida ta adi da omaddawi en Diyos mo adi et onodan da di kabibiyag ay panlaylaydana.
Din Linaona
Din kinadiyos Jesus ay Anak Diyos 1:1-3
Nangatngato si Jesus mo din aanghel 1:4–2:18
Din nanlasinan di kinapadin Cristo 4:14–7:28
Din nanlasinan di intolag Diyos ay siniglotan Cristo 8:1–9:28
Din nanlasinan di indaton Cristo 10:1-31
Din pateg di pammati 11:1-40
Din kabibiyag di mamati 12:1–13:19
Din kakdengan di solat 13:20-25
1
Din Kinadiyos Jesus Ay Anak Diyos
1 Ed nabaon, namin ado ay waday inpaammon Diyos sin aap-o tako babaen sin nankalkaliana ay mamadto. Nankinalasi abe di inyat na ay nangipaammo. 2 Ngem sin nay maod-odi ay agew pay, din nakikaliana en datako et din Anak na. Din nay Anak na di nangipaparsuaana sin am-in ay wada ya sisya di pinili na ay manawid sin am-in. 3 Maiila abe en sisya din am-in ay kinasiged ya kinangaton Diyos, tan sisya din kostokosto ay kaipailaan di kinadiyos en Diyos. Sisya abe di mangol-olnos ya manmanngel sin am-in ay wada, et din kali na anggoy di os-osalena tan manakabalin. Idi nakdeng di inamag na ta malinisan din basbasol di ipogaw, nantaoli ed langit et tinmokdo sin makannawan Diyos.
Nangatngato Din Anak Diyos Mo Din Aanghel
4 Isonga nanbalin ay nangatngato mo din aanghel. Siya abe din inpangadan Diyos en sisya et madaydayaw mo din ngadan di aanghel. 5 Tan maga polos di anghel si nangibagaan Diyos en,
“Sik-a din Anak ko. Ed wani ipailak ay sak-en si Amam.”*Salmo 2:7; Inam-amag 13:33.
Adi aben inbagan Diyos maipanggep si olay sino ay anghel,
“Sin-ama kami.”†2 Samuel 7:14.
6 Et sin nangibaaan Diyos sin besag ay Anak na sinan daga,‡Mo maipanggep si ibilang Diyos ay besag na, ilaen sin 12:23. Mo maipanggep abe si lebbeng di besag, ilaen sin 12:16-17 ya Genesis 25:29-34 ya Genesis 27. kanana,
“Dakayo ay aanghel ko, dayawen yo am-in sisya.”§Deuteronomio 32:43.
7 Siya na di kanan Diyos maipanggep sin aanghel,
“Din aanghel ko et ibabbaak daida ay kaman dagem ya apoy.”*Salmo 104:4.
8 Ngem din kanana pay sin Anak na et,
“Sik-a ay Diyos, manturay ka ay eng-enggana. Nalinteg abe di iyat mo ay manturay. 9 Laylaydem din siged ya kalkaliget mo din lawa. Isonga sak-en ay Diyos mo et peteg di dayaw ya ragsak ay indawat ko en sik-a mo din iib-am.”†Salmo 45:6-7.
10 Kanana abe,
“Sin damodamo, sik-a ay Apo di namarsua sin daga ya am-in abe ay wada ed daya. 11-12 Awni et mamaga da am-in, ngem sik-a pay et wada kas eng-enggana. Kaman dan bado ay domaan ya masokatan, tan awni et sokatam daida. Ngem mo sik-a pay, komakaman ka, tan magay pap-eng di biyag mo.”‡Salmo 102:25-27.
13 Maga abe di olay esay anghel ay nangibagaan Diyos sin inbaga na sin Anak na ay kanana,
“Tomokdo ka sin makannawan ko ta dowanak ipagatin en sik-a am-in di kaibaw mo.”§Salmo 110:1; Inam-amag 2:34-35.
14 Sino ngarud di kasasaad di aanghel? Daida met din adi kaila ay mansilsilbi en Diyos, et ibabbaa nas daida ay en mamadang sin kaipoipogaw ay maisalakan.
*1:5 Salmo 2:7; Inam-amag 13:33.
‡1:6 Mo maipanggep si ibilang Diyos ay besag na, ilaen sin 12:23. Mo maipanggep abe si lebbeng di besag, ilaen sin 12:16-17 ya Genesis 25:29-34 ya Genesis 27.
§1:13 Salmo 110:1; Inam-amag 2:34-35.