A Pas torom a taro
Ibru
A wasiso talapor mugu
A pas ri di tumusi torom a taro Juda, ra det sa nukpukus ma det nurnur un o Iesu. Di watung det kai nama taro Ibru, uni det wasiso nama wasiso Ibru. Katutaio i tasman osi ra i tumus a pas ri.
A kum tene nurnur ra di tumus a pas ri torom det, det los a kum lamlabino mamaut tan a taro ra ka det nurnur. Ara taro det nem na milet melet sur a lotu Juda.
A pas ri i udekdek det sur gong det milet melet. Ra tu maut in los det, det in tur dekdek una nurnur tuk una bung ra det in mat. Una nurnur kut un o Iesu det in tokodos umatan o God, katu kisapi melet. Det in tamtama sur o Iesu ma det in mur a magirano ma det in winim pas a kum maut.
A pas ri i wasiso una tulu lamlabino utna.
1. O Iesu i labo sakit, i a Nutun o God ma i labo taun a kum ensel, a kum poropet ma o Moses kai. Ra o Iesu i kis nin una rakrakon bual, i los a labino maut ma a kum ngunungut. Una kisapi ra, i wanpat anundat a Tene Ulaun.
2. O God ut i pilok pas o Iesu sur i a mugumugu na tene etabor tukum torom o God. Ma i labo taun a kum tene etabor rop anun a taro Juda.
3. O Iesu i a mugumugu na tene etabor mulus ra i kis sapat netes una langit. Ma i ser ulaun pas a taro ra det nurnur uni. A kum pinapam na lotu, ra a kum Warkurai anun o Moses det wasiso uni, det elar kut nama malalar ina labino pinapam mulus ra o Iesu i pami. I etabor nama gapino ut. Ma a matok na kunubus ra o Iesu i pami, i keles ru a mugano kunubus.
A inawan ina Pas Ibru:
O Iesu a Nutun o God, ma i ese o God torom dat (1:1-4)
O Iesu i labo taun a kum ensel, ma i a Tene Ulaun (1:5-2:18)
O Iesu i labo taun o Moses ma o Josua (3:1-4:13)
O Iesu anundat a labino mugumugu na tene etabor torom o God (4:14-7:28)
A matok na kunubus (8:1-9:28)
A gapin o Iesu i unus ru anundat a kum sakino petutna (10:1-39)
A nurnur (11:1-40)
Dat in nurnur un o Iesu ma dat in muri (12:1-13:19)
A ururop na wasiso (13:20-25)
1
A Nutun o God i labo sakit taun a kum ensel
1 Numugu utmakai o God i wasiso torom a kum tumtubun dat nama wan a kum poropet. I wasiso una susut na dino ma una wur ngas na kisapi. 2 Jn 1:3Ikut una kum ururop na bung ri, i wasiso torom dat nama wan o Nutunu. O Nutunu ra i pilok pasi sur in los a kum utna rop anun o God. Ma una laman o Nutunu, o God i ukis a rakrakon bual rop. 3 Ap 2:33-34; Kol 1:20; Ibr 8:1O Nutunu i talapor doko nama minamar anun o God, ma i elar mulus ut nam o God. I pam ukai a kum utna rop nama nun a dekdek na wasiso sur det in papam tomo wakak. I pitar tar anun a nilaun, sur in rus talapor dat gusun a kum sakino petutna rop. Ra i sa pam rop tar a pinapam ra, i kis una papor sot na laman a labino King sakit, sapat netes una langit. 4 Pil 2:9I mo ra, o God i ulabo pas o Nutunu sur in labo sakit taun a kum ensel. I labo sakit, lar ut a risano i labo sakit taun a risan a kum ensel. A risano ra o Tamano i pitar tari tano.
5 Ap 13:33; 1 Sto 17:13Uni o God awu sur i watungi torom tu ensel lenri,
“Ui a Nutung,
ma uniri a sa wanpat o Tamam.” Sng 2:7
ma awu sur i watungi kai un tu ensel lena,
“Iau o Tamano,
ma i a Nutung.” 2 Sml 7:14
6 Rom 8:29Ikut, ra o God i tulu ru a mugano Nutunu urin una rakrakon bual, i watungi uni lenri,
“I wakak ra a kum ensel rop anun o God det in lotu toromi.” Lo 32:43
7 Ma i watungi una nun a kum ensel lenri,
“I pukus anun a kum ensel sur det in elar nama wuwu,
a kum ensel ra det anun a kum tultul,
i pukus det sur det in elar kai nama kunabor ina sungun.” Sng 104:4
8 Ikut o God i watungi un o Nutunu lenri,
“God, anum a kiskis na king in kis tukum ma ken rop.
U ser warkurai sur a taro tagun anum a matanitu nama tokodos na petutna.
9 U nem doko a tokodos na petutna,
ma u nget a sakino petutna.
I mo ra o God, anum a God, i pilok pas ui,
ma i pitar tar a gasgas ma a urur tam,
ra i labo sakit taun a gasgas ma a urur ra i pitari torom a kum paspasam.” Sng 45:6-7
10 Ma o God i watungi kai torom o Nutunu lenri,
“Labino, una turturkibino, ui u ukis tar a kibin a rakrakon bual,
ma u ukis a bakut nama lamam.
11 Der in rop kut, ikut ui un kis tukum.
Der in turai elar namin namalu.
12 Un pul der elar namin namalu na rakrakup,
un keles der elar nam ara ra i keles ru in turai na malu.
Ikut ui, kon keles, un kis lenutra,
ma anum a kum kilalo ken rop.” Sng 102:25-27
13 O God awu sur i watungi kai torom tu ensel lenri,
“Un kis una papor sot na lamang,
tuk ra an winim pas anum a kum ebar
sur det in kis utuntudu in anum a warkurai.” Sng 110:1
14 Sng 34:7; 91:11A kum ensel rop det a kum nion, ra det papam torom o God, niko? I tulu ru det sur det in warut a taro, det ra in ulaun det.