15
Na deteana Jesus inaghona Pilate
(Matthew 27:1-2, 11-26; Luke 23:1-5, 17-26; John 18:28—19:16)
1 Mete labota pungipungi gaira rana lei manesukaghi kamanagho mana ovu ni dete tara ghoi vaukolu, mara padalaghinia na hava kara nea vania Jesus. Vaho ge ra pitia Jesus mara hola vania vaa Pilate. 2 Ma Pilate te huatia Jesus, me vania, “?Ighoe na vunaghi habadira na Jew?”
Ma Jesus te bosa tughu me ghaghua, “Te vaghaa to bosaa.”
3 Ma gaira rana manesukaghi kamanagho tara hurua nia te subo na totobo a Jesus. 4 Ma Pilate te ghoi huatia so me ghaghua, “?O mua bosa tughui na lei totobo tara hurugho nia?” 5 Ma Jesus te mua bosa tughu vania Pilate. Ma Pilate te nia hare ngangata.
6 Tana tughu Gougonu ni Lovovule, taonia nina nilabu, Pilate ke tangomana na lubati tatavahaleana siki tinoni tana vale pipiti, kara nongia na vuresubo itatana. 7 Ma sakai na tinoni igaa tana vale pipiti na ahana a Barabbas te sakai tadira rana tinoni tara labupolo tana bona ni gunaguna. 8 Tana bona na vure subo tara vaa ta Pilate, mara nongia ge ke lubatia vanira siki sakai ke hagha tana vale pipiti, taonia nina nilabu heghena. 9 Ma Pilate te huatira na vure subo me vanira, “?Ighau tau liona ge ku lubati tatavahalea vanighau na vunaghi habadira na Jew?” 10 Pilate te ghilala utora na lei manesukaghi kamanagho tara lotia Jesus, na pukuna tara nia ghaghana.
11 Ma rana lei manesukaghi kamanagho tara keikerira na vure subo ge kara nongia Pilate na lubati vanira a Barabbas. 12 Ma Pilate te ghoi huatira na vure subo me ghaghua, “?Mana hava ku nea vania Jesus na vunaghi habadira na Jew?”
13 Ma gaira tara ghaeghahe mara ghaghua, “Patokia!”
14 Ma Pilate te ghoi huatira so na vure subo me vanira, “?Na hava na hahi ia te gonia?”
Ma gaira tara ghaeghahe sule vaa mara ghaghua, “Patokia!”
15 Ma Pilate te liona ge ke togholuvura na vure subo. Vaho ge lubati tatavahalea vanira a Barabbas. Ge bosa vanira na lei malaghai kara ramusia Jesus, ma kara patokia tana ghaivavala.Matthew 27:15-26; Luke 23:13-25; John 18:39—19:16
Rana malaghai tara batobatoa Jesus
(Matthew 27:27-31; John 19:2-3)
16 Ma rana malaghai tara holaa Jesus va tana bebetena na vale vatu ngasi, tara holoa nia na Praetorium.*Praetorium Na vale vatu ngasi ivei na lei malaghai ni Rome tara ghahara i Jerusalem. Mara holo kolura rana ovu ni malaghai udolu. 17 Mara pupulua nia na pupulu daro te boibongi vaghaa na vunaghi haba. Mara polia na pitiulu ni karukaili mara talua tana uluna. 18 Mara batobatoa Jesus mara ghaghua, “Aghe, ighoe na vunaghi habadira na Jew.” 19 Mara labua na uluna nia na ghai, mara angusua. Mara tualaghi tuturu batobato vania. 20 Mara batobato sokoa tua, ge ra suakehaa na pupulu daro boibongi. Mara pupulua nia anina pupulu heghena. Vaho ge ra hola tonaa Jesus ge kara patokia tana ghaivavala.
Tara patokia Jesus tana ghaivavala
(Matthew 27:2-44; Luke 23:26-43; John 19:17-27)
21 Ma rana malaghai tara holaa Jesus mara nia tona mara va topoa a sakai na tinoni ni Cyrene te vaho haghe mai Jerusalem, na ahana Simon, na tamadira Alexander ma Rufus. Mara kurutia ge ke holaa na ghaivavalana Jesus. 22 Ma gaira tara holaa Jesus vaa tana bona tara holoa nia Golgotha, tana leuda ‘na bona ni savu ni ulu.’ 23 Ma gaira tara haua vania na wine mali tara lolola kolua nia na myrrh.†na myrrh. Na lei malaghai tara hea na inu eni na pukuna te hanga pilea tana vahaghitaili na tinoni tara patokia tana ghaivavala. Ma Jesus te mua inuvia. 24 Gaira tara patokia tua, ge ra tuvalighi nina pupulu ighobudira nia na soni dice, ge kara vilia ahei ke holaa na hava ke tangomanaa.Buka Linge 22:18
25 Tara patokia Jesus tana ghaivavala tana tangi hiua. 26 Tara talua tana ghaivavalana Jesus na gegere tutughuni tara hurua nia, te ghaghua, “Na vunaghi habadira na Jew.” 27-28 Ma Jesus tara patoki kolura nia erua na tinoni, ro gito moro labupolo, sakai tana madolona me ruani tana maulina.‡Na balu gegere tara talua na bosa raini, Mana gegere tabu te kale iga, ‘Tara idumi kolura itatana tara tangohahi.’ (Isaiah 53:12)
29 Mana vure tara sakutua tona haliu, tara birubirui na uludira mara batobatoa Jesus, mara ghaghua, “Ighoe ko haurakea na Valetabu mo ko kisu olia e tolu na bongi,Buka Linge 22:7; 109:25; Mark 14:58; John 2:19 30 ko vavolagho heghemu, mo ko horu mai sania na ghaivavala.”
31 Vagha ghua, rana manesukaghi kamanagho ma rana manetarai ni vetena nina Moses, maia rana lei mane huhuli tara batobatoa, mara ghaghua heghedira, “Te vavolara rana keha, me ke mua tangomana ge ke vavolaa heghena. 32 Me ke vagha gaia a Christ, na vunaghi habadira rana Jew ke, me ke horu mai tana ghaivavala itaeni, ma ka righia ge ka taluutunia.”
Erua na tinoni tara patoki kolua nia Jesus, toro koehorua ghua.
Na Mateana Jesus
(Matthew 27:45-56; Luke 23:44-49; John 19:28-30)
33 Tana kutu ni dani kama, me va sara tana tangi tolu, na pungi te kuvihia na kema udolu. 34 Mi tana tangi tolu, a Jesus te nia ghaeghahe na manga te sule, “Eloi, Eloi, lema sabachthani!” tana leuda te ghaghua, “Nigua na God, nigua na God, e ghua ge o sagauviu.”Buka Linge 22:1
35 Mana balu tinoni tara tughuru dutuvia Jesus, tara rongovia mara ghaghua, “Agaia te holoa Elijah.” 36 Ma sakai itadira te sama me lavia na leilesi me lumia tana wine mali, ge sukavaa tana ghai, me haua va tana mangana ge ke inuvia. Me ghaghua, “Sania soo iga. ?Ma ka righia ke mai Elijah me ke hola horua tana ghaivavala pe ke taho?”Buka Linge 69:21
37 Ma Jesus te nia ghaeghahe na manga sule, ge mate.§Tughu bongi tana tangi tolu, na manesukaghi te matea na sheep vania na sukaghi nulavi vanira na Jew udolu. Jesus te mate tana tangi tolu na madala kasila sukaghi vanighita.
38 Tana bona eni, na tivi tara vokoa nia na Bona Tabu ilokana na Valetabu te tarosi, te vuivuni tana kouna me sara tana borona.*Na tivi tara vokoa nia na Bona Tabu Vaho tua, ivei na Bokisi ni Vetena ni Baubahu tabu te ghaha, mana na Bona Tabu, ivei na manesukaghi tara kerea na ghaiuruuru sopa bongi. God te tarosi na tivi na vaughilala ge kalea na voki ighobudira God mana nina vure te haurake. Ighita ta mai lokana na Bona Tabu Vahotua na pukuna na mateana Jesus tana ghaivavala. Righia Buka Rughuhoru 26:31-33.
39 Mana vunaghidira na malaghai te tughuru iga te righia ivei te ghaghua na mate Jesus, ge bosa, “Agaia utuni sughua Dalena God.”
40 Mana balu vaivine tara tughuru hauvia ge ra vaevanea vaa Jesus, balu itadira Mary Magdalene ma Mary (tinadira James na pile ma Joseph,) maia Salome. 41 Gaira rana lei vaivine raini ke, tara tumuria mara hangaa Jesus tana bubulo i Galilee. E subo na lei vaivine keha tara dato kolua Jesus i Jerusalem, tara tughuru ghua igaa tana bona Jesus te sasarau tana ghaivavala.Luke 8:2-3
Na tavughiana Jesus
(Matthew 27:57-61; Luke 23:50-56; John 19:38-42)
42 Mete dutu tua na huana na aho tana bongi vaghana keri tara gonidilaa iga ghua na Sabbath, 43 A Joseph ni Arimathea, na tinoni haba itadira rana ovu ni dete, me pitua na kinakabuna God ke, te liosakai, me va nongia Pilate ge ke lubatia vania na hulina Jesus. 44 Ma Pilate te nia hare te rongovia a Jesus te mate tua, ge holoa mai itatana na vunaghidira na malaghai, ge huatia itatana na mateana Jesus. 45 Mi tana bona Pilate te rongovia Jesus te mate tua, vaho ge lubatia na hulina Jesus vania Joseph. 46 Ma Joseph te pelua na tivi marabu, vaho ge hui horua na hulina Jesus tana ghaivavala, me sausaghua nia. Vaho ge kolivaghinia tana vatuluma ni beku te tagiha gigiloa tana vatu ngasi, me pilipilia na vatu sule me pata nia na mataulana na vatuluma ni beku.
47 Ma Mary Magdalene ma Mary tinana Joseph toro righia na malana na hulina Jesus te kolivaghinia iga.
15:15 Matthew 27:15-26; Luke 23:13-25; John 18:39—19:16
*15:16 Praetorium Na vale vatu ngasi ivei na lei malaghai ni Rome tara ghahara i Jerusalem.
†15:23 na myrrh. Na lei malaghai tara hea na inu eni na pukuna te hanga pilea tana vahaghitaili na tinoni tara patokia tana ghaivavala.
‡15:27-28 Na balu gegere tara talua na bosa raini, Mana gegere tabu te kale iga, ‘Tara idumi kolura itatana tara tangohahi.’ (Isaiah 53:12)
15:29 Buka Linge 22:7; 109:25; Mark 14:58; John 2:19
§15:37 Tughu bongi tana tangi tolu, na manesukaghi te matea na sheep vania na sukaghi nulavi vanira na Jew udolu. Jesus te mate tana tangi tolu na madala kasila sukaghi vanighita.
*15:38 Na tivi tara vokoa nia na Bona Tabu Vaho tua, ivei na Bokisi ni Vetena ni Baubahu tabu te ghaha, mana na Bona Tabu, ivei na manesukaghi tara kerea na ghaiuruuru sopa bongi. God te tarosi na tivi na vaughilala ge kalea na voki ighobudira God mana nina vure te haurake. Ighita ta mai lokana na Bona Tabu Vahotua na pukuna na mateana Jesus tana ghaivavala. Righia Buka Rughuhoru 26:31-33.