1 Řami issiweř Ilicaɛ ak-d temɣart tenni umi tuɣa issfaq mmis, inna as: “Kkar, ffeɣ, cem ak-d twacunt nnem u zdeɣ am yict n tbarranect mani ma tzemmared ad tzedɣed, maɣar SIDI yura ict n řeḥṣaret n řaẓ tenni i ɣa yekken ɛawed sebɛa n iseggʷusa x temmurt.” ◘8:1 2 Ij. 4:34 2 Uca tekkar temɣart, tegga ɛlaḥsab awař n weryaz n AREBBI. Nettat teffeɣ ak-d twacunt nnes uca tezdeɣ sebɛa n iseggʷusa di temmurt n Ifilisṭiniyyen.

3 Awarni sebɛa n iseggʷusa, imsar belli tamɣart teɛqeb-dd zi temmurt n Ifilisṭiniyyen. Nettat teffeɣ, ḥima ad tᵉttar twiza n ujeǧid x taddart nnes d yeyyar nnes. 4 Ajeǧid tuɣa ittḥarreḍ ak-d Jiḥazi, amsexxar n weryaz n AREBBI, inna: “Ḥaja ayi marra timesřayin timeqqranin i igga Ilicaɛ.” 5 Imsar am tuɣa ittɛawad wanita i ujeǧid x mammec dd-issfaq Ilicaɛ ijj n umettin, xzar, tusa-dd temɣart nni umi dd-issfaq mmis, ḥima ad tᵉttar twiza n ujeǧid x taddart nnes d yeyyar nnes. Xenni inna Jiḥazi: “A sidi inu ajeǧid, ta d tamɣart d wa d mmis i dd-issfaq Ilicaɛ ɣar tudart.” 6 Ajeǧid isseqsa tamɣart u nettat tḥaja as tt-i-dd. Xas uca iwca as ujeǧid ijj n umsexxar amcenneɛ, inna: “Ḥḍat ad ɣares ittwarr marra min iǧan nnes uřa d marra ṣṣabet n iyyar zeg wass nni di tejja nettat tammurt ař ass-a.”

7 Ilicaɛ yusa-dd ɣar Dimacq umi Binhadad, ajeǧid n Aram, ihřec. Ḥajan as man aya, nnan: “Aqa aryaz n AREBBI yusa-dd danita.” 8 Xas uca inna ujeǧid i Ḥazayil: “Awi-dd akidek ict n terzeft, ruḥ ad teřqid aryaz n AREBBI uca seqsa zzayes SIDI, ad tinid: “Ma necc ad ggenfiɣ zi řehřac-a?” ◘8:8 1 Ij. 14:2, 3; 2 Ij. 1:2 9 Ḥazayil yuyur ad t iřqa uca yiwi akides ict n terzeft, ɛřam kuř n min iǧan d lemliḥ zi Dimacq, ijj n ddqeř n arebɛin n iřeɣman. Netta yiweḍ u ibedd zzates, inna: “Mmic Binhadad, ajeǧid n Aram, issekk ayi-dd ɣarek, maḥend ad sseqsiɣ: ‘Ma ad ggenfiɣ zi řehřac-a?’ ” 10 Inna as Ilicaɛ: “Uyur, ad tinid: ‘Cek war teggenfid ca kuřci!’ SIDI isscen ayi, aqa netta ad immet nican.”

11 Udem nnes ibɛar u isseqseḥ dayes tamuɣři ařami war issin min ɣa yegg. Xenni ibda weryaz n AREBBI ittru. 12 Xenni inna Ḥazayil: “Mayemmi ittru sidi inu?” Netta inna: “Minzi necc ssneɣ řeḥřiq i d ɣa tawyed cek i ayt n Israil. Cek ad teqqded timessi i lqelɛat nsen, ad tenɣed iḥudriyyen nsen s ssif, ad třebzed iḥenjiren nsen u timɣarin nsen i iksin s ddeyset ad asent tcarrged aɛeddis.” ◘8:12 2 Ij. 10:32; 12:17; 13:7 13 Ḥazayil inna: “Maɣar min iɛna umsexxar nnec, aqzin nni, aqa netta izemmar ad igg řḥajjet d tameqqrant am tanita?” Ilicaɛ inna: “SIDI isscen ayi-dd belli ad tiřid d ajeǧid x Aram.” 14 Xenni iggʷej netta x Ilicaɛ, uca yusa-dd ɣar sidis. Wanita inna as: “Min d ac inna Ilicaɛ?” U netta yarra-dd: “Netta inna ayi: ‘Aqa cek ad teggenfid!’ ” 15 Tiwecca nnes imsar aqa iksi netta ict n malta, isseɣḍeṣ i-tt deg waman uca issars i-tt x uɣembub nnes ařami immut. Uca idweř Ḥazayil d ajeǧid deg wemcan nnes.

16 Deg useggʷas wiss xemsa n Yuram, mmis n Axab, ajeǧid n Israil, umi tuɣa Yahucafat d ajeǧid n Yahuda, idweř Yahuram, mmis n Yahucafaṭ, d ajeǧid n Yahuda. ◘8:16 [2 Im. 21:2-20] — 2 Im. 21:4, 5 17 Netta tuɣa ɣares tnayen u-třatin n iseggʷusa umi idweř d ajeǧid. Netta iḥkem tmenya n iseggʷusa di Urcalim. 18 Netta yuyur deg webrid n ijeǧiden n Israil, am mammec tuɣa tegga taddart n Axab, maɣar yeǧis n Axab tedweř d tamɣart nnes. Netta igga min iǧan d aɛeffan di tiṭṭawin n SIDI. 19 Maca SIDI war ixs ad yareddeǧ Yahuda di ṭṭweɛ n umsexxar nnes Dawud, am mammec d as tuɣa inna, ad as iwc řebda ijj n řefnar zzat i tiṭṭawin nnes di ṭṭweɛ n warrawen nnes. ◘8:19 2 Ṣm. 7:13; 1 Ij. 11:36; 15:4; Izhd. 132:17

20 Deg wussan nnes izemmar Idum ad ixtutteř zeg ifassen n Yahuda umi ɣewwɣen, u nitni ggin ijj n ujeǧid x yixef nsen. ◘8:20 Amz. 27:40; 2 Im. 21:8 21 Xas uca iɛdu Yahuram ak-d marra ikarruten n umenɣi nnes ɣar Ṣaɛir. Uca imsar aqa ikkar s ǧiřet uca ihjem x ayt n Idum inni tuɣa i d as dd-innḍen i netta u i imeqqranen n ikarruten n umenɣi, maca řgens yarweř ɣar iqiḍan nnes. 22 S uyenni, xtuttřen ayt n Idum s uɣewweɣ zi jar ifassen n Yahuda ař ass-a. Di řweqt nni beɛda iɣewweɣ uřa d Libna.

23 Imezruyen i iqqimen n Yahuram, d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda? 24 Yahuram igga ad yareyyeḥ jar řejdud nnes. Netta ittwanḍeř jar řejdud nnes di tendint n Dawud. Mmis, Axazya, idweř d ajeǧid deg wemcan nnes. ◘8:24 2 Im. 21:19

25 Deg useggʷas wiss tenɛac n Yuram, mmis n Axab, ajeǧid n Israil, ibda Axazya, mmis n Yahuram, ajeǧid n Yahuda, ad iḥkem. ◘8:25 [2 Im. 22:1-6] — 2 Im. 22:1 26 Axazya tuɣa ɣares tnayen u-ɛicrin n iseggʷusa umi idweř d ajeǧid. Netta iḥkem ijj n useggʷas di Urcalim. Yemmas qqaren as Ɛatalya, yeǧis n Ɛumri, ajeǧid n Israil. ◘8:26 2 Im. 22:2 27 Netta yuyur deg webrid n taddart n Axab u igga min iǧan d aɛeffan di tiṭṭawin n SIDI, am taddart n Axab, maɣar tuɣa d aḍeggʷař n taddart n Axab.

28 Iffeɣ Axazya ak-d Yuram, mmis n Axab, i umenɣi ak-d Ḥazayil, ajeǧid n Aram, ɣar Ramut di Jilɛad, maca ayt n Aram ɣeřben x Yuram. 29 Xenni yareggʷeḥ ujeǧid Yuram, maḥend ad yarzu di Yazraɛil agenfu zeg iyezzimen nni i d as ggin ayt n Aram umi immneɣ netta di Ramut ak-d ujeǧid nsen Ḥazayil, ajeǧid n Aram. Axazya, mmis n Yahuram, ajeǧid n Yahuda, ihwa-dd din, ḥima ad issijj x Yuram, mmis n Axab, di Yazraɛil, umi tuɣa ihřec netta. ◘8:29 2 Ij. 9:15; 22:6, 7