9
Ola pipul bin sori blanga olabat nogudbalawei
1-2 Wal langa det namba 24 dei blanga det seimwan manth, det namba 7 manth, detlot Isreil pipul bin kadimat miselp brom detlot pipul brom ola najalot kantri, en deibin majurrumap miselp igin dumaji deibin nogudbinji blanga detlot nogudbala ting weya deibin dumbat. Ol detlot pipul hu grengrenfatha olabat bin brom det femili lain blanga Isreil bin werrimon rafwan klos, en deibin pudum graun langa olabat hed en dei nomo bin dagat eni daga dumaji deibin sori miselp detmatj. Deibin wandi onap blanga olabat nogudbalawei en det nogudbalawei blanga olabat grengrenfatha olabat. 3 Basdam sambala men bin ridim det lowa blanga YAWEI, olabat God blanga 3 awa, en blanga najawan 3 awa afta tharran ola pipul bin onap blanga olabat nogudbalawei en deibin weship YAWEI det trubala God blanga olabat.
4 Wal sambala step bin deya langa det pleis, en sambala Libaimen bin jandap ontop langa detlot step en dislot neim blanga olabat na, Jeshuwa, Bani, Kedmiyel, Shebanaiya, Bunai, Sherebaiya, Bani en Kenanai. Deibin prei adbala langa YAWEI det trubala God blanga olabat.
5 Afta na dislot serramonimen bin tok langa ola pipul, Jeshuwa, Kedmiyel, Bani, Hashabaneiya, Sherebaiya, Hodaiya, Shebanaiya en Pethahiya. Deibin tok,
“Jandap en preisim YAWEI det trubala God blanga wi.
Preisim im olagijawan!
Ola pipul garra preisim wi speshalwan God.
Im brabli haibala.
Wi kaan sabi hau blanga preisim im brabliwei.”
Ola pipul bin prei
6 Brom deya ola pipul bin prei,
“Oni yu na, YAWEI.
Yu jidan trubala God blanga melabat.
Yubin meigim skai en ola sta deya ontop.
Yubin meigim det graun en det solwoda en ebrijing weya jidan deya.
Yubin gibit laif langa ebrijing.
En detlot einjul langa hebin weship yu.
7 Yu na YAWEI det trubala God.
Yubin pikimat Eibram en yubin deigidawei im brom det taun gulum Yura langa det kantri gulum Bebalon.
Yubin tjeinjim im neim langa Eibrahem.✡Jen 11:31; 12:1; 17:5
8 Yubin luk imbin oldei bulurrum yu brabliwei,
en yubin meigim brabli strongbala pramis langa im.
Yubin pramis blanga gibit im det kantri blanga detlot traib gulum Keinanait, Hitait, Emarait, Perasait, Jebusait en Gegashait.
En det kantri garra jidan blanga im biginini olabat.
Yubin kipum yu pramis dumaji yu na jidan trubalawan.✡Jen 15:18-21
9 Bambai afta, yubin luk melabat grengrenfatha olabat bin abum adtaim langa Ijip.
Yubin irrim olabat wen deibin jingat langa yu blanga album olabat langa det solwoda gulum Redsi.✡Eksa 3:7; 14:10-12
10 Wal yubin dum olkain ting langa det king en ol im boswan wekinmen, en detlot pipul langa im kantri,
dumaji deibin praudbala en deibin ardim yu pipul.
Pipul langa ola kantri bin tokabat det pawa blanga yu,
en tudei dei stil tokabat tharran.✡Eksa 7:8—12:32
11 Yubin opinimap det solwoda lida langa yu pipul,
en deibin wokwok ontop langa drai graun thru langa midul langa det solwoda.
Bat jis laik sambodi tjakam ston langa dipwan woda en im godan,
wal lagijat na yubin dum langa detlot solja hubin ranimap olabat,
en deibin ol draun.✡Eksa 14:21-29; 15:4,5
12 Yubin go lida langa yu pipul olabat garram longwan klaud deitaim,
en garram longwan faiya naitaim.✡Eksa 13:21,22
13 Langa det bigwan hil gulum Sainai yubin kamdan brom hebin blanga tok langa yu pipul olabat.
Yubin titjim olabat det raitwei.
Yubin gibit olabat trubala wed en ola gudwan lowa.
14 Yubin titjim olabat blanga kipum det Sebathdei holiwan en difrin brom ola najalot dei.
En thru yu wekinmen Mosis yubin gibit ola wed en detlot lowa langa melabat grenfatha olabat.✡Eksa 19:18—23:33
15 Yubin gibit olabat daga brom hebin wen deibin hanggri,
en wen deibin thesti yubin gibit olabat woda brom bigwan ston.
Yubin dalim olabat blanga go en teikoba det kantri weya yubin pramis blanga gibit langa olabat.✡Eksa 16:4-15; 17:1-7; Dyud 1:21
16 Bat melabat grengrenfatha olabat bin praudbala en adwan langa yu,
en deibin tenim miselp brom yu.
Dei nomo bin teiknodis langa yu lowa.
17 Dei nomo bin laigim dumbat wanim yubin dalim olabat,
en deibin fogedabat ol detlot ting yubin dumbat blanga album olabat.
Deibin gibit bekboun langa yu.
En deibin pikimat wanbala men blanga deigimbek olabat langa Ijip en jidan jis laiga prisana en dumbat ola adwek.
Bat yu na det God hu oldei larramgo pipul fri brom olabat nogudbalawei.
Yu kain en gudbinji langa pipul.
Yu nomo gitwail kwikbala.
Yu laigim pipul detmatj.
Yu nomo bin gowei en libum melabat grengrenfatha olabat.✡Eksa 34:6; Nam 14:1-4,18; Dyud 1:26-33
18 Nomeda deibin meigim det golwan buligi sheip en deibin tok,
‘Dijan na det drimin hubin deigidawei melabat brom Ijip.’
Nomeda deibin mokimbat yu lagijat,✡Eksa 32:1-4
19 bat stil yu nomo bin gowei en libum olabat deya langa det bush kantri dumaji yu brabli kainbala.
Yu nomo bin deigidawei det klaud o det faiya.
Yubin libum dubala blanga shoum olabat det wei, deitaim en naitaim.
20 En yubin gibit yu gudwan spirit blanga titjim olabat.
Yu nomo bin stap gibitbat olabat det daga gulum mena en woda blanga dringgim.
21 Blanga 40 yiya yubin lukaftumbat olabat lagijat langa det bush kantri,
en olabat klos nomo bin go nogudwan.
Yubin gibit olabat ebrijing weya deibin wandim,
en olabat fut nomo bin swelap en ardimbat.✡Dyud 8:2-4
22 Yubin jidan garram olabat wen deibin bidim ola king langa ola gulijapwan kantri.
En deibin teikoba det kantri gulum Heshban weya Saihan bin jidan king.
En deibin teikoba det kantri gulum Beishan weya Og bin jidan king.✡Nam 21:21-35
23 Yubin gibit olabat detmatj biginini,
en deibin jidan laik ola sta langa skai.
Yubin go lida en yubin bringimap olabat langa dijan kantri,
det kantri weya yubin pramis olabat grengrenfatha olabat.✡Jen 15:5; 22:17; Josh 3:14-17
24 Olabat bigininimob bin kaman en teikoba dijan kantri.
Yubin go lida,
en detlot pipul hubin jidan iya bifo, detlot Keinanait pipul,
yubin meigim olabat wikwan.
Yumob pipul olabat bin kaman biyain,
en deibin bidim detlot pipul blanga dijan kantri.
Deibin bidim ola king en pipul olabat,
en detlot pipul langa dijan kantri nomo bin stapam olabat.✡Josh 11:23
25 Deibin teikoba detlot taun garram haibala wol,
en det gud kantri garram blendibala daga.
Deibin teikoba detlot kemp garram detmatj gudbala enijing,
en ola wel weya detlot pipul bin grajim.
Deibin teikoba ola greip gadin,
en ola gudwan olibtri, en ola frut tri.
En deibin abum detmatj blanga dagat en deibin meigim miselp gro fetwan.
Deibin jidan gudbinjiwei dumaji yubin dum ola gudbala ting blanga olabat.✡Dyud 6:10,11
26 Bat nomeda yubin gud langa olabat detmatj,
deibin gibit bekboun langa yu.
Deibin tjakidawei det lowa yubin gibit olabat.
Wen yubin jandim speshalwan mesinja blanga gibit olabat woning blanga dalim olabat blanga kambek langa yu,
deibin oldei kilim olabat ded.
En deibin kipgon mokimbat yu blanga meigim yu nogudbinji.
27 Blanga tharran na yubin larram olabat enami kaman.
Yubin larram olabat enami bidim en ardim olabat en jidan bos blanga olabat.
En wen deibin langa trabul en ardimbat deibin jingat langa yu blanga album olabat,
en yubin irrim olabat brom hebin.
Yubin brabli kainbala.
Yubin jandim lidamob blanga seibum olabat en andimwei olabat enami.
28 Bat wen deibin jidan gudbalawei igin deibin tenawei brom yu en dum nogudbala ting igin.
Yubin larram olabat enami olabat kaman.
Yubin larram olabat bidim olabat en jidan bos langa olabat.
Bat wen deibin tenbek langa yu en jingat langa yu yubin irrim olabat brom hebin,
en loda taim yubin seibumbat olabat dumaji yu brabli kainbala.✡Jadj 2:11-16
29 En yubin gibit olabat woning blanga bulurrum yu lowa igin,
bat deibin gibit yu bekboun igin.
Dei nomo bin teiknodis langa yu lowa.
Langa yu lowa yubin dalim olabat wanim dei garra du blanga jidan laibala,
bat dei nomo bin dum.
Deibin tenim olabat selp en gibit bekboun langa yu.✡Labid 18:5
30 Blanga loda yiya yubin kain langa olabat.
Yubin gibit olabat loda tjens.
Yu spirit bin kaman langa yu speshalwan mesinja olabat,
en deibin wonim detlot pipul,
bat detlot pipul nomo bin teiknodis.
Blanga tharran na yubin larram pipul brom najalot kantri kaman en jidan bos blanga olabat.✡2 King 17:13-18; 2 Kran 36:15,16
31 Bat yu brabli kainbala.
Yu nomo bin larram olabat enamimob binijimap olabat brabliwei.
Yu nomo bin gowei en libum olabat olagija, nomo.
Dumaji yu brabli kainbala God,
en yu laigim yu pipul olabat brabliwei.
32 Wal blanga tharran na melabat prei langa yu tudei.
Yu na det God garram detmatj pawa,
en melabat garra rispek langa yu.
Yu na det God hu oldei kipum im brabli strongbala pramis.
Yu kipgon laigimbat melabat detmatj.
Wal yu luk langa melabat na.
Yu sabi melabat trabul.
Ola king en ola boswan, en ola serramonimen en ola speshalwan mesinja en ol melabat grengrenfatha olabat en ol yu pipul olabat bin oldei abumbat trabul.
Brom det taim wen det king blanga det kantri gulum Asiriya bin breigimdan ola taun blanga melabat,
en stil tudei melabat abumbat trabul.✡2 King 15:19,29; 17:3-6; Esra 4:2,10
33 Bat yubin rait wen yubin panishim melabat blanga melabat nogudbalawei.
Yubin dalim melabat det panishmen garra kaman,
bat stil yubin jidan trubala langa melabat.
34 Ol melabat king olabat en melabat boswan olabat en ol melabat serramonimen olabat en melabat grengrenfatha olabat nomo bin duwit langa yu lowa.
Yubin dalim olabat langa det lowa,
bat dei nomo bin irrim yu.
35 Yubin gibit olabat ronwan kantri.
Yubin gibit olabat ola king blanga lidim olabat,
bat dei nomo bin irrim yu,
Yubin gibit olabat bigwan kantri garram loda daga,
bat dei nomo bin libum ola nogudbalawei blanga olabat.
36 En tudei na melabat jidan jis laiga prisana blanga najawan king langa dijan kantri weya yubin gibit langa melabat grengrenfatha olabat blanga dagat ola gudwan daga en jidan gudbinjiwei.
Iya na melabat jidan jis laiga prisana blanga difrin bos.
37 Detlot king brom najawan kantri oldei gajim ola daga weya melabat gajim brom melabat gadin en dei kipum blanga olabat ronselp,
dumaji melabat bin dumbat nogudbala ting.
Deibin tridim melabat en melabat enimulmob hau dei wandim, en melabat jidan brabli nogudbinji.”
Lagijat na ola pipul bin prei.
Ola pipul bin meigim pramis
38 Wal blanga ol detlot ting weya bin hepin, melabat ola Isreil pipul agri gija en bin raidimdan dijan speshalwan pramis, en ol melabat lidamob en ola serramonimen en ola Libaimen bin pudum olabat speshalwan mak langa bush gam langa det peipa.