5
Sa Ginore Tuti te Rubeni
1 Hire sari na pinodopodo te Rubeni sa tuna kenuna e Zekopi. Koasa ginuguana sapu eko turaṉia sa sa barikaleqe nabulu tanisa tamana, si siana nia sa sa hinia sapu tadi na koburu koreo kenudi, meke sari doduru hinia arini si ta vala koe Zosepa.*Zen 35:22, 49:3-4 2 Sa butubutu te Ziuda si ṉiṉirana koari na tasina meke keke palabatu si vura mae koa sa, gua ba sa hinia tanisa koburu koreo kenuna si te Zosepa.*Zen 49:8-10 3 E Rubeni sa koreo kenuna te Zekopi, si ka made sari tuna koreo: Ari Hanoki, Palu, Hezironi, meke Kami.
4-6 Hire sari na pinodopodo te Zoili, koari na sinage na sage: Semaea, Qoqi, Simei, Maika, Reaia, Beolo, meke Bera. La sa baṉara pa Asiria, Tiqalati Pilesa, saputu vagia se Bera, sa koimata tanisa butubutu asa, meke raovo d taloa nia.*2 Baṉ 15:29
7 Hire sari na pozadi rina koimata pa hopeke pinodopodo koasa butubutu te Rubeni: Zeieli, Zakaraea, 8 meke Bela sapu sa tuna koreo e Azaza, sa tuna koreo sa tuna e Sema, sapu sa tuna e Zoili. Sa puku butubutu hie si koa pa vasileana Aroere meke koasa solosona asa kamo la pa toqere Nebo meke Beolo Meoni. 9 Na soku hola sari na bulumakao tadirini pa popoa Qileadi, ke koa betoa mo rini sa pepeso seu latu pa qega sapu pa kali gasa rimata sapu la kamo gua pa Ovuku Iuparetisi.
10 Pa totoso sapu baṉara se Saula, la sa butubutu te Rubeni meke rapati sari pa butubutu Haqiraiti, meke va mate betoi rini si arini, meke koa hobei rini sa popoa pa kali gasa rimatana sa popoa Qileadi.
Sa Ginore Tuti te Qadi
11 Sa butubutu te Qadi si koa kapae koe Rubeni koasa pepeso pa popoa Basani pa kali gasa rimata kamo la gua pa Saleka. 12 Zoili sina ṉati palabatu koasa butubutu asa, meke e Sapama si vina rua la koasa. Ari Zanai meke Sapahati si na palabatu tugo pa butubutu Qadi pa Basani. 13 Sari kaiqa tie pule koasa butubutu si somanadi koari ka zuapa puku butubutu hire: Maekolo, Mesulama, Siba, Zorai, Zakana, Zia, meke Ebera. 14 Na goredi mae koasa tuti te Abihaili, sa tuna koreo e Huri sapu sa tutina si boka ta pitu pule la koari kasa hire: Abihaili, Huri, Zaroa, Qileadi, Maekolo, Zesisai, Zahado, Buzi. 15 Ahi, sapu sa tuna e Abidieli sapu sa tuna koreo e Guni, sina palabatu koari na puku butubutu hire. 16 Koa i rini sari na vasidi pa popoa Basani meke Qileadi koari na vasileana vasina meke koasa doduruna sa pezara duduli pa Saroni. 17 Sari na kinubekubere hire si ta tavete pa totoso te baṉara Zotamu pa Ziuda meke te baṉara Zeroboami vina rua pa Izireli.
Sari na Puku Tie Varipera tadi na Butubutu pu Koa pa Kali Gasa Rimata koasa Ovuku Zodani
18 Koari na butubutu te Rubeni, Qadi, meke sa kukuruna sa butubutu Manase pa kali gasa rimata si koadia si ka made ṉavulu made tina zuapa gogoto onomo ṉavulu puta tie varipera, sapu bokabokadi hola pa belaṉana sa lave, sekena sa vedara, meke gonana sa bokala. 19 Razai rini sa butubutu Haqiraiti, sapu gore maedi koe Zetura, Napisi, meke Nodaba. 20 Vekoa rini sa dia rinaṉeraṉe koasa Tamasa, meke varavara si arini meke tepa ia rini sa tinokae koasa Tamasa. Olaṉi Tamasa meke va mataqara i Sa si arini koari na tie pa butubutu Haqiraiti meke koari na butubutu pu varitokae la koa rini. 21 Vagi rini koari na dia kana sari ka lima ṉavulu tina kameli, karua gogoto lima ṉavulu tina sipi, meke karua tina doṉ'ki, meke vagi tugo rini sari ka keke gogoto tina tie ta pusidi pa vinaripera. 22 Soku hola sari na dia kana si va matei rini, sina ta tokae si arini koasa Tamasa. La koa ia rini sa popoa asa osolae kamo sa totoso tinaraovo.
Sari na Tie Koasa Kukuruna sa Butubutu Manase pa Kali Gasa Rimata Zodani
23 Sari na tie pa kukuruna sa butubutu Manase pa kali gasa rimata si la koa i sari na vasidi pa popoa Basani kamo la gua tu pa Beolo Hemoni, meke pa Seni, sapu sa toqere Hemoni sina podopodo va soku hola si arini. 24 Hire sari na palabatu koari na hopeke puku butubutu: Epera, Isi, Elieli, Azarieli, Zeremaea, Hodavaea, meke Zahadieli. Doduru arini sina tie bokabokadi pa vinaripera, meke na koimata ta gilanadi koari na dia puku butubutu.
Ta Raovo Taloa sari Butubutu pa Kali Gasa Rimata Zodani
25 Sari na tie si lopu soto va nabu koasa Tamasa tadi na tiatamadia, ba etulia rini si Asa meke vahesi rini sari na tamasa tadi na butubutu tie huporo saripu hadu vura ni sa Tamasa koasa popoa asa. 26 Ke vata evaṉia Tamasa pude la sa baṉara Pulu pa Asiria sapu e Tiqalati Pilesa meke vagia sa dia popoa. Raovo vagi sa sari butubutu te Rubeni, Qadi, meke sa kukuruna sa butubutu Manase meke la va koa i sa si arini pa Hala, Habora, meke Hara, meke pa kapana sa Ovuku Gozana.*2 Baṉ 15:19,29, 17:6