106
Sa Lineana te Zihova koari Nana Tie
1 Mi vahesia se Zihova!* 1 Koron 16:34; 2 Koron 5:13, 7:3; Ezr 3:11; Sam 100:5, 118:1, 136:1; Zer 33:11
Mi zama leana la koa Sa, ura leana si Asa,
meke koa hola ninae rane sa Nana tataru nabuna.
2 Loke tie boka tozi vura betoni sari doduru tinavete ṉiṉiradi,
loke tie boka vala nia sa vinahesi sapu garona.
3 Tamanae si arini pu kopu nia sa lineana pa doduru tie,
meke sarini pu evaṉia sa tinoṉoto doduru totoso.
4 Kei Zihova, Mu balabala au pana qetu ni Goi sari na Mua tie;
Mu va sare au pana harupi Goi sarini.
5 Mu va malumau pude qu dogoria sa minamutu tadi na Mua tie ta vizatadi,
meke maqu somana nia sa qinetuqetu tadi na Mua tinoni,
pude qu somana qetu nia sapu Tanisa si gita.
6 Gita si na tie sea gua tugo ri na tiatamada pukerane,
meke na tie kaleada si gita.
7 Sari na tiatamada pukerane sapu koa pa Izipi si lopu gilani rini sari na tinavete variva magasadi pu evaṉi sa Tamasa,* Ekd 14:10-12
meke muliṉi ni tugo rini sari na totoso sokudi pu vata dogoro ni sa Tamasa koa rini sa Nana tataru;
ba matagutu na lopu raṉea rini sa Tamasa pu tagoi sari doduru ṉiniraṉira pa Kolo Ziṉara.
8 Gua asa sarini, ba harupi Sa si arini koasa laena sa Pozana Sa,
pude kaqu vata dogoro vura sa Nana ṉiniraṉira lavata.
9 Zama ia Sa sa Kolo Ziṉara,* Ekd 14:21-31
meke popa si asa,
meke turaṉa guni Sa vasina sarini, guana enedia pa qega.
10 Ke harupi Sa si arini pa limadi rina kana,
meke vata rupahi Sa si arini koa sa ṉiniraṉira tadi na tie varikanai.
11 Meke kuzu va matei na kolo sari na dia kana;
lopu keke arini si toa.
12 Ke tiqe va hinokaria rini sari Nana zinama,* Ekd 15:1-21
meke kera vahesia rini si Asa.
13 Ba lopu sana muliṉi ni rini sari Nana tinavete,
tuturei taveti rini gua sapu hiva ni rini totoso lopu ele tozi ni Sa.
14 Okoro ginani leleadi si arini pa qega,* Nab 11:4-34
meke podepodekia rini sa Tamasa.
15 Poni Sa gua sapu tepa ia rini,
ba va raza ni Sa koa rini si keke minoho kaleana.
16 Konokono ni rina tinoni pa qega sari Mosese* Nab 16:1-35
e Eroni, sari nabulu madidi te Zihova.
17 Ke ta viqala rua sa pepeso,
meke hoqa lodu beto vasina sari Datani e Abirami meke sari na dia butubutu.
18 Meke gore mae sa nika pa maṉauru,
meke sulu pani sari na tie kaleadi pu lulidi sari kara.
19 Tavetia rini si keke beku bulumakao pa Saenai* Ekd 32:1-14
meke vahesia rini si asa.
20 Lopu vahesia rini sa Tamasa tolavaena na ṉedalana,
ba vahesia tu rini sa bekuna sa bulumakao sapu gani duduli.
21 Muliṉi nia rini sa Tamasa pu harupudi si arini,
sapu ele taveti sari na tinavete nomadi hola pa Izipi.
22 Ba variva magasadi tu sari Nana tinavete vasina,
meke variva matagutudi tu gua saripu evaṉi Sa pa Kolo Ziṉara.
23 Gua asa, ke zama sa Tamasa, sapu kote va mate pani Sa si arini, gua.
Ba sipu gilania Mosese sapu gua asa, si toketoke hukata ni sa koe Tamasa si arini,
pude lopu va matei Sa si arini pa Nana binugoro.
24 Beto asa si kilua rini sa popoa leleana,* Nab 14:1-35
sina lopu va hinokaria rini sa vina tatara te Tamasa.
25 Qumiqumi si arini koari na dia ipi,
meke lopu va tabea rini sa zinama te Zihova.
26 Gua asa ke poni Sa sa vina balau
sapu kaqu va mate pani Sa si arini pa qega.
27 Kaqu va talahuarae i Sa sari na tudia pa korapadi rina butubutu huporodi,* Liv 26:33
pude di la mate palae koari na votiki popoa.
28 Meke beto asa pa toqere Peoro, si la somana nia rini sa vinahesina e Beolo* Beolo sina tamasa beku.* Nab 25:1-13
meke henai rini sari na ginani pu tava vukivukihi la koari na tamasa pu loke dia tinoa.
29 Va bugoria rini se Zihova koari na dia tinavete kaleadi,
ke puzaka vura koa rini si keke oza.
30 Ke turu vura se Pinehasi meke va matei sa sari karua tie seadi, * Pa vinatabena sa tinarae te Zihova pude va mate sari na tie vahesi beku si va matei Sa sari karua pu somana pa vinahesi beku meke vinari riqihi pa kenudi ri doduru tie te Tamasa.
ke tiqe noso sa minoho.
31 Podalae pa totoso asa si ta balabala sapu na tie toṉoto si asa,
meke kaqu ta balabala tugo ninae rane si asa.
32 Koasa kolo pa Meriba si va bugoria rini se Zihova,* Nab 20:2-13
ke pa ginugua tadirini si va tasuna ia rini se Mosese.
33 Ura vata ṉaziria arini si asa,
ke lopu balabala paki se Mosese meke zama.
34 Lopu va matei rini sari na tie huporo* Zaz 2:1-3, 3:5-6
saripu garunu ni e Zihova pude va matei.
35 Ba varihaba la tu koa rini sarini,
meke luli tu rini sari na dia hahanana huporodi.
36 Sari na tie te Tamasa si vahesi beku,
gua asa ke ta evaṉa sa dia vina kilasa.
37 Va vukivukihi lani rini koari na tomate kaleadi
sari na tudia* 2 Baṉ 17:17 koreo na tudia vineki.
38 Va matei rini sari na koburu pu loke dia ginugua seadi,* Nab 35:33
meke va bonia rini sa popoa pa dia vina mate tie.
39 Va boni puleni teledia si arini koari na dia tinavete seadi,
meke lopu soto va nabu si arini koe Tamasa.
40 Ke ta ṉaziri hola ni e Zihova sari Nana tinoni,* Zaz 2:14-18
ke etulu pani Sa sari Nana tinoni soti.
41 Luara lani Sa si arini pa limadi rina butubutu huporodi,
pude madi koa totoli ni rina dia kana.
42 Ta ṉoṉovala si arini koari na dia kana,
meke koa pa dia ṉiniraṉira si arini.
43 Soku totoso si va sarei e Zihova sari Nana tie,
ba vizatia rini si pude lopu va avoso la koa Sa,
meke lodu mate pa dia sinea si arini.
44 Ba avosi e Zihova si arini pana kabo la koa Sa sarini,
meke balabala i Sa pa dia tinasuna.
45 Pa ginuadi rini si balabala ia Sa Nana vinariva egoi nabuna koa rini,
meke pa Nana tataru lavata si toka ni Sa si arini.
46 Va kekeri sa bulodi sari na dia kana
pude tataru ni si arini.
47 Kei Zihova, mami Tamasa, Mu harupu gami,
Mamu turaṉa vata luarae pule mae gami koari na butubutu huporodi,* 1 Koron 16:35-36
pude boka zama leana hola si gami koa Goi,
meke boka vahesia gami sa Pozamu Goi.
48 Mani tavahesi se Zihova, sa Tamasa tadi na tie Izireli,
mada vahesia kamahire, meke ninae rane.
Madi zama “Emeni!” sari doduru tie!
Mi vahesia se Zihova.
*106:1 1 Koron 16:34; 2 Koron 5:13, 7:3; Ezr 3:11; Sam 100:5, 118:1, 136:1; Zer 33:11
*106:28 Beolo sina tamasa beku.
*106:30 Pa vinatabena sa tinarae te Zihova pude va mate sari na tie vahesi beku si va matei Sa sari karua pu somana pa vinahesi beku meke vinari riqihi pa kenudi ri doduru tie te Tamasa.