16
1 Palekia rini sa Bokese Vinariva Egoi meke la vekoa pa korapa ipi sapu ele tavete va nama nia e Devita. Beto asa si va vukivukihi va uququ la koe Tamasa si arini, meke va vukivukihi binaere. 2 Sipu beto taveti sa sari na vina vukivukihi va uququ na vina vukivukihi binaere si mana ni Devita sari na tie pa korapa pozana e Zihova. 3 Meke va hia poni ni ginani sa sari doduru. Hopeke poni ni bereti sa sari na palabatu na barikaleqe pa Izireli, meke keke vasi kukuru masa ta kinana meke kaiqa qurepi popadi tugo.
4 Beto si vizati Devita si kaiqa tie Livaeti pude tuturaṉa pa kenuna sa Bokese Vinariva Egoi pa vinahesina e Zihova, sa Tamasa tadi pa Izireli, pude varavara tepa tinokae, na zama leana, meke vahesia. 5 E Asapa sa koimata, meke se Zakaraea si vina rua tanisa, meke somana tugo sari Zeieli, Semiramoti, Zehieli, Matitihia, Eliabi, Benaea, Opeti Edomu, meke Zeieli si pude mike ni sari hapu. Asapa si pude seke ni sari na sibolo, 6 meke sari karua hiama, e Benaea meke Zahazieli, si pude ivivui sari na buki pa kenuna sa Bokese Vinariva Egoi pa hopeke totoso garona. 7 Asa sa totoso kekenu sapu vala nia Devita koe Asapa, meke sari na tie Livaeti sa tinavete pude turaṉia sa kinera vinahesi pude zama leana koe Zihova.
Kinera pude Zama Leana koe Zihova
(Sam 105:1-15, 96:1-13, 106:1,47-48)
8 Mi vahesia se Zihova, mi tozi vura nia sa Nana vina lavata,
tozi koari doduru butubutu sari Nana tinavete.
9 Kera vahesi la koe Zihova;
tozi vura ni sari doduru Nana tinavete variva magasadi!
10 Mada qetu nia sapu Tanisa si gita,
madi koa qetu sarini pu vahesia si Asa.
11 La hata ia sa tinokae koe Zihova,
hata lamo ia sa minana Tanisa.
12-13 Mi balabala i sari na tinavete marilaedi pu taveti Sa,
meke sari Nana tinavete variva magasadi, na vinaripitui pu evaṉi Sa.
Gamu na tutina e Izireli, sa Nana nabulu;
meke gamu na tuna e Zekopi, sapu ta vizata mia,
14 E Zihova si na nada Tamasa si Asa,
sari na Nana tinarae si tana doduru kasia popoa.
15 Lopu muliṉi nia sa Nana vinariva egoi nabuna ninae rane.
Sari na Nana vina tatara si tadi na tina sinage.
16 Kaqu kopu nia Sa sa Nana vinariva egoi koe Ebarahami,
meke sa Nana vina tatara koe Aisake.*Zen 12:7, 26:3
17 Ele va tatara nia e Zihova koe Zekopi si keke vinariva egoi,
sapu kaqu koa hola ninae rane.*Zen 28:13
18 Zama si Asa, “Kaqu ponigo Rau sa popoa Kenani,
kaqu na mua tinago soti si asa,” gua sa Tamasa.
19 Lopu soku sari na tinoni te Tamasa,
meke na tie karovodi si arini pa popoa Kenani.
20 Ene varikarovae popoa mo si arini,
taluarae pa keke popoa, meke la pa keke popoa pule, gua mo.
21 Ba lopu va malumi Tamasa sari na votiki butubutu pude ṉoṉovali si arini.*Zen 20:3-7
Kopu ni Sa si arini, meke va balau i Sa sari na baṉara.
22 “Mu lopu tiqu la i sari na Qua nabulu ta vizatadi,
lopu taṉini sari na Qua poropita!” gua si Asa.
23 Mi kera la koe Zihova, gamu doduru pa kasia popoa.
Mi tozi vura nia pa hopeke rane sa inavoso leana sapu ele harupu gita Sa si gita.
24 Tozi vura nia koari doduru butubutu sa Nana linavata,
meke sari Nana tinavete marilaedi pu evaṉi Sa.
25 Ura nomana lavata se Zihova meke garona tugo pude tavahesi,
kaqu ta pamaṉae si Asa, hola ni sari na tamasa huporodi.
26 Ura sari doduru tamasa pu vahesi rina votiki butubutu si na beku mo,
ba e Zihova tavetia sa doduruna sa maṉauru.
27 Sa ṉinedala meke na vina lavata si koa koa Sa,
sa ṉiniraṉira na qinetuqetu si siṉia sa vasina koa Sa.
28 Mi vahesia se Zihova, gamu na tinoni pa kasia popoa,
vahesia sa Nana linavata na ṉiniraṉira.
29 Vahesia se Zihova koasa pozana marilaena,
paleke mae nia pa kenuna Sa sa mua vinariponi.
Vahesia se Zihova sa Tamasa Hopena, tolavaena si Asa,
30 mi koa mala pa kenuna Sa, gamu doduru pa kasia popoa.
Sa kasia popoa si ele ta sokirae va nabu, meke lopu kaqu tava rizu;
31 Madi koa qetuqetu sari na maṉauru meke na pepeso,
madi tozi ni sari na butubutu, “E Zihova si na Baṉara!”
32 Mani ovaṉa sa lamana, meke sari doduru tiṉitoṉa pu koa vasina.
Mi koa qetuqetu gamu na pepeso, meke doduru tiṉitoṉa pu koadi vasina.
33 Meke kaqu kera qetuqetu sari na hudahuda pa soloso, pa kenuna e Zihova,
ura na mae varipitui nia Sa sa kasia popoa.
34 Mi zama leana la koe Zihova, ura leana si Asa,
meke koa hola ninae rane sa Nana tataru nabuna.*2 Koron 5:13, 7:3; Ezr 3:11; Sam 100:5, 106:1, 107:1, 118:1, 136:1; Zer 33:11
35 Mada zama la gua hie koa Sa, “Ke Tamasa, mami Hinarupu, Mu harupu gami.
Varigara ni gami Mu vata rupaha gami koari na butubutu huporodi,
pude mami boka zama leana meke vahesia sa Pozamu hopena.”
36 Mani tavahesi se Zihova, sa Tamasa tadi na tie Izireli,
mada vahesia kamahire, meke gua tugo ninae rane ka rane.
Meke sari doduru tie si zama,
“Emeni! Vahesia se Zihova!”
Vinahesi pa Zerusalema meke Qibione
37 Va turui sa baṉara Devita se Asapa meke sari na turaṉana pa butubutu Livae pude kopu nia sa vinahesi pa kenuna sa Bokese Vinariva Egoi te Zihova, gua sapu ta hivae koari na hopeke rane. 38 Va turui tugo sa sari Opeti Edomu sa tuna e Zedutuni meke ari ka onomo ṉavulu vesu turaṉana pude toka nia si asa. Ari Hosa meke e Opeti Edomu si kopu koari na sasada.
39 Meke vekoa Devita se Zedoki sa ṉati hiama kenukenue meke sari na turaṉana pa butubutu hiama pa Qibione pude kopu nia sa vinahesi koasa Ipi Hopena te Zihova koasa vasina vahesihesiana pa toqere. 40 Doduru munumunu na veluvelu si vukivukihi va uququ si arini koa sa hope gua sapu ta kubere pa tinarae, sapu ele poni ni Zihova koari na tie Izireli. 41 Somanae koarini sari Hemani meke Zedutuni meke sari kaiqa pule saripu ta vizatadi pude kera vahesi meke zama leana la koe Zihova, ura sa Nana tataru nabuna si koa hola ninae rane! 42 Koa koari Hemani meke Zedutuni sari na buki meke sibolo boronizi meke kaiqa tiṉitoṉa kerakera pule tana kinera vahesi. Sari na tuna Zedutuni si kopu ni sari na sasada.
43 Meke pule beto sari doduru tie pa dia vetu soti, e Devita ba pule tugo pa nana vetu pude mana ni sari nana tamatina.*2 Samuela 6:19-20