1 Sipu hokoto tugo sa vinaravara te Solomone, si gore mae gana mo sa nika pa maṉauru meke sulu pania mo sa vinukivukihi sapu tava namanama, meke ta siṉia nia sa korapana sa Zelepade sa ṉinedala te Zihova.*Liv 9:23-24 2 Lopu boka nuquru la sari na hiama vasina sina siṉia nia sa kalasa variva keana sa korapana sa Zelepade. 3 Totoso dogoria ri doduru tinoni Izireli sa nika gore maena pa maṉauru meke siṉia sa kalalasa variva keana sa Zelepade, si hoqa todoṉo gore pa pepeso si arini meke vahesia na zama leana si arini koe Zihova,

7 Va madia Solomone sa kokorapana sa varivarigarana pa kenuna sa Zelepade te Zihova. Meke vasina asa si va uqu i sa sari na vina vukivukihi va uququ, sari deanadi rina vina vukivukihi binaere meke sari na vinariponi huiti. Tavetia sa sapu gua asa sina sa hope boronizi si lopu pada koari doduru vinukivukihi arini.

8 E Solomone meke sari doduru tinoni Izireli, si kopu nia sa Inevaṉa Vina Balabaladi rina Dia Ipi pa Qega ka zuapa rane. Na vinarigara nomana meke sari na tinoni si topue mae guadi pa seu podalae koasa karovoana pa toqere sapu la gua pa Hamati pa Lebanoni meke kamo la gua tu koasa volosona Izipi. 9 Ka zuapa rane si koa si arini koasa vina madina sa hope meke ka zuapa rane pule koasa inevaṉa, meke pa vina betona sari na rane inevaṉa si tukua rini sa vinarigara. 10 Meke pa koivugona, koasa vina hiokona ṉeta rane pa vina zuapa sidara si garunu pule ni Solomone pa dia hopeke popoa sari na tinoni. Qetu hola ni rini pa bulodia sari doduru ginugua leadi sapu ele tavete poni ni Tamasa koe Devita, koe Solomone, meke koari Nana tinoni Izireli.

11 Mudina sapu va hokotia Solomone sa Zelepade, meke sa vetu baṉara, meke va gorevura i sari doduru nana binalabala koarini, 12 si vura se Zihova pana boṉi koasa, meke zama ia Sa “Ele avosia Arau sa mua vinaravara; meke ele va egoa Arau sa Zelepade hie pude na vasina sapu kote vukivukihi mae koa Rau si gamu. 13 Pana va nosoa Arau sa ruku, babe garuni Arau sari na kupokupo pude gani pani sari na linetelete, babe garunu la oza koari na Qua tinoni, 14 be pa totoso arini si varavara mae sari Qua tinoni, pu ta pozae na tie te Zihova si arini, meke pepekae puleni meke taliri va seu koari na tinavete kaleadi gua sapu ele evaṉi rini, meke hata Au rini, si kaqu avosi Arau pa Maṉauru, meke taleoso ni sari dia sinea, meke kaqu masuru pule sa dia pepeso. 15 Kaqu kopu totoko nia Rau sa Zelepade hie, meke sari doduru vinaravara sapu ta zamae koasa Zelepade hie si kaqu nama avosi Arau, 16 sina ele vizatia Arau sa vasina hie, meke ele va madia Arau pude na vasina sapu kote ta vahesi sa Pozaqu ninae rane. Sari na mataqu meke sa buloqu si kote kopu totoko nia doduru totoso. 17 Ba sapu koa goi Solomone, be nabulu valeana Nau goi gua sapu tavetia e Devita sa tamamu, meke be taveti goi sari doduru sapu garunu nigo meke luli sari Qua tinozi na tinarae, 18 si kaqu kopu nia Arau sa vina tatara sapu tavetia Arau koe Devita sa tamamu totoso tozi nia Rau, ‘Agoi si kote lopu makudo va habotu tie pa tutimu koasa binaṉara pa Izireli,’ gua.*1 Baṉ 2:4 19 Ba be lopu va tabei agoi meke sari na tie Izireli sari na Qua tinarae na Qua ginarunu sapu ele vatu ni Arau koa gamu, meke nabulu ni meke vahesi gamu sari kaiqa votiki tamasa, 20 si kaqu va rizu taloa gamu Arau koasa popoa sapu ele ponini gamu Arau, meke kaqu kilu pania Arau sa Zelepade sapu ele va madia Arau pude na vasina sapu kaqu ta vahesi sa Pozaqu. Kaqu guni nia Rau na vina sisireana meke na pozapoza variva hegere tadi doduru tinoni.

21 Ke be vea tolavaena gua sa Zelepade hie kamahire, ba pa totosona asa si kote magasa nia ri doduru tie pu ene holadi meke kote nanasa si arini, ‘Na vegua ke tavete guni nia tu e Zihova koasa popoa hie meke sa Zelepade hie?’ 22 Kote olaṉa sari na tinoni, ‘Ura na luara pania rini se Zihova sa Tamasa tadi na tamadia, Asa sapu turaṉa vura ni sari na tiatamadia pa Izipi, meke ele raṉei rini sari na votiki tamasa meke vahesi na nabulu ni. Gua asa ke va kamo ni Sa sari doduru tinahuara hire koa rini,’ kote gua.”