Sepinien xa diamu te
Mak
?Visi iaxa tetis vanuvei ak?
Moletin xa tetis vanuvei ak, hisen tehe Sion Mak. Xi tenave moletin lu e le tei (12) na Iesu ti. Moletin holu lanemi labit Mak ak be horam maxoe xa telesae melele xa mereketeh xil te Nim Eo lamei tengan ladal xat Iesu e hal Ketsemani e huram 33 AD (huram xil tetutou poten na Iesu).✡Mak 14:51-52 E tetutou sung, e huram 46 AD, Mak tehusil Pol xal Banabas e kakaoen kokot nalu tengan luba labithiten longeongen hos usil Iesu mi moletin xil. E Sion Mak tehe reling xalu e suse e tetilomun tehe Serusalem.✡Mak 13:5,13 Di, e huram 50 AD, Mak tehusil Banabas e lutehe aelan tehal Saepras.✡Mak 15:39 Rakila xa melele Pol teti nim texeih, Mal teha teti tetela e tetutou ni.✡Kol 4:10; Flm 1:24; 1Pit 5:13
Mak tetis vanuvei ak melele xa teti e taon te hal Rom sangas ni huram 56 AD. E vahit Pita teti tetela e melele nen ak vengan xa sepinien holu xa tetisi be tumulen xil na Pita. Lanemi labit Mak tetis vanuvei ak usil meulien e polien na Iesu tetiamu ni vanuvei xatel xa Matiu, Luk e Sion lattetisi.
?Visi iaxa tevuli vanuvei ak tetiamu?
Mak tetis vanuvei ak e hal Rom tengan vahit kila mi Kristin xil e rute ak xa Iesu be Nat Hi reitin e be Mesaea xa Hi tehit xati tengan isa ni imei. Misak ni, tetis sepinien holu usil merekel xil xa Iesu tepol ni xa tepisen ni xa xi texo ut nesao reitin.
?Mak tetis vanuvei ak veneh?
Mak ien tehei tengan vapisen reitinen xa Iesu be Nat Hi - Merekel xil a Mak tetis usili latehe holu mak mu mili naha xa di e vanuvei sav xil e Vanuvei Eo. Iesu tepisen ni xa tehur xeihen teli mesien,✡Mak 1:29,40; 2:1; 3:1; 5:21; 6:53; 7:24; 7:31; 8:22 ninin tesa xil,✡Mak 1:21; 5:1; 9:14 holesok xil te ut etan, ✡Mak 4:35; 6:30; 6:44; 8:1 e maten mun.✡Mak 5:21; 16:1 Merekel xil ak latepisen reitinen xa Iesu be Nat Hi xa di nggur keihen.
Mak ien tehei tengan vapisen ni xa Iesu misel xat vat xil na Siu xil e lasin ni - Mak tepisen ni xa tetep iaxa Iesu tesak pisi tengan vapispis kuhi ni vat xil na Siu xil xa xi be Nat Hi reitin e Mesaea nan. E tesak pisi tengan vasel xat xil laviles ra tesaen nae e lihusil xat Hi e sexien xa momal. E neta sav xa mak, lasin ni e lamu vini.✡Mak 14:61
Mak ien tehei tengan vapisen ni xa longeongen hos usil Iesu Kristo di ba mi Siu xil del ngan xil mun xa latave Siu xil ti - Reitin xa melele xa Iesu teti e ut etan, tepol holu tetel Siu xil. E Mak tepisen ni xa Iesu teha tepol tetel ngan xil mun xa latave Siu ti.✡Mak 3:6; 5:1; 7:24,30; 15:39 Mak tetisi mun xa Iesu tesemae ni moletin nan xil tengan likapis e rute xil vus e lihithiten longeongen hos na Hi mi moletin xil vus te ut etan tengan likila lihur meulien sal ixo en.✡Mak 16:15-16
Vatit nenemien tei te vanuvei ak de Mak 10:45
Iesu biteni bit, “Vengan inou mun xa nabe Nat Moletin, natamei ti tengan moletin xil ti latutou ni nou. !E‑e! Inou namei tengan nitutou ni mosav xil e nisa meulien navan tengan nixal rat moletin xil holu mei limeluv ra pangasien te tesaen nae xil.”
?Naha iaxa di e vanuvei ak?
1. Midep Iesu misak mese tengan ha ipol ni polien nan. (1:1-13)
2. Sepinien e polien na Iesu. (1:14–13:37)
a. Iesu pol e rute xil e provins te hal Kaleli. (1:14–7:23)
b. Iesu pol e rute savsav xil. (7:24–10:52)
c. Iesu pol e taon te hal Serusalem. (11:1–13:37)
3. Iesu mat e meul rilomun ra maten. (14:1–16:20)
1
Sion Baptis misak mesen suse ve Iesu
1 Ngan ak be longeongen hos na Iesu Kristo, Nat Hi.✡Mat 3:1-12; Luk 3:1-18; Sion 1:19-28 2 Longeongen ak temei rohon mi xir texoni ngan xa tisen na provet Aesea tehiteni melele xa Hi tesepin mi Mesaea tehit,
“!Uteong kuhi! Inou nisa eloheoh tei navan tengan isak mesen suse nam.
3 Lalong rae tei xa di mikei e uruvuol xa bit,
‘!Musak mesen suse na Suv!
4 Eloheoh xa Aesea di tehit usili, hisen Sion. Moletin ak tete uruvuol e latekesi ni Sion Baptis vengan tebaptaes ni moletin xil holu tehit, “!Muhiles ra tesaen namim xil! Ti, mumei minou e nibaptaes ni xamim tengan vapisen xa Hi di miketeh bos rilomun mi xamim.”✡Pol 13:24; 19:4 5 Ma moletin xil holu xa holu pupu latexo provins te hal Sudea tetel taon te hal Serusalem latemei visal Sion. Labit rerat tesaen nae xil mini e Sion baptaes ni xil e Oeisal Sodan. 6 Xi tesing ni eising xa latepol ni ni hili kamel e tetuatu ni mavulut hilbe buluk. Anien an tehe kelmenamen del hani*Kelmenamen be hisit grashopa tei xa eilep xa lakila lava ni, e hani be oei tei xa mikas xa sukabug xil di lapol ni. xa di mikameti e uruvuol.✡2King 1:8; Sak 13:4 7 E xi biteni mi moletin xil bit, “Itutou ni nou, moletin tei xa eilep pupu imei. Xi be eilep mak mu mili nou e natapin ti tengan name slev nan xa ti valeh rat sandel nan.✡Pol 13:25 8 Inou di nabaptaes ni xamim ni oei tang, e xi ibaptaes ni xamim ni Ninin Eo.”
Melele xa labaptaes ni Iesu bus, Ninin Eo dela be uruvuol tengan vaha vahur sakpisien xil
Mat 3:13–4:11; Luk 3:21-22; 4:1-13
9 E melele xa Sion di baptaes ni moletin xil mak, Iesu nggo Nasaret e provins te hal Kaleli e bemei visali. Di, Sion baptaes ni Iesu e Oeisal Sodan. 10 E melele xa Iesu mea ra oei, miketeh be nesao e pus tilang hat misaha, e Ninin Eo mei dotan en nggoni mae tei. 11 E Hi misepin mini nggo ut nesao bit, “Xouk obe Natuxoli, ngan xa eheien navan da en. E nabesi nou pupu ve xouk.”✡Sen 22:2; Sam 2:7; Aes 42:1; Mat 12:18; 17:5; Mak 9:7; Luk 9:35; 2Pit 1:17
12 Di, e melele nen ak vari, Ninin Eo misak ni Iesu ba be uruvuol. 13 Iesu de rute ak melengien hanutap lu (40) del vuran xil e di nggur sakpisien xil nggo he Temat. E melele xa melengien xil ak bus, masxaxa xil mei ladutou ni.
Iesu pol kokot ni polien nan e mikes moletin hat (4) tengan lavusili
Mat 4:12-22; Luk 4:14-15; 5:1-11
14 Dutou ni ngan ak, Iesu milongeong ni xa lateso Sion tehe nim te xeih. Di, Iesu dilomun be provins te hal Kaleli e bithiten longeongen hos na Hi mi moletin xil bit,✡Mak 6:17-18; Sion 3:24 15 “!Taxeak be melengien xa momal tengan lelaxatien na Hi imei iti visal xir! !Misak ni muhiles meulien namim ra tesaen xil namim, e muling neketen namim iti e longeongen hos nan!”✡Kal 4:4; Efes 1:10; Mat 3:2
16 Vatei, melele xa Iesu mikakao nggusil seri Oei Kaleli, pus moletin lu te sar meseo en, hisealu Saemon xal Andru xa be tuneli. Pusi xa di luso net nalu be oei. 17 E Iesu mei biteni mi xalu bit, “Lumei luhusil inou. Xosali di mulihi meseo xil tang, e inou nisak ni xamil mulihi moletin xil sung.” 18 Vatei takes, lustokovein net xil nalu di, e lunggusil xat Iesu.
19 E melele xa latkakao latoba vuteili, Iesu pus timue lu mun, hisealu Temis xal Sion, xa lube nat Sepeti. Ludi bot del tamealu e di latdil pilei net natel xil.✡Mat 10:2; Mak 3:17; Mat 10:35; Luk 5:10 20 Melele xa pus xalu, vatakes, Iesu mikes xalu tengan lalohusili. Ma, lube reling tamealu e bot del moletin te polien sav xil, e lunggusil Iesu.
Iesu nggol rat ninin tesa ra moletin tei
Luk 2:31-37
21 Iesu mikakao del moletin nan xil labe taon te hal Kapaniam. E Sabat, labe nim te pispisienna Siu xil e Iesu di pispisi mi moletin xil en.✡Mak 6:2; Luk 4:16; 6:6; 13:10 22 Xil vus xa lalong sepinien nan lamesep, vengan xa sexien te pispisien nan misav ni titsa xil te rae na Mosis. Vengan xa melele xa misetu, biteni momal ni xil del xeihen.✡Mat 7:28-29
23 E melele xa Iesu di tamu pispisi, moletin tei xa ninin tesa da en be vangit nim te pispisien ak. Xi mikei nggeih xat Iesu bit,✡Mak 5:2 24 “!Iesu te hal Nasaret! ?!Usak ni naha mi xamem!? ?Omei inggak tengan umu vin xamem? !Inou nakilak, xouk obe Moletin Eo na Hi!”✡Mat 8:29; Mak 5:7; Luk 4:34; 8:28; Sion 6:69
25 Iesu mike xat ninin tesa ak bit, “!Utat votei, e uhe reling moletin ak!” 26 Di, ninin tesa ak bas tan ni moletin ak, muis kei, di, be relingi.✡Mak 9:26
27 Ngan xil vus xa lapusi lamesep pupu ni. E di labiteni mi xil mun tang labit, “?Hisit pispisien eah xiak? Moletin ak di misepin del xeihen. E melele xa misemae ni ninin tesa xil tengan lave reling moletin xil, vatakes lalong xati.” 28 E tave nousav ti, longeongen usil naha xa Iesu di pol ni mikapis ba duxoh rute xil vus e provins te hal Kaleli.✡Mat 4:24
Iesu dal rat moletin xil holu ra mesien nae xil e taon te hal Kapaniam
Mat 8:14-17; Luk 4:38-41
29 E melele xa Iesu be reling nim te pispisien, del Temis xal Sion, latobe tim sa Saemon Pita xal Andru. 30 Melele xa laduxoh tim, labit mesen ni mi Iesu xa avu atou kokon na Saemon Pita, mesei dat vet man, ven minggan pupu. 31 Ma Iesu be visali, dal xat hen e dutou ni mitamea. Vatakes, mesien nan be relingi, milonge bos, e ba pol ni anien ae.✡Mat 9:25; Mak 5:41; 9:27; Luk 8:54
32 E vongien nen ak, melele xa eai minu e Sabat bus, moletin xil holu laleh ngan xil xa lamesei del ngan xil xa ninin tesa di e xil lamei visal Iesu.✡Mat 4:24 33 Lamei, lamei ba vuma … moletin xil vus te metimal ak mei langgonaxon pupu e puiteh te nim xa xi da en. 34 E Iesu dal rat moletin xil holu ra mesien nae xil, e ngan tesav xil mun, nggol rerat ninin tesa ra xil. E tamaen ninin tesa xil ti tengan lasepin vengan xa lakila xa xi be Mesaea xa Hi tehosei.✡Mak 3:12
Iesu be rute sav xil mun tengan vahit longeongen hos mi moletin xil
Luk 4:42-44
35 E makoe roroh, melele xa ut bovoli tamu, Iesu mitamea e be rute tei xa mikila vatasen en e di misis.✡Mat 14:23; Mak 6:46; Luk 5:16; 6:12 36 E melele xa Saemon Pita del ngan tesav xil lamea, di lalang ves Iesu. 37 Lalang vesi ba vuma … lakameti e labiteni mini labit, “!Moletin xil vus te metimal ak di lalang vesuk!”
38 E Iesu biteni mi xil bit, “Rave metimal sav xil mun xa ladi sangas ni rute ak, vengan namei vari tengan niha nisetu ni longeongen hos na Hi mi moletin xil vus.” 39 Ma, lakapis e rute xil vus e provins te hal Kaleli. E xi di misetu mi moletin xil e nim te pispisien na Siu xil e di nggol rerat ninin tesa xil ra moletin xil.✡Mat 4:23; 9:35
Iesu dal rat moletin tei ra mesien leporsi
Mat 8:1-4; Luk 5:12-16
40 Melele xa Iesu di tamu mikapis e provins te hal Kaleli, moletin tei xa mesien leporsi di bas purun tenben xil mei mitingeiril pe met Iesu e dakesi bit, “Xosxa iem bei li, ma ukila upol ni tenbeok mei imese rilomun.”
41 Melele xa Iesu pusi, ien misae en. Ma misa hen ba duxoli e biteni mini bit, “Namaen ni. !Nasak ni tenbom mei memese ngamu!” 42 E melele nen ak vari tang, mesien ak be relingi e tenben mei memese rilomun.
43 Di, Iesu misemae mini bit, 44 “Onahit rat naha ti xa natepol ni minuk mi moletin tova. E uhe Nim Eo kestang tengan uhit rat rin nam mi pris tei, e usa sanien eo nam mi Hi ixoni ngan xa Mosis tehiteni.✡Mat 9:30; Lev 14:2-32 Imak, ma ngan xil xa lilepis tenbom lipus kila xa xouk omese tevi.” Di, Iesu misil moletin ak ba.
45 E melele xa moletin ak be reling Iesu, xi mikapis e rute xil vus e buhu raen holu bit usil naha xa Iesu tepol ni mini. Mak, ma vengan xa vanut moletin xil mei labe mahulong pupu, Iesu misakras mun vahe metimal xil. E neta sav xa Iesu da nga ut xil xa labe sotin ra metimal xil, moletin xil lakakao langgo rute xil vus tengan mei lapusi.
✡^ Kol 4:10; Flm 1:24; 1Pit 5:13
✡^ Mak 1:29,40; 2:1; 3:1; 5:21; 6:53; 7:24; 7:31; 8:22
✡^ Mak 3:6; 5:1; 7:24,30; 15:39
✡1:1: Mat 3:1-12; Luk 3:1-18; Sion 1:19-28
✡1:3: Eks 23:20; Mal 3:1; Mat 11:10; Luk 1:76; 7:27
*1:6: Kelmenamen be hisit grashopa tei xa eilep xa lakila lava ni, e hani be oei tei xa mikas xa sukabug xil di lapol ni.
✡1:6: 2King 1:8; Sak 13:4
✡1:11: Sen 22:2; Sam 2:7; Aes 42:1; Mat 12:18; 17:5; Mak 9:7; Luk 9:35; 2Pit 1:17
✡1:15: Kal 4:4; Efes 1:10; Mat 3:2
✡1:19: Mat 10:2; Mak 3:17; Mat 10:35; Luk 5:10
✡1:21: Mak 6:2; Luk 4:16; 6:6; 13:10
✡1:24: Mat 8:29; Mak 5:7; Luk 4:34; 8:28; Sion 6:69
✡1:31: Mat 9:25; Mak 5:41; 9:27; Luk 8:54
✡1:35: Mat 14:23; Mak 6:46; Luk 5:16; 6:12