Муқеддес Калам (кирил йезиқ) Зәбур 76

76-күй •••• Дәрдмән дәрдини төкүп тәсәлли тапиду

1-2 Нәғмичиләрниң беши Йәдутунға тапшурулған, Асаф язған күй: —

Авазим Худаға көтирилди, мән пәряд қилимән;

Авазим Худаға көтирилди, У маңа қулақ салиду. □

3 Бешимға күн чүшкәндә, мән Рәбни издидим;

Кечичә қолумни дуаға көтирип, бош қоймидим;

Җеним тәсәллини халимай рәт қилди.

4 Мән Худани әсләп сеғиндим, аһ-зар қилдим;

Сеғинип ойлинип, роһум паракәндә болди.

Селаһ.

5 Сән мениң көзүмни жумдурмидиң;

Чоңқур ғәшлик илкидә болғанлиғимдин сөзләлмәйттим.

6 Мән: «Кона замандики күнләрни,

Қедимки жилларни хиял қилимән;

7 Кечиләрдә ейтқан нахшамни әсләймән;

Көңлүмдә чоңқур хиял сүримән» — дедим;

Роһум интилип издимәктә еди;

8 — «Рәб мәңгүгә ташливетәмду?

У қайтидин илтипат көрсәтмәмду?

9 Униң өзгәрмәс муһәббити әнди мәңгүгә түгәп кәттиму?

Униң вәдиси әвлаттин-әвлатқичә инавәтсиз боламду?

10 Тәңри меһри-шәпқитини көрситишни үнтудиму?

У ғәзәплинип Өз рәһимдиллиғини тохтитивәттиму?».

Селаһ.

11-12 Андин мән мундақ дедим: — «Бундақ десәм болмайду, бу етиқатимниң аҗизлиғи әмәсму!

Һәммидин Алий Болғучиниң оң қолиниң жиллирини,

Йәни Яһниң қилғанлирини — яд етимән;

Қедимдин буянқи карамәтлириңни әсләймән.

13 Сениң барлиқ ишлигәнлириң үстидә сеғинип ойлинимән;

Сениң қилғанлириң үстидә истиқамәт қилимән;

14 И Худа, йолуң болса пак-муқәддәсликтидур;

Худадәк улуқ бир илаһ бармидур?

15 Мөҗизиләр Яратқучи Илаһдурсән;

Әл-милләтләр ара Сән күчүңни намайән қилдиң.

16 Өз билигиң билән Өз хәлқиңни,

Йәни Яқуп вә Йүсүпниң пәрзәнтлирини һөрлүккә чиқарғансән;

Селаһ.□ ■

17 Сулар Сени көрди, и Худа, сулар Сени көрди;

Титрәк уларни басти,

Деңиз тәглири патипарақ болди.□

18 Қара булутлар суларни төкүвәтти;

Асманлар зор садасини аңлатти;

Бәрһәқ, Сениң оқлириң тәрәп-тәрәпкә етилди.■

19 Гүлдүрмамаңниң авази қара қуюнда еди,

Чақмақлар җаһанни йорутти;

Йәр йүзи алақзадә болуп тәврәнди. ■

20 Сениң йолуң океан-деңизларда,

Қәдәмлириң чоңқур сулардидур,

Аяқ излириңни тапқили болмайду.

21 Сән қой падисини баққандәк,

Муса вә Һарунниң қоли билән Өз хәлқиңни йетәклидиң».■

□76:1-2 «Нәғмичиләрниң беши Йәдутунға тапшурулған, Асаф язған күй...» — «Йәдутун» Давут пәйғәмбәр «мәдһийә хори»ниң беши дәп бекиткән, Йәдутун исимлиқ бир кишини көрситиду («1Тар.» 16:41ни көрүң). Йәнә бир хил тәрҗимиси: «Нәғмичиләрниң бешиға тапшурулған, «Йәдутун» (мәдһийиләш дегән мәнидә) аһаңида оқулсун дәп, Асаф язған күй...».

□76:16 «Өз билигиң билән... Яқуп вә Йүсүпниң пәрзәнтлирини һөрлүккә чиқарғансән» — ибраний тилидики пеилниң (гаал) мошу йәрдә: «Яқуп вә Йүсүпниң пәрзәнтлиригә һәмҗәмәт болуп, һөрлүккә чиқарғансән» дегән толуқ мәнини билдүриду. «Гаал» вә «гоел» тоғрилиқ «Тәбирләр»ни көрүң.

■76:16 Мис. 15:11

□76:17 «Сулар Сени көрди, и Худа, сулар Сени көрди; титрәк уларни басти, деңиз тәглири патипарақ болди» — Асаф һазир «Мисирдин чиқиш»тики ишларни әсләйду. «Сулар» бу йәрдә Исраиллар мөҗизә билән өткән «Қизил деңиз»ни, андин Иордан дәриясини көрситиду.

■76:18 Мис. 14:21

■76:19 Мис. 14:24

■76:21 Зәб. 77:53; 79:3; Һаб. 3:15; Мар. 6:48; Юһ. 6:19