Муқеддес Калам (кирил йезиқ) Зәбур 140

140

140-күй •••• Рәзиллик билән мурәссә қилғили болмайду

1 Давут язған күй: —

Пәрвәрдигар, мән Саңа нида қилдим;

Йенимға тездин кәлгәйсән;

Саңа нида қилғинимда авазимни аңлиғайсән.

2 Дуайимни аңлиғиниңда, Саңа сунулған хушбуйдәк йеқимлиқ болсун,

Қолумниң көтирилиши сунулған кәчлик қурбанлиқтәк қобул болсун.□ ■

3 Ағзим алдида күзәтчи турғузғайсән, и Пәрвәрдигар;

Ләвлирим дәрвазисини сақлиғайсән;

4 Көңлүмни һеч қандақ яман ишқа,

Қәбиһлик қилғучиларға шерик болуп, рәзиллик қилишқа майил қилмиғайсән.

Мени уларниң немәтлиридин һеч йегүзмигәйсән!

5 Һәққаний адәм мени урсун —

Бу маңа меһриванлиқтур;

Маңа тәнбиһ бәрсун —

Бу болса, бешим рәт қилмайдиған, қуюлған есил майдәк болиду.

Чүнки мениң дуайим йәнила шуларниң рәзилликлиригә қарши болиду.□

6 Уларниң һакимлири тик ярлардин ташливетилгәндә,

Хәлиқ мениң сөзлиримни аңлайду;

Чүнки бу сөзләр шериндур.□

7 Бириси отун ярғанда йәргә чечилған йериндилардәк,

Мана, устиханлиримиз тәһтисара ишиги алдида чечиветилди;□ ■

8 Бәрһәқ, көзлирим Саңила тикилип қарайду, Пәрвәрдигар Рәббим;

Саңа тайинимән;

Җенимни харап қилип ташливәтмигәйсән.

9 Уларниң маңа салған қилтиғидин,

Қәбиһлик қилғучиларниң қапқанлиридин мени сақлиғайсән;

10 Рәзилләр өзиниң торлириға жиқилсун,

Мән болсам — өтүп кетимән.

□140:2 «Қолумниң көтирилиши сунулған кәчлик қурбанлиқтәк қобул болсун» — яки «Қолумниң көтирилиши сунулған кәчлик ашлиқ һәдийәдәк қобул болсун» — ибадәтханида каһинлар кәчлик қурбанлиқ яки һәдийә сунуштин авал, қоли билән шу қурбанлиқ-һәдийәләрни Худа алдида көтирәтти.

■140:2 Мис. 29:30; Вәһ. 5:8; 8:3

□140:5 «Чүнки мениң дуайим йәнила шуларниң рәзилликлиригә қарши болиду» — башқа бир хил тәрҗимиси: «Чүнки мениң дуайим уларға (рәзилләргә) күлпәт чүшкәндә улар үчүн давамлишивериду» (ибраний тилида «яманлиқ» һәм «күлпәт» бир сөз билән ипадилиниду).

□140:6 «Хәлиқ мениң сөзлиримни аңлайду; чүнки бу сөзләр шериндур» — «шерин» бәлким мошу йәрдә «җайида, орунлуқ» дегән мәнидә.

□140:7 «Бириси отун ярғанда йәргә чечилған йериндилардәк, мана, устиханлиримиз тәһтисара ишиги алдида чечиветилди» — айәтниң бир нәччә тәрҗимилири бар. Ибраний тилидики нусхисида, мошу сөз интайин ихчам болуп, чүшиниш тәс.

■140:7 Әз. 37:1,11,12