Muqeddes Kalam (latin yéziq) Yeshaya 27

Sheytanning jazalinishi •••• Israillar yighilip Xudagha méwe béridu

1 Shu künide Perwerdigar Özining dehshetlik, büyük we küchlük shemshiri bilen uchqur yilan léwiatanni,

Yeni tolghan’ghuchi yilan léwiatanni jazalaydu;

U yene déngizda turghan ejdihani öltüridu. ◼ ◘

2 Shu küni sap sharab béridighan bir üzümzar bolidu!

U toghruluq naxsha éytinglar! ◼

3 Özüm Perwerdigar uni saqlaymen;

Men her deqiqe uni sughirimen;

Birsi uninggha ziyan yetküzmisun dep kéche-kündüz saqlaymen.

4 Ghezep Mende qalmidi;

Ah, Manga qarshi jeng qilidighan tikenler yaki jighanlar bolsaidi!

Undaq bolsa Men ulargha qarshi yürüsh qilattim,

Ularni yighishturup köydürüwétettim! ◼

5 Bolmisa u Méni bashpanahliq qilip tutsun;

U Men bilen birlikte xatirjemlikte bolsun,

Derheqiqet, u Men bilen birlikte xatirjemlikte bolsun! ◼

6 Kelgüsi künlerde, Yaqup yiltiz tartidu;

Israil bixlinip, chéchekleydu,

Ular pütkül yer yüzini méwe-chéwe bilen qaplaydu. ◼ ◘

Perwerdigarning Öz xelqige bolghan muamilisi

7 Perwerdigar Israilni urghanlarni urghanchilik Israilni urup baqqanmu?

U qirghanlardek Israil qirilip baqqanmu? ◼

8 Sen ularni eyibligende ölchemdin töwen jazalap ularni paliwetkensen;

Sherq shamili chiqqan künide U Uning zerblik shamili bilen ularni qoghliwetken. ◼ ◘

9 Emdi shu yol bilen Yaqupning qebihliki kechürüm qiliniduki, —

Uning gunahining élip tashlan’ghanliqining pishqan méwisi shu boliduki: —

U qurban’gahtiki hemme tashlarni kukum-talqan qilidu,

«Asherah»larni we «kün tüwrükliri»ni zadila turghuzmaydu. ◼

10 Chünki mustehkemlen’gen sheher ghérib bolup qalidu,

Ademzatsiz makan hem tashliwétilgen bayawandek bolidu;

Shu yerde mozay ozuqlinidu,

Shu yerde yétip, uning shaxlirini yeydu. ◼

11 Uning shaxliri solishish bilen üzülidu;

Ayallar kélip ularni otun qilip köydürüwétidu.

Chünki bu bir yorutulmighan xelq;

Shunga ularni Yaratquchi ulargha rehim qilmaydu;

Ularni Shekillendürgüchi ulargha shepqet körsetmeydu.

12 We shu küni shundaq boliduki,

Perwerdigar Efrat deryasining éqimliridin tartip Misir wadisighiche her yerni silkiydu,

We siler bir-birlep térip yighiwélinisiler,

I Israil baliliri! ◼ ◘

13 We shu küni shundaq boliduki,

Büyük kanay chélinidu;

Shuning bilen Asuriye zéminida tügishey dep qalghanlar,

We Misir zéminida musapir bolghanlar kélidu;

Ular Yérusalémda muqeddes tagh üstide Perwerdigargha ibadet qilidu. ◼ ◘

◼27:1 «Perwerdigar ... Shemshiri bilen uchqur yilan léwiatanni, yeni tolghan’ghuchi yilan léwiatanni jazalaydu; u yene déngizda turghan ejdihani öltüridu» — léwiatan chongqur déngiz astida yashaydighan qorqunchluq ejdihagha oxshap kétidighan haywan. Bezi alimlar uni timsah deydu, biraq biz uninggha ishenmeymiz (Tewrattiki «Ayup» léwiatan toghrisidiki 41-babtiki izahatlirimiz we «qoshumche sözimiz»ni körüng). «Jazalash» dégen sözdin, birxil yaman rohning küchining léwiatanning keynide turushi bilen, léwiatanni rezillikning bir wekili bolidu dep chüshinimiz. Injil «Wehiy» 12-, 13- hem 20-babqa asasen chüshinimizki, léwiatan Sheytanning özi hem özining axirqi zamandiki wekili bolghan dejjalni bildüridu. «uchqur yilan» — léwiatan Sheytanning asmandiki ipadisi, «tolghan’ghuchi yilan» yer yüzidiki ipadisi, «ejdiha» déngizdiki ipadisidur.

◘27:1 Weh. 12:9

◼27:2 «sap sharab béridighan bir üzümzar» — yaki «bek yéqimliq bir üzümzar».

◼27:4 «Ghezep Mende qalmidi» — belkim Israilgha qaritilghan ghezepni körsitidu. «Ah, Manga qarshi jeng qilidighan tikenler yaki jighanlar bolsaidi!... ularni yighishturup köydürüwétettim!» — Xudaning Öz üzümzari bolghan Israilgha (5-babni yene körüng) shunche xursenliki we qizghinliqi barki, U «ulargha bolghan qoghdash muhebbitimni körsitish pursiti bolsun üchün, bir tal tikenla peyda bolsaidi!» dep tiligendek qilidu.

◼27:5 «Bolmisa u Méni bashpanahliq qilip tutsun; u Men bilen birlikte xatirjemlikte bolsun!...» — Xuda hetta Özige qarshi turghan bir tiken’gimu towa qilish, xatirjemlikke kélish pursitini yetküzidu! Buni ikki qétim déyish, buni tekitleshtin ibaret.

◼27:6 «Ular (Israil) pütkül yer yüzini méwe-chéwe bilen qaplaydu» — mushu söz Babil shehirining «yer yüzini sheherler bilen qaplayli» (14:21) dégen meqsiti bilen pütünley oxshimaydu. Shu chaghda bolsa Xudaning Öz üzümzari bolghan Israildin kütken ümidi (5-babta xatirilen’gendek) köp jehetlerdin emelge ashurulidu.

◘27:6 Zeb. 72:16

◼27:7 «Perwerdigar Israilni urghanlarni urghanchilik Israilni urup baqqanmu? U qirghanlardek Israil qirilip baqqanmu?» — ibraniy tilida intayin qisqartilip ipadilinidu: «U Israilni urghanlarni urghan derijide uni urup baqqanmu? U (Xuda) qirghanlardek, u (Israil) qirilip baqqanmu?». Bashqa birxil terjimisi: «Perwerdigar Israilni bashqilar urghan derijide urup baqqanmu? Yaki Israil eller teripidin qirilghandek Perwerdigar teripidin qirilip baqqanmu?».

◼27:8 «Sen ularni eyibligende ölchemdin töwen jazalap ularni paliwetkensen; sherq shamili chiqqan künide U Uning zerblik shamili bilen ularni qoghliwetken» — démek, 7-ayette déyilginidek, Xuda Israilni terbiyilep jazalighanda «ölchemdin töwen» jazalighan; sherq shamili zerbilik bolghini bilen daimliq emes, peqet turup-turup soqup turidu. Bashqa birnechche xil terjimiliri uchrishi mumkin.

◘27:8 Yer. 30:11; 46:28

◼27:9 «Yaqupning qebihliki kechürüm qilinidu» — ibraniy tilida «Yaqupning qebihliki yépilidu» yaki «Yaqupning qebihliki kefarǝt qilinidu». «qurban’gahtiki hemme tashlar...» — mushu ayettiki «qurban’gah» belkim butlargha choqunushta ishlitilidighan nerse. «Asherah» — «Asherah» butliri we xushbuygahlar bolsa, 17-bab, 8-ayettiki izahatni körüng.

◼27:10 «mustehkemlen’gen sheher» — mushu «mustehkemlen’gen sheher» bolsa, awwal Babilni körsetse kérek; biraq 10:24-ayettiki izahatta déginimizdek, Babilning özi kelgüsi «pütkül xudasiz dunya»ni bildüridu.

◼27:12 «Efrat deryasining éqimliridin tartip Misir wadisighiche» — mushu ibare Israilning barliq zéminini körsitish üchün pat-pat ishlitilidu. Xeritilerni körüng.

◘27:12 Yesh. 17:5

◼27:13 «Shu küni shundaq boliduki, büyük kanay chélinidu» — Xudaning xelqini chaqiridighan, axirqi zamandiki mushu «büyük kanay» muqeddes kitabta bashqa köp yerlerde tilgha élinidu. Yeshaya özi 18-babta u toghrisida toxtilidu. Mushu yerde, Xudaning méhir-shepqitining barliq insanlar üchün ortaqliqi, Yehudiy emesler (Asuriye zéminida tügishey dep qalghanlar... Misir zéminida musapir bolghanlar) Xudagha tayan’ghan Yehudiylar bilen bille Uning padishahliqigha mirasxor bolidighanliqi éniq körünidu.

◘27:13 Zek. 9:14; Mat.24:31; 1Kor. 15:52; 1Tés. 4:16; Weh. 10:7, 11:15