Muqeddes Kalam (latin yéziq) Yeshaya 59

Xudaning sözining dawami — Gunahning özini tehlil qilish

1 — Qaranglar, Perwerdigarning qoli qutquzalmighudek küchsiz bolup qalghan emes;

Yaki Uning quliqi anglimighudek éghir bolup qalghan emes;■

2 Biraq silerning qebihlikinglar silerni Xudayinglardin yiraqlashturdi,

Gunahinglar Uning yüzini silerdin qachurup Uninggha tilikinglarni anglatquzmidi.□

3 Chünki qolliringlar qan bilen,

Barmaqliringlar qebihlik bilen milen’gen,

Lewliringlar yalghan gep éytqan,

Tilinglar kaldirlap qériship sözligen;

4 Heqqaniyliq terepte sözligüchi yoqtur,

Heqiqet terepte turidighan höküm sorighuchi yoqtur;

Ular yoq bir nersige tayinip, aldamchiliq qilmaqta,

Ularning qorsiqidikisi ziyandash,

Ularning tughuwatqini qebihlik;■

5 Ular char yilanning tuxumlirini töreldüridu,

Ömüchükning torini torlaydu,

Kim uning tuxumlirini yése ölidu;

Ulardin biri chéqilsa zeherlik yilan chiqidu.□

6 Ularning torliri kiyim bolalmaydu;

Özliri ishligenliri bilen özlirini yapalmaydu;

Ishligenliri bolsa qebih ishlardur;

Ularning qolida zorawanliq turidu;□ ■

7 Qedemliri yamanliq terepke yügüridu,

Gunahsiz qanni töküshke aldiraydu,

Ularning oyliri qebihlik toghrisidiki oylardur;

Barghanla yerde weyranchiliq we halaket tépilidu.■

8 Tinchliq-aramliq yolini ular héch tonumaydu;

Yürüshliride héch heqiqet-adalet yoqtur;

Ular yollirini egri-toqay qiliwaldi;

Kim bularda mangghan bolsa tinch-aramliqni körmeydu.

Israil gunahini iqrar qilidu

9 — Shunga heqiqet-adalet bizdin yiraq turidu;

Heqqaniyliq yétip bizni chümkigen emes;

Nurni kütimiz, biraq yenila qarangghuluq!

Birla ghil-pal parlighan yoruqluqnimu kütimiz,

Yenila zulmette mangimiz.

10 Qarighulardek biz tamni silashturup izdeymiz,

Közsiz bolghandek silashturimiz;

Gugumda turghandek chüshtimu putliship kétimiz,

Chet yaqilarda ölüklerdek yürimiz.□

11 Éyiqlardek nere tartimiz,

Paxteklerdek qattiq ah urimiz;

Biz höküm-heqiqetni kütüp qaraymiz, biraq u yoq;

Nijat-qutulushni kütimiz, biraq u bizdin yiraqtur;

12 Chünki itaetsizliklirimiz aldingda köpiyip ketti,

Gunahlirimiz bizni eyiblep guwahliq béridu;

Chünki itaetsizliklirimiz herdaim biz bilen billidur;

Qebihliklirimiz bolsa, bizge roshendur: —

13 Chünki Perwerdigargha itaetsizlik qilmaqtimiz, wapasizliq qilmaqtimiz,

Uningdin yüz örimektimiz,

Zulumni hem asiyliqni terghip qilmaqtimiz,

Yalghan sözlerni oydurup, ich-ichimizdin sözlimektimiz;

14 Adalet-xalisliq bolsa yoldin yénip ketti;

Heqqaniyliq yiraqta turidu;

Chünki heqiqet kochida putliship kétidu;

Durus-diyanetningmu kirgüdek yéri yoqtur.

15 Shuning bilen heqiqet yoqay dep qaldi;

Özümni yamanliqtin néri qilay dégen adem xeqning olja nishani bolup qaldi!

Perwerdigar duani anglap ishqa kiridu

16 Hem Perwerdigar kördi;

Höküm-heqiqetning yoqluqi Uning neziride intayin yaman bilindi.

We U amal qilghudek birmu ademning yoqluqini kördi;

Gunahkarlargha wekil bolup dua qilghuchi héchkimning yoqluqini körüp, azablinip köngli parakende boldi.

Shunga Uning Öz Biliki özige nijat keltürdi;

Uning Öz heqqaniyliqi Özini qollap chidamliq qildi;□ ■

17 U heqqaniyliqni qalqan-sawut qildi,

Béshigha nijatliq dubulghisini kiydi;

Qisas libasini kiyim qildi,

Muhebbetlik qizghinliqni ton qilip kiydi.■

18 Ademlerning qilghanliri boyiche, u ulargha qayturidu;

Reqiblirige qehr chüshüridu,

Düshmenlirige ishlirini qayturidu,

Chet arallardikilergimu u ishlirini qayturidu.

19 Shuning bilen ular gherbte Perwerdigarning namidin,

Künchiqishta Uning shan-sheripidin qorqidu;

Düshmen kelkündek bésip kirginide,

Emdi Perwerdigarning Rohi uninggha qarshi bir tughni kötürüp béridu;

20 Shuning bilen Hemjemet-Qutquzghuchi Zion’gha kélidu,

U Yaqup jemetidikiler arisidin itaetsizliktin yénip towa qilghanlargha yéqinlishidu, — deydu Perwerdigar.□ ■

21 Men bolsam, mana, Méning ular bilen bolghan ehdem shuki, — deydu Perwerdigar —

«séning üstüngge qonup turghan Méning Rohim, shundaqla Men séning aghzinggha quyghan söz-kalamim bolsa,

Buningdin bashlap ebedil’ebedgiche öz aghzingdin, neslingning aghzidin yaki neslingning neslining aghzidin hergiz chüshmeydu! — deydu Perwerdigar. □

■59:1 Chöl. 11:23; Yesh. 50:2

□59:2 «Qaranglar, Perwerdigarning qoli qutquzalmighudek küchsiz bolup qalghan emes... biraq silerning qebihlikinglar silerni Xudayinglardin yiraqlashturdi, gunahinglar Uning yüzini silerdin qachurup Uninggha tilikinglarni anglatquzmidi» — mushu -1-2-ayetler bolsa 58-bab, 3-ayettiki soalgha bérilgen jawabtur.

■59:4 Ayup 15:35; Zeb. 7:14

□59:5 «Ulardin biri chéqilsa zeherlik yilan chiqidu» — démek, ulardin héchqandaq yaxshiliq chiqmaydu, ulargha taqabil turush intayin tes; adem «tuxumlar»ni yése, ölidu; «tuxumlar»ni buzsa, ulardin téxi xeterlik bir yilan chiqidu.

□59:6 «ularning torliri kiyim bolalmaydu» — mushu ayet we 5-ayetke qarighanda, «torliri» dégenlik ularning qestliri hem yamanliqlirini diniy niqab bilen yapidighan usullarni bildüridu.

■59:6 Ayup 8:14,15

■59:7 Pend. 1:16; Rim. 3:15

□59:10 «Chet yaqilarda ölüklerdek yürimiz» — bashqa birxil terjimisi: «küchi barlar arisida ölüklerdek yürimiz».

□59:16 «Hem Perwerdigar kördi; höküm-heqiqetning yoqluqi Uning neziride intayin yaman bilindi» — Perwerdigar Öz mömin bendilirining duasini anglap ishqa kirishidu. «shunga uning öz biliki özige nijat keltürdi» — oqurmenlerning éside bolushi kérekki, «Perwerdigarning Biliki» Uning dunyagha ewetidighan Qutquzghuchi-Mesihi, yeni «Perwerdigarning quli»dur. Démek, Israil özining asiyliqi, itaetsizlikini, özlirining gunahqa taqabil turalmaydighanliqini toluq iqrar qilip towa qilghan waqitta, «héch qutquzghudek adem bolmighanda», Xudaning shan-sheripini eslige keltürüsh üchün, shundaqla amalsiz qalghan insanni qutquzush üchün «Perwerdigarning Biliki» nijatni élip mushu dunyagha kélidu. Qutquzush ishlirini u yalghuz ada qilidu; «héch adem» uninggha yardem bermeydu. Yene 53-babni körüng.

■59:16 Yesh. 63:5

■59:17 Ef. 6:17; 1Tés. 5:8

□59:20 «Shuning bilen Hemjemet-Qutquzghuchi Zion’gha kélidu, u Yaqup jemetidikiler arisidin itaetsizliktin yénip towa qilghanlargha yéqinlishidu» — «Rim.» 11:26 körüng.

■59:20 Yesh. 10:21,22; Rim. 11:26

□59:21 «séning üstüngge qonup turghan Méning Rohim» — emdi mushu ayettiki «sen» dégen kim? Yuqiriqi 20-ayette «Hemjemet-Qutquzghuchi Zion’gha kélidu» déyilgen. «Hemjemet-Qutquzghuchi» bolsa, 16-ayettiki «Perwerdigarning Biliki», yeni «Perwerdigarning quli»dur. Shübhisizki, mushu sözler uninggha, yeni Mesihge déyilidu.