Muqeddes Kalam (latin yéziq) Ayup 41

Léwiatandin alghan sawaq

1 Léwiatanni qarmaq bilen tartalamsen?

Uning tilini arghamcha bilen baghlap basalamsen?□

2 Uning burnigha qomush chülükni kirgüzelemsen?

Uning éngikini tömür neyze bilen téshelemsen?

3 U sanga arqa-arqidin iltija qilamdu?

Yaki sanga yawashliq bilen söz qilamdu?

4 U sen bilen ehde tüzüp,

Shuning bilen sen uni menggü malay süpitide qobul qilalamsen?

5 Sen uni qushqachni oynatqandek oynitamsen?

Dédekliringning huzuri üchün uni baghlap qoyamsen?

6 Tijaretchiler uning üstide sodilishamdu?

Uni sodigerlerge bölüshtürüp béremdu?

7 Sen uning pütkül térisige atarneyzini sanjiyalamsen?

Uning béshigha changgak bilen sanjiyalamsen?!

8 Qolungni uninggha birla tegküzgendin kéyin,

Bu jengni eslep ikkinchi undaq qilghuchi bolmaysen!

9 Mana, «uni boysundurimen» dégen herqandaq ümid bihudiliktur;

Hetta uni bir körüpla, ümidsizlinip yerge qarap qalidu emesmu?

10 Uning jénigha tégishke pétinalaydighan héchkim yoqtur;

Undaqta Méning aldimda turmaqchi bolghan kimdur?□

11 Asman astidiki hemme nerse Méning tursa,

Méning aldimgha kim kélip «manga tégishlikini bergine» dep baqqan iken,

Men uninggha qayturushqa tégishlikmu?□ ■

12 Léwiatanning ezaliri,

Uning zor küchi,

Uning tüzülüshining güzelliki toghruluq,

Men süküt qilip turalmaymen.

13 Kim uning sawutluq tonini salduruwételisun?

Kim uning qosh éngiki ichige kiriwalalisun?□

14 Kim uning yüz derwazilirini achalalisun?

Uning chishliri etrapida wehime yatidu.

15 Qasiraqlirining sepliri uning pexridur,

Ular bir-birige ching chaplashturulghanki,□

16 Bir-birige shamal kirmes yéqin turidu.

17 Ularning herbiri öz hemrahlirigha chaplashqandur;

Bir-birige zich yépishturulghan, héch ayrilmastur.

18 Uning chüshkürüshliridin nur chaqnaydu,

Uning közliri seherdiki qapaqtektur.

19 Uning aghzidin otlar chiqip turidu;

Ot uchqunliri sekrep chiqidu.

20 Qomush gülxan’gha qoyghan qaynawatqan qazandin chiqqan hordek,

Uning burun töshükidin tütün chiqip turidu;

21 Uning nepisi kömürlerni tutashturidu,

Uning aghzidin bir yalqun chiqidu.

22 Boynida zor küch yatidu,

Wehime uning aldida sekriship oynaydu.

23 Uning etliri qat-qat birleshtürülüp ching turidu;

Üstidiki qasiraqliri yépishturulup, midirlimay turidu.

24 Uning yüriki beeyni tashtek mustehkem turidu,

Hetta tügmenning asti téshidek mezmut turidu.

25 U ornidin qozghalsa, palwanlarmu qorqup qalidu;

Uning tolghinip shawqunlishidin alaqzade bolup kétidu.□

26 Birsi qilichni uninggha tegküzsimu, héch ünümi yoq;

Neyze, atarneyze we yaki changgaq bolsimu beribir ünümsizdur.

27 U tömürni samandek,

Misni por yaghachtek chaghlaydu.

28 Oqya bolsa uni qorqitip qachquzalmaydu;

Salgha tashliri uning aldida paxalgha aylinidu.

29 Toqmaqlarmu paxaldek héchnéme hésablanmaydu;

U neyze-sheshberning tenglinishige qarap külüp qoyidu.□

30 Uning asti qismi bolsa ötkür sapal parchiliridur;

U lay üstige chong tirna bilen tatilighandek iz qalduridu.□

31 U déngiz-okyanlarni qazandek qaynitiwétidu;

U déngizni qazandiki melhemdek waraqshitidu;

32 U mangsa mangghan yoli parqiraydu;

Adem buzhghunlarni körüp chongqur déngizni ap’aq chachliq boway dep oylap qalidu.

33 Yer yüzide uning tengdishi yoqtur,

U héch qorqmas yaritilghan.

34 U büyüklerning herqandiqigha jür’et bilen nezer sélip, qorqmaydu;

U barliq meghrur haywanlarning padishahidur». □

Ayup
<
41
>

□41:1 «Léwiatan» — yuqiriqi 3-bab, 8-ayettiki izahatni körüng.

□41:10 «Uning jénigha tégishke pétinalaydighan héchkim yoqtur; undaqta Méning aldimda turmaqchi bolghan kimdur?» — léwiatan insan’gha ögitidighan eng ulugh ish Xudaning Öz heywisini gewdilendürüshtur; insanlar léwiatanning ulughluqini hem tilsim körkemlikige qarap Xudadin eyminishi kérektur. Oqurmenlerning «qoshumche söz»imizni körüshini ümid qilimiz.

□41:11 «Méning aldimgha kim kélip «manga tégishlikini bergine» dep baqqan iken» — bashqa birxil terjimisi: «manga kim awwal bir nerse bergeniken, andin «manga tégishlikini bergine» dep baqqan iken?».

■41:11 Mis. 19:5; Qan. 10:14; Zeb. 24:1; 50:12; Rim. 11:35; 1Kor. 10:26, 28

□41:13 «...Kim uning qosh éngiki ichige kiriwalalisun?» — bashqa nechche xil terjimiliri bar, mesilen: — «...Kim uning ikki qur chishliri ichige kiriwalalisun?» yaki «...Kim uninggha yügenni yéqinlashturalisun?».

□41:15 «Qasiraqlirining sepliri uning pexridur, ular bir-birige ching chaplashturulghanki...» — bashqa birxil terjimisi: «Uning pütün dümbisi qasiraqlardur, ular bir-birige ching chaplashturulghanki...»

□41:25 «Uning tolghinip shawqunlishidin alaqzade bolup kétidu» — bashqa birnechche xil terjimiliri uchrishi mumkin.

□41:29 «sheshber» — béshi tikendek bolghan uzun birxil neyze.

□41:30 «Uning asti qismi bolsa ötkür sapal parchiliridur» — yaki «Uning asti qismi bolsa, beeyni qiyiq tashlardur».

□41:34 «U barliq meghrur haywanlarning padishahidur» — bashqa birxil terjimisi: «U barliq meghrur bolghuchilarning padishahidur». Oqurmenlerning léwiatandin alghan sawaqlar toghruluq «qoshumche söz»diki söhbitimizni körüshini ümid qilimiz.