6
Yene birnechche nesihet
1 I oghlum, eger dostunggha borun bolghan bolsang,
Yat kishining qerzini töleshke qol bériship wede bergen bolsang,□«borun» — képil bolghan kishi.
2 Eger öz sözüngdin ilin’ghan bolsang,
Öz wedeng bilen baghlinip qalsang,
3 U yéqiningning qoligha chüshkenliking üchün,
Amal qilip özüngni uningdin qutquz —
Derhal yéqiningning yénigha bérip, özüngni kemter tutup shu ishtin xaliy qilishini ötünüp sora.
4 Jeren shikarchining qolidin qutulushqa tirishqandek,
Qush owchining qolidin chiqishqa tirishqandek,
Qutulmighuche uxlap yatma,
Hetta ügdep arammu alma.■Zeb. 132:4-5; Pend. 20:13
Chümüle
6 I hurun, chömülining yénigha bérip uningdin ögen,
Uning tirikchilik yollirigha qarap dana bol.
7 Ularning bashliqi, emeldari, hökümdari yoq bolsimu,
8 Lékin ular yazda yilning éhtiyaji üchün ash topliwalidu,
Hosul peslide ozuq teyyarliwalidu.
9 I hurun, qachan’ghiche uxlap yatisen?
Qachan ornungdin turisen?■Pend. 13:4; 20:4; 24:33,34
10 Sen: — Birdem köz yumuwalay, birdem uxliwalay,
Birdem qolumni qoshturup yétiwalay, — deysen.
11 Lékin uxlap yatqanda, miskinlik qaraqchidek kélip séni basidu,
Yoqsulluq xuddi qoralliq bulangchidek hujumgha ötidu.
12 Erzimes, peyli buzuq adem hemmila yerde yalghan éytip, peslikni sözleydu.□«Erzimes» — ibraniy tilida «Bélialning oghli» déyilidu. «Bélial»ning menisi «erzimes» dégenlik bolup, belkim Iblisni körsitidu.
13 U köz qisip,
Putliri bilen ishare qilip,
Barmaqliri bilen körsitidu;
14 Könglide aldamchiliqla yatidu,
U daim rezillikning koyida bolidu,
Hemmila yerde jédel-majira tériydu.
15 Shunga uninggha békitilgen balayi’qaza uni tuyuqsiz basidu,
U biraqla dawalighusiz yanjilidu.
16 Perwerdigar nepretlinidighan alte nerse bar,
Berheq, yette nerse Uninggha yirginchliktur.
17 Ular bolsa,
Tekebburluq bilen qaraydighan köz,
Yalghan sözleydighan til,
Bigunahlarning qénini töküzidighan qol,■Pend. 30:13
18 Suyiqest oylaydighan köngül,
Yamanliq qilishqa téz yügüreydighan putlar,■Rim. 3:15
19 Yalghan sözleydighan saxta guwahchi,
Burader-qérindashliri arisigha bölgünchilik salghuchi kishidur.
Zinaxorluqtin özüngni tart
20 I oghlum, atangning emrige emel qil;
Anangning körsetmisidin chiqma.■Pend. 1:8
21 Ularning sözini qelbingge téngip,
Ularni boynunggha marjandek qilip ésiwal.■Pend. 3:3
22 Yolgha chiqqiningda ular séni yétekleydu,
Uxlighiningda ular séni saqlaydu,
Uyqudin oyghan’ghiningda ular séni xewerlendüridu.■Pend. 3:23,24
23 Chünki Xudaning permani yoruq chiragh,
Uning muqeddes qanuni nurdur;
Terbiyening tenbihliri bolsa hayatliq yolidur.■Zeb. 19:7-9; 119:105
24 Ular séni buzuq xotundin saqlighuchi,
Yat xotunning shérin sözliridin yiraq qilghuchidur.■Pend. 2:16; 5:3; 7:5
25 Uning guzellikige könglüngni baghlimighin,
Uning qash-köz oynitishi séni esirge almisun.
26 Chünki buzuq ayallar tüpeylidin ademler bir parche nan’ghimu zar bolidu,
Yat ademning zinaxor ayali bolsa kishining qimmetlik jénini özige ow qiliwalidu.
27 Otni qoynunggha salsang,
Öz kiyimingni köydürmemsen?
28 Choghning üstide dessep mangsang putungni köydürmemsen?
29 Bashqilarning ayali bilen bir orunda yatidighan kishi shundaq bolidu;
Kim uninggha tégip ketse aqiwitidin qutulalmaydu.
30 Ach qalghanda qorsiqini toyghuzush üchün oghriliq qilghan kishini bashqilar kemsitmeydu;
31 Shundaq turuqluq u tutulup qalsa,
Igisige yettini töleshke toghra kélidu;
U öz öyidiki hemme nersisini tapshuridu.■Mis. 22:1, 4
32 Halbuki, bashqilarning xotuni bilen zina qilghuchi uningdinmu better bolup, tolimu ghepletliktur;
Undaq qilghuchi öz-özini halak qilidu.
33 U zexmet yeydu, shermende bolidu,
Uning reswasi héch öchürülmeydu.
34 Chünki künlesh oti erni derghezepke keltüridu,
Intiqam alghan künide u héch rehim qilmaydu.
35 Tölem puli bérey désengmu u qobul qilmaydu,
Herqanche sowgha-salam bersengmu uni bésiqturghili bolmaydu.
□6:1 «borun» — képil bolghan kishi.
■6:4 Zeb. 132:4-5; Pend. 20:13
■6:9 Pend. 13:4; 20:4; 24:33,34
□6:12 «Erzimes» — ibraniy tilida «Bélialning oghli» déyilidu. «Bélial»ning menisi «erzimes» dégenlik bolup, belkim Iblisni körsitidu.
■6:24 Pend. 2:16; 5:3; 7:5
■6:31 Mis. 22:1, 4