5
5-küy •••• Seherdiki ümid
1 Neghmichilerning béshigha tapshurulup, neyler bilen oqulsun dep, Dawut yazghan küy: —
Méning sözlirimge qulaq salghaysen, i Perwerdigar,
Méning ahlirimgha köngül bölgeysen.
2 Kötürgen peryadlirimni angla, méning Padishahim, méning Xudayim,
Chünki sangila dua qilimen.
3 I Perwerdigar, seherde Sen awazimni anglaysen;
Men seherde özümni Sanga qaritimen,
4 Chünki Sen rezilliktin huzur alghuchi ilah emesdursen;
Yamanliq hergiz Sen bilen bille turmaydu.
5 Pochi-tekebburlar közüng aldida turalmaydu;
Qebihlik qilghuchilarning hemmisi Sanga yirginchliktur.
6 Yalghan sözligüchilerning hemmisini halak qilisen;
Perwerdigar qanxor, aldamchi kishilerge nepret qilur.
7 Biraq men bolsam, méhri-shepqitingning kengrichilikidin öyüngge kirimen;
Sanga bolghan eyminishtin muqeddes ibadetxananggha qarap sejde qilimen;
8 Méni öch körgenler tüpeylidin Öz heqqaniyliqing bilen méni yétekligeysen, i Perwerdigar;
Yolungni aldimda tüz qilghin.
9 Chünki ularning aghzida héchqandaq semimiylik yoqtur;
Ularning ichki dunyasi bolsa pasiqliqtur,
Ularning galliri échilghan qebridek sésiqtur,
Ular tili bilen xushamet qiliwatidu.■Zeb. 12:2-3; 36:1-3; 52:2; 62:4; Rim. 3:13
10 Ularning gunahini békitkeysen, i Xuda;
Ular öz pilanliri bilen özliri mollaq atsun;
Ularni özlirining nurghunlighan itaetsizlikliri bilen heydep chiqarghaysen;
Chünki ular Sanga asiyliq qildi.■Zeb. 7:14-15; 9:15-16; 35:7-8; 59:12
11 Shundaq qilghanda Sanga tayan’ghanlarning hemmisi shadlinidu;
Ular menggü shadliq bilen tentene qilidu;
Sen ularni qoghdaysen;
Séning namingni söygenler séningdin yayraydu.
12 Chünki Sen, i Perwerdigar, heqqaniy ademge bext ata qilisen;
Uni shapaiting bilen qalqan kebi oraysen.
□5:3 «I Perwerdigar, seherde Sen awazimni anglaysen;...» — «seherde» dégen sözge qarap bezi alimlar 3-, 4- hem 5-küyler, Dawutning Abshalomdin qéchish jeryanidiki üch kün ichidiki dualiri, dep qaraydu (3-küyde «kech» hem «seher» bar, 4-de bolsa «kech», 5-de «seher» bar).
■5:9 Zeb. 12:2-3; 36:1-3; 52:2; 62:4; Rim. 3:13
■5:10 Zeb. 7:14-15; 9:15-16; 35:7-8; 59:12