Muⱪeddes Kalam (yǝngi yeziⱪ) Zǝbur 77

77-küy •••• Dǝrdmǝn dǝrdini tɵküp tǝsǝlli tapidu

1 Nǝƣmiqilǝrning bexi Yǝdutunƣa tapxurulƣan, Asaf yazƣan küy: —

Awazim Xudaƣa kɵtürüldi, mǝn pǝryad ⱪilimǝn;

Awazim Xudaƣa kɵtürüldi, U meni anglaydu.◼

3 Beximƣa kün qüxkǝndǝ, mǝn Rǝbni izdidim;

Keqiqǝ ⱪolumni duaƣa kɵtürüp, box ⱪoymidim;

Jenim tǝsǝllini halimay rǝt ⱪildi.

4 Mǝn Hudani ǝslǝp seƣindim, aⱨ-zar ⱪildim;

Seƣinip oylinip, roⱨim parakǝndǝ boldi.

Selaⱨ.

5 Sǝn mening kɵzümni yumdurmiding;

Qongⱪur ƣǝxlik ilkidǝ bolƣanliⱪimdin sɵzliyǝlmǝyttim;

6 Mǝn dǝrmǝn: «Yad etimǝn ötüp kǝtkǝn künlǝrni,

Hiyal ⱪilimǝn axu yillarni;

7 Kǝqilliri eytkan nahxamni ǝslǝp;

Hiyallirim kɵnglümdin keqar»;

Roⱨim intilip izdimǝktǝ idi;

8 — «Rǝb mǝnggügǝ taxliwetǝmdu?

U ⱪaytidin iltipat kɵrsǝtmǝmdu?

9 Uning ɵzgǝrmǝs muⱨǝbbiti ǝmdi mǝnggügǝ tügǝp kǝttimu?

Uning wǝdisi ǝwladtin-ǝwladⱪiqǝ inawǝtsiz bolamdu?

10-11 Tǝngri meⱨir-xǝpⱪitini kɵrsitixni üntudimu?

U ƣǝzǝplinip Ɵz rǝⱨimdilliⱪini tohtitiwǝttimu?».

Selaⱨ.

12 Yǝni Yaⱨning ⱪilƣanlirini — yad etimǝn;

Ⱪǝdimdin buyanⱪi karamǝtliringni ǝslǝymǝn.

13 Sening barliⱪ ixligǝnliring üstidǝ seƣinip oylinimǝn;

Sening ⱪilƣanliring üstidǝ istiⱪamǝt ⱪilimǝn;

14 I Huda, yolung bolsa pak-muⱪǝddǝsliktidur;

Hudadǝk uluƣ bir ilaⱨ barmidur?

15 Mɵjizilǝr Yaratⱪuqi Ilaⱨdursǝn;

Əl-millǝtlǝr ara Sǝn küqüngni namayan ⱪilding. ◘

16 Ɵz biliking bilǝn Ɵz hǝlⱪingni,

Yǝni Yaⱪup wǝ Yüsüpning pǝrzǝntlirini ⱨɵrlükkǝ qiⱪarƣansǝn;

Selaⱨ. ◼

17 Sular Seni kɵrdi, i Huda, sular Seni kɵrdi;

Titrǝk ularni basti,

Dengiz tǝgliri patiparaⱪ boldi. ◼ ◘

18 Ⱪara bulutlar yamyur tɵkti;

Asmanlar zor sadasini anglatti;

Bǝrⱨǝⱪ, Sening oⱪliring tǝrǝp-tǝrǝpkǝ etildi. ◘

19 Güldürmamangning awazi ⱪara ⱪuyunda idi,

Qaⱪmaⱪlar jaⱨanni yorutti;

Yǝr-zemin alaⱪzadǝ bolup tǝwrǝndi.

20 Sening yolung dengiz-okyanlarda,

Ⱪǝdǝmliring qongⱪur sulardidur,

Ayaƣ izliringni tapⱪili bolmas. ◘

◼77:1 «Nǝƣmiqilǝrning bexi Yǝdutunƣa tapxurulƣan, Asaf yazƣan küy...» — «Yǝdutun» Dawut pǝyƣǝmbǝr «mǝdⱨiyǝ hori»ning bexi dǝp bekitkǝn, Yǝdutun isimlik bir kixini kɵrsitidu («1Tar.» 16:41ni kɵrüng). Yǝnǝ birhil tǝrjimisi: «Nǝƣmiqilǝrning bexiƣa tapxurulƣan, «Yǝdutun» (mǝdⱨiyilǝx degǝn mǝnidǝ) aⱨangida oⱪulsun dǝp, Asaf yazƣan küy...».

◘77:15 Mis. 15:11

◼77:16 «Ɵz biliking bilǝn... Yaⱪup wǝ Yüsüpning pǝrzǝntlirini ⱨɵrlükkǝ qiⱪarƣansǝn» — ibraniy tilidiki peilning (gaal) muxu yǝrdǝ: «Yaⱪup wǝ Yüsüpning pǝrzǝntlirigǝ ⱨǝmjǝmǝt bolup, ⱨɵrlükkǝ qiⱪarƣansǝn» degǝn toluⱪ mǝnini bildüridu. «Gaal» wǝ «goel» toƣruluⱪ «Tǝbirlǝr»ni kɵrüng.

◼77:17 «Sular Seni kɵrdi, i Huda, sular Seni kɵrdi; titrǝk ularni basti, dengiz tǝgliri patiparaⱪ boldi» — Asaf ⱨazir «Misirdin qiⱪix»tiki ixlarni ǝslǝydu. «Sular» bu yǝrdǝ Israillar mɵjizǝ bilǝn ɵtkǝn «Ⱪizil Dengiz»ni, andin Iordan dǝryasini kɵrsitidu.

◘77:17 Mis. 14:21

◘77:18 Mis. 14:24

◘77:20 Zǝb. 78:53; 80:2; Ⱨab. 3:15; Mar. 6:48; Yuⱨ. 6:19