143
143-küy •••• Roⱨim tügixǝy dǝp ⱪaldi!
1 Dawut yazƣan küy: —
Pǝrwǝrdigar, duayimni angliƣaysǝn;
Yelinixlirimƣa ⱪulaⱪ salƣaysǝn;
Ⱨǝⱪiⱪǝt-sadaⱪitingdǝ ⱨǝm ⱨǝⱪⱪaniyitingdǝ manga jawab bǝrgǝysǝn.
2 Ɵz ⱪulungni soraⱪⱪa tartixⱪa turmiƣaysǝn;
Qünki nǝziringdǝ tiriklǝrning ⱨeqbiri ⱨǝⱪⱪaniy ispatlanmaydu.■Rim. 3, 4; Gal. 3, 4
3 Qünki düxmǝn jenimƣa ziyankǝxlik ⱪilmaⱪta,
U ⱨayatimni dǝpsǝndǝ ⱪildi;
Meni huddi ɵlgili uzun bolƣanlardǝk,
Ⱪarangƣu jaylarda turuxⱪa mǝjbur ⱪilidu.
4 Xunga roⱨim iqimdǝ tügixǝy dǝp ⱪaldi;
Iqimdǝ ⱪǝlbim sundi.
5 Mǝn ⱪǝdimki künlǝrni ǝslǝymǝn;
Sening barliⱪ ⱪilƣanliring üstidǝ seƣinip oylinimǝn;
Ⱪolliring ixligǝnlirini hiyalimdin ɵtküzimǝn.■Zǝb. 77:5-12
6 Ⱪollirimni Sanga ⱪarap sozup intilimǝn;
Jenim qangⱪiƣan zemindǝk Sanga tǝxnadur.
Selaⱨ.
7 Manga tezdin jawab bǝrgǝysǝn, i Pǝrwǝrdigar;
Roⱨim ⱨalidin ketidu;
Didaringni mǝndin yoxurmiƣaysǝn;
Bolmisa mǝn ⱨangƣa qüxidiƣanlardǝk bolimǝn.
8 Meⱨir-muⱨǝbbitingni tang sǝⱨǝrdǝ anglatⱪaysǝn;
Qünki tayanƣinim Sǝn;
Mengixim kerǝk bolƣan yolni manga bildürgǝysǝn;
Qünki jenim Sanga tǝlmürüp ⱪaraydu;■Zǝb. 25:1
9 Meni ⱪutuldurƣaysǝn, i Pǝrwǝrdigar, düxmǝnlirimdin;
Baxpanaⱨ izdǝp Sening yeningƣa ⱪaqimǝn.
10 Ɵz iradǝnggǝ ǝmǝl ⱪiliximⱪa meni ɵgǝtkǝysǝn;
Qünki Sǝn mening Hudayimdursǝn;
Sening meⱨriban Roⱨing meni tüptüz zeminda yetǝkligǝy;□«...meni tüptüz zeminda yetǝkligǝy» — yaki «..meni tüz kɵngüllǝrning zeminida yetǝkligǝy», «...meni diyanǝtlik zeminda yetǝkligǝy».
11 Ɵz nam-xɵⱨriting üqün meni janlandurƣaysǝn, i Pǝrwǝrdigar;
Ɵz ⱨǝⱪⱪaniyitingdǝ jenimni awariqiliktin azad ⱪilƣaysǝn.
12 Ⱨǝm meⱨir-xǝpⱪitingdǝ düxmǝnlirimni üzüp taxliwǝtkǝysǝn;
Jenimni har ⱪilƣanlarning ⱨǝmmisini ⱨalak ⱪilƣaysǝn;
Qünki mǝn Sening ⱪulungdurmǝn.■Zǝb. 86:14-16; 116:16