2
Yeisu Keliso yana tubuga ifuifufuna.
Mad 1:18-25
1 Tayuwe tova-nai Iyoni aimo kabisone, aku kwana Loma anayegana Sisa Ogosita banae anafaiweya kini, ada giveimeya ke senisisi ina vaina yana ebaveimeya anamatatabuna wagaine. 2 Taidei senisisi-nai wai nagona gimaduyegemona tova-nai Kuliniyasi givetoveimeya Siliya anafafali wagaine. 3 Ada kaliva seyana seyana anayegana ina vetokilumina faina, inau taudiyavo yadi melala wagaidiya.
4 E ada Iyosefa kaduwe Galili melalina Nasaledi wagaine gitauya gilaka ginau Yudiya anafafali wagaine, aku tainei Kini Deivida yana melala lakaina Bedeliema wagaine, faina banae Deivida yana tubudelideli ada gabu-dina wagaine. 5 Ada wadedeku Meli nodi inau adiyegana ina vetokiluma faina, aku vavine-nai gisetagona aimo gina nagina ani bademowa giveifuga.†Iyo 7:42 6 Ada aimo Bedeliema wagaine imiyamiya aku Meli yana tova venatuna giyegemona, 7 ada yana tomoinagona bebeta kaliva givenatunena. Ada bebeta ikiwafiwafina nuya diyadi wagaidiya ke kevakeva adiafo wagaine ivenobalina, faina keke tamo mwatugu ebada faidiya manuwa wakawaka wagaine.
Toitaveyabina sifi ada aneloseyavo.
8 Aku wadedeku Bedeliema lilivane ani awaawana-dina wagaidiya sifi aditoitaveyabina tufodi imiyamiya, ada bogibogi-nai wagaine yadi sifiyavo iitaitaveyabidi. 9 Tova-nai wagaine KAUVEYA yana anelose seyana giyegemona wagaidiya ada Kauveya yana iwakana mamalina gilunamanamalena ani gituimalidi, ada iaseulolo lakaina. 10 Aku anelose wagaidiya givona, “Keke wana matauta. Iya valeya iwakana gaaliyena wagaimiya, ada taidei valeya-nai ani ebavemwamwala lakai-moena kaliva moyaidi faidiya. 11 Tova malinai Deivida melalina wagaine amiTokibababala gitubuga, Banae Mesaiya au yada Kauveya. 12 Yami iyaiyaya ani bebeta wana nuwagana nuya diyadi wagaidiya ikiwakiwafina, ada kevakeva bulumakau adiafo wagaine gidaudau.”
13 Ada maduga-mowa kaduwe gabama anaaneloseyavo yoo lakai-moena iyegemona ada banae nodi ivebutu Yaubada iawadavadavana ivonavona,
14 “Yaubada gabama getane-mwane kana awadavadavana,
ada kaliva babi wagaine gavega yana awaveiwaka wagaidiya
ani miya niwalova gimiyamiya wagaidiya.”
15 Ada aneloseyavo tova-nai isegedi aku ina iluku gabameya, ada au sifi aditoitaveyabina seyana seyana ivetolitoli ivona, “Kananau Bedeliema ada kana itana gaitoma taidei giyegemona, gavaiyamu Kauveya givoneda faine.” 16 E ada imadu inau Meli ke Iyosefa inuwagadi, ada iitana bebeta gidaudau kevakeva adiafo wagaine. 17 Ada tova-nai kwamana-nai iitana, au valeyana gavaiyamu anelose gimatawedi ivemogatalina, 18 ada badi gavega sifi aditoitaveyabina yadi vona inogalina ani meyadi gisidobodobona. 19 Aku Meli ani gaitoma-dina aseasediya isedi ada ivenuwadadanedi lakaina. 20 E ada sifi aditoitaveyabina iyewadi ada Yaubada anayegana ikilakaina ke idavadavana faina gaitoma moyaina inogalidi ke iitadi ani au gavaiyamu anelose-nai givonedi anafaiweya.
Yeisu anayegana ivelena ada inauwena manuwa tabu wagaine.
21 Yadayada anaveeita wagaine tainei bebeta vovona bubuna ina tomogoloina, ada tova-nai wagaine anayegana ivelena Yeisu, yegana-nai anelose givelena muliya-yo inana giveifuga.†Luk 1:31 22 Ada tova-nai Meli adikiveyegayegana anatova iluyabuna anafaiweya Mosese yana veimeya, ada Iyosefa ke Meli kwamana inauwena Yelusalema wagaine ke Yaubada matane inasena. 23 Faina Yaubada yana Veimeya anabuki wagaine ivetokilumina, givona, “Tomoinagona seyana seyana ina seliyedi Yaubada wagaine.” †Iyeg 13:2,12,15 24 Aku vevine adikiveyegayegana yadi tova venatuna muline faina, Yaubada yana veimeya givona, “Manuga bunebune iluwei o kai kabututula kabisodi iluwei.” **Yaubada yana veimeya tuwaina givona ani kai vavine gina venatunena natuna kaliva, aga ina bodana yadayada foti (40), e ada muline wa yadi vebolavoi nodi inanau manuwa tabu wagaine adikiveyegayegana Yaubada matane faina. Ada manuga iluwei ina vebolavoiyedi muline, yadi bwanene gina avaina e ada badi yegayegadi Yaubada matane yana veimeya anafaiweya. (Vei 12:1-8) E ada kaduwe tainei yadi vebolavoi inauwena Yelusalema wagaine ina vebolavoiyena.
25 Aku tova-nai wagaine kaliva seyana gimiyamiya Yelusalema wagaine, anayegana Simiyoni. Banae toyegayegana ada wa yana matauta Yaubada givemoimoinena, ada giitaitaboda gavatoveya meIsileli adietoyavuga ida nuwaga yadi miya vitana wagaine ke miya niwalova gida yegemo. Ada Aluwaluwa Tabuna gimiyamiya wagaine. 26 Ada Aluwaluwa Tabuna giivemogatalina banae wagaine vaita keke gina madualika aku nagona Kauveya yana Mesaiya gina itana. 27 Ada au Aluwaluwa Tabuna Simiyoni ginagoyena ke ginau manuwa tabu wagaine giluku. Aku tova-nai wagaine Yeisu inana ke tamana inauwe ilukuwena ke gavana Yaubada yana veimeya anafaiweya ina gugai faine, 28 aku Simiyoni inuwagana ada bana bebeta givai giwaina ada Yaubada gidavana givonaga,
29 “Kauveya, anafaiweya uvonadabadaba ada
tova malinai una awaegeku Iya ya togugai gana veyawai
nuwaniwalova wagaine.
30 Faina bademowa tauku matakuya gaitana ya Tokibababala
uimilina gielai,
31 Tauna Banae ukidewedewena gina dinava yoo tulina
tulina moyaidi faidiya.
32 Ada Banae anafaiweya malina ani Yaubada giluvemogatalina
badi keke meIsileli wagaidiya,
ada ya kalivamomo meIsileli ani Banae faine kaliva
moyaidi ina awadavadavama.ӠAis 49:6, Iyo 8:12
33 Ada Simiyoni yana vona bebeta-nai faine ani inana ke tamana meyadi gibovu. 34 E ada Simiyoni giawanuwakabubuyedi aku inana Meli wagaidiya givona, “Taidei Banae Yaubada givenuwadadanena ada meIsileli badi gavega keke ina vetumagane aga aimo vita lakaina ina nuwagana, aku gavega ina vetumaganena ani Yaubada gina kibababaledi ke ina vemwamwala-vagata. Ada Yaubada gisena ani Banae gina veiyaiyaya, aku kaliva moyaidi ina vonaveyewa faine, 35 e ada aseasedi ananuwanuwa moyaina gina mogatala. Ada imi taumi ani aseasemi gina ulolo lakaina vaita benisi gida etoyavali.”†Ais 8:14, 1Kol 1:23, 1Pi 2:6-8
36 Kaduwe wadedeku seyana falofita vavine gimiyamiya anayegana Ana, Fenuweli natuna, Aseli anaunuma wagaine. Banae tuwaina, akedune ginagi moganena nodi imiyamiya malamala seveni, 37 ada muliya gisikwa ke gimiyamiya analaba malamala eiti-fowa (84), ada au givesilakai-mowa. Ada tova ke tova bogi ke yadayada wagaidiya gina nauna manuwa tabu anafafali wagaine gioduodu, ada tauna giawatana ada kani giiloilovau aku giveoveola.†1Tim 5:5 38 E ada Simiyoni yana ifufu giavaina ani vavine-nai gilaka gielai Iyosefa ke Meli wagaidiya ada givesiule Yaubada wagaine ke giifufu kwamana faine moyaidi wagaidiya, badi gavega iitaitaboda aimoina Yelusalema anatutuveobu faina.
39 Ada Iyosefa ke Meli igugai anafaiweya gavana Yaubada yana veimeya ananuwanuwa, e ada iyewadi Galili anafafaliya ke taudiyavo yadi melala lakaina Nasaledi†Mad 2:23 wagaine iyegemona. 40 Ada kwamana-nai giveinala ke wa yana toyogina, ada nuwauya wagaine gimaga. Ada Yaubada yana nuwadoga wagaine gimiyamiya.
Kwamana Yeisu ani tovewalayavo nodi manuwa tabu wagaine.
41 Aku malamala seyana seyana ani Yeisu inana ke tamana inaunau Yelusalema wagaine Nugulina Abutuna faina.**Nugulina Abutuna wagaine, meIsileli inuwaududuna ke ivevemwamwalena tova-nai aditubudelideliyavo tova tuwaina KAUVEYA yana anelose gigai meItipita yadi kini giawaegedi meIsileli ina yegemona Itipita aku ina segena. Yaubada Mosese givonena ke meIsileli gina vonedi ada manuwa seyana seyana anatomiya ani lami seyana ina mununa ada dayagina ina vaina ke yadi manuwa adiwana anaogola wagaidiya ina luababana. Ada matatabudi imuliyena. Ada bogibogi-nai wagaine anelose gielai ada meItipita yadi manuwa adiogola keke wa dayagidi ani manuwa-dina gilukudi ke natudiyavo kaliva tomoinagona ani giluvealikadi. Aku tova-nai gielai meIsileli yadi manuwa wagaidiya ada giitana dayaga wana anaogola wagaidiya, ani keke gidaluku ke meIsileli natudiyavo kaliva tomoinagona gida luvealikadi aku ginugulidi. (Iyeg 12:1-14,21-27) 42 Ada tova-nai Yeisu anamalamala tuwelo ginuwagana, ada banae nodi inau Abutu wagaine anafaiweya adigiduwa. 43 Ada Abutu anayadayada giavaidi aku inana ke tamana iyewayewadi melaleya ani kwamana Yeisu gimiyayewa Yelusalema wagaine, aku badi keke ida alamane. 44 Inuwanuwa vaita banae nodi adiyoo nafone, ada yadayada seyana anamatatabuna inaunau. Muliya ivebutu ilelena yadi gabuyavo ke tubuiyadiyavo wagaidiya 45 aku keke ida nuwaga, e ada iyewadi Yelusalema ina lelena. 46 Ada yadayada anaveto wagaine inuwagana manuwa tabu nafone givetovetoga veimeya anatovewalayavo adimwatuguya, ada ginoganogala wagaidiya kadu gitolitolidadanedi. 47 Ada moyaidi gavega inogalina yana nuwauya ada yana laufata wagaidiya meyadi ibovu. 48 Aku tova-nai inana ke tamana iitana ada itataweyana, ada inana ivona wagaine, ivona, “Natuku, gavana faina taidei anafaiweya udewa wagaimeya? Tama ke imae wa yama aseuloulolo lakaina o aleleleni.”
49 Banae givonaga, “Gavaiyamu-yo waleleleku? Kai keke wada alamane gilubodaku ada Kamaku yana manuweya gana miyamiya?” 50 Aku gavana givonayena ani badi keke nuwadi gidamali. 51 Ada Yeisu nodi iobu inau Nasaledi wagaine ke bonadi gimatawalewaleyena. Aku inana ani gaitoma-dina taidei matatabuna inuwaveyalaidi aseasediya. 52 Ada Yeisu giveinala ke yana nuwauya kadu giveinala-mowa, ada Yaubada ke kaliva nodi ivemwamwala Bana faine.
†2:23 Iyeg 13:2,12,15
**2:24 Yaubada yana veimeya tuwaina givona ani kai vavine gina venatunena natuna kaliva, aga ina bodana yadayada foti (40), e ada muline wa yadi vebolavoi nodi inanau manuwa tabu wagaine adikiveyegayegana Yaubada matane faina. Ada manuga iluwei ina vebolavoiyedi muline, yadi bwanene gina avaina e ada badi yegayegadi Yaubada matane yana veimeya anafaiweya. (Vei 12:1-8)
†2:35 Ais 8:14, 1Kol 1:23, 1Pi 2:6-8
**2:41 Nugulina Abutuna wagaine, meIsileli inuwaududuna ke ivevemwamwalena tova-nai aditubudelideliyavo tova tuwaina KAUVEYA yana anelose gigai meItipita yadi kini giawaegedi meIsileli ina yegemona Itipita aku ina segena. Yaubada Mosese givonena ke meIsileli gina vonedi ada manuwa seyana seyana anatomiya ani lami seyana ina mununa ada dayagina ina vaina ke yadi manuwa adiwana anaogola wagaidiya ina luababana. Ada matatabudi imuliyena. Ada bogibogi-nai wagaine anelose gielai ada meItipita yadi manuwa adiogola keke wa dayagidi ani manuwa-dina gilukudi ke natudiyavo kaliva tomoinagona ani giluvealikadi. Aku tova-nai gielai meIsileli yadi manuwa wagaidiya ada giitana dayaga wana anaogola wagaidiya, ani keke gidaluku ke meIsileli natudiyavo kaliva tomoinagona gida luvealikadi aku ginugulidi. (Iyeg 12:1-14,21-27)