Kâte Bible MAREKO 15

Jesu kiarao barâ rambiŋ

(Mat 27:1–2, 11–30; Luk 23:1–25; Joh 18:28—19:16)

1 Hae fure pârâckeme taha bapa micne â soŋaŋ â miti qaqazu erâ micne guru ŋic sasawa jaŋe tumaŋnerâ Jesure dâŋ mujomirembiŋ. Mujomirepie ŋic gâcnezi Jesu rorâ mene qarâ jowa rarâ kia Pilato erao râembiŋ. 2 Eme Pilatozi honerâ wiocnerâ muwec, “Judaŋic jaŋere ŋicwofuŋ go hâcne me?” Mume Jesuzi muwec, “Ine hâcne mukomec.” 3 Eme taha bapa micne jaŋe babafic erâ Jesu mâretec qorickehuc domambiŋ. 4 Iŋuc epie Pilatozi Jesu wiocnerâ muwec, “Jaŋe gore dâŋ ŋemâcne mupie wemocte mana takirehuc iŋuc me iŋuc mi mukomec?” 5 Mume micnao mi rohuc dâŋemâc domame Pilatozi wareckewec.

6 Aakic hombaŋ sâc kia e Judaŋic jaŋe kâpâcwâru ŋic moc ʒâŋene mupie akickehuc firue‐jare jujec. 7 Eme dameŋ ira ŋic moc kâpâcwâru ficko ŋewec, ʒâŋene Baraba. Eki ŋic gâcne micne bajareme ʒika qahuc ŋic moc qâhâmombiŋ. Eme irec kâpâcwâru ficko mâmâc râec‐jopambiŋ. 8 Eme ŋicguru jaŋe Pilatore hae ʒoŋao tumaŋne‐fârerâ hombâŋ sâc mupie ejare jujec iŋuc ejareocte manasucnembiŋ. 9 Manasucnepie Pilatozi muwec, “Judaŋic ŋoŋere ŋicwofuŋ akicke‐ŋarepe manapie sâckeocmu me?” 10 Taha bapa micne jaŋe Jesu mâc aaric manacnehuc erao râembiŋ, i manahuc hâcne wio‐jarewec. 11 Ŋicguru sâko iŋuc wio‐jareme taha bapa micne jaŋe qafeŋ‐jopahuc mumbiŋ, “Ŋoŋe mupie Baraba firue‐ŋarezejec.” 12 Eme Pilatozi harierâ wio‐jarewec, “Iŋuc muŋgopieŋko Judaŋic ŋoŋere ŋicwofuŋ mucneeŋgopieŋ e wemo ecnepere muŋgopieŋ?” 13 Wio‐jareme musereckerâ mumbiŋ, “E maripoŋko hâmooc!” 14 Mupie jazawec, “Wemo kiŋte?” Mume jaŋe mic sâc owa ruruckerâ mumbiŋ, “E maripoŋko hâmooc!” 15 Eme Pilatozi maŋjeŋic taraocte mana‐jarerâ Baraba firue‐jarewec. Â Jesu ine mume becsahac biriŋneheczi qâʒâickehapie maripoŋko hâmoocte qikiŋne‐jarewec.

Jesu qa sâsâc ecnembiŋ

16 Eme momori jaŋe Jesu fickonec bawaharâ ficrâpeo sacmaŋko baraʒirâ momori gâcne ejarepie fisi‐fârembiŋ. 17 Erâ momori ŋaqi bâbâroŋ hecnepie huwec â mucʒârâzi hendiŋ ba akic erâ mainao hecnepie huwec. 18 Iŋuc erâ ofac hecnehuc mumbiŋ, “Ohec, Judaŋic jaŋere ŋicwofuŋ.” 19 Dâŋ i âzâcnehuc bacqeŋqeŋzi qizecnao qahuc tâfeckembiŋ. Erâ dieŋzi hecnerâ sâckehuc araŋ burec burec bacnembiŋ. 20 Qa sâsâc iŋuc ecneku momori ŋaqi heunuckehuc e jahacne ŋaqi mocwâc hecnepie hume maripoŋko qaniŋte jowa rambiŋ.

Jesu maripoŋko qapie hâmowec

(Mat 27:2–56; Luk 23:26–49; Joh 19:16–30)

21 Rahuc hatao ŋic moc bâfuambiŋ, ʒâŋene Simoŋ, Kirene hae mâreŋkonec, Alesande â Rufu jahere mamac. Eki hâcne gieonec wareme bâfuarâ ʒoɋac ecnepie Jesure maripoŋ âsickeme barambiŋ. 22 Baraku mâreŋ moc ʒâŋene Goligata, nâŋâcne dâŋko utu siec, ira fisimbiŋ. 23 Ira fisirâ waiŋ â maŋ ninikec opâ bâsifuckerâ râcnepie qikiŋnewec. 24 Eme maripoŋko qambiŋ. Qapie domahame ɋaqi‐ticnere ɋâsâi qapie kifuac‐jopame sâc rorambiŋ. 25 Jaŋe 9 kilok ehame qambiŋ. 26 Qarâ qizec botâŋnao fuŋne‐ticne ʒiŋuc qâreŋkembiŋ: “E Judaŋic jaŋere ŋicwofuŋ.” 27 Erâ ʒika qaqa jajahec mâmâc maripoŋko jofarâ moc ŋifec â moc ŋifec iŋuc râec‐jofambiŋ. [ 28 Eme miti papiao dâŋ ʒiŋuc fokac i fario qawec: “E sâqocne bapa jaŋere guruo râekicne”.] 29 Eme ŋic rac warec embiŋ jaŋe mufec muriŋ ehuc sâke itic ecnerâ mumbiŋ, “Oi, taha ufuŋ heropierâ ʒoaŋ jahec â moc eha bâzickezo muekiczi 30 sahacge ŋezickehuc maripoŋkonec wahac me!” 31 Taha bapa micne â miti qaqazu jaŋe iŋuc jaha nifepupu ecnerâ mumbiŋ, “Ŋic gâcne bâpiaŋ‐jopaweczi e jahacne sahac ŋezicke‐bipiekac. 32 E Kristo, Israe ŋic nâŋâcne ŋicwofuŋ jukacko maripoŋkonec wahame honerâ dâŋticne mana ʒakienʒepeneŋ.” Ŋic jofakicne jahe bafic‐jopahuc iŋuc jaha mu ruruc ecnepic.

33 Juku 12 kilok eme dapâc fuarâ mâreŋ sâckerâ fohame 3 kilok ewec. 34 3 kilok ira Jesuzi wiwic jaha wirahuc muwec, “Eloi, Eloi, lama sabaktani?” Nâŋâcne dâŋko: Anutu‐nane, Anutu‐nane, wemocte behecnukomec? 35 Eme ŋic domambiŋ jaŋeraonec gâcnezi manarâ mumbiŋ, “Keci mananiŋ, Elia wâsickekac.” 36 Eme ŋic moczi bâruŋ gasacke rarâ hâwec sâmbiŋ moc winigao âke uruckerâ huti tofanao bândeŋnerâ bâfeŋnerâ Jesu gumehuc âgofâcne jazawec, “Ŋoŋe behehapie honenaŋ, Eliazi jâmbomac ware bataraocmu me mâcne.” 37 Eme Jesu e mocwâc kâcɋene wirahuc hâmowec. 38 Hâmome taha ufuŋko qoruc ââketâc sâko i faic irec ʒâʒâŋiŋ jaha tâcnerâ suckerâ waha tarawec. 39 Eme momori soŋaŋ e mai jaha domahuc honehame hâmome muwec, “Ŋic kecʒi e jâmbomac Anuture Ŋokâ juwec.”

40 Ŋokac tucne jaŋe mâmâc taic domahuc wiac i hone manac embiŋ. Eme jaŋere ŋondeŋko Maria Madala haeonec â Maria Jakobo wârâŋne â Jose jahere neŋgoc â Salome jaŋe mâmâc domambiŋ. 41 Jaŋe Jesu Galilaia mâreŋko bâjâpehuc kiŋaŋ qacne jumbieŋ. Erâ jaŋe sawa mâcne, ŋokac gâcne mâmâc Jesuhec Jerusalem haeo ware jumbiŋ.

Jesu duckembiŋ

(Mat 27:57–61; Luk 23:50–55; Joh 19:38–42)

42 Sabata hombaŋte ʒaʒawie dameŋ, Neŋgocgieo hâcne hae owâeme Josefe Arimatia haeonec e warewec. 43 E micne guru jaŋere kâcɋene juweczi Anuture uucmaŋ fua tâcneocte maŋne domawec. Eki hâcne hâhâwic qamaserâ Pilatorao rarâ Jesu qâŋɋâŋ‐ticnere numucnewec. 44 Eme Pilato eki jâmbomac biac hâmojec muhuc momori soŋaŋ ecneme fisime wiocnewec. 45 Eme momori soŋaŋ eki biac qâŋɋâŋ fuajec, iŋuc mume manarâ Josefe mutaracnewec. 46 Eme Josefezi rarâ qoruc qaŋqaŋ furine barâ Jesu qâŋɋâŋ‐ticne maripoŋkonec batararâ qoruczia râpâckewec. Râpâckerâ bararâ qânâ hâŋko hawec ɋâricne e jahacne ʒâŋeruŋ biŋe gufukicne ira râewec. Râerâ qânâ moc qârândiŋkeme motâc kibâzickewec. 47 Maria Madala haeonec â Maria Josere neŋgoc jahe honehapire duckembiŋ.