16
Jesu faharewec
(Mat 28:1–8; Luk 24:1–12; Joh 20:1–10)
1 Owâ ririŋte sabata hombaŋ taraha Maria Madala haeonec â Maria Jakobore neŋgoc â Salome jaŋe Jesure qâŋɋâŋ ruacneniŋte wokemaŋ âsu biaŋ â kâŋâ furine barâ bâmockembiŋ. 2 Erâ Sonda hae fufurecte rarâ ʒâŋeruŋko fisihapie ʒoaŋ wefuwec. 3 Eme ʒâŋeruŋ bâqiŋkehuc nazaŋ gazaŋ erâ mumbiŋ, “Ʒâŋeruŋ motâckonec qânâ mozi qârândiŋke‐nâreocmu?” 4 Iŋuc murâ ʒâŋe fipie rame honembiŋ: Qânâ e wiac sâkozi qârândiŋkekicne fowec. 5 Eme ʒâŋeruŋ aaŋ fome honerâ raʒirâ fâreopec ŋicmotec moc ŋaqi ʒora qaŋqaŋ rodomame honerâ mâretec fâfârembiŋ. 6 Eme ʒiŋuc jazawec: “Mi fâfâreniŋ, ŋoŋe Jesu Nazarete rune maripoŋko qakicne honeniŋte wareŋgopieŋ. E ʒira mi fokac, e faharejec; fofotacne ʒi honeniŋ. 7 Ŋoŋe rarâ motecfâc‐ticne â Petoro jazaniŋ. E Galilaia mâreŋko bânie‐ŋareocte ŋazawec ira rarâ honeniŋmu.” Mar 14:28 8 Mume ŋokac jaŋe hâwic‐jopa sâqoreme ɋarac ɋarac qahuc ʒâŋeruŋkonec wefu gagasac jaha wiserâ rambiŋ. Erâ maŋjeŋic gâckeme ŋic wemocko biŋe moc jazanʒapiŋ.
Jesuzi ŋic fua sipuac ejarewec
(Mat 28:16–20; Luk 24:13–49; Joh 20:19–23)
[ 9 Jesu e Sonda hae fufurecte faharerâ qanaŋ Maria Madala haeonec mârâc demoŋ 7 jâpecnewec e fuacnewec. Luk 8:2; Joh 20:11–18 10 Fuacneme rarâ fuŋfuŋfâc‐ticne ki busâqoc ehuc juhapie biŋe jazawec. 11 Eme jaŋe Jesu faharerâ ŋokac fuacnejec dâŋ i manapie fârimâc ewec. 12 Eme ŋic jajahec hae mocko ranicte rahapire hawarine bâtikierâ hatao fua‐jactewec. Luk 24:13–35 13 Fua‐jacteme ra gâcne jazapire iŋuc jaha manapie fârine mi ewec.
14 Izi ʒâhec motecfâcne 11 tumaŋnerâ nânâ nâhuc ŋehapie fua‐jarewec. Erâ fahareme honembiŋzi biŋedâŋ jazapie maŋjeŋic bâzickeme mi mana ʒakiembiŋ irec mumu hehec ejarewec. Kor I 15:5 15 Erâ ʒiŋuc jazawec: “Ŋoŋe mâreŋne mâreŋne rarâ ŋic juraŋgopieŋ sâc Biŋebiaŋ jazanʒepieŋ. Mat 28:18–20 16 Mamanasiŋhec Miti Opâ ruaocmu e sambâŋte biŋe eocmu, mamanasiŋ tâmiric e ine hârâcte biŋe eocmu. Apo 2:38 17 Mamanasiŋhec juniŋmu jaŋe tâpiri qikiŋne‐jarepe fuŋne qaqa mâsi kecʒiŋuc bâfuaniŋmu: Nore ʒâŋe muhuc demoŋ jâpe‐jareniŋmu, dâŋ marac furune muniŋmu, Apo 16:18; 2:4, 11; 10:46 18 homa ba bâuac eniŋmu, opâ momori nâpie mi sipiric‐jopaocmu, huchec jaŋere qizecko mejeŋic râepie ɋiɋic qaniŋmu.” Luk 10:19; Apo 28:3–6; Jak 5:14, 15
Jesuzi sambâŋko fewec
(Luk 24:50–53)
19 Wofuŋ Jesu e dâŋ iŋuc jaza mutâc efârerâ afeckehuc sambâŋko fewec. Ira Anuture fâreo juhuc jukac. Luk 24:50–53; Apo 1:4–11; Mi Mâ 110:1 20 Eme jaŋe ine rarâ hae mâreŋ sâc miti‐ticne murambiŋ. Ehame Wofuŋzi qâtec‐joparâ mâsi bahuc dâŋjeŋic dopecke basanaŋ ewec.] Heb 2:4