A Pas anun o Pol torom a taro
Pilipai
A wasiso talapor mugu
Ra o Pol i kis una karabus tong o Rom, i tumus a wat na pas: Ara torom a taro Epeses, ara torom a taro Pilipai, ara torom a taro Kolosi ma ara kai torom o Pilimon.
A pas ri i tumusi torom a taro tong o Pilipai, ra i watung wakak torom det una mani ra det pitar tari tano. Det pitar tari tan o Epaproditus, ra i wan nami torom o Pol.
O Pilipai i ara labino tamon tong una papor Masedonia. O Pol i wan utong una nun a manru na inawan. Ra o Pol i wan utong, ka det longoro i utmakai a Wakak na Wasiso. Det ra det nukpukus una warawai anun o Pol, det a kum mugano taro na lotu tong o Pilipai (tama Ap 16:12-40).
A taro na lotu tong o Pilipai awu sur a kum tene gongon. Ikut det gasgas sur det in etabor nama mani torom a taro na lotu sapat o Judia ra det sibo doko, ma torom o Pol kai.
O Pol i kis una karabus, ikut i gas, ma i nemi sur a taro Pilipai kai, det in gas ra det etorom a kum mamaut. O Pol i watungi torom det lena, det in tur dekdek ma det in tumarong det gusun a kum torotoro na tene ususer ra det ususer a taro lena, din tok talilis a pinindet. I watungi kai lena, det in mur a petutna anun o Iesu ra i unatino pasi.
Una buk ri, dat tama i lena, o Pol i nem doko a taro na lotu tong o Pilipai.
A inawan ina Buk Pilipai:
A turturkibin ina buk ri (1:1-11)
O Pol i inanos det una nun a kinkinis una karabus (1:12-26)
A petutna ra a kum tene nurnur det in muri (1:27-2:18)
O Pol i nem na tulu o Timoti ma o Epaproditus (2:19-30)
Det in tur dekdek (3:1-4:9)
O Pol i gas nama nundet a etabor (4:10-20)
A ururop na wasiso anun o Pol torom det (4:21-23)
1
1 Ap 16:12-40Iau o Pol, mir nam o Timoti, aru tultul anun o Karisito Iesu, mir tumtumus torom mot, a taro rop anun o God, tiro una tamon Pilipai. Torom mot ra mot laun un o Karisito Iesu, ma mot kai a kum mugumugu na lotu ma a kum tene warut. 2 A marmaris ma a malmal tan o God a Tamandat ma a Labino o Iesu Karisito in kis tomo nam mot.
A niaring anun o Pol sur a taro Pilipai
3 A watung wakak torom anung a God una kum du bung rop ra a nuk pas mot. 4 Ma una nung a kum niaring rop sur mot rop, a ser wararing nama gasgas, 5 1 Kor 1:8uni mot tur tomo nam iau una Wakak na Wasiso, turpasi ut una mugano bung ra mot longoro i tuk uniri. 6 A tasman mulusi lena, o God ra i turpas a wakak na pinapam un mot, in pam nanani, tuk ra in uropi, una bung ra o Karisito Iesu in nan pirso melet.
7 I tokodos sur an nuknuk lenri un mot rop, uni mot kis mulus una nuknuking. Dat rop dat tur tomo una pinapam ra o God i pitar tari tang una nun a marmaris. Dat tur tomo ra a kis una karabus, ra a wasiso balu det ra det watung laulau a Wakak na Wasiso, ra a upuaso i torom a taro. 8 O God i tasmani lena, a nem doko i sur an tama mot rop, uni a nem doko mot nama marmaris anun o Karisito Iesu.
9 A wararing sur anumot a marmaris in labo ma in labo bing, ma a mananos ma a tastasman in lubung una numot a nilaun. 10 1 Tes 5:23Ra in lenra, mot in pet lari sur mot in tasman lele asau ra i wakak o ke wakak, sur a magiramot in tokodos umatan o God, ma katu etakun in los mot una bung ra o Karisito in nanpat. 11 Ma a wararing sur mot in bukus nama tokodosino, ra o Iesu Karisito in pam pati una numot a nilaun, sur a taro det in watung ulabo pas o God, ma det in rakon lekeleke pasi.
A kinkinis anun o Pol una karabus i ulubung a Wakak na Wasiso
12 A kum tistising, a nemi sur mot in tasmani lena, a kum mamaut ra a taramo i, i ulubung a Wakak na Wasiso sur in nan sarara. 13 Ap 28:30Uni i talapor torom a kum tene inaim rop ra det tamtamabat a rumu anun a king, ma torom a taro rop kai lena, a kis una karabus uni iau anun o Karisito. 14 Anung a kinkinis na karabus i sa uragot a susut na taro ra met nisnisino una Labino, ma ka det ngara sur det in wasiso puaso nama wasiso anun o God nama dekdek.
15 A lingmulus, ara taro det warawai un o Karisito uni det nuknuk laulau un iau. Ma ara taro kai, det warawai uni det nem na turbat iau gusun anung a kinkinis na mugumugu. Ikut, ara taro det warawai nama wakak na nuknukin det. 16 Det warawai uni a marmaris i kis un det. Det tasmani lena, a kis una karabus sur an wasiso balu a taro ra det watung laulau a Wakak na Wasiso. 17 Ikut ara taro det warawai un o Karisito uni det nem na ulabo pas det ut, ma ke lingmulus a nuknukin det. Det nem na wot meleti kut anung a kum mamaut, ra a kis una karabus. 18 Ikut katu utna ra det warawai nama sakino nuknuk, o a wakak na nuknuk. Det rop ri det warawai kut un o Karisito. Iri a kibino ra a gas.
A lingmulus, an gas bolbolos, 19 2 Kor 1:11uni a tasmani lena, una numot a kum niaring, ma a warut anun a Nion o Iesu Karisito, asau ra i wanpat un iau din pukusi sur an langolango. 20 A nurnur lena, kan pam tu utna ra an maimai uni. An tur dekdek ma kan ngara, sur an ulabo pas o Karisito una nung a kum petutna rop elar nami ra numugu a ser pami. Sako an laun o an mat, an ulabo pasi ut. 21 Gal 2:20Uni a nuknuking i lenri: Ra a laun, a laun sur o Karisito. Ra an mat, an rakon pas a labino utna sakit. 22 Ra a laun, anung a pinapam in wu a wakak na wino. Ka tasmani osi na pasander mo ra an pilok pasi, a nilaun, o a minat. 23 2 Kor 5:8Aru nuknuking. Ara, a nem doko i, sur an nan ma an kis tomo nam o Karisito, i ra i wakak sakit tan ara pasander. 24 Ikut i wakak sakit sur an laun, ra an warut mot. 25 A tasman mulusi lena, an laun ma an kis tomo nam mot, sur mot in lubung, ma mot in gas una nurnur. 26 Ra dat in tamtama tomo melet, anumot a gasgas un o Karisito Iesu in bukus ma in tiltilingis, kibino un iau.
27 Ep 4:1; 1 Tes 2:12Asau ra in nanpat, anumot a nilaun in mur sot pas a Wakak na Wasiso anun o Karisito. Ra an nan sur an tama mot, o ra an kis bakbak ma an longoro i kut a wasiso un mot, an tasmani lena, mot tur dekdek un ara nuknuk sot kut, ra mot papam tomo nam ara nuknuki mot kut sur a taro det in nurnur una Wakak na Wasiso, 28 ma ka mot in ngaran a kum ebar. Iri a ukinalong torom anumot a kum ebar ra det in iru, ikut torom mot, o God in ulaun mot. O God ut in pam a kum utna ra. 29 Ap 16:19-40Uni o God i udan mot. Awu sur i udan mot nama numot a nurnur kut un o Karisito, awu, i udan mot nama mamaut kai, ra mot taramo i uni mot tagun o Karisito. 30 Mot taramo a mamaut uni mot sa tur tomo nam iau una inaim. A inaim ra numugu mot tama i ra a pami, ma uniri mot longoro i ra a ser pami utmakai.