Moso Iri Sahou Tinan
Udu bolo buk dah ou winiyan anyolom iri kalem nadu bwisik i buku doh udu ndrobek ta sahou o kabowe sahou. Moso iri sahou tinan doh asah i buku doh:
Abraham
Abraham badeh, tama taha mwan ma badih marakon badu kon munyak ma hawe iri lau badu Isra-el. Ma bwena handru mene badeh, Kindrei tiye Abraham i buku doh: Iy kameh edeu rakon kon ha-un i tan ta iy ere aliy. I kon tan amwenen. Abraham anuhun boho Kindrei. Iy edek san lawe-en labai, ma jaha solo-an labai, eme iy asahan ta kon nane doh. Kon nane doh, nadah badeh, iri aloh Isra-el.
Kindrei amekes sahou tandrakan hawe Abraham. Iy tiye Abraham, buku iy hawe lundriyen oro kameh asahan lau ta Kindrei amwenen, tasah iy amwenen kameh atondrok oro, buku oro a-en hamon ta Kindrei.
Abraham sudi Sara i udun. Uru ari nadu uru bwe, ili le winiya uru a bada ndramak. Eme Kindrei amekes kalem, ma Sara tuwi nah ari. Uru tondrohani nyara i nah doh Aisik. Aisik asahan i tinan i loweu, eme iy sudi badih ari nyaran Rebeka. Rebeka tuwi nadun uru mumwir; tondrohani nyara uru, Esau hawe Jekop. Nyara Jekop ari ja badeh, Isra-el; idoh badu minen buku iri Juwis akohok nyara iri, Lau badu Isra-el.
Nadun uru ma la-uh doh badeh, Jekop sudi Leya hawe Rejel, uru nadu tine uru, ma iy ale sudi uru badih la-uh ja. Eme oro badih doh tuwi oro nah ma ronoh la-uh. Oro doh badeh, asahan tubu boho kamen ma ronoh la-uh badu Isra-el. Nyara oro hawe sare oro badeh, iri torowenei udu bolo tarou ta Rebelesen 7:4-8. Oro lau ma ronoh la-uh doh badeh, nadu oro asahan solo-an labai, ano nadu oro asahan i sola le gwek, eme ma kane lau badu Isra-el badeh, i solo-an mara-ei. Lau marakon doh badeh, asahan ta lundriye Abraham le ari.
Aget (Reb. 21:19) –Ou anyolom Jiwel
Alomwa, Anyu, Inyu (Baptais)
Iri torowenei udu bolo buk ndrabun asehek ta Jon ta alomwa badeh, inyu lau solo-an udu gwa Jodan. Iy tiye iri katubuni ndrine iri ma karuwani kandriyen ndra-in tiri, ano baranyu iri. Idoh bwidiy badeh, ma iri atanan buku kandriyen ndra-in ndraruwani iri.
Udu bolo iri lau nane atehei budon handru in ta Jises Krais, iri anyu doh badeh, kalem ta leheya buku ndramak asahan lau ta Kindrei. Moso sahou anyu i buku doh:
(a) Iy lau nane anyu iy badeh, ndraruwani iri kandriyen ndra-in marakon mene iy amekes.
(b) Iy ale ndratehei budon tan ndra-en ta Jises Krais, iy mene ndratandrakan ta akunoh kandriyen ta lau heh atehei budon tiri handru in tan.
(c) Iy anya ki-in hamon ta Jises Krais ma kanuhun sahou tan.
Ametis (Reb. 21:20) –Ou anyolom Jiwel
Angelo
Angelo doh badeh, iri ta atiye boho Kindrei, iri badeh ado kandrah hawe Kindrei. Iri badeh, bala buku lau awas, bwe. Iri malawiu o jor laleyah. Taha winiyan banyolom bada iri bwe, buku iri tubuni iri ame awas eh, idah kameh taha anyolom iri ai, bwe, kameh bwai. Kindrei suni iri angelo doh ta amekes gok tan. Gok tiri badeh, ta atondrok iri lau ta Kindrei (Apo. 12:6-11; 27:23; Hib. 1:14). Len ra-on Kindrei suni iri ta asehek sahou ta batanau i ta ari mwan o badih. Batun ta atondrok iri angelo marakon badeh, nyaran Maikel (Jut 9). Angelo ari bwele-en ja badeh, Gabiriyel (Luk 1:19, 26)
Aposel
Iri lau ta atiye sahou ta Kindrei, Jises luhi oro lau ma ronoh la-uh ame hawen, ma asahan lau tan (Met. 10:1-4; Mak 3:13-19; Luk 6:12-16). Oro lau doh badeh, are hawen ma iy leheya oro. Kala Jises imek ano iy amak ja, badeh, oro anyolom na mada oro amwenen. Iy suni oro ala tiye iri lau, ta saba lakou oro atou ma atiye sahou mwasin ta Kindrei. Eme ma oro asahan batun tiri lau nane atehei budon tiri handru in ta Jises. Ya, udu bolo Tarou toro Aposel, Pol uru Banabas ma hawe lau rayah ja badeh, aloh oro aposel ale.
Asan ku-i iri nah mwan
Kandriyen tiri Juwis badeh, iri asan ku-i iri nah mwan. Tine iri edeu iri eme len, buku len ma ndru la-uh ano badeh, iri asan ku-i iri. Idoh badeh, Kindrei tiye Abraham ta amekes. Ou anyolom udu bolo tarou ta Jenesis kalan 17:9-14.
Asan ku-i nah mwan doh badeh, i buku kalem ta ndramak, iy badu Juwis. Iri mene aloh iri Juwis badeh, Lau ala asan ku-i iri. Udu kabatana iri lau atiye sahou mwasin bwena mene, iri Juwis rayah badeh, anya, buku ari ndramak, iy badu Juwis bwe, arile, buku iy anya kasahan lau ta Kindrei badeh, iy kasani ku-in op. Idoh leheya buku iy ndrasahan Juwis ari ai; ma udu hamon ja kameh iy ndrasahan lau ta Kindrei ari ai. Arile, Pol badeh, basekesek bwe. Iy eme atorou nyala lakou dah, udu bolo la-ukei tan ili tiri Galesiya, ma iri kon solo-an ale. Iy anya, lakou ari le laba tinan ndramak kamekes badeh, buku anya, Kindrei kakohok iy keme hamon, iy badeh, katehei budon tan mara-ei ki-in le ta Jises Krais le ari.
Asiu ta atukum tiri Juwis (Sinagog)
Kon tinan ma kon bwisik marakon tiri Juwis badeh, asiu ta atukum tiri Juwis (Sinagog) badeh, udu aliy le ai. Idoh badeh, asiu ta atukum tiri lau ame le aliy, i buku len ta amunyau asahan bolo wik mari. Udu bolo asiu doh badeh, iri aloh sahou badu bolo buk ndrabun ta Kindrei, iri ale leheya nyala batanau ta Kindrei malen, iri asolom ma atudun nyara Kindrei. Len rayah iri lau ales are ta mada sahou ala bolo asiu doh ale.
Asiu tinan ta Kindrei (Tempol)
Asiu tinan ta Kindrei doh badeh, udu Jerusalem kon tinan tiri lau badu Isra-el. Kon doh badeh, iri Juwis atukum ala le aliy ta amekes ma sekesek ta len tinan tiri, ma amekes salom i ta Kindrei. Tarou ta asiu doh badeh, udu ka-u pes 214. Iri nane Juwis bwe badeh, winiyan bala bolon handru bwe, iri kameh are le ka-un kabwe. Udu bolon alih badeh, ndrahune iri lakou mara-ei ndrabun ta Kindrei ere aliy. Tinan tiri pris le badeh, winiyan ili loboho don ai, rasan le ta bolo jaha ari. Iri talahani kolau ra-ei ma buruwen badeh, turuki madasan ta ili bolo asiu ndrok doh. Kolau doh mene atarah i ma lusi ereu loken eme andri kala Jises mene imek udu ta kei tondreh (Met. 27:51; Mak 15:38; Luk 23:45). Idoh leheya buku, udu kabatana len doh eme badeh, Kindrei ndrasihi madasan ta lau marakon ta ala bolo loboho ndrahunen amwenen, buku iri lau atehei budon tiri handru in ta Jises Krais.
Balik - Ou anyolom Malawin Ndra-in
Batanau Malen, Batanau ta Moses, Kandriyen Malen
Batanau ta Kindrei badeh, torowenei udu bolo buk ma limeh ma mwena handru ta buk ndrabun (Sahou randra le malen). Iri batanau doh badeh, Kindrei tiye i ta Moses ta ili tiri lau tan. Boho iri jam aloh batanau malen badeh, “Lo.”
Be (Reb. 13:2)
Be doh badeh, bwisir ari laba tinan ma boto-on labai. Iy badeh, udu bolo lokei ta kon rayah le. Be badeh, bado bolo lokei ta Papuwa Niugini bwe. Malawi be badeh udu pes 757.
Beril (Reb 21:20) –Ou anyolom Jiwel
Bwisi sahou randra le (Ak) (Hib. 9:4; Reb. 11:19)
Bwisi sahou randra le doh badeh, iri amekes na kei, ano iri tubuluhi mara-ei na bek nyikilikin. Bolon badeh, bek ma lusi udu aliy, Kindrei mene torowenei sahou batanau tan ma ronoh udu aliy (Hib. 9:4-5). Iri lau badu Isra-el badeh bwese bwisi sahou randra le doh i hawe iri buku iri adek ado bolo kon lomale an, ma iri atehei udu bolo asiu balei ta Kindrei. Bwisi lakou doh hawe lakou marakon udu bolon badeh, ndrabun labai, tasah iri lakou mari doh i buku koroha o malawi kalem ta sahou randra le nane Kindrei amekes hawe iri lau badu Isra-el. Malawi bwisi sahou randra le badeh udu pes 646.
Debit
Debit badeh, tinan ma iy udu bwele-en labai tiri kabin tiri lau badu Isra-el. Iy le ari badeh, loweu udu bolo nadu Jesi oro marakon. Iy basahan kabin bwe le badeh, iy ma mwena badeh, atondrok sipsip ta taman. Iy ma loweu badeh, iy amekes bahun hawe laba ndramak nyekelen ari, ma iy idi iy imek. Debit badeh, iy ndramak ari ta aso-ok Kindrei tinan labai. Iy ale torowenei Wari ta atudun Kindrei badeh, solo-an labai, iri jam aloh Sam. Idoh badeh, badu bolo sare lundriye Debit, ma Jises asahan (Rom 1:3; Reb. 22:16). Ndra bwena labai, iri asehek anya Kindrei kameh suni seben ari nyaran Krais eme, iy kameh asahan bolo lundriye kabin Debit.
Emeral (Reb. 21:19) –Ou anyolom Jiwel
Epikuriya (Apo. 17:18)
Iri lau badu Epikuriya ma hawe iri lau rabuk ja, iri aloh iri Stowik, iri badeh, lau ta tanan, iri badeh, atehei budon tiri boto-on in ta tanan hawe sahou handru. Iri atehei len tiri marakon badeh, ili ta tukum tiri, ta asehek nyala iri lakou doh.
Gomora –Ou anyolom Sodom
Grik, Gris
Udu bolo mep udu bolo kona buk dah, ou winiyan anyolom nyara kon munyak tinan ari iri aloh Gris. Kon tinan udu bolo Gris badeh, Atens, ma kon tinan Korin udu loboho doh ale. Iri lau badu Gris badeh, tanan labai, ma iri lau marakon anuhun ma a-en hamon ta budon tiri. Lau solo-an badeh, asehek boho kon Grik, ma udu kabatana doh, Jises badeh udu kon munyak, iri lau ta tanan marakon badeh, winiyan asehek boho kon tiri Grik. Buk ha-un aloh Sahou Randra Le Ha-un (Niu Testamen) ma bwena handru badeh, iri torowenei i boho kon Grik.
Hayasin (Reb. 21:20) –Ou anyolom Jiwel
Herot
Udu bolo Sahou ta Kindrei badeh, oro lau ma hahuw nyara oro ari le iri aloh Herot.
1. Kabin Herot badeh, iri aloh iy Herot ndramak tinan labai, kabatana doh badeh, iy batun ta atondrok loboho Judiya ma kabatana doh badeh, Mariya edeu Jises. Iy Herot le doh mene adeh anya kidi Jises ma nyandren. Ou anyolom udu bolo tarou ta Met. 2:1-22 ma hawe Luk 1:5.
2. Herot Antipas doh badeh, batun ta atondrok loboho Galili, ma kabatana doh badeh, Jises asehek sahou ta Kindrei ma iy amekes kalem. Iy le adeh sudi Herodiyas i udun, ma mwetehei batu Jon ta alomwa. Kabatana doh ale Jises ereu ta mada sahou, iri tawi iy ma andrei iy ili hawe Herot ale ta adeu iy i ta mada sahou. Ou anyolom Mak 6:14-29; Luk 23:6-12.
3. Kabin Herot Agrippa I doh badeh, mene ta idi lau, ma adeu iri ala bolo asiu lulik, ta iri nane atehei budon tiri handru in ta Jises, ma a-en hamon tan, kabatana lahou ta Kindrei asahan ma mwena. Iy ale idi Jems nadu tine Jon. Ou anyolom udu bolo Apo. 12:1-23.
4. Kabin Herot Agrippa II doh mene badeh, anuhun sahou ta Pol ma suni iy iu ili Rom ta ales udu mada sahou hawe Sisa. Ou anyolom udu bolo Apo. 25:1326:2; 26:19, 27-32.
Ip (2 Kor. 11:3; 1 Tim. 2:13)
Ip doh badeh, udu Adam. Udu ndra kabatana Kindrei amekes kon munyak mara-ei, iy amekes Adam ma bwena, ano iy bwidi Adam amadin, iy to-ai ndruwi kabede Adam ari, ma iy amekes Ip. Ip badeh, anuhun boho mwak, iy Satan, andrekei iy ma iy ini buwa kei nane Kindrei anya uru saimon. Ip ale atehei buwa kei rayah i na Adam ma iy iniy ale. Uru doh badeh, ma mwena handru ta bokoro-ei batanau ta Kindrei udu kabatana doh eme, ma lau marakon amekes kandriyen ndra-in. Nadu Adam uru Ip badeh, ma taloh. Nyara oro badeh, Ken, Ebol hawe Set.
Iso (Rom 9:13; Hib. 11:20; 12:16-17)
Nadu Aisik ma la-uh badeh, mumwir. Iri aloh uru Iso hawe Jekop. Iso badeh, kadok, arile len rasan badeh, iy imeson andra-i labai, ma iy nyumusi iri tondrok tan i buku kadok badeh, i ta nadu tinen Jekop. Iy badeh, sekesek buku nadu tinen Jekop kakohok nyosowan ta tuluton ta amekes balam ta ndranoh.
Isra-el
Isra-el doh badeh, Kindrei tondrohon nyara Jekop i aliy, iy badeh, nadu Aisik uru udun Rebeka ari ai. Lundriye iri Isra-el badeh, aloh nyara iri badeh, solo-an. Iri aloh Lau badu Isra-el, udu hamon ja iri aloh Juwis, ma iri ale aloh Hiburu. Ou anyolom Juwis. Kon munyak nane iri Isra-el manyah are aliy kede-eh badeh, iri aloh Isra-el ale. Bwena mene iri aloh Kenan. Na dah ale iri aloh Palesta-en.
Jaspa (Reb. 21:11, 18, 19) –Ou anyolom Jiwel
Jekop
Jekop badeh, ndramak ari le nane nyaran Isra-el. Iy badeh, nadun ma ronoh la-uh, ma oro ale badeh, tubu boho kamen ma ronoh la-uh tiri lau badu Isra-el. Ou anyolom nyara Abraham.
Jises
Moso nyara Jises badeh, Seben o Kindrei badeh seben tahi. Nyara Jises rayah ja iri aloh badeh, i buku doh: Jises Krais, Nadu Kindrei, Nadu Ndramak Awas, hawe Nadu Debit.
Jiwel
Udu bolo tarou ta Rebelesen kalan 21 badeh, asehek ta nyala kon tinan ndrabun, nane Jon anyolom udu bolo ameh tan. Ka-un badeh, iri bwidiy na bek ma ronoh la-uh doh, kone oro mwasin labai udu ta katin. Oro bek ma ronoh la-uh doh, tariye oro bala le randra bwe, tariye ari ari i randrah labai, kone oro badeh, mwasin, mwasin labai. Lomada oro anya i randrah labai, nyikadi oro ma tariye oro i buku beteke nyabwiu. Nyara oro bek ma ronoh la-uh doh, ari ari badeh, randrah randrah labai:
1. Jaspa - tariyen badeh, nyorowan ma lewen.
2. Sapaya - tariyen badeh, nyarawin.
3. Aget - tariyen badeh, randrah doh, randrah doh.
4. Emeral - tariyen badeh, nyorowan hutu-un labai.
5. Sadonikis - tariyen randrah, randrah solo-an labai.
6. Koniliyen - tariyen badeh, saraman lomadan labai.
7. Krisolait - tariyen badeh, nyokowan.
8. Beril - tariyen badeh, nyorowan mari.
9. Topas - tariyen badeh, nyokowan mara-ei.
10. Krisopres - tariyen badeh, belen buku ma-o sur.
11. Hayasin - tariyen badeh, nyarawin ano nyorowan hawe nyarawin.
12. Ametis - tariyen badeh, bwe-es hawe saraman.
Josep
Bolo buk ndrabun nyara lau i Josep badeh, solo-an sese:
1. Josep ari badeh, nadu Jekop iy badu hawe oro ma ronoh la-uh. Oro badeh, tubu iri lau badu Isra-el. Iy badeh, nadu tine Benjamin. Ou anyolom Apo. 7:9-14 ma hawe Jon 4:5; Hib. 11:21-22; Reb. 7:8.
2. Josep ari ja badeh, udu Mariya.
3. Josep ari badeh, nadu tine Jises (Met. 13:55; Mak 6:3)
4. Josep ari ja badeh, nadu tine Jemis loweu. (Met. 27:56; Mak 15:40, 47).
5. Josep ari badu kon Arimateya, iy ndramak nadu batun ari, iy ari ta atukum hawe iri kansol ta bwena tiri Juwis. Iy badeh, ndramak ari mwasin, ma iy in hamon ta Jises Krais (Met. 27:57-60; Mak 15:42-46; Luk 23:50-53; Jon 19:38-42).
6. Josep Barsabas (Apo. 1:23). Iy lau ari ta in hamon ta Krais, ma iy badu hawen ale. Iri anya kasilah, are lau handru kameh winiyan asahan aposel ma akohok kon ta Judas Iskariyot badeh, iri asoh nyek ndrokowa Josep uru Matiyas. Eme Matiyas asahan aposel ma akohok kon ta Judas.
7. Barabas badeh, iri aloh iy Josep ale. (Apo. 4:36).
Juwis
Iri aloh iri Juwis badeh, lundriye Abraham iri. Ou anyolom nyara Abraham. Moso sahou Juwis badeh, Iri lau manyah are bwele-e munyak tiri Juda. Iri doh badeh, badu boho kamen ta Juda, idoh boho kamen ari ai, badu hawe boho kamen ma ronoh la-uh nane tiri Isra-el. Arile udu hamon ja badeh, iri aloh Juwis in hamon tiri lau mara-ei badu Isra-el. Ou anyolom ki ta nyara Isra-el. Udu bolo tarou ta Jon badeh, iy Juwis, idoh amwenen ili tiri lau ta are bwena tiri Juwis.
Kandrah (Paradais o Heben) (Luk 23:43; 2 Kor. 12:3; Reb. 2:7)
Moso sahou Paradais doh badeh, Bilin mwasin mwasin labai. Lau aloh doh badeh, in hamon ta kon mwasin labai udu bolo Iden mene Kindrei atehei Adam uru Ip are aliy ma mwena handru, kala iy amekes kon munyak. Udu bolo buk ndrabun (sahou randra le ha-un), i buku moso sahou Paradais doh badeh, moson ta aliy mara-ei i buku le ta kandrah o heben. Iy kon ari konen mwasin labai mara-ei, ta iri lau marakon nane ndratehei budon tiri handru ndra-en ta Jises Krais kameh alih aliy buku iri amak.
Kandriyen Malen –Ou anyolom Batanau Malen
Kandriyen ndra-in, Karei, Lomondra ndra-in
Buku are lau iy ba-en hamon ta batanau ta Kindrei bwe, iy ndrabwidi karei ma lomondra ndra-in. Buku lakou nadu bwisik o laba tinan udu mada taha lau, arile udu mada Kindrei badeh, idoh ou ndrabwidi kandriyen ndra-in kabwe.
Karei –Ou anyolom Kandriyen Ndra-in
Kei tondreh
Udu bolo kandriyen tiri lau badu Rom badeh, buku ari ndramak iy ndrabwidi ari kandriyen bamwenen bwe, buku iy idi ari ndramak imek, o, apou asiu bene-ei lakou ma amekes ramwes, san ari le badeh, kameh, iri atehei iy i bada kei tondreh ma iy kudu gwek winiya le iy imek. Iri amekes kei lunah le, ta amekes kei tondreh, ano iri tatahi ndramak ili bada kei tondreh doh, bwe kameh iri bawei minen ma hawe katin na malou. Ano iri tutuni kei tondreh ma ndramak udu aliy ili loken udu gwek winiya le ndramak imek. Ndramak nane, iri tatahi iy ili bada kei tondreh doh badeh, akohok sisi-in laba tinan labai ano iy imek. Lakou buku doh badeh, ta amekes bwilima laba tinan labai.
Koniliyen (Reb. 21:20) –Ou anyolom Jiwel
Krais
I boho Inglis iri aloh Krais i Mesaya ale. Krais doh badeh, boho kon tiri Grik, ya Mesaya ja badeh, boho iri Juwis. Moson turu sahou ma la-uh doh badeh, i buku Ndramak iri asolou ndrelekei ili batun. Idoh ta leheya buku iy kabin. Tasah, kandriyen tiri Juwis bwena, buku Kindrei aso-ok are lau anya kasahan kabin tiri Juwis, iri asolou ndrelekei i batun buku kalem doh badeh, leheya iy ndrasahan kabin tiri. Kindrei tandrakan ta edeu ari kabin keme ta aseben iri lau tan ta akohok iri marakon kame bahandra tondrok tan. Ndramak doh badeh, iri aloh iy Krais, tasah Krais doh badeh, iy le ari, Kindrei edeu kalem boto-on labai i tan ma suni iy eme kon munyak ta akohok iri mwan ma badih ame hamon.
Krisolait (Reb. 21:20) –Ou anyolom Jiwel
Krisopres (Reb. 21:20) –Ou anyolom Jiwel
Kristen (Apo. 26:28; 1 Pita 4:16)
Moson ta sahou Kristen badeh, i buku Ndramak iy in hamon handru ta Jises Krais. Ou anyolom ale Lau ta Jises o Lau ta Kindrei.
Lau badu leheleh (Jenta-el)
Boho iri jam badeh, aloh Jenta-el. Lau badu leheleh doh badeh, taha badu kon munyak, arile taha Juwis bwe. Boho iri Grik badeh, moson anya taha lau marakon. Ma moson ta aliy, lau marakon badu kon munyak, arile iri Juwis le badeh, bwe. Iri Juwis badeh, atudun iri ma alim ade iri tasah Kindrei badeh, atehei kalem i tiri ma aloh iri lau tan handru, eme ma iri baso-ok iri lau badu leheleh bwe.
Lau ta leheya kandriyen tiri Juwis (Skraip)
Iri lau doh badeh, ta leheya iri lau ta batanau malen mene Kindrei edeu i mine Moses ta iri Juwis. Iri leheya iri tanan nane ndratorowenei udu bolo oro buk ma limeh ta Moses. Ou anyolom Batanau Malen ma hawe nyara Moses.
Lau ta Jises (Disaipel), Lau (mwan ma badih) ta Kindrei (Kristen, Sios)
Disaipel badeh, boho iri jam. Boho Nyindrou badeh, lau ta Jises o lau ta Kindrei. Iri lau ta Jises doh badeh, adek a-en hamon tan ma iri atehei budon tiri in ta Jises. Ya, udu bolo Tarou toro Aposel badeh, moso sahou lau ta Jises o lau ta Kindrei badeh, i le buku are lau iy atehei budon tan handru in ta Jises, ma iy i buku nadu tinen handru. Boho iri jam aloh Kristen. Ya tukum tiri badeh, boho iri jam aloh Sios. Sahou rayah udu bolo tarou ta Metiu, Mak, Luk hawe Jon badeh, asehek i buku doh: Oro lau ta Jises ma ronoh la-uh. Oro lau ma ronoh la-uh doh badeh, Jises akohok oro ta adek hawen. Iy ale suni oro a buku iri aposel, ta atiye sahou tan, i buku ndratorowenei udu bolo tarou ta Met. 10:1-4.
Len ta amunyau (Sabat)
Len ta amunyau doh badeh, iy len tinan ari. I boho Hiburu iri aloh len ta amunyau doh Sabat. Udu bolo buk ta Jenesis, iri torowenei anya Kindrei andrei len onoh badeh, ta amekes kon munyak, ano udu bolo len ndro taloh doh badeh, iy amunyau, tasah gok tan mari ndrano. Kindrei anya, lau badeh, kabo gok na len onoh, ya len ndro taloh doh badeh, iri kamunyau ma katudun Kindrei. Iri Juwis, batanau tiri ta nyala len ta amunyau badeh, solo-an labai. Iri anya, lau badeh, samekes gok na bolo len ta amunyau, ma iri badeh, abolosen buku iri lau ba-en hamon ta batanau bwe. Ta idoh le badeh, iri abolosen kala Jises bwidi sik ta ndramak ari amwenen ja udu bolo len ta amunyau, ma kala oro lau ta Jises mene bosowa kalom udu bolo mine oro ta aimon udu bolo len ta amunyau. Iri anya iri doh badeh, amekes gok.
Len ndrabun - Ou anyolom Len tinan
Len tinan
Len tinan doh badeh, solo-an, eme badeh, iri Juwis awer iri len doh na bolo jaha mari. Iri len tinan doh badeh, len tiri abudon i hamon ta mwasin ta Kindrei i tiri ma hawe iri lakou marakon iy sebenei ma atehei i tiri bwena ndra-au. Idah badeh, nyara iri len tinan rayah:
Len tinan ta amekes salom ta asiu tinan ta Kindrei (Jon 10:22) Len tinan ta amekes salom doh badeh, ta amekes iri Juwis abudon ndramak ari ndra bwena ndra-au, nyaran Judas Makabiyus, iy mene bwidi asiu ta Kindrei asahan ha-un, ma lowosaniy amwenen ta lau winiyan ala atudun Kindrei are bolon. Iy amekes doh, tasah iri lau badu rakon ja hawe iri lau ta amekes kaliu ala bolo asiu tinan ta Kindrei doh, bokoro-ei andra-i. Iri Juwis ale aloh len tinan doh, len tinan ta sun. Ta idoh le badeh, kabatana len doh, Jises anya, “Buku jo udu ndra kon munyak dah, jo sun handru ta lomada kon munyak.” (Jon 9:5)
Len tinan ta Pasoba (Met. 26:2, 5, 17-19) Len tinan ta Pasoba doh badeh, iy len ari tinan labai tiri Juwis ta abudon ta aliy ta bolo jaha mari. Pasoba doh badeh, moson ta aliy i buku doh, Ruwaniy. Udu ta bolo len tinan doh badeh, iri Juwis abudon ili hamon mene iri asahan bonyo-ou tiri Ijip, ano iri atobwak ma ruwani kon Ijip. Kabatana len doh badeh, Kindrei suni angelo tan eme andri ili bolo kon Ijip idi nadu iri Ijip kadok mari amak. Arile, iy tiye iri Juwis anya, mada kou ta asiu tiri ari, ari badeh, iri kadai sipsip kasen, katahi ndraye sipsip ki bada ndru-u kou tiri mari. Buku angelo eme anyolom ndra udu ta ndru-u kou, iy kameh ruwani asiu dah, ma iy winiyan badai nah mwan kadok badu asiu doh bwe. Ta idoh le, udu kabatana len tinan ta Pasoba doh badeh, bolo asiu ra-em, ra-em iri Juwis adai sipsip ma aimon a le se ta abudon len tinan doh.
Len tinan ta jabi ramen yis bolon bwe. Len tinan ndrabun ta jabi ramen yis bolon bwe doh badeh, iri Juwis amekes udu bolo hawe le len ta Pasoba. Kabatana iri Juwis mene atobwak ma ruwani Ijip, iri badeh, ari len ta atondrok jabi ramen apus, ano adeu ili bek bwe. Ta idoh le badeh, udu ta len tinan doh, iri Juwis aimon jabi ramen yis bolon bwe.
Len tinan ta asiu balei ta Kindrei (Jon 7:2-52). Udu ta len doh badeh, iri Juwis sekesek, tasah len ta akohok nyamon badu bilin badeh, ndrame. Iri atah asiu mandron ta iri are aliy atondrok len tinan doh winiya wik ari, ta abudon manyah ta tubu iri bwena mene are bolo asiu mandron, kabatana iri mene adek ala ame an bolo kon lomale an winiya jaha ma hanoh (40), ano iri barandruni kon nane Kindrei ndratandrakan ta edeu i tiri.
Len tinan ta Pentikos (Apo. 2:1; 20:16; 1 Kor. 16:8). Len Pentikos doh badeh, len tinan ari ale tiri Juwis. Moson ta nyara Pentikos doh badeh, lomonoh (50). Iri Juwis atukum ta sekesek ta len ma lomonoh doh udu hamon ta len ta Pasoba. Udu bolo len ta Pentikos doh badeh, iri Juwis ale sekesek ta akohok kalom o wit. Iri ale abudon ta bwena mene Kindrei edeu batanau malen i mine Moses i tiri Juwis udu bwele-e mandrei Sainai.
Na len dah, Pentikos badeh, asahan i buku len tiri lau ta Kindrei abudon mwena mene Malawin Ndrabun eme andri bwele-e lau, iri nane atehei budon tiri handru in ta Jises Krais (Apo. 2:1-4)
Lomondra ndra-in - Ou anyolom Kandriyen Ndra-in
Mada koto-ok (Alta)
Iri Juwis amekes mada koto-ok doh badeh, ta amekes salom i ta Kindrei. Iri adai katin haka, buku sipsip, me, o bulumakau asun ta amekes salom. Mada koto-ok doh badeh ndrahune iri ta asun lakou i ta salom udu aliy. Mada koto-ok doh badeh, iri atikiy na bek.
Malawin Ndrabun, Malawin Mwasin
Kindrei, Malawin Ndrabun, hawe Krais, oro ma taloh doh badeh, ari le. Ou anyolom bolo tarou ta Met. 28:19. Malawin Mwasin ta Kindrei eme udu bolo ndrine iri lau atehei budon tiri handru in ta Jises Krais. Iy udu gwek ma iri gok iy amekes badeh, i buku doh:
(a) Iy amekes lau atanan lakou handru. Ou anyolom Jon 16:13 ma hawe 1 Kor. 2:10-13.
(b) Iy asolom ili ta Kindrei, asahan buku boho iri lau atehei budon tiri handru in ta Jises Krais. Ou anyolom Rom 8:26.
(c) Iy aseben ma leheya iri lau winiyan atanan san mwasin ta Kindrei. Ou anyolom Apo. 13:2; 16:6-7.
(d) Iy edeu boto-on i tiri lau ta iri winiyan asehek sahou ta Kindrei, ma winiyan amekes gok tan. Ou anyolom 1 Kor. 2:4-5.
(e) Iy edeu boto-on i ta ndramak ari ari ta amekes lakou, buku winiyan bwidi lau ta Kindrei marakon abadok. Ou anyolom 1 Kor. kalan 12 hawe kalan 14.
Malawin ndra-in, Balik
Malawin ndra-in hawe iri balik doh badeh, iri lau ta Satan. Iri malawiu doh badeh, ame ta none ma andrek lau ta iri sanuhun Kindrei, iri lau badeh, ka-en hamon ta Satan. Len rayah badeh, iri anya kame bolo budon ta ndramak ma kamekes budon ta ndramak kabadok ta amekes gok ta Satan ta amekes kandriyen ndra-in. Ki buku none ari ndramak anya kamekes lahou ta balahak o lahou ta kau, idoh iy amekes san ta iri malawin ndra-in eme bwele-en amwenen.
Melkisedek (Hib. kalan 5-7)
Taha marakon bala tanan bala mwasin ta nyala Melkisedek bwe, buku saba lakou ndratorowenei le udu bolo buk ta Hiburu kalan 5-7. Udu bolo buk ta Jenesis kalan 14:17-20 ndratorowenei anya, len rasan iri lau ta ramwes ame tawi Lot hawe udun ma nadun oro, ma andrei lakou toro mara-ei iu. Abraham anuhun badeh, ma iy ili amekes bahun hawe iri lau ta ramwes nane doh, iy ili idi iri amak. Ma iy kuhi Lot oro nadun, ma lakou toro mara-ei eme hamon ja. Abraham edek udu ta bahun anya keme hamon badeh, Melkisedek ndruni iy udu san. Melkisedek edeu na Abraham jabi ramen hawe waen, ma nyosowani iy, asolom i buku Kindrei kamekes mwasin ki tan kudu le buku don ai. Abraham eme apwai lakou tan ari, ari badu bolo ronoh, ronoh ta iri lakou marakon iy akohok ta bahun, ma iy edeu ari i ta Melkisedek. Udu hamon ja, iri lau badu Isra-el ame badeh, adeu ari, ari badu bolo ronoh ta lakou tiri mari ili ta pris. Ya udu bolo buk ta Hiburu tiye anya Melkisedek badeh, pris ari ale. Udu hamon ja, Kindrei anya, pris tiri lau badu Isra-el kameh akohok iri badu ta lundriye Libai oro le doh kabwe. Arile, kala doh mene badeh, Melkisedek ndruni Abraham, Libai asahan ta lundriye Abraham badeh, tinen badeu iy bwe le. Ta idoh le badeh, iy asehek udu bolo buk ta Hiburu anya, kala Abraham edeu lakou tan ari, ari badu bolo ronoh, ronoh ili ta Melkisedek, idoh i buku le iri pris badu ta lundriye Libai badeh, ndradeu, tasah udu hamon ja kameh iri asahan ta Abraham.
Mer (Met. 2:11; Mak 15:23; Jon 19:39; Reb. 18:13)
Mer doh badeh, lakou ari sowan tinan ma manahun ale mwasin ma nyaman labai. Iri amekes badu ta ndraye kei sabata-an, buku ou mwetehei ndrayen atekei ma sabata-an. Iri Juwis badeh, amekes i ta marasin. Mer doh amekes ndramak amadin, ma iy winiyan batona isi tinan bwe. Iri ale atah i bada ndramak imek, buku alokou ta adeu iy i lek.
Mesaya –Ou anyolom Krais
Moses
Moses ndramak batun tinan ari tiri lau badu Isra-el. Kabatana doh mene iri lau badu Isra-el asahan bonyo-ou are Ijip, Kindrei eme tiye Moses ki-in bwena tiri ma iri katobwak karuwani kon Ijip ma kala kare munyak nane iy ndraleheyaniy ndrala tiri. Kindrei asahan hawe Moses badeh, i san randrah labai ja. Moses anyolom jih anya udu bwele-e kei, arile basulumwi kei bandrakak bwe. Iy tanan Kindrei badeh, udu loboho doh. Ano Kindrei asehek sahou i tan ma tiye tan buku iy atehei kalem ndra tan ta udu bwena tiri lau tan ka-au kala hamon ka munyak tiri amwenen.
Kindrei amekes lakou solo-an ndra mwasin le asahan ta Moses. Len rasan, kala iri lau badu Ijip atikah iri lau badu Isra-el, iri ame aso are kapa gwa Retsi. Kindrei bwidi gwa i bilisiu bilisiu ale asamar mara-ei, ma i buku san soboren tiri Isra-el au ala bilisiu. Iri adek ala asos bilisiu le badeh, iri lau badu Ijip anya ka-en hamon tiri kala bilisiu ale, arile gwa atohou eme hamon ja badeh, ma tubuluhi iri mara-ei atuh au.
Moses doh le mene adeh, Kindrei edeu batanau tan malen i tiri lau badu Isra-el. Len rasan badeh, iri are bolo lokei, Moses badeh, inyek iu ili loke bwele-e mandrei iri aloh Sainai, ta ili kamanyah kudu loboho doh ma kamekes salom kili ta Kindrei. Kindrei leheyani iy amwenen i mada Moses ma tiye ta nyala batanau tan. Kindrei ale torowenei batanau tan ma ronoh badeh, udu bwele-e bek ma lusi; bek ma lusi doh badeh, iri nyahani udu loboho bosoh ndrabun ndrabun labai. Batanau doh badeh, iri torowenei udu bolo buk ma limeh udu mwena ta buk ndrabun (sahou randra le malen), iri aloh buk ta Moses. Oro buk doh badeh, Jenesis, Eksodus, Libitikus, Namba, ma hawe Dutoronomi. Ou anyolom ale udu ta Batanau Malen.
Mwak banin ere aliy (Draigon)
Mwak banin ere aliy doh badeh, kotowan ndra-in ndra-in labai. Iri asehek nyala mwak doh badeh, udu bolo tarou ta Rebelesen 12:313:4. Lau rayah asehek anya, mwak banin ere aliy doh badeh, i buku wadi laba tinan mara-ei, ma iri ale anya kotowan i buku mwak. Iy boto-on labai ja. Mwak banin ere aliy doh badeh, i buku Satan, kabin tiri malawin ndra-in marakon.
Nadu Ndramak Awas
Ndra bwena, bwena handru, propet ari nyaran Daniyel, iy aloh nyaran doh Ndramak ta Seben, ndramak nane Kindrei suni iy eme ta aseben iri lau ta kandriyen ndra-in tiri. Moson ta aliy i buku le Krais. Ou anyolom nyara Krais. Jises aloh nyaran doh ta asehek i badan amwenen. Buku Jises aloh iy amwenen Nadu Ndramak Awas, iy anya, iy ndramak le doh badeh, Kindrei suni iy eme ma hawe boto-on tan. Iy ndramak awas ma iy ale Kindrei.
Nadu Sipsip ta Kindrei
Jon ta alomwa aloh Jises badeh, Nadu sipsip ta Kindrei. Idoh badeh, asehek udu bolo tarou ta Jon kalan 1:29, 36. Udu bolo kandriyen tiri Juwis, iri badeh, adai sipsip kasen i nyara salom tiri buku Kindrei kameh kamani kandriyen ndra-in tiri. Ndraye sipsip kasen doh kameh sikine iri asahan ha-un ta mada Kindrei. Eme ma aloh Jises badeh, Nadu sipsip ta Kindrei, tasah iy badeh atehei kohan ma iy imek i nyara salom ta akunoh kandriyen ndra-in tataha marakon.
Nowa (Met. 24:37-38; Luk 3:36; 17:26-27; Hib. 11:7; 1 Pita 3:20; 2 Pita 2:5)
Nowa asahan badeh, ndra bwena bwena labai. Kindrei amekes Adam ma bwena ta lau marakon asahan kon munyak, asahan ndro ari badeh, Kindrei amekes iy ai. Kabatana Nowa udu kon doh badeh, iri lau badu bolo kon munyak mara-ei badeh, amekes kandriyen ndra-in solo-an labai. Tasah ta idoh le, Kindrei anya iy kameh suni wadah laba tinan ili bokoro-ei ma tolomwani iri, hawe lakou marakon udu bolo kon munyak. Arile, Nowa badeh, ndramak ari mwasin iy anuhun Kindrei. Ya Kindrei tiye Nowa ta kawiri ra-ei ndron laba tinan, iy tiye nyala Nowa amwenen ta iy kamekes ki buku sah handru. Iy tiye Nowa kandrei udun ma nadun oro ma taloh hawe udu oro kala bolo ndron, ma ale hawe ari mwan ari badih ta iri lakou mara-ei, ma iri sirih are bwele-e munyak. Ta lakou handru, iy badeh, kakohok iri ndro taloh mwan ya ndro taloh badih. Nowa atehei budon tan mara-ei in ta saba lakou Kindrei asehek, ma iy amekes lakou in hamon ta Kindrei ndratiye tan. Udu hamon ta Nowa hawe oro lau tan ala bolo ndron tinan badeh, Kindrei suni ur undruk laba tinan eme andri, ma bwidi laba wadah. Wadah badeh, sakalawi mandrei ma tolomwaniy atuh mara-ei. Iri lau marakon nane ado bolo kon munyak badeh, atuh, arile Nowa ma hawe lau tan oro le badeh bamak bwai.
Udu hamon ta bun solo-an iu, wadah ameres iu i andri, ma munyak abosar ja. Nowa ma hawe oro lau tan are bolo ndron ame manan. Ano Nowa amekes salom i ta Kindrei ma atudun iy, tasah iy sebenei oro. Kindrei tandrakan anya iy kameh winiyan bamekes wadah buku doh ja bwai. Iy anya beteke nyabwiu kameh i buku kalem ta tandrakan tan buku udu kabatana len doh eme, len hawe ben kameh udu aliy, kum ma lolan, len ta ur ma len ta an, ma len ta akohok nyamon badu bolo bilin.
Nyamon tinan –Ou anyolom Len tinan
Olip (Rom 11:17, 24; Jem. 3:12; Reb. 11:4)
Olip doh badeh, kei ari iy ato-ou salin. Ou winiyan anyolom malawin udu ka-u pes 311. Iri Juwis akohok buwan badeh, ta amekes ndrelekei. Ndrelekei tan badeh, amekes nyamon na aliy, ma amekes i ta lakou solo-an. Lakou ari laba tinan handru iri amekes udu bolo manyah tiri Juwis.
Nyara bwili ndrondro-ou Olip doh badeh, aloh i nyara bwili ndrondro-ou nane udu mirihik ta Jerusalem. Idoh badeh, iri kei olip ateh ere aliy.
Oniks (Reb. 21:20) –Ou anyolom Jiwel
Parasi
Iri Parasi doh badeh, iri lau ta atondrok kandriyen tiri Juwis. Iri atukum a le se hawe iri lau ta leheya tanan o kandriyen tiri Juwis (Skraip). Iri tanan labai ta batanau nane Kindrei edeu i ta Moses ale, ma iri ndraleheya kandriyen rayah solo-an ma iri adeu tanan tiri amwenen ale ili hawen. Iri badeh, a-um ade iri tasah, iri atehei budon tiri anya, iri badeh, mwasin labai tiri lau rayah ja. Iri badeh, ta asehek lau, iri amekes iri i buku iri mwasin mara-ei, arile budon ma lomondra ndra-in udu tiri. Iri tebelese hawe Jises ma asilah san ta adai iy kimek.
Pasoba –Ou anyolom Len tinan (Pasoba)
Pentikos –Ou anyolom Len tinan (Pentikos)
Pris, Tinan tiri pris
Iri pris doh badeh, iri ta ndrokowa lau hawe Kindrei, ma iri ta are bwena ta amekes salom i ta Kindrei, in hamon ta so-ok tiri lau badu Isra-el. Udu bolo len ta Jises badeh, iri amekes salom udu bolo asiu tinan ta Kindrei udu Jerusalem. Iri adeu kalem i ta ndramak asahan pris badeh, asahan ta Aron amwenen, ma asahan ta lundriye Libai le amwenen.
Tinan tiri pris doh badeh, iy udu bwele-en ma iy atondrok iri pris mari. Adeu kalem i ta ndramak asahan tinan ta pris, iy kameh amekes lahou ta pris ta jaha ari le, ano iri adeu kalem i ta iy ari ja. Tinan tiri pris le ari kameh winiyan ili bolo asiu ndrok, udu bolo asiu tinan ta Kindrei, ta amekes salom i ta Kindrei, tasah ta iri kandriyen ndra-in tan amwenen ma tiri lau nane ndramekes.
Iri pris rayah ale iri aloh iri pris tinan. Iri pris doh badeh, are bwele-en labai ja tiri pris mari. Iri pris ateu gok buku tinan tiri pris bwena mene, aloh iri ale tinan tiri pris. Ou anyolom malawi pris doh udu ta pes 639.
Propet
Propet doh badeh, lau ta tiye iri sahou Kindrei asehek i tan. Iy asehek sahou badu boho Kindrei amwenen i tiri lau. Bwena mene badeh, Kindrei suni iri propet solo-an, buku Samuwel, hawe Aisaya, ma Jeremaya. Ta oro propet doh le badeh, Kindrei ale sihidiy nyala iri lakou marakon kameh asahan hamon. Udu bwena mene Jises Krais basahan bolo kon munyak bwe le, iri propet badeh, asehek nyala len tan ta eme, ma iy kameh asehek lakou solo-an iy kameh amekes, ma saba lakou kameh asahan tan. Iri badeh asehek lakou solo-an ale kameh asahan na len hamon ta munyak ma lakou mari ano, ta Jises Krais eme hamon ja ta edeu lau mari badu kon munyak ala ta mada sahou.
Rebeka (Rom 9:10-13)
Rebeka doh badeh, udu Aisik, nadu Abraham. Rebeka badeh, tine Iso uru Jekop, iy tuwi uru ma la-uh mumwir. Iso badeh, eme len bwena, arile Kindrei badeh, atehei kalem i ta Jekop ta asahan bwena, ya ta iy le badeh, iri Juwis asahan. Ou anyolom nyara Iso uru Jekop.
Rom
Rom doh badeh, kati kon tinan rakon iri aloh Itali. Udu bada len doh mene, Jises badeh, ndra-en kon munyak ai, ya iri lau badu Rom badeh, ndrandrei kon solo-an labai badu munyak. Iri ale andrei Isra-el ma iri Isra-el are bahandra tondrok tiri. Tasah ta idoh le badeh, iri lau badu Isra-el baso-ok iri bwe, ma anya katikah iri ka-au ka len ta kon tiri. Iri kabin badu Rom nane iri aloh iy Sisa, iy doh badeh, kabin ari bwele-en labai udu bolo kon munyak mara-ei na len doh. Ou anyolom Sisa.
Sabat –Ou anyolom Len ta amunyau
Sadonikis –Ou anyolom Jiwel
Sadusi
Iri Sadusi doh badeh, iri lau rabuk batun tinan ale, are bolo iri Juwis. Iri leheya lau ta ka-en hamon ta batanau mene Kindrei edeu ili mine Moses, ma hawe kandriyen rayah ja tiri Juwis amwenen. Iri lau doh badeh, i buku le iri Parasi amwenen (Ou anyolom Parasi). Arile, iri Sadusi badeh, ta tebelese hawe iri Parasi, tasah iri Parasi atehei budon anya, udu hamon ta ndramak imek, iy kameh amak eme awas ja na len hamon, arile iri Sadusi badeh, batehei budon tiri handru ba-en ta aliy bwe.
Sahou randra le (Malen: Luk 1:72; Apo. 3:25; 7:8; Gal. 3:17; Hib. 9:1; Ha-un: Met. 26:28; Mak 14:24; Luk 22:20; Rom 11:27; 1 Kor. 11:25; 2 Kor. 3:6; Hib. 7:22; 8:6-13; 9:15; 10:16, 29; 12:24; 13:20)
Uru lau ma la-uh, ndrokowa uru udu aliy, arile uru amekes budon turu i le ari. Buku ari ndramak iy amekes sahou randra le, iy badeh, tandrakan ta amekes lakou ta ari ndramak, ma iy ndramak ari ja doh kameh amekes i buku le aliy, buku sahou turu badeh, kili le ari. I buku sahou randra le ta Kindrei, Kindrei le ari badeh, amekes sahou randra le doh, ma iy tandrakan buku iy badeh, kameh asahan tama Laban tiri lau tan, buku iri atehei budon tiri in tan, ma a-en hamon tan.
Sahou randra le badeh, la-uh Kindrei amekes. Ma bwena handru badeh, Kindrei amekes sahou randra le malen (Ol Testamen) hawe Moses. Kindrei anya, iy kameh akohok iri lau ame hamon asahan lau tan handru, buku iri a-en hamon ta batanau tan mari. Arile, ari ndramak ba-en hamon ta batanau tan mari bwe, ma ari ndramak ale bala mwasin ta madan udu bada sahou randra le tan malen, bwe. Ya, udu bada sahou randra le ha-un (Niu Testamen) ja badeh, Kindrei anya, buku are lau atehei budon tan mara-ei in ta Jises Krais, iy kameh aloh iy ndramak mwasin handru ta madan, i buku iy bamekes kandriyen ta karei ma basakalawi sahou batanau tan bwe.
Sainai
Sainai doh badeh, nyara mandrei mene Moses udu bwele-en, kala Kindrei edeu batanau tan i minen. Ou anyolom nyara Moses ma udu bolo mep udu bolo kona buk ma bwena.
Samariya
Samariya doh badeh, nyara kon i buku kobek. Ou winiyan anyolom udu bolo mep udu bolo kona buk ma bwena. Iri lau badu Samariya badeh, iri Juwis handru bwe. Tasah, bwena mene, iri asoh badih badeh, badu Juwis bwe. Iri Juwis handru badeh, winiyan basehek sahou hawe iri bwe.
Sapaya (Reb. 21:19) –Ou anyolom Jiwel
Sara (Rom 4:19; 9:9)
Sara badeh, udu Abraham. Jaha solo-an labai, iy bato-ou ari nah bwai, udu, iy asahan alon labai badeh, iy baratuwi Aisik. Ou anyolom nyara Abraham.
Satan
Satan badeh, tinan tiri malawin ndra-in marakon. Iy badeh, kawas ta Kindrei bwe, iy badeh, wendreya lau ma andrek iri ta amekes kandriyen ndra-in. Iy ale edek ili eme na bolo len mari asehek tiri lau nane ndratehei budon tiri ndra-en ta Jises Krais ta iri lakou ndra-in iri amekes bwena ndra-au, buku iri kabudon Kindrei badeh, bamani kandriyen ndra-in tiri bwe. Satan ale, iri aloh iy Balik ma Kabin badu kon munyak dah. Ou anyolom Malawi ndra-in ale.
Sayon (Met. 21:5; Jon 12:15; Rom 9:33; 11:26; 1 Pita 2:6)
Sayon doh badeh, nyara bwili ndrondro-ou ari nane iri tahi kon tinan Jerusalem udu aliy. Asiu tinan ta Kindrei badeh, udu bwele-e bwili ndrondro-ou nane doh, ma loboho bolo kon tinan nane doh badeh, ndrabun labai. San rasan Sayon badeh, iri aloh loboho Jerusalem mara-ei. Len rayah badeh, nyara Sayon iri aloh Jerusalem udu loken. Idoh i buku nyala kandrah amwenen. Idoh badeh, koroha kon nane Kindrei udu aliy (Hib. 12:22; Reb. 14:1)
Sipsip
Kandriyen tiri Juwis ta atondrok sipsip ma bwena mene badeh, i buku doh:
(a) Kabatana doh badeh, ndramak ari winiyan atondrok sipsip solo-an, solo-an. Iri bado bolo kon tinan le bwe, arile iri sariye iri sipsip au ala lokei, ala kon bwidiu solo-an tiri ta aimon.
(b) Lau handru badeh, are lokei doh ta atondrok iri sipsip. Iri lau doh badeh, tanan iri sipsip mwasin labai. Iri winiyan atanan iri ari, ari.
(c) Ndramak ta atondrok iri sipsip badeh, tahi kowah awudi kon ndrahune iri sipsip tan. I ben badeh, iri atehei ndrokei tiri sipsip are bolo kowah, ta ari lakou sasahan tiri. Iy ndramak ta atondrok sipsip doh kameh amadin amwenen udu mada san ta kowah. Len rayah iri lau ta bahana badeh, anyek kabede kowah ta bahana sipsip.
(d) Iri Juwis adai sipsip badeh, ta amekes salom i ta Kindrei. Ou anyolom ale ki ta Nadu Sipsip ta Kindrei.
Sisa
Sisa doh badeh, nyara kabin tiri lau badu kon Rom. Iri lau badu Rom badeh, adai lau badu kon solo-an amak, ma andrei kon tiri. Sisa doh badeh, kabin tiri marakon. Iri batun tiri lau badu Rom marakon aloh nyara iri badeh, Sisa.
Sodom (Met. 10:15; 11:23-24; Luk 17:29; Reb. 11:8)
Sodom doh nyara kon tinan mene Lot manyah udu aliy. Kon tinan ari mirihik tan badeh, Gomora. Iri lau badu Sodom ma Gomora nane adeh amekes kandriyen solo-an ndra-in. Tasah ta idoh le badeh, Kindrei bokoro-ei kon tinan ma la-uh doh na jih.
Solomon (Met. 1:6-7; 6:29; 12:42; Luk 11:31; 12:27; Apo. 7:47)
Solomon badeh, nadu Debit. Iy badeh kabin tinan tiri lau badu Isra-el. Len rasan Kindrei eme asahan hawe Solomon i san ta ameh, ma ndremenya iy ta saba ndramas handru iy aso-ok Kindrei kedeu ki tan. Solomon ndremenya Kindrei ta kedeu tanan ki tan ta iy kameh winiyan tondrokei iri lau tan ado mwasin. Kindrei atehei laba tine tanan i ta Solomon. Iy badeh, laba tine tanan labai udu bwele-e iri kabin mara-ei. Kindrei ale atehei iri lakou ndra mwasin le i tan, ma bwidi iy asahan nadu batun. Iy Solomon le doh badeh, tahi asiu tinan ta Kindrei ma bwena handru. Idoh badeh, akohok kon ta asiu balei ta Kindrei mene iri Juwis are aliy ta atudun Kindrei. Asiu tinan ta Kindrei doh badeh, konen mwasin mwasin labai.
Solpa, Bek solpa, Bek brim (Reb. 9:17)
Solpa doh badeh, iri aloh hamon ai. Bwena mene badeh, iri aloh bek brim. Tariyen badeh, nyokowan iy anya badeh, lomadan tinan labai, ma manahun boto-on labai. Iri amekes sali bokak badeh na aliy.
Stowik –Ou anyolom nyara Epikuriya
Topas (Reb. 21:20) –Ou anyolom Jiwel
Tubuni ndrinem
Moso sahou marakon ta tubuni ndrinem badeh, i buku doh:
(a) Ndramak anyolom buku iy ndrabwidi kandriyen ndra-in;
(b) Iy anya iy kameh ano ta amekes iri kandriyen ndra-in iy mene amekes bwena, idah iy anya kamekes iri kandriyen Kindrei aso-ok;
(c) Iy ndremenya Kindrei ta kamani iri kandriyen tan ndra-in mari nane iy amekes.
Yis (Met. 13:33; 16:6, 12; 1 Kor. 5:6-8; Gal. 5:9)
Yis doh badeh, lakou ari i buku eh, iri adeu i bolo kalom ta amekes jabi ramen. Yis doh badeh, ta amekes jabi ramen apus eme loken. Ou atehei nadu sese le ta amekes jabi ramen solo-an apus eme loken.
Waen, Buwa Waen
Waen doh badeh, buwa kei waen. Malawi buwa kei waen dah badeh ou winiyan anyolom udu ka-u pes 310. Kei doh ato-ou buwan badeh, iri aloh malou. Buwan badeh, iri amekes i waen. Iri Juwis atah bada malou doh solo-an labai udu bolo bilin tiri, ma iri atondrok udu mwasin labai.
Wari, Buk Wari