3
Na tinoni te rapo
Mi ta sakai na bongi Peter ma John toro tona tana Valetabu te manana tana tangi tolu tana dani, tana bona ni kokoeliulivuti. Tana mataula ni peo tara holoa nia na “Mataula Utoutoa” tara holaa mai gaa sakai na tinoni te rapo tana volana mai tua. Tughu bongi tara holaa mai tana mataula eni, ge nongi rongo tadira na vure kara haghe tana Valetabu. Tana bona te righira Peter ma John toro haghe, ge nongira ge koro hea siki rongo. Ma gaira toro totolaa vaa, ge bosa Peter, “Ko vaevaneghai mai!” Ge vaevanera vaa, te ghanaghana koro ba hea siki totobo. Ge bosa Peter vania, “Inau tu mua loghoa siki rongo. Mu ku hegho vamua na hava tu loghoa - tana ahana Jesus Christ ni Nazareth inau tu keikerigho ge ko tughuru dato mo ko sakutua!” Ma Peter te tabea na limana madolona me tughuruvaghinia. Tana bona vaghana keri, na marevona mana guruvatu ni tuana tara ghoi laga oli, ma gaia te tughuru dato me vuivuni ni sakusaku tua kolili me nira udukolu haghe tana Valetabu me soghasogha me holohabaa igaa God.
Mana vure igaa tara righia te sakusaku tua me holohabaa God, 10 mi tana bona tara righi vaughilalana gaia na tinoni te sopou tana Mataula Utoutoa ge ara nia hare ngangata ivei vaho tua tea ge uto.
Nina kokoe Peter tana Valetabu
11 Agaia na tinoni te pongora Peter ma John ilokana na peo ni Valetabu tara holoa nia nina ghaghata Solomon, mana vure tara hare mara kokoluvira. 12 Tana bona te righira na vure Peter ge bosa vanira, “?Ghau rana Israel, e ghua ge au nia hare eni, mana hava te ghua ge au totolaghai? ?Au ghanaghana ighau ke, ma nimami na maana mana nilabumami, ge sakutua na tinoni eni? 13 Anina God Abraham, Isaac, ma Jacob adidira God lei kukuada, te hea mai na rongoragha ni kokou a Jesus anina tinoni lutu God. Buka Rughuhoru 3:6, 15 Hauvaa mi ghau tau lubatia vanira rana haba, mau nia sika tana matana Pilate tana bona te liona ge ke tatavahalea. 14 Agaia te tabu me uto, mau mua holopangotia, hauvaa mau nongia Pilate ge ke lubatia na tinoni labupolo. Matthew 27:15-23; Mark 15:6-14; Luke 23:13-23; John 19:12-15 15 Mau vamatea gaia te nia hevei na vola. Ma God te vola olia tana mate, mi ghai tai righia nia na matamami. 16 Nia na maana tana ahana ge ghoi volaoli na tinoni rapo eni. Na hava tau righia te kale na pukuna toro taluutunia Jesus, mi tana taluutuniana Jesus te nea ge tatavahale.
17 “Mi taeni ghau hoghogu, inau tu ghilalaghau kolura lei nimiu mane huhuli tau mua manahana na hava tau nea vania Jesus. 18 God te diki ladavaghinia mai tua idania tadira na lei prophet, ke vahaghitaili mughua anina Messiah, ma gaia te nea ge kale utuni te vaghaa eni. 19 Kau tughulio ma kau taluutunia God ge ke talukehai na lei palumiu. Kau nea te vaghaa eni, 20 ma God ke vaheghau mai na patupatu. Me ke vetenaa mai Jesus vanighita, agaia na Messiah te vili dilaa tua. 21 Agaia ke ghahaa olia i kokou polo ke sara na bongi sosoko kara ghoi goni vaolui na lei totobo, te diki ladavaghinighi mai tua God vanira nina lei prophet tabu idania. 22 Ma Moses te ghaghua, ‘A Lord nimiu na God ke vetena vanighau na prophet te vaghaa inau, agaia ke butu mai tana kemamiu, mi ghau kau lavipangotighi na lei totobo ke bosai vanighau. Eruani Vetena 18:15, 18 (LXX) 23 Ma hei ke mua lavipangotia na prophet keri, ma God ke sonikehaa itadira nina vure me ke taghalaghinia,’ e ghaghua. Eruani Vetena 18:19; Buka Vetena 23:29
24 “Gaira udolu lei prophet tara ladavaghi kolua Samuel maia rahei tara mai murina, tara bosa tatei na hava te kale tana lei bongi raini. 25 Lei nina baubahu God te diki bosa tatei vanira tua na lei prophet vanighita, mi ghita na baubahu God te tuvalia kolura rana kukuada, te vaghaa te bosaa vania Abraham,
‘Mi tadira na lei vinavahuhumu kara lavia na vauto na lei kema ilokana na maramana.’ Vuivuni 22:18; 26:4
26 Keri ge vilia nina Tinoni Lutu God a Jesus, me diki vetena vanighita mai, ge ke vautoghita me ke neghita ge ka ririu keha tana lei paluda.”

3:13 Buka Rughuhoru 3:6, 15

3:14 Matthew 27:15-23; Mark 15:6-14; Luke 23:13-23; John 19:12-15

3:22 Eruani Vetena 18:15, 18 (LXX)

3:23 Eruani Vetena 18:19; Buka Vetena 23:29

3:25 Vuivuni 22:18; 26:4