Hibrus
Nəkwəkwə yame ramvən kɨmi nəmə Isrel
Nəgkiarien kwakwə kape nəkwəkwə e Hibrus
?Pa rɨmɨrai nəkwəkwə e? Kɨtawə kɨseinein mə pa rɨmɨrai nəkwəkwə e, meinai yermamə yame rɨmɨrai nəkwəkwə e, in rɨpəh nɨniyen nhagɨn. Yermamə yame rɨmɨrai rɨmɨpəh nəmien Yesu Kristo, mərɨg narmamə tɨksɨn yamə mɨne kɨmɨsəm Yesu kɨmɨsəvsao kɨn kɨmi yermamə yame rɨmɨrai nəkwəkwə e. Kɨni in rɨrkun nəgkiarien kape Ol Testamen, mɨne norien kape nəmə Isrel kupan. Tukmə ror Banabas uə Apolos kɨmɨrɨrai nəkwəkwə e, meinai iriu kɨrarkun Nəvsaoyen Huvə kape Yesu, kɨni iriu mawehuə ye niməhuak. Narmamə tɨksɨn, rɨkiriə raməsɨk mə Pol rɨmɨrai nəkwəkwə e, mərɨg rɨkitawə rɨpəh nəsɨkien məknakɨn meinai ye leta yamə mɨne Pol rɨmɨrai, rɨmnərəhu-pən nhagɨn. Mərɨg nhagɨn rɨrkək ye nəkwəkwə e.
?Rɨmɨrai ramvən kɨmi nɨpa? Rɨmɨrai nəkwəkwə e ramvən kɨmi nəmə Isrel yamə mɨne kɨshatətə ye Yesu Kristo, mərɨg iriə tɨksɨn kɨmnharerɨg-pən tuk norien kape nəri-pənien Loa kape Moses. Tukmə ror iriə khapəh nharkun-huvəyen nɨprai Nəvsaoyen Huvə.
?Nɨmraghien rɨmnhawor pən iran mɨne ye nɨpɨg rɨmɨrai? Ye nɨpɨg a, nəmə Isrel tɨksɨn kɨmɨsoriah nəmə Isrel yamə mɨne kashatətə ye Yesu Kristo, mɨsor rɨkiriə rəpou. Rhuvə mə iriə tukharkun mə nhatətəyen kapəriə in nəfrakɨsien, kɨni Yesu in Kristo yame Kughen rɨmə tukrher-pə kɨn.
?Rɨmɨrai nəkwəkwə e tuk naha? Ye nɨpɨg a, narmamə tɨksɨn ye niməhuak, rɨkiriə rəsɨk mə norien kape nəri-pənien Loa kape Moses ye Ol Testamen, in yerpɨrɨg rapita norien kape nhatətəyen ye Yesu Kristo. Mərɨg narɨmnar ye Ol Testamen in nuhpɨkɨnien əmə kape norien yame Yesu rɨmnor. Rəmhen kɨn temple in ramor nuhpɨkɨnien ye Nanmɨn kape Kughen yame ramarə yerkitawə; kɨni Sabat in ramor nuhpɨkɨnien ye napɨsien yame Kughen tukrɨvəhsi-pə kɨmi ətawə ye rao ye neai; kɨni norien kape nɨviyen nɨtə in ramor nuhpɨkɨnien ye nɨtaw Yesu Kristo yame rɨmnaiyu ye nai kamarkwao kɨn. Kɨmɨrai nəkwəkwə e mə narmamə tuksəm mharkun mə Yesu Kristo In yerpɨrɨg rapita narɨmnar fam, rapita profet mɨnə, mɨne agelo mɨnə, mɨne Moses, mɨne Eron, mɨne pris mɨnə kupan. Nhatətəyen ye Yesu Kristo in rhuvə pɨk rapita nəripənien Loa kape Moses. Ror məkneikɨn meinai narɨmnar fam ye Ol Testamen rɨmauə mor nəfrakɨsien kɨn ye Yesu Kristo. Kɨni nɨmhəyen kafan in rəmhen tuk nɨrɨsɨnien norien has kape narmamə.
1
Kristo rɨmnor əpu Kughen kɨmi ətawə
1 Apa kupan, Kughen rɨmɨvəhsi-pən nəgkiarien kafan kɨmi profet mɨnə ye nɨpɨg pɨsɨn pɨsɨn mɨnə, mɨne swatuk pɨsɨn pɨsɨn mɨnə, kɨmnhani-pən tuk rɨptawə mɨnə. 2 Mərɨg taktakun ai kɨtawə kwəsəviə-pən tuk Nɨpɨg Kwasɨg, kɨni Kughen raməgkiar atuatuk əmə kɨmi ətawə kɨn Tɨni. Tɨni a Kughen rɨmɨrpen in mə tukror neiai mɨne tokrei tanə, mɨrpen In mə tukmə ror infamien, narɨmnar fam, rəmɨr tukun.Sam 2:8, Jon 1:1-3; Kol 1:16 3 Tɨni e In nɨkhakien kape nɨhuvəyen mɨne nəsanɨnien kape Kughen.Jon 1:14; 12:41; Aes 6:1-4 In rhai atuatuk rɨmni ye narɨmnar fam.Jon 14:9; Fil 2:6-7; Kol 1:15; 2 Kor 4:4 In mampɨk ətərəkɨn narɨmnar fam ye nəsanɨnien kape nəgkiarien kafan.Kol 1:17 Nɨpɨg In rɨmamhə tuk nəspir-tayen norien has kapətawə,Taet 2:14 In rɨmavən ye rao ye neai məkwətə-pən ye nɨkar Kughen Yermaru matuk.Fil 2:5-11; Kol 1:15-18.
Ji Kughen e In yerpɨrɨg rapita agelo mɨnə
4 Kughen rɨmɨvəh-si haktə Tɨni e, kɨni In yerpɨrɨg rapita agelo mɨnə rəmhen kɨn mə nhag e yame Kughen rɨvəhsi-pən kɨmin in yerpɨrɨg rapita nhag agelo mɨnə fam.Efes 1:20-21; Fil 2:9 5 Kughen rɨpəh nɨni-pənien tuk agelo kɨrik kafan mɨmə,
“Ik narɨk.
Taktakun ai yakwauə rɨmɨm atuatuk.”(Sam 2:7)
Mərɨg in rɨmnəgkiar məknakɨn kɨmi Yesu. Kɨni Kughen rɨpəh nɨni-pənien tuk agelo kɨrik mɨmə,
“Yo rɨmɨm atuatuk,
kɨni ik nakuauə narɨk.”(Sam 2:7)
Mərɨg In raməgkiar məknakɨn kɨmi Yesu. 6 Meinai nɨpɨg Kughen rɨmnher-pən kɨn Nɨmrɨn Nupan kafan ruə ye tokrei tanə, kɨni In mamni mɨmə,
“Pəh agelo m-fam kafan tuksəgnəgɨn In.”(Dut 32:43)
7 Nɨpɨg Kughen raməgkiar ye nɨkarɨn kape agelo mɨnə mamni mɨmə,
“Yo yakamor kafak agelo mɨnə kɨsəmhen kɨn nɨmətag yame ramavən ikɨn mɨnə fam, mamor kafak wok.
Iriə kɨsəmhen kɨn nap.”(Sam 104:4)
8 Mərɨg In raməgkiar kɨmi Tɨni mɨmə,
“Kughen, kafam narmaruyen tukraməmɨr rerɨn, infamien rɨkək.
Nakamehuə ye narmamə ye norien yame ratuatuk.
9 Ik nakorkeikei əmə natuatukien
maməməkɨn norien iko iko mɨnə.
Ror pən, Yo e, kafam atuatuk Kughen,
Yo yakamərəhu kupan ik, kɨni ik yerpɨrɨg rapita ik mɨnə tɨksɨn.”(Sam 45:6-7)
10 Kɨni Kughen ramni-pən mɨn tukun mɨmə,
“Yermaru. Ye nɨrikakunien, Ik nɨmnor tanɨmtanə,
Kɨni Ik nɨmnor narɨmnar fam yamə mɨne kasəmɨr-pən ye neai kɨn kwermɨm.
11 Narɨmnar fam mɨnə e tukharkək,
kɨsəmhen kɨn neipən yame tukrəmətɨt,
mərɨg Ik takamarə kape rerɨn.
12 Takarakikɨn narɨmnar fam ye tokrei tanə mɨne ye neai rəmhen kɨn yame yermamə ramarakikɨn neipən mətɨt.
Takukreikɨn narɨmnar fam rəmhen kɨn yame yermamə raməviruə kɨn neipən.
Mərɨg Ik nakpəh nəviruəkɨnien,
Kɨni Ik nakamarə kape rerɨn.”(Sam 102:25-27)
13 Kɨni pəh nien mə agelo e yame Kughen rɨmɨni-pən nəgkiarien tukun e mɨmə,
“Ik əkwətə-pə ye kwermɨk matuk,
Meriaji nɨpɨg jakor ik takehuə ye tɨkmɨr kafam mɨnə.”(Sam 110:1)
14 Mərɨg agelo mɨnə, iriə yorwok mɨnə əmə. Iriə nanmɨn yamə mɨne Kughen ramher-pə kɨn mə tuksarha huvə tuk narmamə yamə mɨne In ravəh mɨragh əriə.