3
1 ?Mukonek, asa tahos en ir Siu keil? ?Asa tahos en sakien ten vekahoi? 2 Anatin eli keke tounah houlu tahos. Veni, mulamu, Ahi san selusien onen min Siu keil ka ling desien onen en keil keke avalosil kat revi. ✡Dut 4:7-8; Sam 103:7; 147:19-20; Rom 9:4 3 Ka anatin keke tei en ir Siu keil armusil revitei. Ka avaseini keke armusiltei selusien onen, Ahi houmon tounah vasi koa viteni. ?Mukave, anatin keke akilea avoumon tounah koa Ahi viteni vamai vahi heisav enges? ✡Rom 9:6; 11:29; 2Tim 2:13 4 !Vuo, asakras! Veni, avaseini meatin vasi keil aliluvos, Ahi rie lati keke vi anatin imok. Koanik suval koa Tus Votut viteni vit,
“O Ahi, navong kolei rahit usite onak, selusien vasi keil onom vi anatin.
5 Ka vahesa meatin tai hehiteni hehit, “Navong ir, Siu keil, romum romaltei, romul rolei kilea imok keke Ahi mul mum mal lisenges. Hemukonek, Ahi mum romaltei navong vuroh kat ir ka san mahien min ir.” (Koanik vi rendemien onen tei en meatin keil.) 6 !Vuo romukteinek! Ahi mul mum mal en avong vasi. Veni munak Ahi mum romaltei navong vuroh kat ir, hervinvintei mun valei rahit usite onen meatin keil ten out netan.
7 Ka vahesa amul aviteni mun avit, “Luvosien onak mul rie lati keke Ahi anatin imok, ka sakin meatin keil amul avati lat isen vina nesa. Sakini, Ahi mul mum romaltei navong lei rahit inau ka san mahien minau suval navi meatin tisa tai.”
8 Ka vahesa amul aviteni mun avit, “Rehoumon tounah hetisa keke hesakin tounah koa hetahos hemai hekistal.” Veni meatin tei keil amul aliluvos avit komai memul meviten selusien enek, ka rovitei anatin. !Mal imok keke Ahi hesan mahien min keil en avong koa helei rahit usite onen meatin keil enek! ✡Rom 6:1
Meatin tovuol varei koa kilea vamal en meten Ahi vaka en sise ten mengkatien keil
9 ?Ka mukave? ?Ahi houmoni hetahos imok min ir, Siu keil, helin koakeil arvitei Siu? !Vuo! Veni narie lati tuai emal keke meatin vasi keil ikur mahien ven tisaen keil one, avaseini avi Siu vuo arvitei Siu. ✡Rom 1:18–2:24; 3:23 10 Koanik suval koa Tus Votut viteni koa vit,
“Meatin tovuol vamal.
Anatin, tovuol eli varei.
11 Meatin tovuol vaileilei.
Meatin tovuol varei koa vit vailea en Ahi.
12 Keil vasi aviles rani.
Keil vasi umai avi meatin heisav enges en meten.
Meatin tovuol vatie lat tahosien min mesav keil.
13 “Selusien keil one tisaso vareis suval viven meatin koa vo mul en tehitan,
ka onge vilelau en luvosien lisenges.” Sam keil 5:9
“Anatin, selusien keil one suval poisen onen tetal tisa keil.” Sam keil 140:1
14 “Selusien keil one vilelau en sesendaen tisa keil.” Sam keil 10:1
15 “Meatin keil enek akalah avapurun meatin sav ka avou vini keil.
16 En out vasi uva ien amu rasilin tounah vasi ka asakin mesav keil alonge tisa houlu.
18 “Ka armundemtei keke mal avahouhou min Ahi.” Sam keil 36:1
19 Selusien keil ekek ten mengkatien onen Ahi rie lati min ir tuai keke meatin tovuol vamal en meten. Ka rokilea keke mengkatien onen Ahi mul selus mal min Siu keil veni kei san mengkatien onen min keil. Sakini meatin tovuol varei koa kilea valomal en meten Ahi ka vahit, “Inau namal emok.” !Vuo! Mal keke meatin vasi keil ikur mahien ven tisaen one. 20 Veni meatin tovuol kilea voum vasin tounah koa mengkatien viteni keke vamai vamal en meten Ahi. Vi umen kati ten mengkatien onen keke vasakin meatin keil avalei kilea tisaen keil one. ✡Sam 143:2; Kal 2:16; Rom 7:7
Romai romal en meten Ahi ka en sise ten demkatien
21 Ka kosa, Ahi vothot en sise tuai keke rovamai rovamal en meten. Sise enek, mengkatien onen Mosis ka provet keil emun avit usili, ka rokatei en longkatien ten mengkatien. 22 Ahi les koakeil vasi aling demkatien one en Iesu Kristo keke amal en meten. Anatin, en rovattei vailea munak meatin tai vi Siu vuo rovitei Siu, ka sakin koakeil vasi aling demkatien one en Kristo amal en meten. ✡Rom 1:17; Kal 2:16 23 Veni meatin vasi keil amumon tisaen, asakras avatokol hetetamenien koa Ahi ling kati keke meatin keil avato ien. ✡Rom 3:9 24 Ka ven more envatien onen Ahi, kei sakin keil amal en meten ka en Iesu Kristo koa vul lat keil keke avamaluv ran mahien ten tisaen keil one. ✡Efes 2:8; Rom 5:1 25 Musil rendemien onen Ahi, Iesu mat suval sanien votut tai ka ran mue vakas motein ir ran tisaen orer. Ka Ahi mul les koakeil aling demkatien one en Iesu Kristo suval amal en meten. Kei mumoni mukonek vatie lat maluen onen. Ka rie lati mun keke mul vuli kat vurohien onen, veni, mulamu en matien onen Iesu, kei rosantei mahien min meatin keil ven tisaen vasi keil koa amumoni tuai. ✡Efes 1:7 26 Anatin, kei vuli kat vurohien onen enek mulamu keke, kosa, kilea vatie lat maluen onen en sise koa mul mumon koakeil vasi aling demkatien one en Iesu Kristo amal en meten.
27 ?Ka asa suk rokilea rovoumoni keke rovahasi ir eni? !Tounah tovuol! ?Rovahasi ir veni romusil kat mengkatien keil? !Vuo! Rosakras rovahasi ir veni romul romusil sise ten demkatien. ✡1Kor 1:31 28 Veni rolesi keke romai romal en meten Ahi ka en demkatien orer enges, ka rovitei veni romul romumon tounah vasi koa mengkatien keil onen Mosis viteni. ✡Kal 2:16 29 ?Mukave? ?Ahi vi Ahi onen sei? ?Onen Siu keil enges? !Vuo! Kei vi Ahi onen Siu ka koakeil emun arvitei Siu. ✡Rom 10:12 30 Ka veni Ahi, kei tas, kei mumoni keke koakeil uva en vekahoi imal en meten heka en sise ten demkatien, ka mumoni keke koakeil arvatei en vekahoi emun imal en meten heka en vati sise enek ten demkatien. ✡Dut 6:4; Kal 3:20; Rom 4:11-12 31 ?Ka mukave? ?Rokilea rovaso lat mengkatien koanek vaha veni romul romusil sise ten demkatien? !Vuo, romukteinek! Ir koa rokur demkatien rosakin mengkatien enek mul mum musil sakien kati teni.✡Mat 5:17; Rom 4:3; 8:4