78
Sa Tamasa meke sari Nana Tinoni
(Keke kinera te Asapa)
1 Mi avoso maei sari na qua vina tumatumae, ke gamu na qua tinoni,
mi va taliṉa maei sari na qua zinama pu zama vura ni rau.
2 Kaqu zama vura ni rau koari na vivinei vina tumatumae,* Mt 13:35
pude va bakali ginuadi sari na tiṉitoṉa pu ele hola;
3 Sari na tiṉitoṉa pu ele avosi gita, meke ele gilani gita,
saripu ele totozini gita rina tamada.
4 Lopu kaqu tomei gita si arini koari na nada koburu,
ba kaqu totozi gita koari na sinage mae hire meke koari na tudia sari na tiṉitoṉa marilaedi,
pu evaṉi e Zihova koasa Nana ṉiniraṉira lavata,
meke sari na tiṉitoṉa variva magasadi pu evaṉi Sa.
5 Poni ni Sa sari Nana tinarae koari na tie Izireli,
meke sari na Nana Zinama koari na tutina e Zekopi.
Totozi ni Sa sari kasa tiatamada
pude di va tumatumae i sari na tudia,
6 pude sa sinage luli mae sapu sari na koburu pu lopu podo si pude madi va nonogai,
meke pude di totozi ni sari na tudia,
7 pude madi boka va sotoa ri koe Tamasa sa dia rinaṉeraṉe,
meke madi lopu muliṉi ni sari na tinavete te Tamasa,
ba pude madi kopu ni sari na Nana tinarae,
8 pude madi lopu gugua rina tamadia,
na sinage va gugue na va karikari,
sapu lopu soto va nabu sari na bulodia koe Tamasa,
ke lopu ta ronu koe Tamasa sari na maqomaqodia.
9 Sari na tie pa butubutu Iparemi sapu va namanamadi pude varipera meke paleke dia bokala na tupi
si govete taloa pa vinaripera.
10 Lopu kopu nia rini sa vinariva egoi te Tamasa;
korodia va tabea rini sa Nana tinarae.
11 Muliṉi nia rini sapu gua tavetia sa Tamasa,
meke sari na tinavete variva magasadi pu ele va dogoro ni Sa koa rini.
12 Dogori ri na tiatamadia sari na tinavete variva magasadi
pu evaṉi Sa pa popoa Izipi, pa pezara pozana Zoani.* Ekd 7:8 kamo hinia 12:32
13 Varipaqaha nia Sa sa kolo, meke va ene karovi Sa si arini,* Ekd 14:21-22
meke va goba vekoa Sa sa kolo pa varikalidi.
14 Pana rane si turaṉi Sa si arini koasa lei,* Ekd 13:21-22
meke pana boṉi si turaṉi Sa koasa nika huruṉuna.
15 Viqali Sa sari na patu pa soloso qega,* Ekd 17:1-7; Nab 20:2-13
meke va totolo vura poni Sa sa kolo pa korapa pepeso.
16 Va vura maei Sa pa patu sari na bukaha,
meke va totolo gorei Sa guana ovuku.
17 Gua asa, ba tavete nono la i tu rini sari na dia sinea koa Sa,
meke pa soloso qega si bugoro nia rini si Asa sapu Ululuna Hola.
18 Vizatia rini pa bulodia pude podekia sa Tamasa,* Ekd 16:2-15; Nab 11:4-23,31-35
koari na dia inokorodi rina ginani pu hiva ni rini.
19 Zama ṉoṉovalia rini sa Tamasa, meke zama guahe si arini,
“Vegua, boka ponini gita ginani sa Tamasa si gita pa korapa soloso qegana hie?
20 Gilania gami sapu ele sekea Sa sa patu meke puzaka vura mae sa kolo, meke totolo palapalae.
Ba vegua, boka ponini ginani na masa kurukuru tugo Sa sari Nana tie?” gua si arini.
21 Gua asa ke sipu avosia e Zihova sapu gua asa, si ta ṉaziri si Asa,
ke huruṉu vura sa nikana sa Nana binugoro koari na tutina e Zekopi,
meke sa Nana tinaṉaziri koe Izireli.
22 Sina lopu raṉea rini sa Tamasa,
meke lopu kalavarae si arini koasa Nana ṉiniraṉira variharupi.
23 Ba zama ia Sa sa maṉauru meke ta tukele sari na sasadana,
meke va gore maei Sa sari na ginani.
24 Meke va titisi gore la nia sa koa rini sa mana pude di henahena si arini.* Zn 6:31
25 Gua asa ke henai rini sari na ginani tana mateana.
26 Vata evaṉia Sa sa givusu pa kali gasa rimata pude hiru mae gua pa galegalearane,
meke pa Nana ṉiniraṉira si va mae ia Sa sa givusu pa kali mae gua pa Izipi.
27 Va hoqa mae ni Sa pa maṉauru sari na kurukuru tapuru, gua tugo na kavuru,
meke sari na kurukuru tapuru pu soku gua tugo na onone pa masa.
28 Va hoqa gorei Sa si arini pa varikorapadi rina dia ipi koasa vasina pu koa ia rini.
29 Henahena si arini meke deṉa utoṉo;
ura poni ni Sa gua sapu okoro nia rini.
30 Ba sipu korapa henahena rini,
meke lopu ele henahena beto ri,
31 si ta ṉaziri ni sa Tamasa si arini,
ke va mate pani Sa sari na dia tie ṉiṉiradi,
meke va gore pani Sa sari na tie vaqura ta vizatadi pa Izireli.
32 Gua arini si ta evaṉa, ba tavete va sea nono latu si rini,
dogori rini sari Nana tinavete variva magasadi,
ba lopu hite raṉea rini si Asa.
33 Gua asa, ke va kokoi i mo Sa sari na ranedi, guana keke siniṉo mo,
meke va raza va hodaka ni Sa sari na dia tinoa pa minate.
34 Totoso va matei sa Tamasa sari kaiqa,
si tiqe kekere saripu koa hola,
meke hata sisigitia rini si Asa.
35 Tiqe balabala ia rini sapu Asa sa dia Patutokaena,
meke sa Tamasa Ululuna Hola, sa dia tinokae pude koa valeana pule.
36 Ba sari na dia zinama si tale kokohadi mo,
meke loke hite vasi hinokara si koa koari na dia zinama.
37 Lopu hite koa soto koa Sa si arini,
lopu hite va tabea rini sa Nana vinariva egoi sapu ele tavetia Sa koa rini.
38 Ba tataru ni na taleoso ni Tamasa sari Nana tinoni.
Taleoso ni Sa sari na dia sinea,
meke lopu va mate pani Sa si arini.
Soku totoso si tuqe pulea Sa sa Nana binugoro,
meke lopu va ṉiṉira ia Sa sa Nana tinaṉaziri,
39 sina balabala pulea Sa sapu na tie mo si arini,
sapu gua mo na givusu sapu raza meke hola taloa.
40 Soku totoso si lopu va egoa rini sa Tamasa pa soloso qega
meke va talotaṉia rini si Asa pa qega.
41 Podeke pilipulea rini si Asa,
meke vata sigitia rini sa Tamasa Hopena tadi na tie Izireli.
42 Muliṉi nia rini sa Nana ṉiniraṉira lavata,
meke sa totoso pu rupahi Sa si arini koa rina dia kana,
43 sipu tavetia Sa sari Nana vina gilagila pa Izipi
meke sari Nana tinavete variva magasadi pa pezara pa Zoani.
44 Va iliri ni ehara Sa sari na dia ovuku,
pude di lopu boka napoi rini sari na kolodi.* Ekd 7:17-21
45 Garunu lani Sa koari na tie Izipi sari na dodoa vari sigiti,* Ekd 8:1-6,20-24
meke sari na bakarao pu ṉovalia sa popoa.
46 Va ganini kupokupo Sa sari na dia linetelete,* Ekd 10:12-15
meke sari na vuvua si va gani ni kupokupo Sa.
47 Ṉovala ni ruku aesi Sa sari na dia huda vaeni,
meke sari na dia huda sikamoa si va tamunu ṉovala ni aesi Sa.
48 Va hoqa mate ni ruku aesi Sa sari na dia bulumakao,
meke va mate ni kapi Sa sari na dia rovana sipi.* Ekd 9:22-25
49 Vata dogoro nia Sa koa rini sa Nana tinaṉaziri ṉiṉirana,
sa Nana binugoro na tinahuara si va raza lani Sa,
sipu garunu lani Sa sari na mateana variva mate.
50 Lopu tuqe pulea Sa sa Nana binugoro,
meke lopu hite ruriti Sa sari na dia tinoa,
ba va matei Sa si arini koasa oza.
51 Va mate pani Sa sari doduru koburu koreo kenudi
tadi doduru tatamana pa Izipi.* Ekd 12:29
52 Beto asa, si turaṉa vura ni Sa pa Izipi sari Nana tie guana sepati,* Ekd 13:17-22
meke turaṉa ene guni ni na rovana sipi Sa pa qega si arini.
53 Turaṉa va sarei Sa si arini, ke lopu matagutu si arini,* Ekd 14:26-28
ba sari na dia kana si va lodu matei Sa pa kolo.
54 Turaṉa va kamoi Sa si arini koasa Nana popoa madina,* Ekd 15:17; Zos 3:14-17
koasa toqere sapu ele vagia Sa pa vinaripera.
55 Hadu pani Sa sari na butubutu huporodi pa kenudi rina tie varipera Izireli,* Zos 11:16-23
meke paqaha va hia poni Sa koari na butubutu tie sa popoa,
meke sari na dia vetuvetu si poni ni Sa koari na Nana tie.
56 Ba bugoro nia ri Nana tie sa Tamasa Ululuna Hola,* Zaz 2:11-15
meke podepodekia rini si Asa.
Lopu va tabei rini sari Nana tinarae,
57 ba bugoro nia rini meke lopu koa soto koa Sa si arini,
gua tugo rina tamadia pukerane,
lopu ta raṉe si arini kekeṉoṉo gua tugo na tupi kokoqina.
58 Va bugoria rini si Asa koari na dia vasina hopena pa toqere,
meke vata ṉaziria rini si Asa koari na dia beku.
59 Sipu dogoria Tamasa sa dia tamasa huporona si ta ṉaziri si Asa,
meke kilu pani hokari Sa sari Nana tie Izireli.
60 Muliṉi pani hokaria Sa sa dia vasina vina vukivukihi sapu pozana Saelo,* Zos 18:1; Zer 7:12-14, 26:6
sapu sa vasina pu koa ia Sa pa Ipi Hopena pa varikorapadi ri Nana tinoni.
61 Va malumi Sa sari nada kana pude raovo vagia sa Bokese Tanisa Vinariva Egoi,* 1 Samuela 4:4-22
sapu sa vina gilagilana sa Nana ṉiniraṉira na tinolava.
62 Bugoro ni Sa sari nana tie soti,
meke va malumi Sa si arini pude tava mate koari na dia kana.
63 Sari na tie vaqura si tava mate pa vinaripera,
ke lopu boka varihaba sari na tudia vineki.
64 Sari na hiama si tava mate,
meke lopu tava malumu sari na nabokodi rini pude kabo pa tinalotaṉa.
65 Mumudi si turu mae gana sa Baṉara, guana tie vaṉununa,
meke guana tie ṉiṉira sapu va ṉaliṉali ia pa ninapo vaeni.
66 Zukuru pule ni Sa sari Nana kana,
meke va kilasa hokari Sa pa kinurekure loke vinabetona.
67 Ba etulu pani Sa sari na tutina e Zosepa;
meke lopu vizati Sa sari na butubutu te Iparemi.
68 Ba vizatia tu Sa sa butubutu te Ziuda
meke sa Toqere Zaione sapu qetu hola nia Sa.
69 Vasina si kuria Sa sa Nana Zelepade Hopena,
kekeṉoṉo sa Nana vasina kokoana pa Maṉauru;
sokirae va nabu nia Sa si asa,
gua tugo na kasia popoa sapu koa hola ninae rane.
70 Vizatia Sa sa Nana nabulu Devita;* 1 Samuela 16:11-12; 2 Samuela 7:8; 1 Koron 17:7
vagi pania Sa si asa pa kinopudi rina sipi.
71 Va betoa Sa si asa pa tinavete kopu sipi,
pude Mani baṉara ni Sa sari Nana tinoni,
pude Mani koa na Sepati si Asa koari na tie Izireli.
72 Kopu ni Devita sari na tinoni pa tinoṉoto,
meke turaṉi Sa si arini pa nana binokaboka.
*78:12 Ekd 7:8 kamo hinia 12:32
*78:15 Ekd 17:1-7; Nab 20:2-13
*78:18 Ekd 16:2-15; Nab 11:4-23,31-35
*78:60 Zos 18:1; Zer 7:12-14, 26:6
*78:70 1 Samuela 16:11-12; 2 Samuela 7:8; 1 Koron 17:7