Муқеддес Калам (кирил йезиқ) Микаһ 6

Бешарәтләр 3-қатар •••• Худаниң дәваси

1 Пәрвәрдигарниң немә дәватқинини һазир аңлаңлар: —

«Орнуңдин тур, тағлар алдида дәвайиңни баян қил,

Егизликләргә авазиңни аңлатқин».□

2 «И тағлар,

Вә силәр, йәр-зиминниң өзгәрмәс һуллири,

Пәрвәрдигарниң дәвасини аңлаңлар;

Чүнки Пәрвәрдигарниң Өз хәлқи билән бир дәваси бар,

У Исраил билән муназилишип әйивини көрсәтмәкчи;■

3 И хәлқим, Мән саңа зади немә қилдим?

Сени немә ишта бизар қилиптимән?

Мениң хаталиғим тоғрилиқ гувалиқ беришкин!

4 Чүнки Мән сени Мисир зиминидин елип чиқардим,

Сени қуллуқ маканидин һөрлүккә қутқуздум;

Алдиңда йетәкләшкә Муса, Һарун вә Мәрйәмләрни әвәттим.■

5 И хәлқим, Пәрвәрдигарниң һәққанийлиқлирини билип йетишиңлар үчүн,

Моаб падишаси Балакниң қандақ нийитиниң барлиғини,

Беорниң оғли Балаамниң униңға қандақ җавап бәргәнлигини,

Шиттимдин Гилгалғичә немә ишлар болғанлиғини һазир есиңларға кәлтүрүңлар.□ ■

6 — Мән әнди немини көтирип Пәрвәрдигар алдиға келимән?

Немәм билән Һәммидин Алий Болғучи Худаниң алдида егилимән?

Униң алдиға көйдүрмә қурбанлиқларни,

Бир жиллиқ мозайларни елип келәмдим?

7 Пәрвәрдигар миңлиған қочқарлардин,

Түмәнлигән зәйтун мейи дәриялиридин һозур аламду?

Итаәтсизлигим үчүн тунҗа баламни,

Тенимниң пуштини җенимниң гунайиға атамдимән!?□

8 И инсан, У саңа немә ишниң яхши екәнлигини көрсәтти,

Бәрһәқ, Пәрвәрдигар сәндин немә тәләп қилғанлиғини көрсәтти —

Адаләтни жүргүзүш,

Меһриванлиқни сөйүш,

Сениң Худайиң билән биллә кәмтәрлик билән меңиштин башқа йәнә немә ишиң болсун?■

Дәваниң давами, һөкүм чиқириш

9 Пәрвәрдигарниң авази шәһәргә хитап қилип чақириду;

(Пәм-даналиқ болса намиңға һөрмәт билән қарайду!)

Әнди һөкүм палиқини вә уни Бекиткинини аңлаңлар: —□

10 Рәзил адәмниң өйидә рәзилликтин алған байлиқлар йәнә бармиду?

Кам өлчәйдиған жиркиничлик өлчәм йәнә бармиду?□

11 Адилсиз тараза билән,

Бир халта сахта тараза ташлири билән пак болаламдим?□ ■

12 Чүнки шәһәрниң байлири зораванлиқ билән толған,

Униң аһалиси ялған гәп қилиду,

Уларниң ағзидики тили алдамчидур. ■

13 Шуңа Мән сени уруп кесәл қилимән,

Гуналириң түпәйлидин сени харабә қилимән.

14 Йәйсән, бирақ тоюнмайсән,

Оттураңда ач-бошлуқ қалиду,

Сән мүлкүңни елип йөткимәкчи болисән,

Бирақ сақлалмайсән;

Сақлап қалдурғиниң болсиму, уни қиличқа тапшуримән.□ ■

15 Терийсән, бирақ һосул алмайсән;

Зәйтунларни чәйләйсән, бирақ өзүңни мейини сүртүп мәсиһ қилалмайсән,

Йеңи шарапни чәйләп чиқирисән,

Бирақ шарап ичәлмәйсән.■

16 Чүнки «Омриниң бәлгүлимилири»ни,

«Аһабниң җәмәтидикиләр қилғанлири»ни тутисән;

Сән уларниң несиһәтлиридә маңисән,

Шуниң билән Мән сени харабә,

Сәндә туруватқанларниң һәммиси исқиртиш объекти қилимән;

Сән хәлқимдики шәрмәндичиликни көтирисән.□ ■

□6:1 «Орнуңдин тур, тағлар алдида дәвайиңни баян қил, егизликләргә авазиңни аңлатқин» — бу сөзләр Микаһниң өзигә (Исраиллар аңлисун дәп) ейтилған. Қедимки тағлар вә дөң-егизликләр мошу дәвада Худаниң вәдилиридә турғанлиғиға гувалиқ бериду («Қан.» 4:26, «Йәш.» 1:2ни көрүң).

■6:2 Һош. 4:1

■6:4 Мис. 12:51; 14:30; 20:2

□6:5 «И хәлқим... Моаб падишаси Балакниң қандақ нийитиниң барлиғини, Беорниң оғли Балаамниң униңға қандақ җавап бәргәнлигини, Шиттимдин Гилгалғичә немә ишлар болғанлиғини һазир есиңларға кәлтүрүңлар» — Худа Шиттимдә Исраилларниң бутпәрәслигини җазалиған, андин уларни кәчүрүм қилған; У Гилгалда мөҗизә яритип, уларни Иордан дәриясидин өткөзгән. Әнди һазир охшаш ишлар болмамду — улар халисила, бутпәрәсликтин товва қилип, Худаниң ниҗатини көрүдиған болиду. Тилға елинған вақиәләр «Чөл.» 24-, 25-бап, вә «Йәшуа» 1-5-бапларда хатириләнгән.

■6:5 Чөл. 22:5; 23:7; 25; Йә. 5

□6:7 «Тенимниң пуштини җенимниң гунайиға атамдимән!?» — ибраний тилида «тенимниң мевисини җенимниң гунайиға атамдимән!?».

■6:8 Қан. 10:12

□6:9 «Әнди һөкүм палиқини вә уни бекиткинини аңлаңлар!» — башқа бир хил тәрҗимиси: «Әнди и қәбилә вә шәһәр җамаити, аңлаңлар!».

□6:10 «Рәзил адәмниң өйидә рәзилликтин алған байлиқлар йәнә бармиду? Кам өлчәйдиған жиркиничлик өлчәм йәнә бармиду?...» — 10-15-айәтләрдә хатириләнгән Исраилниң қилмишлири жуқуриқи 8-айәттики сөзниң әкси болиду (адаләтни жүргүзүш, меһриванлиқни сөйүш, кәмтәрләрчә Худа билән биллә меңиш). Мошу айәттики «өлчәм» ибраний тилида «әфаһ» болиду.

□6:11 «Адилсиз тараза билән, бир халта сахта тараза ташлири билән пак болаламдим?» — башқа бир хил тәрҗимиси: «Адилсиз таразини, бир халта сахта тараза ташлирини тутуп турған адәмләрни пак һесаплаламдим?».

■6:11 Һош. 12:8

■6:12 Йәр. 9:7

□6:14 «Йәйсән, бирақ тоюнмайсән, оттураңда ач-бошлуқ қалиду» — бәзи алимлар бу ибарә толғақ кесили «дизентерийә»ни көрситиду, дәп қарайду. «Сән мүлкүңни елип йөткимәкчи болисән, бирақ сақлалмайсән; сақлап қалдурғиниң болсиму, уни қиличқа тапшуримән» — башқа бир хил тәрҗимиси: «сән толғаққа келисән, бирақ балини туғмайсән; туғсаңму, балаңни қиличқа тапшуримән».

■6:14 Һош. 4:10

■6:15 Қан. 28:38; Һаг. 1:6

□6:16 «Чүнки «Омриниң бәлгүлимилири»ни, «Аһабниң җәмәтидикиләр қилғанлири»ни тутисән» — Омри Исраилниң интайин рәзил падишаси болуп, нурғунлиған бутларни ясап, Исраилни буларға чоқунушқа буйруған. Аһаб униңдин техиму рәзилликкә өтүп, бутпәрәсликкә паһишивазлиқ, «инсан қурбанлиғи», пухраларни булаң-талаң қилиш вә қатиллиқни қошқан еди. («1Пад.» 16-22-бапларни көрүң). «Сәндә туруватқанларниң һәммиси исқиртиш объекти қилимән» — мошу йәрдә «исқиртиш» мазақ қилишни билдүриду.

■6:16 1Пад. 16:25, 26, 30-34