18
Itaǝtmǝn hǝlⱪ bolux — mǝn’i ⱪilinƣan jinsiy munasiwǝtlǝr
1 Pǝrwǝrdigar Musaƣa sɵz ⱪilip mundaⱪ dedi: — 2 Sǝn Israillarƣa mundaⱪ degin: — «Mǝn bolsam Hudayinglar Pǝrwǝrdigardurmǝn. 3 Silǝr ilgiri turƣan Misir zeminidikidǝk ixlarni ⱪilmanglar wǝ yaki Mǝn silǝrni elip baridiƣan Ⱪanaan zeminidikidǝk ixlarni ⱪilmanglar; ularning rǝsim-adǝtliridǝ yürmǝnglar, 4 bǝlki Mening ⱨɵkümlirimgǝ ǝmǝl ⱪilip, ⱪanun bǝlgilimilirimni tutup xu boyiqǝ menginglar. Mǝn Hudayinglar Pǝrwǝrdigardurmǝn. 5 Silǝr qoⱪum Mening bǝlgilimilirim bilǝn ⱨɵkümlirimni tutuxunglar kerǝk; insan ularƣa ǝmǝl ⱪilidiƣan bolsa ularning sǝwǝbidin ⱨayatta bolidu. Mǝn Pǝrwǝrdigardurmǝn.□«ⱨayatta bolidu» — ǝⱨmiyǝtlik, ⱨǝⱪiⱪiy roⱨiy ⱨayatta. ■Əz. 20:11,13; Rim. 10:5; Gal. 3:12
6 — Ⱨeqkim ɵzigǝ yeⱪin tuƣⱪan bolƣan ayalƣa yeⱪinliⱪ ⱪilip ǝwritini aqmisun. Mǝn Pǝrwǝrdigardurmǝn.
7 Anangning ǝwritigǝ tǝgmǝ, bu atangning ǝwritigǝ tǝgkining bolidu; u sening anang bolƣaqⱪa uning ǝwritigǝ tǝgsǝng bolmaydu.□«ǝwrǝtkǝ tegix» — jinsiy munasiwǝt ɵtküzmǝk (ibraniy tilida «ǝwrǝtni eqix» degǝn sɵz bilǝn ipadilinidu). Ibraniy tilida «anangning ǝwritini aqma, bu atangning ǝwritini aqⱪining». Huda aldida ǝr-hotun bir tǝn bolƣaqⱪa, anisining ǝwritini eqix atisining ǝwritini aqⱪanƣa barawǝrdur. Mundaⱪ ⱪilmix anisiƣimu, atisiƣimu qong ⱨɵrmǝtsizlik, ǝlwǝttǝ.
8 Atangning ayalining ǝwritigimu tǝgmǝ, qünki xundaⱪ ⱪilsang atangning ǝwritigǝ tǝgkǝndǝk bolidu.■Law. 20:11; 1Kor. 5:1
9 Sǝn aqa-singlingning, bir atidin bolƣan yaki bir anidin bolƣan, yaki xu ɵydǝ tuƣulƣan yaki baxⱪa yǝrdǝ tuƣulƣan bolsun, uning ǝwritigǝ tǝgmǝ.
10 Sǝn ɵz oƣlungning ⱪizi wǝ yaki ⱪizingning ⱪizining ǝwritigǝ tǝgmǝ; qünki ularning ǝwriti sǝn ɵzüngning ǝwritidur.
11 Sǝn atangning ayalining ⱪizining ǝwritigǝ tǝgmǝ; u atangdin tuƣulƣan, sening aqa-singling, xunga uning ǝwritigǝ tǝgmǝ.□«atangning ayali» — muxu yǝrdǝ ɵgǝy anisi yaki atisining toⱪilini kɵrsitidu. ■Law. 20:17
12 Sǝn atangning aqa-singlisining ǝwritigimu tǝgmǝ, qünki u atangning birtuƣⱪinidur.■Law. 20:19
13 Sǝn anangning aqa-singillirining ǝwritigimu tǝgmǝ, qünki u anangning birtuƣⱪinidur.
14 Atangning aka-inilirining ayalining ǝwritigǝ tǝgmǝ; ularning ayalliriƣa yeⱪinliⱪ ⱪilma; qünki ular sening ⱨammangdur.■Law. 20:20; Əz. 22:11
15 Sǝn keliningning ǝwritigǝ tǝgmǝ; u sening oƣlungning ayali bolƣaqⱪa, uning ǝwritigǝ tǝgsǝng bolmaydu.■Law. 20:12
16 Sǝn aka-iniliringning ayalining ǝwritigǝ tǝgmǝ; qünki bu ɵz aka-iniliringning ǝwritigǝ tǝgkǝndǝk bolidu.■Law. 20:21
17 Sǝn bir ayalƣa wǝ xuning bilǝn birgǝ uning ⱪizining ǝwritigǝ tǝgmǝ; xundaⱪla uning oƣlining ⱪizi wǝ ⱪizining ⱪizinimu hotunluⱪⱪa elip ǝwritigǝ tǝgmǝ. Ular bir-birigǝ yeⱪin tuƣⱪan bolƣaqⱪa, mundaⱪ ix pǝsǝndiliktur.■Law. 20:14
18 Sǝn ayaling ⱨayat waⱪtida, uning aqa-singlisini hotunluⱪⱪa elip ǝwritigǝ tǝgmǝ. Undaⱪ ⱪilsang hotunungƣa kündǝxlik azabini kǝltürisǝn.
19 Sǝn bir ayalning adǝt kɵrüp napak turƣan waⱪtida yeⱪinliⱪ ⱪilip ǝwritigǝ tǝgmǝ.□«adǝt kɵrüp» — ibraniy tilida «ayrim ⱨalǝttǝ bolup» degǝn sɵzlǝr bilǝn ipadilinidu. ■Law. 20:18
20 Sǝn ɵz ⱪoxnangning ayali bilǝn zina ⱪilip ɵzüngni uning bilǝn napak ⱪilma.■Law. 20:10; Ⱪan. 22:22; Yⱨ. 9:5
21 Sǝn ɵz nǝslingdin ⱨeqbirini Molǝk mǝbudiƣa atap ottin ɵtküzsǝng ⱪǝt’iy bolmaydu. Əgǝr xundaⱪ ⱪilsang Hudayingning namini napak ⱪilƣan bolisǝn. Mǝn Ɵzüm Pǝrwǝrdigardurmǝn.□«Sǝn ɵz nǝslingdin ⱨeqbirini ... ottin ɵtküzsǝng ⱪǝt’iy bolmaydu» — «ottin ɵtküzüx» insaniy ⱪurbanliⱪlarni kɵrsǝtsǝ kerǝk. ■Law. 20:2; Ⱪan. 18:10; 2Pad. 17:17; 23:10
22 Sǝn ayallar bilǝn birgǝ bolƣandǝk ǝr kixi bilǝn birgǝ bolma. Bu ix yirginqliktur.■Law. 20:13
23 Sǝn ⱨeq ⱨaywan bilǝn munasiwǝt ⱪilip ɵzüngni napak ⱪilma; xuningdǝk ayal kiximu munasiwǝt ⱪildurux üqün bir ⱨaywanning aldiƣa barmisun. Bu ix nijisliⱪtur.■Law. 20:15,16
24 Silǝr bu ixlarni ⱪilip ɵzünglarni napak ⱪilmanglar, qünki mǝn silǝrning aldinglardin qiⱪiriwatⱪan taipilǝr bolsa xundaⱪ ixlarni ⱪilip ɵzlirini napak ⱪilƣan 25 wǝ zeminimu napak bolƣandur. Buning üqün Mǝn u zeminning ⱪǝbiⱨlikini ɵz bexiƣa qüxürimǝn, xuningdǝk u zeminmu ɵzidǝ turuwatⱪanlarni ⱪusup qiⱪiriwetidu.
26 Lekin silǝr bolsanglar Mening bǝlgilimilirim bilǝn ⱨɵkümlirimni tutunglar; silǝrdin ⱨeqkim, mǝyli yǝrlik yaki aranglarda turuwatⱪan yaⱪa yurtluⱪ bolsun bu yirginqlik ixlardin ⱨeqbirini ⱪilmisun ■Law. 20:22 27 (qünki bu barliⱪ yirginqlik ixlarni silǝrdin ilgiri xu zeminda turƣan hǝlⱪ ⱪilip kǝlgǝqkǝ, zeminning ɵzi napak bolup ⱪaldi). 28 Xundaⱪ ⱪilip zeminni napak ⱪilsanglar, zemin ɵzi silǝrdin ilgiri ɵzidǝ turƣan ǝllǝrni ⱪusup qiⱪarƣandǝk, silǝrnimu ⱪusup qiⱪiriwetidu. 29 Qünki bu yirginqlik ixlarning ⱨǝrⱪandiⱪini ⱪilƣuqi, — mundaⱪ ⱪilmixlarni ⱪilƣan ⱨǝrⱪandaⱪ kixi ɵz hǝlⱪi arisidin üzüp taxlinidu.□«ɵz hǝlⱪidin üzüp taxlinidu» — 17-bab, 5-ayǝt wǝ uning izaⱨatini kɵrüng.
30 Silǝr Mǝn silǝrgǝ tapiliƣinimƣa ǝmǝl ⱪilixinglar zɵrürdur; — demǝk, silǝr ɵzünglardin ilgiri ɵtkǝnlǝr tutⱪan xu yirginqlik rǝsim-ⱪaidilǝrni tutup, ɵzünglarni napak ⱪilmasliⱪinglar kerǝk. Mǝn Hudayinglar Pǝrwǝrdigardurmǝn.
□18:5 «ⱨayatta bolidu» — ǝⱨmiyǝtlik, ⱨǝⱪiⱪiy roⱨiy ⱨayatta.
■18:5 Əz. 20:11,13; Rim. 10:5; Gal. 3:12
□18:7 «ǝwrǝtkǝ tegix» — jinsiy munasiwǝt ɵtküzmǝk (ibraniy tilida «ǝwrǝtni eqix» degǝn sɵz bilǝn ipadilinidu). Ibraniy tilida «anangning ǝwritini aqma, bu atangning ǝwritini aqⱪining». Huda aldida ǝr-hotun bir tǝn bolƣaqⱪa, anisining ǝwritini eqix atisining ǝwritini aqⱪanƣa barawǝrdur. Mundaⱪ ⱪilmix anisiƣimu, atisiƣimu qong ⱨɵrmǝtsizlik, ǝlwǝttǝ.
□18:11 «atangning ayali» — muxu yǝrdǝ ɵgǝy anisi yaki atisining toⱪilini kɵrsitidu.
□18:19 «adǝt kɵrüp» — ibraniy tilida «ayrim ⱨalǝttǝ bolup» degǝn sɵzlǝr bilǝn ipadilinidu.
■18:20 Law. 20:10; Ⱪan. 22:22; Yⱨ. 9:5
□18:21 «Sǝn ɵz nǝslingdin ⱨeqbirini ... ottin ɵtküzsǝng ⱪǝt’iy bolmaydu» — «ottin ɵtküzüx» insaniy ⱪurbanliⱪlarni kɵrsǝtsǝ kerǝk.
■18:21 Law. 20:2; Ⱪan. 18:10; 2Pad. 17:17; 23:10
□18:29 «ɵz hǝlⱪidin üzüp taxlinidu» — 17-bab, 5-ayǝt wǝ uning izaⱨatini kɵrüng.