Muⱪeddes Kalam (yǝngi yeziⱪ) Mikaⱨ 6

Bexarǝtlǝr 3-ⱪatar •••• Hudaning dǝwasi

1 Pǝrwǝrdigarning nemǝ dǝwatⱪinini ⱨazir anglanglar: —

«Ornungdin tur, taƣlar aldida dǝwayingni bayan ⱪil,

Egizliklǝrgǝ awazingni anglatⱪin».□

2 «I taƣlar,

Wǝ silǝr, yǝr-zeminning ɵzgǝrmǝs ulliri,

Pǝrwǝrdigarning dǝwasini anglanglar;

Qünki Pǝrwǝrdigarning Ɵz hǝlⱪi bilǝn bir dǝwasi bar,

U Israil bilǝn munazilixip ǝyibini kɵrsǝtmǝkqi;■

3 I hǝlⱪim, Mǝn sanga zadi nemǝ ⱪildim?

Seni nemǝ ixta bizar ⱪiliptimǝn?

Mening hataliⱪim toƣruluⱪ guwaⱨliⱪ berixkin!

4 Qünki Mǝn seni Misir zeminidin elip qiⱪardim,

Seni ⱪulluⱪ makanidin ⱨɵrlükkǝ ⱪutⱪuzdum;

Aldingda yetǝklǝxkǝ Musa, Ⱨarun wǝ Mǝryǝmlǝrni ǝwǝttim.■

5 I hǝlⱪim, Pǝrwǝrdigarning ⱨǝⱪⱪaniyliⱪlirini bilip yetixinglar üqün,

Moab padixaⱨi Balakning ⱪandaⱪ niyitining barliⱪini,

Beorning oƣli Balaamning uningƣa ⱪandaⱪ jawab bǝrgǝnlikini,

Xittimdin Gilgalƣiqǝ nemǝ ixlar bolƣanliⱪini ⱨazir esinglarƣa kǝltürünglar.□ ■

6 — Mǝn ǝmdi nemini kɵtürüp Pǝrwǝrdigar aldiƣa kelimǝn?

Nemǝm bilǝn Ⱨǝmmidin Aliy Bolƣuqi Hudaning aldida egilimǝn?

Uning aldiƣa kɵydürmǝ ⱪurbanliⱪlarni,

Bir yilliⱪ mozaylarni elip kelǝmdim?

7 Pǝrwǝrdigar mingliƣan ⱪoqⱪarlardin,

Tümǝnligǝn zǝytun meyi dǝryaliridin ⱨuzur alamdu?

Itaǝtsizlikim üqün tunji balamni,

Tenimning puxtini jenimning gunaⱨiƣa atamdimǝn!?□

8 I insan, U sanga nemǝ ixning yahxi ikǝnlikini kɵrsǝtti,

Bǝrⱨǝⱪ, Pǝrwǝrdigar sǝndin nemǝ tǝlǝp ⱪilƣanliⱪini kɵrsǝtti —

Adalǝtni yürgüzüx,

Meⱨribanliⱪni sɵyüx,

Sening Hudaying bilǝn billǝ kǝmtǝrlik bilǝn mengixtin baxⱪa yǝnǝ nemǝ ixing bolsun?■

Dǝwaning dawami, ⱨɵküm qiⱪirix

9 Pǝrwǝrdigarning awazi xǝⱨǝrgǝ hitab ⱪilip qaⱪiridu;

(Pǝm-danaliⱪ bolsa namingƣa ⱨɵrmǝt bilǝn ⱪaraydu!)

Əmdi ⱨɵküm paliⱪini wǝ uni Bekitkinini anglanglar: —□

10 Rǝzil adǝmning ɵyidǝ rǝzilliktin alƣan bayliⱪlar yǝnǝ barmidu?

Kǝm ɵlqǝydiƣan yirginqlik ɵlqǝm yǝnǝ barmidu?□

11 Biadil taraza bilǝn,

Bir halta sahta taraza taxliri bilǝn pak bolalamdim?□ ■

12 Qünki xǝⱨǝrning bayliri zorawanliⱪ bilǝn tolƣan,

Uning aⱨalisi yalƣan gǝp ⱪilidu,

Ularning aƣzidiki tili aldamqidur. ■

13 Xunga Mǝn seni urup kesǝl ⱪilimǝn,

Gunaⱨliring tüpǝylidin seni harabǝ ⱪilimǝn.

14 Yǝysǝn, biraⱪ toyunmaysǝn,

Otturangda aq-boxluⱪ ⱪalidu,

Sǝn mülküngni elip yɵtkimǝkqi bolisǝn,

Biraⱪ saⱪliyalmaysǝn;

Saⱪlap ⱪaldurƣining bolsimu, uni ⱪiliqⱪa tapxurimǝn.□ ■

15 Teriysǝn, biraⱪ ⱨosul almaysǝn;

Zǝytunlarni qǝylǝysǝn, biraⱪ ɵzüngni meyini sürtüp mǝsiⱨ ⱪilalmaysǝn,

Yengi xarabni qǝylǝp qiⱪirisǝn,

Biraⱪ xarab iqǝlmǝysǝn.■

16 Qünki «Omrining bǝlgilimiliri»ni,

«Aⱨabning jǝmǝtidikilǝr ⱪilƣanliri»ni tutisǝn;

Sǝn ularning nǝsiⱨǝtliridǝ mangisǝn,

Xuning bilǝn Mǝn seni harabǝ,

Sǝndǝ turuwatⱪanlarning ⱨǝmmisi isⱪirtix obyekti ⱪilimǝn;

Sǝn hǝlⱪimdiki xǝrmǝndiqilikni kɵtürisǝn.□ ■

□6:1 «Ornungdin tur, taƣlar aldida dǝwayingni bayan ⱪil, egizliklǝrgǝ awazingni anglatⱪin» — bu sɵzlǝr Mikaⱨning ɵzigǝ (Israillar anglisun dǝp) eytilƣan. Ⱪǝdimki taƣlar wǝ dɵng-egizliklǝr muxu dǝwada Hudaning wǝdiliridǝ turƣanliⱪiƣa guwaⱨliⱪ beridu («Ⱪan.» 4:26, «Yǝx.» 1:2ni kɵrüng).

■6:2 Ⱨox. 4:1

■6:4 Mis. 12:51; 14:30; 20:2

□6:5 «I hǝlⱪim... Moab padixaⱨi Balakning ⱪandaⱪ niyitining barliⱪini, Beorning oƣli Balaamning uningƣa ⱪandaⱪ jawab bǝrgǝnlikini, Xittimdin Gilgalƣiqǝ nemǝ ixlar bolƣanliⱪini ⱨazir esinglarƣa kǝltürünglar» — Huda Xittimdǝ Israillarning butpǝrǝslikini jazaliƣan, andin ularni kǝqürüm ⱪilƣan; U Gilgalda mɵjizǝ yaritip, ularni Iordan dǝryasidin ɵtkɵzgǝn. Əmdi ⱨazir ohxax ixlar bolmamdu — ular halisila, butpǝrǝsliktin towa ⱪilip, Hudaning nijatini kɵrüdiƣan bolidu. Tilƣa elinƣan wǝⱪǝlǝr «Qɵl.» 24-, 25-bab, wǝ «Yǝxua» 1-5-bablarda hatirilǝngǝn.

■6:5 Qɵl. 22:5; 23:7; 25; Yǝ. 5

□6:7 «Tenimning puxtini jenimning gunaⱨiƣa atamdimǝn!?» — ibraniy tilida «tenimning mewisini jenimning gunaⱨiƣa atamdimǝn!?».

■6:8 Ⱪan. 10:12

□6:9 «Əmdi ⱨɵküm paliⱪini wǝ uni bekitkinini anglanglar!» — baxⱪa birhil tǝrjimisi: «Əmdi i ⱪǝbilǝ wǝ xǝⱨǝr jamaiti, anglanglar!».

□6:10 «Rǝzil adǝmning ɵyidǝ rǝzilliktin alƣan bayliⱪlar yǝnǝ barmidu? Kǝm ɵlqǝydiƣan yirginqlik ɵlqǝm yǝnǝ barmidu?...» — 10-15-ayǝtlǝrdǝ hatirilǝngǝn Israilning ⱪilmixliri yuⱪiriⱪi 8-ayǝttiki sɵzning ǝksi bolidu (adalǝtni yürgüzüx, meⱨribanliⱪni sɵyüx, kǝmtǝrlǝrqǝ Huda bilǝn billǝ mengix). Muxu ayǝttiki «ɵlqǝm» ibraniy tilida «ǝfaⱨ» bolidu.

□6:11 «Biadil taraza bilǝn, bir halta sahta taraza taxliri bilǝn pak bolalamdim?» — baxⱪa birhil tǝrjimisi: «Biadil tarazini, bir halta sahta taraza taxlirini tutup turƣan adǝmlǝrni pak ⱨesabliyalamdim?».

■6:11 Ⱨox. 12:8

■6:12 Yǝr. 9:7

□6:14 «Yǝysǝn, biraⱪ toyunmaysǝn, otturangda aq-boxluⱪ ⱪalidu» — bǝzi alimlar bu ibarǝ tolƣaⱪ kesili «dizenteriyǝ»ni kɵrsitidu, dǝp ⱪaraydu. «Sǝn mülküngni elip yɵtkimǝkqi bolisǝn, biraⱪ saⱪliyalmaysǝn; saⱪlap ⱪaldurƣining bolsimu, uni ⱪiliqⱪa tapxurimǝn» — baxⱪa birhil tǝrjimisi: «sǝn tolƣaⱪⱪa kelisǝn, biraⱪ balini tuƣmaysǝn; tuƣsangmu, balangni ⱪiliqⱪa tapxurimǝn».

■6:14 Ⱨox. 4:10

■6:15 Ⱪan. 28:38; Ⱨag. 1:6

□6:16 «Qünki «Omrining bǝlgilimiliri»ni, «Aⱨabning jǝmǝtidikilǝr ⱪilƣanliri»ni tutisǝn» — Omri Israilning intayin rǝzil padixaⱨi bolup, nurƣunliƣan butlarni yasap, Israilni bularƣa qoⱪunuxⱪa buyruƣan. Aⱨab uningdin tehimu rǝzillikkǝ ɵtüp, butpǝrǝslikkǝ paⱨixiwazliⱪ, «insan ⱪurbanliⱪi», puⱪralarni bulang-talang ⱪilix wǝ ⱪatilliⱪni ⱪoxⱪanidi. («1Pad.» 16-22-bablarni kɵrüng). «Sǝndǝ turuwatⱪanlarning ⱨǝmmisi isⱪirtix obyekti ⱪilimǝn» — muxu yǝrdǝ «isⱪirtix» mazaⱪ ⱪilixni bildüridu.

■6:16 1Pad. 16:25, 26, 30-34