8
Da Prieses Bring Da Box Inside Da Temple
Fo No Foget God Deal
Fo No Foget God Deal
1 ✡ 8:1: 2Sam 6:12-16; 1Rec 15:25-29Den King Solomon tell da older leada guys fo da Israel peopo, da main guys fo da twelve big ohanas, an all da ohana leadas fo da Israel peopo, fo come togedda by him, Jerusalem town. All dese guys come by Solomon fo help bring da Box Fo No Foget Da Deal Wit Da One In Charge, from da part dey call King David Town, dass Zion, fo put um inside da Temple. 2 ✡ 8:2: Pries 23:34Dat time, all da Israel peopo stay togedda by King Solomon, cuz dat was da spesho religious kine ceremony wen erybody live one week inside shacks, da las week in Setemba. 3 Wen all da leada guys fo da Israel peopo come David Town, da pries guys go pick up da Box.
4 Den da Levi ohana guys an da prieses bring up da Box Fo No Foget Da Deal Wit Da One In Charge, an da Tent Fo Come Togedda Wit God, an all da pots an tings dat spesho fo God fo use inside da Tent. 5 King Solomon an all da odda Israel peopo dat wen come by him, dey all go wit him in front da Box. Da pries guys stay carry da Box, an da peopo make real plenny sacrifices. No can even count how plenny sheeps an goats an cows dey wen kill in front da Box!
6 Den da pries guys bring da Box Fo No Foget Da Deal Wit Da One In Charge inside da place Solomon wen build fo um. Dey put um inside da mos inside room, way inside da Temple. Dey set um up inside da Place Dat Stay Real, Real Spesho Fo God, undaneat da wings a da awesome angel watcha guy statues. 7 Da angel kine statues get wings dat go ova da place fo da Box, jalike da awesome angel watcha guys make one cova ova da Box an da poles dey use fo carry um. 8 Da poles, real long, an if you stan inside da main room fo da Temple, right in front da Place Dat Stay Spesho Fo God, you can see da end a da poles from dea. But if you outside da Temple, you no can see da poles. An da poles stay dea still yet today. 9 ✡ 8:9: Rules2 10:5Inside da box, ony had da two flat stone dat Moses wen put inside dea wen da Israel peopo stay Mount Sinai afta dey come outa da Egypt land, wen Da One In Charge make da deal wit da Israel peopo.
10 ✡ 8:10: Outa 40:34-35Den, wen da pries guys come outa da Place Dat Stay Spesho Fo God, da cloud from God fill up da whole Temple Fo Da One In Charge. 11 Da pries guys no can do dea pries kine work notting, cuz dey no can stan in front da cloud dat fill up da Temple Fo Da One In Charge, dat show how awesome Da One In Charge stay.
Solomon Aks God Fo Do
Good Tings Fo Da Peopo
Good Tings Fo Da Peopo
12 ✡ 8:12: Songs 18:11; 97:2Den Solomon tell:
“You Da One In Charge!
You wen tell us awready,
Dat you stay live inside one real dark place.
13 But now, I wen build
Dis awesome Temple fo you,
You can live inside dea, foeva!”
14 Wen all da Israel peopo stay stan dea togedda in front him, King Solomon turn aroun fo face dem. Den he tell God fo do good kine tings fo all da Israel peopo. 15 He tell da peopo: “You know Da One In Charge, da God fo us Israel peopo! We like tell, he do good tings fo us! God wen make one promise to my faddah David befo time. An now, God use his powa fo do da ting he wen promise fo do. 16 ✡ 8:16: 2Sam 7:4-11; 1Rec 17:3-10God wen tell my faddah David dis: ‘From befo time, wen I bring my Israel peopo outa Egypt to dis land, I neva pick one town from da Israel ohana lands fo make my Temple. But now, I wen pick dis place fo my Temple, so erybody goin know wat kine god me an wea I stay. An I wen pick you, David, fo stay in charge a my peopo, da Israel peopo.’
17 ✡ 8:17: 2Sam 7:1-3; 1Rec 17:1-2“From befo time, my faddah David wen like build one temple fo Da One In Charge, fo erybody know wat kine god him, da God fo da Israel peopo. 18 Da One In Charge tell my faddah David, ‘Az real good, wat you wen do, wen you wen tink fo build dat temple fo erybody know who me! 19 ✡ 8:19: 2Sam 7:12-13; 1Rec 17:11-12But, you know wat? You not da one goin build dat Temple. Yoa boy, yoa blood an bones, goin build da temple fo show how I stay.’
20 “An now, Da One In Charge do wat he wen make one promise fo do. Now az my kuleana fo be da king afta my faddah David. I stay sit on top da throne fo da Israel peopo, jalike Da One In Charge wen promise. An I wen build dis Temple, fo erybody know wat kine god Da One In Charge, da God fo da Israel peopo. 21 Inside dea, I wen make one spesho place fo put Da Box Fo No Foget Da Deal Wit Da One In Charge, da same deal Da One In Charge wen make wit oua ancesta guys, da time he bring um outa da Egypt land.”
22 Den Solomon face da front a da altar wea dey make sacrifice fo Da One In Charge. All da Israel peopo dat wen come ova dea stan behind him. Solomon put up his hands to da sky fo pray. 23 He tell God dis:
“Eh! You Da One In Charge! You da God fo us Israel peopo!
No mo anodda god dat stay like you.
Not inside da sky up dea,
Not on top da earth down hea.
You do jalike you wen make one deal wit oua peopo fo do.
You stay tight wit us guys dat stay work fo you,
An dat stay live in front you wit one good heart.
24 You do jalike you wen make one promise fo do,
Fo yoa worka guy, my faddah David.
You wen tell David dat,
An cuz you strong, you do um all awready.
Dass how stay today.
25 ✡ 8:25: 1Kings 2:4An cuz you Da One In Charge, da God fo da Israel peopo,
An cuz you wen make dat kine promise,
I like you fo do bumbye
Jalike you wen make one promise fo do to my faddah David.
You wen tell David,
‘I like yoa kids watch out how dey ack in front me
Da same way you, David, wen live in front me.
If dey do all dat,
Den da kings from yoa blood line
Goin get da right fo sit in front me
On top da throne fo da Israel peopo foeva.’
26 So, you da God fo da Israel peopo,
An I like fo da ting you wen tell you goin do
Happen fo real.
Dass wat you wen make one promise fo do
To my faddah David,
Dat wen work plenny fo you.
27 ✡ 8:27: 2Rec 2:6“But you know wat, God?
How you goin make house
Hea on top da earth, aah?! No can!
You, mo big den da mos high part a da sky!
Fo shua, no way you can live down hea
Inside dis Temple dat I wen build!
28 I yoa worka guy.
You Da One In Charge,
Lissen dis prayer I stay make to you.
Da One In Charge, you da God fo me.
I call out to you fo help me.
Lissen how I stay pray in front you today!
29 ✡ 8:29: Rules2 12:11I like fo you stay watch dis Temple
Day time an nite time.
Dis da place, you wen tell,
‘Dass wea peopo goin know
Wat kine god me.’
Az why I like fo you hear wen I pray to you,
Looking at dis Temple.
30 I yoa worka guy,
An I beg you fo lissen,
Me an all yoa Israel peopo stay pray togedda
Facing dis Temple.
From da sky,
Lissen to us,
An hemo oua shame fo da bad tings us guys wen do!
31 “Bumbye, jalike wen somebody do
Someting bad to some odda guy.
An da judge goin tell,
Dat da firs guy gotta come
In front yoa altar, hea inside dis Temple,
An swea to you, God, fo show proof
Dat he neva do notting wrong.
32 Den I like you lissen from da sky
An judge wat da guy dat swea to you tell,
An wat da odda guy tell.
Fo da one dat wen do someting bad,
Make da bad ting he wen do
Come back an hurt him.
An fo da one dat do da right ting,
Show um dat he get um right wit you,
Cuz wat he do, az wass right.
33 “An bumbye, yoa Israel peopo
Goin go do bad kine stuff
An go agains you.
Cuz a dat, da peopo dat stay agains dem
Goin fight um an win.
But wen yoa peopo turn aroun
An come back to you,
An tell dat dey yoa peopo fo real kine,
An dey come dis Temple fo pray to you
An beg you fo help dem,
34 Den I like you lissen from da sky,
An let go yoa Israel peopo
Fo da bad tings dey wen do,
An hemo dea shame!
Bring um back one mo time
To da land you wen give to dea ancesta guys.
35 “Bumbye, wen yoa peopo do bad kine stuff
An go agains you,
You goin shut da sky
An no let rain come down.
But wen dey tink bout dis place
An look dis way an pray,
An tell dat dey yoa peopo fo real kine,
Den dey goin turn aroun
An no do bad kine stuff
Cuz you punish um awready.
36 Den I like you lissen from da sky,
An let go yoa Israel peopo
Fo da bad tings dey wen do,
An hemo dea shame!
Teach dem da right way fo live,
An let da rain come down on top da land,
Dat you wen give yoa peopo fo come dea land.
37 “Bumbye, no goin get food inside da land,
O get real bad kine sick,
O da plants come sick,
O da mold make da food pilau,
O da grasshoppa an da caterpilla
Eat up all da food
Befo da peopo can harves um,
O da peopo dat stay agains yoa peopo
Sen dea army guys agains yoa towns,
O get odda kine sick.
38 But anybody dat pray to you,
O beg you fo help dem
From all da Israel peopo in da land,
An all da ones dat stay pray
Know dey stay sad inside,
An dey put up dea hands
An look dis way wea dis Temple stay,
39 Den I like you lissen from da sky wea you stay,
An let um go from da bad tings dey wen do,
An hemo dea shame,
An help um!
Ony you know how all dem stay inside,
So help all dem, da way dey need help!
40 So do wateva you gotta do,
Fo make dem feel jalike dey sked
Weneva dey come in front you.
Do dis fo dem,
An fo all da ones dat goin come from dem.
Do um fo all da time dey goin stay inside dis land
Dat you wen give to oua ancesta guys!
41 “An bumbye, goin get peopo from odda places,
Dat not Israel kine peopo.
Dey goin come from odda lands far from hea,
Cuz dey like know wat kine god you.
42 Cuz dey goin hear bout da big name you get,
An how strong you stay,
An da awesome kine tings you do.
So, wen peopo from anodda place
Come fo look dis Temple an pray dea,
43 Den lissen from inside da sky wea you stay,
An go do someting fo da guys from anodda place
Dat aks you fo help um.
Wen you do dat,
All da diffren peopos all ova da world
Goin know wat kine god you.
Den dey goin feel jalike dey sked
Wen dey come in front you,
Same ting jalike yoa Israel peopo feel.
An dey goin know
Dat dis Temple I wen build,
Get yoa name.
44 “Bumbye, yoa peopo goin go anodda place
Cuz dey gotta fight wit da peopo dat stay agains dem.
You goin sen um wea dey gotta go fo fight,
An dey goin do um jalike you tell um fo do.
Den dey goin face dis town Jerusalem you wen pick
An da Temple I wen build
Fo show wat kine god you.
From dea, dey goin pray to you, Da One In Charge,
45 Den I like you lissen from da sky
Wen dey pray an beg you fo help dem,
An I like you make shua dey stay do da right ting,
An help dem fo do um.
46 “Bumbye, dis peopo
Goin go do bad kine stuff
An go agains you.
Cuz no mo nobody
Dat no do bad kine stuff!
Den you goin come huhu wit dem,
An let da peopo dat stay agains dem
Take da peopo
An make dem prisonas
An take um away to dea land,
O maybe nea yoa land, o maybe far away.
47 But den, yoa peopo goin turn aroun
An start fo tink strait,
Ova dea inside da land
Wea dey stay prisonas.
Dey goin change dea mind
An beg you fo give um chance,
Ova dea inside da land
Fo da peopo dat make um prisonas.
Dey goin tell you,
‘Us guys wen do bad kine tings
An do wrong.
Us get da blame fo da bad tings we do!’
48 Ova dea inside dat land
Wea da peopo dat make dem prisonas
Stay agains my peopo,
If my peopo change how dey tink an how dey feel inside,
An dey pray to you from ova dea,
Facing dis land
Dat you wen give to dea ancesta guys,
An dis big town you wen pick,
An dis Temple dat I wen build
Fo show wat kine god you,
49 Den lissen dem
From inside da sky, wea you live.
Lissen how dey pray to you,
An da tings dey beg you fo do,
An do da right ting fo dem.
50 Let go all yoa peopo
Dat wen do bad kine stuff agains you,
An dat wen go agains you.
Da peopo dat wen make yoa peopo prisonas,
Make dem show pity,
An give yoa peopo chance.
51 Cuz dis peopo,
Dey da ones you wen take
Fo be yoa peopo foeva.
You wen bring um outa Egypt,
Da time dey feel
Jalike dey stay inside one hot place,
Hot enuff fo melt da iron ova dea.
52 “So den, no foget us guys!
Me, I jalike yoa slave guy,
An dis Israel peopo, dey yoa peopo too,
An me an all yoa peopo stay beg you
Fo lissen,
Erytime dey call you fo help dem.
53 Cuz you da one wen pick dem
Fo make um come yoa peopo,
Diffren den all da odda peopos
All ova da world.
Dass wat you wen tell yoa worka guy Moses fo tell dem,
Da time you wen get oua ancesta guys outa Egypt
An bring um ova hea.
You Da One In Charge! You da Boss fo me!”
Solomon Give Da Temple To God
54 Dass how Solomon pray to Da One In Charge, on his knees, an putting up his hands to da sky an aks um fo help, an looking at da altar fo make one sacrifice to Da One In Charge. 55 Afta he pau pray, he stan up an tell all da Israel peopo dat come togedda dea da spesho kine tings God like do fo dem. He talk real loud, lidis:
56 ✡ 8:56: Rules2 12:10; Josh 21:44-45“Az good us guys tell,
Da One In Charge do good tings fo us.
All us Israel guys, us his peopo,
An us can res now,
Jalike he wen make one promise befo time.
Da One In Charge wen make dat good promise
To his worka guy Moses,
An Moses wen tell us we can res too.
An eryting Da One In Charge tell he goin do,
He do um.
Not even one word come poho.
57 We like oua God, Da One In Charge,
Stay wit us guys,
Jalike he wen stay befo time
Wit oua ancesta guys.
We no like he no do notting fo us
O leave us.
58 Mo betta God change how us guys tink,
Fo us go all out fo do how he like,
An live da way he tell us erytime,
An do da tings he tell us gotta do,
An keep his rules,
An do wat he tell cuz he da judge,
Jalike he wen tell oua ancesta guys fo do.
59 I wen beg Da One In Charge
Fo give us guys chance.
Now, I like fo oua God, Da One In Charge,
Rememba da tings I wen pray,
Day time an nite time.
Erytime get problem,
I like Da One In Charge do wass right
Fo me his worka guy,
An fo all his peopo, da Israel peopo,
Wateva dey need, ery day.
60 Cuz a dat, all da diffren peopos all ova da world
Goin know dat Da One In Charge, he da God dass fo real,
An no mo anodda god jalike him.
61 An you guys, I like you go all out
Fo do eryting fo oua God, Da One In Charge.
Live da way he tell you fo live,
Do eryting he tell you gotta do,
Jalike you stay do today.”
Solomon Make Da Temple Spesho Fo God
62 Den da King an all da Israel peopo togedda wen make plenny sacrifice in front Da One In Charge. 63 Fo show dat eryting stay good wit him an Da One In Charge, Solomon an da pries guys kill 22,000 cows an 120,000 sheeps an goats fo make da sacrifice.
An dass how da King an all da Israel peopo start fo use da Temple Fo Da One In Charge. 64 Dat same day, da King make da middo part a da open lanai in front da Temple Fo Da One In Charge, spesho fo God. Az wea da King make da burn up kine sacrifices, an da wheat flour kine sacrifices, an he burn da fat pieces from da sacrifices fo show dat eryting stay good wit him an Da One In Charge. He do all dat outside in da open lanai, cuz da big bronze metal altar dat sit in front da Temple Fo Da One In Charge, too small fo do dat. Da altar no can hold all da burn up kine sacrifice, an da wheat flour kine sacrifice, an da fat pieces from da sacrifices dat he make fo show dat eryting stay good wit him an Da One In Charge.
65 Dass how, dat time, Solomon wen make da spesho religious kine ceremony. All da Israel peopo wen come dea togedda fo be wit Solomon, from Lebo-Hamat north side to da Egypt Borda Stream. Dey stay togedda in front oua God, Da One In Charge, seven days, den anodda seven mo days, az fourteen days in all. 66 Da day afta dey pau, Solomon tell da peopo fo go home. Dey tell da king “We like God do good tings fo you!” Den dey go back home. Dey feel real good inside, an dey dance an sing, cuz a all da good tings dat Da One In Charge wen do fo his worka guy King David, an fo his peopo, da Israel peopo.
✡8:1 8:1: 2Sam 6:12-16; 1Rec 15:25-29
✡8:2 8:2: Pries 23:34
✡8:9 8:9: Rules2 10:5
✡8:10 8:10: Outa 40:34-35
✡8:12 8:12: Songs 18:11; 97:2
✡8:16 8:16: 2Sam 7:4-11; 1Rec 17:3-10
✡8:17 8:17: 2Sam 7:1-3; 1Rec 17:1-2
✡8:19 8:19: 2Sam 7:12-13; 1Rec 17:11-12
✡8:25 8:25: 1Kings 2:4
✡8:29 8:29: Rules2 12:11
✡8:56 8:56: Rules2 12:10; Josh 21:44-45