1 Eme Jesu e hae mâreŋ i beherâ haefuŋ‐ticnao rame motecfâcne bâjâpembiŋ. 2 Ra juhame sabata hombaŋ maickeme mitificko ferâ miti jazawec. Eme ŋic bocjaha miti manahuc ŋembiŋ jaŋe wareckehuc ʒiŋuc mumbiŋ: “Wiac keci wenirec fuacnewec? Mamana sâko i mozi qazucnewec? Erâ wâc mâsi bapa sâko‐ticne i mo iŋucne! Joh 7:15 3 E ficbapa ŋic i, Mariare ŋokâ, â Jakobo â Jose â Juda â Simoŋ hahac‐jeŋic hâcne, erâ seŋfâc‐ticne ŋondeŋ‐nâŋecko jueŋgopieŋ wâc.” Iŋuc murâ quŋkecnehuc mana pitiwambiŋ. 4 Eme Jesuzi ʒiŋuc jazawec: “Porofete moc e ʒâŋe biŋe‐ticne hae mâreŋ gâcnao haŋ bahame haefâcne â soctofafâcne â fuŋfuŋfâcne jaŋe ine qikiŋneeŋgopieŋ.” 5 Iŋuc jumbiŋte jaŋerao mâsi baocte quŋkewec. E mâc ŋic huchec moc moc sawa mezi bâuac‐jopahuc ɋiɋicne bacjopawec. Mar 6:13 6 Ehuc maŋjeŋic boc sakarembiŋte secke‐jarewec. Eme hae râreckerâ ŋerawec ira ra juhuc miti jaza qazuc ewec.

7 Eku motecfâcne 12 hefârec‐joparâ jajahec jajahec sasawa miti muniŋte fuŋkerâ sorec‐jopawec. Ehuc demoŋ jâpe‐jareniŋte tâpiri râe‐jarerâ ʒiŋuc jazawec. Luk 10:1 8 “Ŋoŋe wiac moc mi baranʒepieŋ, gunu sawa, nânâ aricne, he aricne, moneŋ aricne. 9 Kikehuhu ine rojunʒepieŋ, erâ ŋaqi maŋne sahacne misac, mocjaha hepie huzejec.” 10 Iŋuc murâ ʒiŋuc jazawec: “Hae mocko fisirâ fic feniŋmu ijaha ŋec foc eku waha ranʒepieŋ. 11 Hae moc ira fisipie âgo mi eŋarehuc dâŋŋeŋic qikiŋnepie râpec‐joparâ kike‐ŋeŋickonec gâc wândoc‐jeŋic âteickepie wahame jaŋe fuŋne‐jeŋic mananʒepieŋ.” 12 Iŋuc mume jaŋe rarâ ŋic maŋjeŋic bârisieniŋte miti jazambiŋ. 13 Ehuc demoŋ bocjaha jâpe‐jarembiŋ â huchec bocjaha wâc wokemaŋ rua‐jarehuc ɋiɋicne bacjopambiŋ. Jak 5:14, 15

14 Jesure biŋedâŋ haŋ baraku ŋicwofuŋ Heroderao fisime manawec. Manarâ muwec, “Johane Miti Opâ fufuŋke e hâmockonec ɋâreweczi tâpiri sâkohec jukac hâcne.” Luk 3:19, 20 15 Ŋic gâcne jaŋe ine Jesure ʒiŋuc mumbiŋ: “E Elia.” Gâcnezi mumbiŋ. “E porofete moc, porofete mimiŋne jaŋe iŋucne.” 16 Herodezi ine manarâ muwec, “Aricne, Johane upene qâtâcnepo e hâcne ɋârewec jukac.”

17 Herode e mârâcko momori ejareme Johane rorâ kâpâcwâru bambiŋ. Qanaŋ juwicnao Herodezi ɋaticne Filipo ere ŋonâŋ ʒâŋene Herodia jâoc rowec, ŋokac ere erâ Johane iŋuc ecnewec. 18 Ine Johanezi Herode ʒiŋuc âzâcnewecte: “Go ɋagere ŋonâŋ bameŋ i sâcmutâc qaqa ekac.” Tah 18:16 19 Iŋuc mume Herodia e Johane aaric manacnehuc qaocte maŋne kâcɋene domawec, erâ ine hata basawec. 20 Herode eki ine Johanere ŋic tiŋne â mitihec muhuc araŋ bacnehuc ŋezickewec. Â micticnaonec dâŋ manarâ maŋgu qâŋguru ewec. Erâ sifu dâŋticne mana aŋac ewec. 21 Eme juku wiac kecʒiŋuc fuawec: Herode e fufua dameŋ‐ticne maickeme kia sâkofâcne â momori soŋaŋ kâcɋene â Galilaia mâreŋkonec ŋic fekicne hetumaŋ‐jopa‐fârerâ tiwâ ʒepec ejarewec. 22 Eme jaŋe tumaŋnerâ ŋehapie Herodia otâ‐ticne jaŋerao ferâ mai‐jeŋicko gae wowec. Gae wome Herode â ŋicfâc‐ticne jaŋe honerâ aŋac‐jopawec. Eme Herodezi naru ʒiŋuc âzâcnewec: “Go wiac irec me irec egareme mutec garepemu.” 23 Murâ Femicnere maio musanaŋkerâ muwec, “Wiac kosare mutec garepemu â mâreŋ‐nanere mutec i wâc bâtâc barâ ŋifecne qikiŋne‐garepemu.” Esi 5:3–6 24 Eme naru e rarâ neŋgoc‐ticne wiocnerâ muwec, “No wemo wiacte mupe?” Mume eki âzâcnewec, “Johane Miti Opâ fufuŋke qizec‐ticnere muc.” 25 Eme naru e biac gasackerâ ŋicwofuŋtao rarâ muwec, “Go Johane Miti Opâ fufuŋke ere qizec ʒiŋuczia râqâcko râerâ narec.” 26 Mume ŋicwofuŋ e bune bocjaha sâqorewec. Erâ Femicnere maio mupaŋkewecte â ŋic ŋembiŋ jaŋerao dâŋticne wahazacte manacnewec. 27 Ehuc biac jaha momori moc ra Johane qizec‐ticne bareocte sorewec. Eme eki kâpâcwâru ficko rarâ Johane upene qâtâcnerâ 28 qizecne râqâcko râeme hume bafisi naru râcnewec. Râcneme naruzi neŋgoc‐ticnerao barawec. 29 Eme Johane motecfâcne biŋe manarâ ra qâŋɋâŋ‐ticne rorâ duckembiŋ.

30 Aposolo jaŋe hae mâreŋ jufârerâ risierâ Jesurao tumaŋnehuc wiac embiŋ bambiŋ â miti mumbiŋ irec binaŋ sasawa bacnembiŋ. Luk 9:10; 10:17 31 Bacne‐fârepie ʒiŋuc jazawec: “Warepie tuhuo ranaŋ, ira piticne juhuc âke mâteŋ‐ŋopaoc.” Ŋic wemo afecne ʒuʒuhuczi ʒuʒuhuc fisihuc ra, fisihuc ra, iŋuc ehuc domapie wemocko ŋemanahuc nânâ opâ nanʒapiŋ. 32 Eme jaŋe bucjeŋic wokeo ferâ tuhuo rambiŋ. 33 Rahapie bocjahazi hone tarac‐joparâ haene haene qaja fuserâ tiŋko biac gasackerâ bâbâni ra fisimbiŋ.

34 Eme Jesuzi wokeonec waharâ ŋic ŋokac guru sâko honec‐joparâ, lama soŋaŋ tâmiric tinac jumbiŋte busâqoc mana‐jarewec. Iŋuc honec‐joparâ izia fuŋkerâ mitire dâŋ bocjaha jazawec. Ʒar 27:17; Eʒek 34:5; Mat 9:36 35 Ehame qâqâtâc âkesue rame honerâ motecfâcne jaŋe erao rarâ mumbiŋ, “Ʒi tuhuo juhapene qâqâtâc biac âkesue rakacte Mar 8:1–9 36 ŋic râec‐jopatec hae ŋerakac ira rarâ nânâ furine ba nâc enʒepieŋ.” 37 Mupie ʒiŋuc jazawec: “Ŋoŋe ŋaŋac moc gumec‐jopaniŋ me.” Jazame mumbiŋ, “Nâŋe rarâ 20 kina nânâ furine barâ ware gumec‐jopanaŋte mukomec me?” 38 Eme eki jazawec, “Ŋaŋacne nânâ wezimuc fokac, ra honeniŋ.” Mume jaŋe ra honerâ âzâcnembiŋ, “Poroŋ memoc â opâ qowi jajahec.” 39 Eme mume ŋic jaŋe birickerâ kecɋaŋko hatane hatane ŋerambiŋ. 40 Biri moc 100, biri moc 50 iŋuc ŋerambiŋ. 41 Ŋefârepie poroŋ memoc â opâ qowi jajahec rorâ sambâŋko fime feha jambuŋkerâ bazurâ motecfâcne jareme jaŋe bârâwiŋnerâ ŋic jarembiŋ. Eme qowi bâtâc barâ jareme rorâ iŋuc jaha embiŋ. Mar 7:34 42 Eme jaŋe mâmâc sasawa nâ gapec embiŋ. 43 Ehame poroŋ â qowi tiwâne ŋerawec i ropie hurâ sasac 12 fusewec. Sâc 28:5 44 Nânâ nâmbiŋ ŋic i jaŋe 5 tauseŋ.

45 Eme izia Jesuzi motecfâcne esoc‐jopame wokeo ferâ ocniŋucpec Besaida haeopec bânierâ rambiŋ, e jahacne ine ŋic ŋokac râec‐jopaocte ŋewec. 46 Ehuc mâzoc‐joparâ nunumu gie baocte tikio fewec. 47 Eme hae ŋafeme woke riqic ʒâʒâŋiŋko ra fisihame e gâmbuŋ‐ticne tiŋko juwec. 48 Eme mâŋâŋ rambiŋkonec warewecte woke foicke‐bipiepie honec‐joparâ ŋafe furec hehec‐jekicko riqic âte âte raku jaŋerao fisirâ jowaruzo ewec. 49 Eme jaŋe riqic faio rame honerâ bawe warekac muhuc owackembiŋ. 50 Jaŋe mâmâc sasawa honerâ hâbi‐jeŋic goroŋkewec. Iŋuc epie dâŋ bacjopahuc jazawec, “Buŋeŋic mâteŋkeoc, no nahac fâkopac, mi hâwic‐ŋopaoc.” 51 Iŋuc murâ woke‐jeŋicko feme mâŋâŋ niniŋkewec. Eme jaŋe maŋjeŋic omaeme niniŋkerâ ŋembiŋ. Mar 4:39 52 Ine nânâ gumec‐jopawec irec fuŋne kâuc bambiŋzi maŋbâzic jaha jumbiŋ.

53 Riqic fotâcne‐fârerâ Genesarete mâreŋko fisirâ aŋga behepie huwec. 54 Eme wokeonec wahapie izia ŋic ŋokac jaŋe Jesu ʒâŋitarâ 55 hae sâc gasacke rarâ huchec kanʒeo râec‐joparâ ira me ira juwecko manarâ bacjopa fisimbiŋ. 56 Eme hae kâcɋene me piticne me fic boze fotâcnezo eme huchec bâfuac‐joparâ tomao râec‐joparâ âzâcnepie maname ŋaqi‐ticne qaŋeŋne bâuambiŋ. Eme bâuambiŋ sâc biaŋ‐jopa‐fârewec. Mar 5:27, 28; Apo 5:15; 19:11, 12