1 Kamo mae koa rau sa zinama te Zihova: 2 “Tuna na tie, boka pitu ia goi sa popoa Zerusalema? Boka pitu ia goi sa vasileana lavata sapu va zoloro ehara hie? Beto mamu tozi nia pa kenuna sari doduru nana tinavete variva malederedi, 3 mamu zama guahe: ‘Hiera gua si zama nia e Zihova sa Baṉara: Kei, agoi na vasileana lavata sapu va kamo pule nigo tinasuna koari na vina mate tie pa vari korapamu meke va boni pule nigo koari na vinahesi beku, 4 agoi si ele zutu pule nigo koari na tie sapu va mate i goi, meke va boni pule nigo koari na beku sapu taveti goi. La agoi meke va tata mae ia sa mua rane vinakilasa, meke sa vina betodi ri mua vuaheni si kamo mo. Gua ke kote la Arau meke tavete guni nigo na keke tiṉitoṉa variva hegere koari na butubutu meke na vina sisireana koari doduru popoa. 5 Sarini pu koa tata meke sari pu koa pa seu si kote hegehegere nigo. Agoi na vasileana lavata sapu ta gilana sa pozamu meke sari mua tinavete kaleana, agoi pu siṉi igo na kinaleana.

6 Doṉo la sari koburu tavia pa Izireli pu koa koa goi, sa dia ṉiniraṉira si tavetavete nia rini pude va mate tie. 7 Koa koa goi si arini meke lopu pamaṉani rini sari tamadia meke tinadia; koa goi si hikoi rini sari tie karovodi meke ta ṉoṉovala saripu loke tamadia meke sari naboko.*Ekd 20:12, 22:21-22; Diut 5:16, 24:17 8 Lopu pamaṉa ni goi sari Qua likakalae hopedi meke va boni goi sari Qua rane Sabati.*Liv 19:30, 26:2 9 Koa koa goi sari tie kokohadi sapu edi va mate tie; koa koa goi sarini pu hoke la henahena koa ri na hope pa toqere meke taveti sari hahanana variva malederedi. 10 Koa dia koa goi si arini pu puta turaṉi sari loadi ri tamadia; koa koa goi saripu puta turaṉi sari barikaleqe sapu dogoro sidaradi, totoso sapu lopu via si arini.*Liv 18:7-20 11 Koa koa goi saripu barati sari barikaleqe tadi na turaṉadia, meke sari tie sapu eko turaṉi sari barikaleqe tadi na tudia koreo, meke sari tie pu eko turaṉi sari tasidi vineki, sapu podo soti rina tamadia. 12 Koa koa goi saripu va tabei sari tinabara golomodi pude va mate tie; sari tie sapu poni lipulipu meke vagi va hola meke tagotago ni sari poata arini tadi turaṉadia. Na muliṉi Nau agoi si Arau, zama vura gua si Arau Zihova sa Baṉara.*Ekd 22:25, 23:8; Liv 25:36-37; Diut 16:19, 23:19

13 Hinokara kote pohara ni Arau sari Limaqu pa tinaṉaziri koari na vinagi poata lopu toṉotodi sapu taveti goi meke sari ehara sapu zoloro pa vari korapamia. 14 Vea, kote varane mua babe ṉiṉira sari limamu koasa rane sapu atu va tana igo Arau? Arau Zihova si ele zama meke na kote tavetia Rau. 15 Arau kote vari paqahani gamu la koari na butubutu meke va hurakatae lani gamu koari na popoa; meke kote va kokoi i Rau sari mia hahanana bonidi. 16 Pana kamo ta zama va gore si gamu koari na butubutu, si kote tumae nia gamu sapu Arau tugo se Zihova.’ ”

17 Meke kamo mae koa rau sa zinama te Zihova: 18 “Tuna na tie, sa butubutu Izireli si guana remoremo koa Rau; doduru arini si guana teni, ledi, meke na kopa pa nika lerana; guana bonina sa siliva si arini totoso ta via si asa pa nika lerana. 19 Gua ke hiera gua si zama nia Arau Zihova sa Baṉara: ‘Sina ta evaṉae na remoremo si gamu doduru, ke kote varigara lani gamu Arau pa Zerusalema. 20 Pa Qua binugoro meke tinaṉaziri si kote varigarani gamu Arau meke veko gamu pa korapana Zerusalema meke va katu ni gamu nika, gugua ari tie sapu varigara ni sari siliva, kopa, aeana, ledi, meke teni pa korapa nika lerana pude va kolo i. 21 Uve, pa Qua binugoro si kote varigara lani gamu Rau pa Zerusalema meke va katuni gamu nika meke va kolo gamu. 22 Kote tava kolo si gamu pa Zerusalema gugua na siliva sapu tava kolo pa nika lerana, pude mi tumae nia gamu sapu sa binugoro te Zihova si korapa va nonoga ia gamu.’ ”

23 Meke kamo pule mae koa rau sa zinama te Zihova: 24 “Tuna na tie, mu zama la ia sa pepeso, ‘Agoi sa pepeso sapu lopu hoqa igo na ruku babe vasi boboso koasa rane sapu bugoro si Arau.’ 25 Sari koburu tavia si tavete binalabala kalekaleadi pa korapana sa vasileana lavata, guana laione sapu kurumuna totoso teuru ia sa sa masa kurukuru; va mate tie si arini, vagi dia tinagotago meke likakalae arilaedi meke va soku i rini sari na nabonaboko pa popoa. 26 Sekei ri hiama sari Qua tinarae meke va boni rini sari Qua likakalae hopedi. Loke vinotikaena koa rini sapu hopena meke sapu hoborona. Vari totozi nia rini sapu loke vinotikaena sapu via meke sapu lopu via, meke tukui rini sari mata dia koasa kinopudi ri na rane Sabati, ke guana tozini rini sari na tie pude lopu pamaṉa Nau, guana lopu Hopequ si Rau, guana gua asa tavete guni Nau rini.*Liv 10:10 27 Sari palabatu vasileana si guana siki pinomo sapu teuru i sari masadi ri kurukuru. Va zoloro ehara si arini meke va mate tie pude tagotago dia. 28 Sari sinea hire si va paeri ri nana poropita koari dia dinogodogorae na vinakuvakutae kokohadi. Zama si arini, ‘Hiera gua si zama nia e Zihova sa Baṉara’ gua, totoso lopu hite zama gua si Arau Zihova. 29 Sari tiena sa popoa si ṉoṉovala meke hikohiko; naqoti rini sari tie malaṉa meke sapu loke gedi meke lopu va malumu ni tinoṉoto rini sari tie karovodi.

30 Doṉo hata ia Rau si keke tie koa rini sapu kote boka kuri pule ia sa goba meke boka turu pa Kenuqu meke toketoke ponia sa popoa pude Maqu lopu huara ia, gua ba lopu keke si dogoria Rau. 31 Ke kote zoropo vura la nia Rau sa Qua tinaṉaziri koa rini meke huara pani koasa Qua binugoro huruṉuna, va gore pule lani pa batu dia sari doduru pu taveti rini, zama vura gua si Arau Zihova sa Baṉara.”