Muqeddes Kalam (latin yéziq) Yeremiya 1

Yeremiya

Xudaning Yeremiyani chaqirishi

1 Binyamin qebilisi zéminidiki Anatot yézisida turuwatqan kahinlardin bolghan Hilqiyaning oghli Yeremiyaning sözliri töwende xatirilinidu: —

2 Yehuda padishahi, Amonning oghli Yosiyaning künliride, yeni u textke olturghan on üchinchi yilida Yeremiyagha Perwerdigarning sözi keldi; ◘ 3 Yehuda padishahi Yosiyaning oghli Yehoakimning künliride hemde Yehuda padishahi Yosiyaning oghli Zedekiyaning on birinchi yilining axirighiche, yeni shu yilning beshinchi éyida Yérusalémdikiler sürgün qilin’ghuche uninggha Perwerdigarning sözi yene kélip turdi. ◘

4 Perwerdigarning sözi manga kélip mundaⱪ dégǝndǝ: ◼

5 — Anangning qorsiqida séni apiride qilishtin ilgirila Men séni bilettim; sen baliyatqudin chiqishtin burun séni Özümge atap, ellerge peyghember bolushqa tiklidim. ◘

6 Men bolsam: — Apla, Perwerdigar! Men gep qilishni bilmeymen; chünki men gödek balidurmen, dédim. ◼ ◘

7 Lékin Perwerdigar manga: — Özüngni gödek bala, déme; chünki Men séni kimge ewetsem, sen shulargha barisen; we Men séni néme de dep buyrusam, sen shuni deysen. 8 Ulardin qorqma; chünki séni qutquzush üchün Men sen bilen billidurmen, — dédi. ◘

9 We Perwerdigar qolini sozup aghzimgha tegküzdi; Perwerdigar manga: Mana, Öz sözlirimni aghzinggha qoydum; ◘ 10 Qara, mushu küni Men séni yulush, söküsh, halak qilish we örüsh, qurush we térip östürüsh üchün eller we padishahliqlar üstige tiklidim, — dédi. ◘

Ikki alamet körünüsh

11 We Perwerdigarning sözi manga kélip mundaq dégende: «Yeremiya, némini körüwatisen?».

Men: «Badam derixining shéxini körüwatimen» — dédim.

12 Perwerdigar manga: «Körgining yaxshi boldi; chünki Men sözümning emeliylishishi üchün sözümni közitip turimen» — dédi. ◼

13 We Perwerdigarning sözi manga ikkinchi qétim kélip mundaq dégende: «Némini körüwatisen?».

Men: «Poruq-poruq qaynawatqan, aghzi shimal teripidin qiysayghan bir qazanni kördüm» — dédim.

14 Perwerdigar manga: — Külpet shimal tereptin kélip bu zéminda turuwatqanlarning hemmisi üstige bösüp kélidu — dédi. ◘

15 — Chünki mana, Men shimaliy padishahliqlarning barliq jemetlirini chaqirimen, — deydu Perwerdigar; — ular kélidu, padishahlar herbiri öz textini Yérusalém qowuqliri aldigha sélip, hemme sépillargha we Yehudaning barliq sheherlirige hujumgha teyyarlinidu; ◼ ◘ 16 shuning bilen Men Yehudadikilerning barliq rezillikliri üchün ularning üstidin hökümlerni jakarlaymen; chünki ular Mendin waz kéchip, bashqa ilahlargha xushbuy yéqip, öz qolliri yasighanlirigha choqundi.

17 Sen emdi bélingni baghlap ornungdin turup, sanga buyrughanlirimning hemmisini ulargha éyt; ular aldida hoduqup ketmigin; bolmisa Men séni ular aldida hoduqturimen. 18 Qara, Men bügün séni Yehudaning padishahlirigha, emirlirige, kahinlirigha hem pütkül zémin xelqige qarshi turghuchi mustehkem sheher, tömür tüwrük we mis sépillardek tiklidim. ◼ ◘ 19 Ular sanga qarshi jeng qilidu, lékin séning üstüngdin ghelibe qilalmaydu — Chünki Men séni qutquzush üchün sen bilen billidurmen, — deydu Perwerdigar.

◘1:2 2Pad. 21:26; 22:1-23; 2Tar. 34:1-30

◘1:3 2Pad. 23:34; 24:17; 25:8; 2Tar. 36:4, 10-23; Yer. 52:1-30

◼1:4 «Perwerdigarning sözi ... kélip ... dégǝndǝ» — ibraniy tilida: «Perwerdigarning sözi ... kélip ... dédi» déyilidu. Bu ibare yaki bundaq ibare Tewrat-Zeburda pat-pat körünüp, «Perwerdigarning söz-kalami»ning emeliyette «Üchte Bir»diki Ikkinchi Shexs ikenlikini körsitidu. «Yuⱨ,» 1:1-2ni körüng.

◘1:5 Gal. 1:15

◼1:6 «Men gep qilishni bilmeymen; chünki men gödek balidurmen» — ibraniy tilida: «bala» dégen bu söz 5-16 yashtiki balini körsitidu. Kitabning bashqa melumatlirigha qarighanda bizningche Xudaning sözi Yeremiyagha kelgende u belkim texminen on alte yashqa kirgenidi.

◘1:6 Mis. 3; 4; 6:11,29

◘1:8 Qan. 31:6, 8; Ye. 1:5; Ez. 3:9

◘1:9 Yesh. 6:6, 7; Yer. 5:14

◘1:10 Yer. 18:7; 2Kor. 10:4, 5

◼1:12 «Körgining yaxshi boldi; chünki Men sözümning emeliylishishi üchün sözümni közitip turimen» — badam derixi baharda birinchi bolup chécheklep, baharning kelgenlikini jakarlighuchi bolghachqa ibraniy tilida «közetchi» dep atilidu.

◘1:14 Yer. 4:6

◼1:15 «padishahlar herbiri öz textini Yérusalém qowuqliri aldigha sélip,..» — bashqa birxil terjimisi: «padishahlar herbiri öz textini Yérusalém qowuqlirigha sélip...»

◘1:15 Yer. 5:15; 6:22; 10:22; 52:4, 5

◼1:18 «Men ... séni... mustehkem sheher, tömür tüwrük we mis sépillardek tiklidim» — oqurmenler shuninggha diqqet qiliduki, Xudaning bu sözliri «ötken zamanda» éytilghan. Bir qarashqa, Yeremiya peqet gödek bir yash yigittek körünsimu, lékin iman-ishenchke nisbeten Xudaning sözi alliqachan ishen’güchilerge pakit bolghan. Iman-ishenchtiki adem ishlargha Xudaning közqarishi bilen qaraydu.

◘1:18 Yer. 6:27; 15:20