Muqeddes Kalam (latin yéziq) Ayup 14

Ölümdin kéyin qandaq bolidu?

1 Anidin tughulghanlarning künliri azdur,

Palaket uninggha yardur.■

2 U güldek dunyagha kélip andin tozuydu,

U quyash aldidin sayige oxshash qéchip kétidu.■

3 Biraq Sen téxi shundaq bir ajiz bolghuchigha közüngni tikip,

Méni Öz aldinggha soraqqa tartiwatamsen?□ ■

4 Kim napak nersilerdin pak nersini chiqiralaydu? — héchkim!□ ■

5 Insanning künliri békitilgendikin,

Uning aylirining sani Séning ilkingde bolghandikin,

Sen uning ötse bolmaydighan cheklirini békitkendikin,■

6 Uning bir’az dem élishi üchün uningdin közüngni élip qachqin,

Shuning bilen medikardek uninggha öz künliridin söyünüsh nésip bolsun!□ ■

7 Chünki derex késiwétilgendin kéyin, qayta ösüshtin ümid bar;

Buningliq bilen uning yumran bixliri tügep ketmeydu;

8 Uning yiltizi yerde qurup ketken bolsimu,

Uning kötiki topida ölüp ketken bolsimu,

9 Biraq suning puriqi bilenla u yene kökiridu,

Yumran ot-chöptek yéngi bixlarni chiqiridu.

10 Biraq adem bolsa ölidu, ilajsiz ongda yatidu, berheq,

Insan nepestin qalidu, andin nede bolidu?

11 Déngizdiki sular pargha aylinip tügep ketkendek,

Deryalar qaghjirap qurup ketkendek,

12 Oxshashla adem yétip qalsila qaytidin turmaydu;

Asmanlar yoqimighuche, ular oyghanmaydu, uyqudin turmaydu.

13 Ah, tehtisaragha méni yoshurup qoysang idi,

Gheziping ötüp ketküche méni mexpiy saqlap qoysang idi,

Méni ésingge alidighan bir waqit-saetni manga békitip berseng idi!□

14 Adem ölse, qayta yashamdu?

Shundaq bolsa manga shundaq özgirish waqti kelgüche,

Mushu japagha tolghan künlirim ötküche, sewr-taqet bilen kütettim!□

15 Shundaq bolsa Sen méni chaqirsang, jawab bérettim;

Sen Öz qolung bilen yaratqininggha ümid-arzuyung bolatti.□

16 Biraq Sen hazir herbir dessigen qedemlirimni sanap,

Gunahimni közitiwatisen’ghu!□ ■

17 Itaetsizlikim xaltigha sélinip péchetlendi,

Gunahlirimni döwe-döwe qilip saqlap qoydung.□

18 Derweqe taghmu yimirilip yoqalghandek,

Tash öz ornidin tewrinip ketkendek,

19 Sular tash-shéghillarni upritip yoqatqandek,

Topanlar zémindiki topini süpürüp ketkendek,

Sen ademning ümidini yoq qilisen.

20 Sen menggüge uning üstidin ghalib kélisen,

Shunga u dunyadin kétidu; uning chirayini tutuldurisen,

Uni Öz yéningdin yiraq qilisen.

21 Uning oghulliri hörmetke érishidu, biraq u buni bilmeydu;

Ular pes qilinsimu,

Biraq uning bulardinmu xewiri bolmaydu.

22 U peqet öz ténidiki aghriqidinla azablinidu,

U könglide özi üchünla hesret-nadamet chékidu. □

Ayup
<
14
>

■14:1 Zeb. 90:5-6, 9-10; 102:11; 103:15; 144:4; Yaq. 4:14

■14:2 Ayup 8:9; Zeb. 90:5-6, 9-10; 102:11; 103:15; 144:4; Yesh. 40:6; 1Pét. 1:24

□14:3 «Méni Öz aldinggha soraqqa tartiwatamsen?» — yaki «Uni Öz aldinggha soraqqa tartiwatamsen?».

■14:3 Ayup 7:17,18; 10:20

□14:4 «Kim napak nersilerdin pak nersini chiqiralaydu? — héchkim!» — démek, insan balisi Xudaning aldida qandaq qilip pak bolalaydu hem qobul qilinalaydu? Ayupning özi 19-babta bésharet qilip bu soalgha jawab béridu.

■14:4 Yar. 5:3; Zeb. 51:5-7; Yuh. 3:6; Rim. 5:12; Ef. 2:3

■14:5 Ayup 7:1

□14:6 «Uning bir’az dem élishi üchün ... medikardek uninggha öz künliridin söyünüsh nésip bolsun!» — Ayupning dégini boyiche insanlargha adettiki turmushning (medikarningkidek) japasi kupaye, shunga u bu japaliq hayat künliridin azraqqine huzur alsun, «bu adettiki japagha téximu köp japa artmighaysen» dégen menide.

■14:6 Ayup 7:1, 2, 16, 19; 10:20

□14:13 «tehtisara» — ölgenlerning rohliri baridighan jayni körsitidu. Yenila 7-bab, 9-ayettiki izahatni körüng.

□14:14 «Adem ölse, qayta yashamdu? Shundaq bolsa ... sewr-taqet bilen kütettim!» — Ayupning insanning ülümdin (yeni tehtisaradin) tirilishi toghrisida xewiri yoq. Biraq u bundaq ish bolsila, neqeder yaxshi bolatti, undaq ümid we sewr-taqet bilen Xudaning orunlashturushini («shundaq özgirish»ni) kütettim, deydu. Kéyin u özining tirilishi toghruluq bésharet béridu (19-babta).

□14:15 «Shundaq bolsa ... Sen Öz qolung bilen yaratqininggha ümid-arzuyung bolatti» — Ayup yenila Xudaning Özi tüjüpilep yaratqan hemme insan’gha bolghan ajayib ümid-arzusigha étiqad qilghanliqini bildüridu.

□14:16 «Biraq Sen hazir herbir dessigen qedemlirimni sanap...» — yaki «Chünki Sen hazir herbir dessigen qedemlirimni sanap...».

■14:16 Ayup 31:4; 34:21; Zeb. 56:8; 139:1-5; Pend. 5:21; Yer. 32:19

□14:17 «Itaetsizlikim xaltigha sélinip péchetlendi...» — bezi terjimanlar Ayupning mushu sözlirining menisini, Xuda Ayupning gunahlirini yapqaniken, dep qaraydu. Biz eksiche, Ayupning mushu sözining menisini Xuda uni téximu eyiblesh üchün gunahlirini döwe-döwe qilip péchetlep saqlap qoyghan, dep chüshinimiz.

□14:22 «U peqet öz ténidiki aghriqidinla azablinidu, ... hesret-nadamet chékidu» — Ayup mushu yerde insan görge chüshkendin kéyin öz ténining chirip ketkenlikini hés qilip qiynilidu, dep oylighan bolushi mumkin.