Muⱪeddes Kalam (yǝngi yeziⱪ) Kolossiliklǝrgǝ 4

1 Silǝr hojayinlar, ⱪulliliringlarƣa adil wǝ toƣra muamilǝ ⱪilinglar; qünki ǝrxtǝ ɵz hojayininglarning barliⱪini bilisilǝr.■

2 Dua-tilawǝtkǝ ⱨǝrⱪandaⱪ waⱪitta berilinglar, buningda rǝⱨmǝtlǝr eytixip ⱨoxyar turunglar;■ 3 xuning bilǝn biz üqünmu dua ⱪilƣaysilǝrki, Huda bizgǝ Mǝsiⱨning sirini jakarlax üqün Ɵz sɵzigǝ ixik aqsun; mǝn dǝl sir üqün zǝnjirlǝr bilǝn baƣlanƣanmǝn;■ 4 xunga ⱪilixⱪa tegixlikim boyiqǝ, sirni axkariliximƣa dua ⱪilinglar.

5 Sirttikilǝrgǝ nisbǝtǝn danaliⱪ bilǝn menginglar, pursǝtlǝr qiⱪⱪanda kɵngül ⱪoyup ⱪoldin bǝrmǝnglar.□ ■ 6 Silǝrning gǝp-sɵzliringlar ⱨǝrdaim meⱨir-xǝpⱪǝt bilǝn bolsun, tuz bilǝn tetitilsun; xuning bilǝn silǝr ⱨǝrbir adǝmgǝ ⱪandaⱪ jawab berixni bilisilǝr.□ ■

7 Sɵyümlük ⱪerindax ⱨǝm Rǝbdǝ sadiⱪ hizmǝtkar, ixdiximiz bolƣan Tikikus silǝrgǝ mǝn toƣruluⱪ ⱨǝmmǝ ixlarni mǝlum ⱪilidu.□ ■ 8 Mǝn uni dǝl muxu ix üqün yeninglarƣa ǝwǝtixim, silǝrning ǝⱨwalinglarni biliwelixi wǝ xundaⱪla kɵnglünglarƣa ilⱨam-riƣbǝt berixi üqündur. 9 Mǝn ɵzi silǝrdin bolƣan, sadiⱪ wǝ sɵyümlük ⱪerindiximiz Onesimusni uning bilǝn ǝwǝttim; ular silǝrgǝ muxu yǝrdiki barliⱪ ixlarni mǝlum ⱪilidu.■

10 Türmidixim bolƣan Aristarhus silǝrgǝ salam yollaydu; Barnabasning nǝwri inisi Markusmu xundaⱪ (silǝr uning toƣruluⱪ tapxuruⱪlarni tapxuruwaldinglar; u yeninglarƣa kǝlsǝ, uni ⱪobul ⱪilinglar); ■ 11 Yustus dǝp atalƣan Yǝxuamu salam yollaydu. Hudaning padixaⱨliⱪi üqün manga hizmǝtdax bolƣan sünnǝt ⱪilinƣanlardin pǝⱪǝt muxular bardur; ular manga tǝsǝlli bolƣan.□

12 Silǝrdin bolƣan, Mǝsiⱨ Əysaning ⱪuli Əpafras silǝrgǝ salam yollaydu; u silǝrning Hudaning pütkül iradisidǝ mukǝmmǝl, kamalǝtkǝ yetip qing turuxunglar üqün ⱨǝrdaim silǝr üqün dualarda kürǝx ⱪilidu. ■ 13 Qünki mǝn uningƣa guwaⱨqimǝnki, u silǝr üqün, Laodikiadikilǝr üqün wǝ Heyrapolistikilǝr üqünmu kɵp japa tartidu.□

14 Sɵyümlük tewip bolƣan Luⱪadin silǝrgǝ salam, Demastinmu xundaⱪ.■

15 Laodikiadiki ⱪerindaxlarƣa bizdin salam, Nimfaƣa ⱨǝm uning ɵyidǝ yiƣilidiƣan jamaǝtkimu salam eytinglar.□

16 Bu hǝt aranglarda oⱪulƣandin keyin, silǝr uni Laodikiyidiki jamaǝttimu oⱪutunglar, wǝ Laodikiyǝdikilǝrgǝ yazƣan hǝtni silǝrmu oⱪunglar; □ 17 wǝ Arkippusⱪa: «Sǝn Rǝbdǝ tapxuruwalƣan hizmitinggǝ, toluⱪ ǝmǝl ⱪilixing üqün kɵngül ⱪoyƣin» — dǝnglar.

18 Mǝnki Pawlustin ɵz ⱪolum bilǝn yazƣan salam. Mening kixǝnlinip ⱪamap ⱪoyulƣanliⱪimni ǝslǝnglar. Silǝrgǝ meⱨir-xǝpⱪǝt bolƣay!□ ■

■4:1 Əf. 6:9.

■4:2 Luⱪa 18:1; Rim. 12:12; Əf. 6:18; 1Tes. 5:17.

■4:3 Əf. 6:19; 2Tes. 3:1.

□4:5 «Sirttikilǝrgǝ nisbǝtǝn danaliⱪ bilǝn menginglar» — «sirttikilǝr» — Hudaning padixaⱨliⱪining sirtida turƣanlar, tehi etiⱪad ⱪilmiƣanlarni kɵrsitidu, ǝlwǝttǝ. «pursǝtlǝr qiⱪⱪanda kɵngül ⱪoyup ⱪoldin bǝrmǝnglar» — «pursǝtlǝr» bolsa «sirttikilǝr»gǝ yahxiliⱪ kɵrsitix, Hudaning sɵzini eytix, Mǝsiⱨgǝ guwaⱨliⱪ berix ⱪatarliⱪ pursǝtlǝr.

■4:5 Əf. 5:15, 16.

□4:6 «Silǝrning gǝp-sɵzliringlar ⱨǝrdaim meⱨir-xǝpⱪǝt bilǝn bolsun, tuz bilǝn tetitilsun; xuning bilǝn silǝr ⱨǝrbir adǝmgǝ ⱪandaⱪ jawab berixni bilisilǝr» — «tuz bilǝn tetitilsun» degǝn jekilǝx toƣruluⱪ «ⱪoxumqǝ sɵz»imizdǝ tohtilimiz.

■4:6 Mar. 9:50.

□4:7 «sɵyümlük ⱪerindax ⱨǝm Rǝbdǝ sadiⱪ hizmǝtkar, ixdiximiz bolƣan Tikikus» — «ixdax» grek tilida «(Hudaning) ⱪulluⱪidiki ixdax» degǝn uⱪumni bildüridu.

■4:7 Ros. 20:4; Əf. 6:21; 2Tim. 4:12.

■4:9 Flm. 10.

■4:10 Ros. 15:37; 27:2; 2Tim. 4:11.

□4:11 «Hudaning padixaⱨliⱪi üqün manga hizmǝtdax bolƣan sünnǝt ⱪilinƣanlardin pǝⱪǝt muxular bardur; ular manga tǝsǝlli bolƣan» — «sünnǝt ⱪilinƣanlar» — Yǝⱨudiylar. Demas wǝ Luⱪa (14-ayǝttǝ) «yat ǝllǝr»din idi.

■4:12 Kol. 1:7; Flm. 23.

□4:13 «...u silǝr üqün, Laodikiadikilǝr üqün wǝ Heyrapolistikilǝr üqünmu kɵp japa tartidu» — bu «japa tartix» bolsa dualirida. Tekisttiki baxⱪa bir kona kɵqürmidǝ: «.. uning silǝr üqün, Laodikiadikilǝr üqün wǝ Hirapolistikilǝr üqünmu kɵp ⱪizƣinliⱪi bardur» deyilidu.

■4:14 2Tim. 4:10,11

□4:15 «Nimfaƣa ⱨǝm uning ɵyidǝ yiƣilidiƣan jamaǝtkimu salam eytinglar» — Nimfa bir ayalning ismi idi. Tekisttiki bǝzi kona kɵqürmilǝrdǝ: «Nimfas» (ǝrning ismi) deyilidu.

□4:16 «Bu hǝt aranglarda oⱪulƣandin keyin, silǝr uni Laodikiyidiki jamaǝttimu oⱪutunglar, wǝ Laodikiyǝdikilǝrgǝ yazƣan hǝtni silǝrmu oⱪunglar» — mumkinqiliki barki, «Laodikiyǝdikilǝrgǝ yazƣan hǝt» ǝsli Pawlusning «Əfǝsusluⱪlarƣa» yazƣan hetidur. «Əfǝsusluⱪlarƣa»diki «kirix sɵz»imizni kɵrüng.

□4:18 «Mǝnki Pawlustin ɵz ⱪolum bilǝn yazƣan salam» — demǝk, hǝtning baxⱪa yǝrliri katipliⱪ ⱪilƣan ⱪerindixining ⱪolida yezilƣan. Pawlusning kɵzliri ajiz boluxi mumkin («2Kor.» 12:6-10, «Gal.» 4:15). «Mening kixǝnlinip ⱪamap ⱪoyulƣanliⱪimni ǝslǝnglar» — demǝk, dua-tilawǝtliringlarda ǝslǝnglar.

■4:18 2Tes. 3:17; Ibr. 13:3.