Muqeddes Kalam (latin yéziq) Ayup 5

Élifazning sözini dawamlashturushi

1 Qéni, iltija qilip baq, sanga jawab qilghuchi barmikin?

Muqeddeslerning qaysisidin panah tileysen?□

2 Chünki exmeqning achchiqi özini öltüridu,

Qehri nadanning jénigha zamin bolidu.□

3 Men öz közüm bilen exmeqning yiltiz tartqanliqini körgenmen;

Lékin shu haman uning makanini «Lenetke uchraydu!» dep bildim,□

4 Uning baliliri amanliqtin yiraqtur;

Ular sheher derwazisida sot qilin’ghanda basturuldi;

Ulargha héchkim himayichi bolmaydu.

5 Uning hosulini achlar yep tügitidu;

Ular hetta tiken arisida qalghanlirinimu élip tügitidu;

Qiltaqchimu uning mal-mülüklirini yutuwélishqa teyyar turidu.

6 Chünki awarichilik ezeldin topidin ünüp chiqmaydu,

Külpetmu yerdin ösüp chiqqanmu emes.

7 Biraq uchqun yuqirigha uchidighandek,

Insan külpet tartishqa tughulghandur.□

8 Ornungda men bolsam, Tengrighila murajiet qilattim,

Men ishimni Xudayimghila tapshuriwétettim.

9 U hésabsiz karametlerni,

San-sanaqsiz möjizilerni yaritidu.■

10 U yerge yamghur teqdim qilidu;

U dala üstige su ewetip béridu.■

11 U pes orunda turidighanlarning mertiwisini üstün qilidu;

Matem tutqanlar amanliqqa kötürülidu.■

12 U hiyligerlerning niyetlirini bikar qiliwétidu,

Netijide ular ishini püttürelmeydu.□ ■

13 U mekkarlarni öz hiyligerlikidin tuzaqqa alidu;

Egrilerning neyrengliri éqitip kétilidu.□ ■

14 Kündüzde ular qarangghuluqqa uchraydu;

Chüshte tün kéchidek silashturup mangidu.■

15 Biraq u miskinlerni mekkarlarning qilichi we aghzidin qutquzidu,

Ularni küchlüklerning changgilidin qudretlik qoli bilen qutquzidu.

16 Shunga, ajizlar üchün ümid tughulidu,

Qebihlik aghzini yumidu.■

17 Qara, Tengri ibret bergen adem bextliktur,

Shunga, Hemmige Qadirning terbiyisige sel qarima jumu!■

18 Chünki U ademni yarilanduridu, andin yarini tangidu;

U sanjiydu, biraq Uning qolliri yene saqaytidu.■

19 U séni alte qiyinchiliqtin qutquzidu;

Hetta yette külpette héchqandaq yamanliq sanga tegmeydu.□ ■

20 Acharchiliqta U séning ülümingge,

Urushta U sanga urulghan qilich zerbisige nijatkar bolidu.

21 Sen zeherlik tillarning zerbisidimu bashpanahliq ichige yoshurunisen,

Weyranchiliq kelgende uningdin héch qorqmaydighan bolisen.

22 Weyranchiliq we qehetchilik aldida külüpla qoyisen;

Yer yüzidiki haywanlardinmu héch qorqmaysen.

23 Sen daladiki tashlar bilen ehdidash bolisen;

Yawayi haywanlarmu sen bilen inaq ötidu.■

24 Sen chédiringning tinch-amanliqta bolidighanliqini bilip yétisen;

Mal-mülküngni éditliseng, hemme némengning tel ikenlikini bayqaysen.

25 Nesling köp bolidighanliqini,

Perzentliringning ot-chöptek köp ikenlikini bilisen.□

26 Sen öz waqtidila yétilip yighilghan bir bagh bughdaydek,

Peqet waqit-saiting piship yétilgendila yerlikingge kirisen.

27 Biz özimiz buni tekshürüp körgenmiz — ular heqiqeten shundaqtur.

Shunga özüng anglap bil, bularni özüngge tetbiqlap oylap baq».

Ayup
<
5
>

□5:1 «Muqeddesler» — mushu yerde belkim muqeddes perishtilerni körsitidu.

□5:2 «Qehri nadanning jénigha zamin bolidu» — yaki «Körmesliki nadanning jénigha zamin bolidu». Élifazning bu sözining menisi: Ayupning achchiqlinip, Xudagha qaqshishi xeterlik ish; Xuda uninggha jawab kelmigen yerde, Xuda we insanning ariliqida turidighan bir «kélishtürgüchi»dinmu yardem tilesh pütünley bihude ish, dégenlik bolushi mumkin.

□5:3 «Lékin shu haman uning makanini «lenetke uchraydu!» dep bildim» — bashqa birxil terjimisi: «Lékin men derhal uning makanigha lenet oqudum».

□5:7 «Insan külpet tartishqa tughulghandur» — yaki «Insan japa tartishqimu tughulghandur». Kirish sözimizde éytqinimizdek, oqurmenlerning éside bolsunki, Ayupning üch dostining bergen pikirliride xéli köp xataliq yerliri bar. Kéyin Xuda shu xata gepliri üchün ularni eyibleydu. 42:7-9ni körüng.

■5:9 Ayup 9:10; Zeb. 72:18; Rim. 11:33

■5:10 Zeb. 104:10

■5:11 1Sam. 2:7; Zeb. 113:7, 8

□5:12 «U hiyligerlerning niyetlirini bikar qiliwétidu, netijide ular ishini püttürelmeydu» — bu ayet Injilda («1Kor.» 1:19) rosul Pawlus teripidin neqil keltürülgen, shunga shübhisizki uni toghra dep bilimiz.

■5:12 Neh. 4:9; Zeb. 33:10; Yesh. 8:10

□5:13 «U mekkarlarni öz hiyligerlikidin tuzaqqa alidu» — Élifazning bu jümlisimu Injilda («1Kor.» 3:19) rosul Pawlus teripidin neqil keltürülgen, shunga shübhisizki unimu toghra dep bilimiz.

■5:13 1Kor. 3:19

■5:14 Qan. 28:29

■5:16 Zeb. 107:42

■5:17 Pend. 3:11, 12; Ibr. 12:5; Yaq. 1:12; Weh. 3:19

■5:18 Qan. 32:39; 1Sam. 2:6; Hosh. 6:1

□5:19 «... alte qiyinchiliq... yette külpette ... » — bu «alte... yette...» dégen ibare «herxil..., herqandaq...» dégenni bildüridu.

■5:19 Zeb. 91

■5:23 Hosh. 2:20

□5:25 «Nesling köp bolidighanliqini, perzentliringning ot-chöptek köp ikenlikini bilisen» — Élifaz Ayupning on balisidin hem barliq mal-mülkidin ayrilip qalghanliqini pütünley ésidin chiqirip qoyghandek qilatti.